Génesis 2
2
1Mãgá Tachi Akꞌõrepa ooji pajãde nɨ̃bɨ mãikꞌaapa na eujãde nɨ̃bɨ. 2Kꞌãima sietede Tachi Akꞌõrepa ichi mimia oo aupakꞌãri, ɨ̃iji.
3Ma ewate iru mimia jõma aupapꞌeda, ɨ̃ida perã, ma ewaridé jaraji:
—Pia bɨda aji.
Ma ewari awara bɨji tomia chaa eperãarã ɨ̃idamerã ichi ɨ̃idakꞌa. 4Mãga paji Tachi Akꞌõrepa na eujã, pajã ome ookꞌãri.
Tachi Akꞌõrepa naapema eperã ooda
5Tachi Akꞌõre Waibɨapa pajã, eujã ome ookꞌãri, ne–inaa kꞌarra, pꞌũajara paara waide tꞌonoda–e pꞌanajida, Tachi Akꞌõrepa kꞌoi waide chepi–e bada perã mãikꞌaapa eperãarã waide oo–e bada perã ma eujãde mimiadamerã. 6Mãgá Tachi Akꞌõrepa kꞌoi waide chepi–e baji mĩda, ma eujã ekꞌariipa pania uchiapachi. 7Maapai Tachi Akꞌõre Waibɨapa eperã yooro pꞌoradee ooji. Yooro pꞌoradee oopꞌeda, ma eperã kꞌɨ̃de jãrapꞌuaji. Aramata chokꞌai beeji. Tachi Akꞌõrepa ma eperã tꞌɨ̃ bɨji Adán.#2.7 Hebreo pedeede Adán jara kꞌinia bɨ “eujãdepema” wa “ɨmɨkꞌĩra”.
8Mãpai Tachi Akꞌõrepa ma eperã bɨji Edén ne–uu kꞌãide; oriente eere. Mama Tachi Akꞌõrepa ne–inaa kꞌarra kꞌĩra tꞌãdoo tꞌonopiji ma eperãpa kꞌomerã. 9Ichiaba pakꞌuru pi–ia kꞌĩra tꞌãdoo tꞌonopiji nejõ chaumerã, mãgá madepema kꞌodamerã. Ma Edén ne–uu kꞌãi esajĩakꞌa pakꞌuru omé tꞌonopiji; aba nejõ bɨɨrɨdepema jõdakꞌãri, piuda–ee, chokꞌai pꞌanapataadamerã; chi apema nejõ bɨɨrɨdepema jõdakꞌãri, kꞌĩsia pia mãikꞌaapa kꞌĩsia kꞌachia kꞌawadamerã.
10Edén ne–uu kꞌãi to kꞌɨ̃de baji. Ma todepema pania chi ne–uu kꞌãide wee wãyaa baji. Ma to jua kꞌĩmari nẽra baji. 11Chi naarapema to tꞌɨ̃jarapachida Pisón. Mãgɨ́ wãyaapachi Javilá eujã jõmaade, nẽe paraamãi. 12Mãpema nẽe pi–ia bapari. Ichiaba ma eujãde unupata ne–inaa tꞌũa bapari resina mãikꞌaapa mãu pi–ia ónice. 13Aɨ eerepema to tꞌɨ̃jarapachida Guijón. Mãgɨ́ wãyaapachi Cus eujãde. 14Aɨ eerepema to tꞌɨ̃jarapata Tigris. Mãgɨ́ wãyaapari Asiria eujã ikꞌaawa, oriente eere. Chi apema to tꞌɨ̃jarapata Éufrates.
15Tachi Akꞌõre Waibɨapa ma eperã bɨji Edén ne–uu kꞌãide ne–inaa uumerã mãikꞌaapa akꞌɨ bamerã.
16Mãpai Tachi Akꞌõrepa Adanmaa mãgaji:
—Pɨa nejõ jõ kꞌiniata jõpáde aji. 17Mamĩda jõnaapáde aji, jã pakꞌuru kꞌĩsia pia mãikꞌaapa kꞌĩsia kꞌachia kꞌawapiparidepema. Pɨa jãta jõru pɨrã, piuitꞌeeda aji.
18Maapꞌeda Tachi Akꞌõre Waibɨapa jaraji:
—Pia–e bɨda aji, ɨmɨkꞌĩra ituaba bamerã. Iru–itꞌee kꞌõpꞌãyo ooteeitꞌeeda aji.
19Tachi Akꞌõre Waibɨapa ne–animalaarã kꞌĩra tꞌãdoo mãikꞌaapa ipanaarã kꞌĩra tꞌãdoo yoorodee ooji. Maapꞌeda ichia ooda Adanmaa ateeji ma ne–animalaarã, ipanaarã jõmaweda tꞌɨ̃ bɨmerã. 20Mãpai Adanpa tꞌɨ̃ bɨji ne–animalaarã taunomaa, tausaaree beerã mãikꞌaapa ipanaarã. Irua ma tꞌɨ̃ chaa bɨdakꞌa mãga beeji. Mãgá ne–animalaarã chokꞌara paraaji mĩda, ichi–itꞌee kꞌõpꞌãyo wẽ–e paji.
21Mãpai Tachi Akꞌõre Waibɨapa Adán kꞌãipiji. Mãɨmisa orro aba ẽtꞌa ataji mãikꞌaapa waya chi chiara aɨ naawedapemakꞌa bɨji. 22Ma orrodee Tachi Akꞌõrepa Adan–itꞌee wẽra ooteeji.
23Adanpa unukꞌãri, mãgaji:
—Na mɨkꞌa bɨda aji, mɨ kꞌapꞌɨakꞌa bairã mãikꞌaapa mɨ bɨɨrɨdeepa ooda perã. Tꞌɨ̃jaradaitꞌeeda aji, wẽra, wẽra ɨmɨkꞌĩradeepa ooda perã.
24Mãgá Tachi Akꞌõrepa wẽra ɨmɨkꞌĩradeepa ooda perã, ɨmɨkꞌĩrapa atabëiitꞌee chi akꞌõre chi nawe ome, ichi wẽra ome araa pꞌanadaitꞌee. Mãgá eperã omeeweda eperã apai pɨkꞌa pꞌaneedaitꞌee.
25Adán chi wẽra ome ãkꞌadaa pꞌanapachida. Mamĩda kꞌĩra nejasia kꞌawadakꞌaa paji.
ప్రస్తుతం ఎంపిక చేయబడింది:
Génesis 2: sjaB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©2005, 2010, 2015 Wycliffe Bible Translators, Inc. All rights reserved.
