Amatie 11

Azã n mise nẽrba ko'om pʋam tõm a karẽnbiisi Azezi-krisi zẽ'am

(Aluki 7:18-35)

1Azezi n daan pa'alɛ a karẽnbiisi pia la ayi la kɩ'ɩlɩm na, a yese bilam sẽŋɛ la so'olʋm na tẽnsɩ la wuu pʋam ka zãsna nẽrba, dee mõola Nawẽnnɛ kõ-yẽlga.

2Tɩ Azã daan bɔna yʋ'a deem, wõm Krisi tõoma la yelle, tõm a karẽnbiisi a zẽ'am, 3tɩ ba sẽŋɛ ka soke ẽ yetɩ: «Fõn de la sɛka tɩ Nawẽnnɛ yetɩ a wʋn wa'am na bɩɩ, tɩ gu'ura nẽra ayẽma?» 4Tɩ Azezi lerge ba yetɩ: «Sẽŋɛ-ya ka yele Azã yãma n wõnnɩ se'em, la yãma n yẽtɩ se'em na: 5Fɔɔsɩ nini yẽtɩ mɛ, tɩ kɔɔrnɔ sẽnna, tɩ kõnkɔma yẽta ĩmã'asʋm le ãna sõŋa, tɩ wansɩ wõnna, tɩ kũm vɔ'ɔra, tɩ nasdõma wõnna Nawẽnnɛ kõ-yẽlga. 6La nẽr-sɛka n ka lebrɩ poorʋm mam ĩyã la tarɩ zu-yẽlga.»

7Azã karẽnbiisi la n fõrgɛ la, tɩ Azezi yãŋa tɔgra Azã yelle bɔ'ɔra nẽr-kʋʋŋɔ la yetɩ: «Bẽm tɩ yãma daan sẽŋɛ ka bɩsɛ weem? Yãma sẽŋɛ ka bɩsɛ la mõorɔ tɩ kʋsebgo mĩini bɩɩ? Ayɛɩ. 8La bẽm tɩ yãma sẽŋɛ ka bɩsɛ? Nẽra n yɛ fu-sõma? Ayɛɩ. Nẽr-sɛba n yɛ fu-sõma la boe na'adõma yiɛ. 9La yãma sẽŋɛ ka bɩsɛ la bẽm? Ya sẽŋɛ ka bɩsɛ la Nawẽnnɛ nõtɔ'ɔsa bɩɩ? Ẽe. La mam yetɩ ya tɩ a de la nẽra n gãnnɩ Nawẽnnɛ nõtɔ'ɔsa. 10La de la ẽŋa yelle tɩ la gʋlsɛ Nawẽnnɛ gõŋɔ pʋam tɩ Nawẽnnɛ yetɩ:

‹Mam tõntõnna n wãna

tɩ mam tõm tɩ a dẽŋɛ fʋ nẽŋa

malgɛ sore bɔ fɔ.›

11Mam yetɩ ya la sɩra, tɩ nẽrsaalba tɩ ba dɔgɛ la wuu pʋam, nẽra ka boe n gãnnɩ Azã n mise nẽrba ko'om pʋam na. La nẽr-sɛka n de pɩka Nawẽnnɛ so'olʋm na pʋam gãnnɩ Azã mɛ. 12Lan pɔsɛ Azã n misri nẽrba ko'om pʋam na wa paam lɛɛlɛ wã, Nawẽnnɛ so'olʋm sẽnnɩ nẽŋa la pãŋa, la pãnsɩ dõma n mõrgrɩ tɩ ba fãagɛ ẽ. 13Nawẽnnɛ nõtɔ'ɔsrɩba la wuu, la lɔɔ gõnnɔ la wuu dẽŋɛ tɔgɛ so'olʋm na yelle mɛ halɩ wa paagɛ Azã wakatɛ. 14La ya sãn bɔɔra tɩ ya bãŋɛ a võorɛ, Azã n de A'eli tɩ ba yʋʋn yetɩ a wʋn wa'am na. 15Sɛka n wõm yetɔga wã, a selse sõŋa sõŋa.

16Mam wʋn dɩkɛ la bẽm makɛ la zamãan-ẽna wã nẽrba? Ba ãn wʋ kɔma n zĩ da'am wi'ira taaba yetɩ: 17‹Tõma peebe wɩɩsɩ mɛ, tɩ yãma zagsɛ ka wa. Tɩ tõma yõom kʋʋrɛ yõoma, tɩ yãma zagsɛ ka yõom.› 18Se'ere n soe la, Azã wa'am mɛ wa lʋta nõorɛ dee ka yũura dãam, tɩ ba yetɩ kʋlkã'arga n dolɩ ẽ. 19Tɩ Nẽrsaala Dayʋa la wa'am wa dita dee yũura, tɩ ba yetɩ, a de la dita, la dã-yũura, la lampo-tɔ'ɔsrɩba, la tõon-be'ero dõma sɩrɛ. Yɛm dãana tõoma n pa'alɩ tɩ a tarɩ yɛm.»

Azezi zɛrgɛ tẽn-sɛba nẽrba n ka bɔ ẽ sɩra la

(Aluki 10:13-15)

20Bɛla poorʋm tɩ Azezi zɛrgɛ nẽr-sɛba tɩ a tõm tõon-yãlma zozo'e ba tẽnsɩ pʋam, dee tɩ ba ka teege yɛm basɛ tõon-be'ero la yetɩ: 21«Korazẽ dõma, ya wʋn yẽ toogo! Betisayida dõma, ya wʋn yẽ toogo! Se'ere n soe la, tõon-yãlma sɛba n tõm ya tẽnsɩ pʋam na, daan sãn tõm nɩ na Tiiri, la Sidõ tẽnsɩ pʋam, ba wʋn teege nɩ yɛm basɛ tõon-be'ero halɩ kʋrʋm kʋrʋm, yɛ bɔra futo ẽŋɛ tãmpɛglʋm ẽŋɛ ba zuto tɩ la pa'alɛ tɩ ba teege yɛm. 22Bɛla ĩyã tɩ mam yɛta ya tɩ sarɩyadia daarɛ, la wʋn dɛna toogo bɔ yãma gãnna Tiiri, la Sidõ dõma. 23La yãma Kapɛrnaʋm dõma, yãma tẽ'esɛ tɩ ya wʋn zẽkɛ mɛ ka paagɛ saazuum bɩɩ? Ayɛɩ, ya wʋn sige mɛ halɩ ka paagɛ kɩ'ɩn-tẽŋa. Se'ere n soe la, tõon-yãlma sɛba tɩ mam tõm ya zẽ'am na daan sãn tõm nɩ na Sodom tẽŋam, a wʋn ken boe nɩ mɛ zĩna. 24La mam yetɩ ya tɩ sarɩyadia daarɛ, Sodom dõma kãn yẽ toogo paagɛ yãma.»

Azezi tɔgɛ ẽŋa la a Sɔ Nawẽnnɛ yelle

(Aluki 10:21-22)

25Wakat-ẽŋa Azezi tɔgɛ mɛ yetɩ: «Mam Sɔ Nawẽnnɛ n de saazuum la tẽŋa wã Zuudãana, mam pẽgrɩ fɔ, se'ere n soe la, fõn sʋgɛ bõn-bãna wã mɛ tɩ yɛm dõma la bãŋrɩba ka mina, dee pa'alɛ nẽr-sɛba n ãn wʋ kɔm-pɩgsɩ la. 26Ẽe, mam Sɔ, la de la fõn boorɩ bɛla la ĩyã.»

27«Mam Sɔ dɩkɛ sɛla woo ẽŋɛ la mam nu'usum. La nẽra ka mi mam n de Nawẽnnɛ Dayʋa la n de sɛka, sãn dagna mam Sɔ la, la nẽra mẽ ka mi mam Sɔ la n de se'em, sãn dagna mam n de a Dayʋa la, la sɛba tɩ mam wʋn botɩ ba bãŋɛ ẽ na.»

Azezi n bɔ'ɔrɩ nẽrba vo'osgo

28«Wa'am-ya mam zẽ'am, yãma sɛba wuu n tʋ ze-tɩbsa targɛ la, tɩ mam wʋn bɔ ya vo'osgo. 29Dɩkɛ-ya mam sɔgrɩga sɔgɛ ya mẽŋa, zãsʋm sɛla tɩ mam wʋn pa'alɛ ya la, tɩ ya wʋn yẽ vo'osgo. Se'ere n soe la, mam de la sũ-bʋgsʋm dãana, la sik-m-mẽŋa dãana. 30Mam sɔgrɩga la fakɛ mɛ, la mam zeero la ka tɩbgɛ.»

ప్రస్తుతం ఎంపిక చేయబడింది:

Amatie 11: gurDBL

హైలైట్

షేర్ చేయి

కాపీ