Amatie 10

Azezi looge a karẽnbiisi pia la ayi tõm ba

(Amarkɩ 3:13-19;6:7-13, Aluki 6:12-16;9:1-6)

1Azezi daan wi a karẽnbiisi pia la ayi la mɛ bɔ ba pãŋa tɩ ba dige kʋlkã'arsɩ, dee botɩ bã'adõma buuri wuu, la kobro buuri wuu yẽ ĩmã'asʋm. 2Karẽnbiisi pia la ayi la tɩ a looge tɩ a tõm na yʋ'ʋra n wãna: Pɔspɔsɩ dãana de la Asimõ tɩ ba wi'iri tɩ Apɩyɛɛrɩ, la a yɩbga A'ãndre, la Azebede dayɔɔsɩ Azakɩ la a yɩbga Azã, 3la Afilipi, la Abatelemi, la Atoma, la Amatie n de lampo-tɔ'ɔsa la, la Azakɩ n de Alfe dayʋa, la Atade, 4la Asimõ n daan de Zelɔtɩ nẽra ayɩla la, la Azudaasɩ Iskariyo, sɛka n wʋn pa'alɛ tɩ ba yõkɛ Azezi la.

5La de la bãna pia la ayi tɩ Azezi daan tõm, yele ba yetɩ: «Da sẽŋɛ-ya bu-zãŋsɩ la zẽ'am, la da kẽ-ya Samaari dõma tẽnsɩ pʋam. 6Sẽŋɛ-ya Ɩsrayɛlɩ dõma n ãn wʋ piisi n bɔɩ la zẽ'am, 7ka mõola yetɩ: ‹Nawẽnnɛ so'olʋm na lɛm mɛ.› 8La ya botɩ bã'adõma yẽ ĩmã'asʋm, dee botɩ kũm vo'oge, dee botɩ kõnkɔma yẽ ĩmã'asʋm le ãna sõŋa, dee dige kʋlkã'arsɩ. Yãma to'oge la zãŋa, bɛla bɔ-ya zãŋa. 9Da dɩkɛ-ya sãlma bɩɩ ligri sũm sẽŋɛ. 10La ya da dɩkɛ tãmpɔkɔ sore la sẽnnɛ ĩyã, da dɩkɛ-ya futo bayi, bɩɩ tagra, bɩɩ doore. Ba wʋn bɔ tõntõnna ẽn boorɩ sɛla.

11Ya sãn paagɛ tẽn-kãtɛ bɩɩ tẽn-pɩka pʋam, soke-ya bãŋɛ nẽr-sõŋɔ sãn bɔna mĩ wʋn to'oge ya tɩ ya kẽ'era a yire, bɔna-ya bilam ka paagɛ daar-sɛka tɩ ya wʋn fõrgɛ tẽŋa la. 12Ya sãn paagɛ kẽ yire pʋam, ya pʋ'ʋsɛ ba yetɩ: ‹Sũ-mã'asʋm wʋn bɔna la ya.› 13La yire la dõma sãn to'oge ya, ya sũ-mã'asʋm wʋn bɔna la ba. La ba sãn zagsɛ ka to'oge ya, ya sũ-mã'asʋm wʋn weege ya zẽ'am. 14La yi-sɛka, bɩɩ tẽn-sɛka nẽrba sãn ka to'oge ya, bɩɩ ka selse ya yetɔga, ya yese zẽ'e-ẽŋa dee pɩɩsɛ ya nãma tẽntõnnɔ basɛ mĩ. 15Mam yetɩ ya la sɩra sɩra, tɩ sarɩyadia daarɛ tẽn-ẽŋa dõma wʋn yẽ toogo gãnna Sodom la Gomõorɩ tẽnsɩ nẽrba.»

Azezi yetɩ nãmsgɔ n wʋn wa'am

(Amarkɩ 13:9-13, Aluki 21:12-17)

16Azezi le yetɩ: «Bɩsɛ-ya, mam tõm ya wʋ piisi saasaadõma tẽŋasʋka. Bɛla ĩyã, dɛna-ya yɛm dõma wʋ bõnsɛ'ɛdõma, la ya ãna wʋ na'adawɛma n ka tarɩ yelle se'em na. 17Guuse-ya ya mẽŋa la nẽrba la. Se'ere n soe la, ba wʋn wa yõgɛ ya mɛ tarɩ sẽŋɛ sarɩyadia zẽ'esʋm, dee wẽ ya ba wẽndeto pʋam. 18La ba wʋn yõgɛ ya sẽŋɛ gɔmnadõma, la na'adõma nẽŋam, yãma n dolɩ mam na ĩyã, tɩ ya wʋn dɛna kaset-dõma tɔgɛ bɔ bãma la bu-zãŋsɩ. 19La ba sãn tarɩ ya sẽŋɛ, da fabla-ya yãma n wʋn tɔgɛ se'em, bɩɩ yãma n wʋn tɔgɛ sɛla yelle. Se'ere n soe la, wakat-ẽŋa mẽŋa Nawẽnnɛ Sɩa wʋn bɔ ya bõn-sɛka tɩ ya wʋn tɔgɛ. 20La dagɩ yãma mẽŋa n wʋn tɔgɛ, la de la ya Sɔ Nawẽnnɛ Sɩa la n boe ya pʋam na n wʋn tɔgɛ.

21Sɔbia wʋn botɩ ba yõkɛ a sɔbia kʋ. La sɔdõma mẽ wʋn ẽŋɛ ba kɔma bɛla. La kɔma mẽ wʋn zɛbɛ la ba dɔgrɩba, botɩ ba kʋ ba. 22Nẽrba wuu wʋn sise ya mam yʋ'ʋrɛ la ĩyã. La sɛka n ze'ele kãŋkãŋɛ ka paagɛ ba'asgɔ, a wʋn yẽ fãarɛ. 23Ba sãn nãmsɛ ya tẽŋa ayɩla pʋam, ya zoe sẽŋɛ tẽŋa ayẽma. Mam yetɩ ya la sɩra, tɩ ya kãn yãŋɛ kaagɛ Ɩsrayɛlɩ tẽnsɩ ba'asɛ dee tɩ mam n de Nẽrsaala Dayʋa la leme wa'am.

24Karẽnbia ka gãnnɩ a karẽnsãama, la tõntõnna mẽ ka gãnnɩ a zuudãana. 25La karẽnbia sãn wa ãna wʋ a karẽnsãama la, la tõntõnna sãn wa ãna wʋ a zuudãana la, la seke mɛ. Ban wi'iri yidãana la tɩ Abelzebuli n de Asũtãana la, ba wʋn tʋʋra a yire la dõma gãnna la bɛla.»

La masɛ tɩ ya zɔta la Nawẽnnɛ

(Aluki 12:2-9)

26«Bɛla, da zɔta-ya nẽrsaalba, tɩ bõn-sɛka woo n lile, wʋn lilge. La bõn-sɛka woo n sʋgɛ, wʋn puke. 27Mam n yele ya se'em lika pʋam wã, tɔgɛ-ya ẽ peelem pʋam. La sɛla tɩ mam waasʋm ya la, zom-ya deto zuto mõolɛ ẽ. 28Da zɔta-ya sɛba n kʋʋrɩ ĩyã, dee ka tãna wʋn kʋ sɩa la. Zɔta-ya Nawẽnnɛ n tã wʋn botɩ ya ĩyã, la ya sɩa sã'am bug-tẽŋa la. 29Ba ka koosrɩ mõom niinto bayi la lag-kõbrɛ ayɩla mã'a? La baa niila ayɩla kãn ki, tɩ la sãn dagna ya Sɔ Nawẽnnɛ n sakɛ. 30La baa yãma zuugo zomto, Nawẽnnɛ mi ba wuu kãllɛ mɛ. 31Bɛla ĩyã, da zɔta-ya dabeem, yãma tarɩ yõorɔ gãnna niinto zozo'e mɛ.

32Nẽr-sɛka woo n wʋn ze'ele nẽrba nẽŋam yetɩ ẽŋa de la mam nẽra, mam mẽ wʋn ze'ele mam Sɔ Nawẽnnɛ n boe saazuum nẽŋam yetɩ a de la mam nẽra. 33La nẽr-sɛka woo n sɩ'ɩsɛ nẽrba nẽŋam yetɩ ẽŋa ka mi mam, mam mẽ wʋn sɩ'ɩsɛ mam Sɔ Nawẽnnɛ n boe saazuum nẽŋam tɩ mam ka mi ẽ.»

Tɩ nõŋɛ Azezi gãnna

(Aluki 12:51-53;14:26-27)

34«Da tẽ'esɛ-ya tɩ mam tarɩ la nõ-yẽnnɛ wa'am dũnia zuo. Mam ka wa'am tɩ m botɩ nẽrba dɛna nõorɛ ayɩla dũnia zuo, la de la welgre tɩ mam tarɩ wa'am. 35Se'ere n soe la, mam wa'am tɩ m welge la dayɔɔsɩ la ba sɔdõma, la pugunto la ba madõma, la dayɔɔsɩ pɔgba la ba sɩrba madõma. 36Tɩ nẽra mẽŋa yir-dõma wʋn dɛna a bɛ'ɛba. 37Nẽr-sɛka n nõŋɛ a sɔ bɩɩ a ma gãnna mam, a ka masɛ tɩ a dɛna mam nẽra. La nẽr-sɛka woo n nõŋɛ a dayʋa bɩɩ a pɔyʋa gãnna mam, a ka masɛ tɩ a dɛna mam nẽra. 38La nẽr-sɛka woo n ka sakɛ nãmsgɔ wʋ nẽra n zɛɛrɩ a kũm dɔ-puurŋa dɔla mam, a ka masɛ tɩ a dɛna mam nẽra. 39La nẽr-sɛka woo n boorɩ tɩ a gu a vɔm, a wʋn koŋe ẽ. La nẽr-sɛka n basɛ a vɔm mam ĩyã, a wʋn yẽ ẽ.»

Nẽr-sɛba n tarɩ yɔɔrɔ

(Amarkɩ 9:41)

40«Nẽr-sɛka woo n to'oge ya, a to'oge la mam. La nẽr-sɛka woo n to'oge mam, a to'oge la sɛka n tõm mam na. 41La nẽr-sɛka woo n to'oge Nawẽnnɛ nõtɔ'ɔsa ẽn de Nawẽnnɛ nõtɔ'ɔsa la ĩyã, a wʋn to'oge Nawẽnnɛ nõtɔ'ɔsa yɔɔrɔ. La nẽr-sɛka woo n to'oge sɩra dãana ẽn de sɩra dãana la ĩyã, a wʋn to'oge sɩra dãana yɔɔrɔ. 42La nẽr-sɛka woo n bɔ mam nẽrba wã ayɩla ko-mã'asga tɩ a yũ, ẽn de mam karẽnbia la ĩyã, mam yetɩ ya la sɩra, tɩ a kãn koŋe yɔɔrɔ.»

ప్రస్తుతం ఎంపిక చేయబడింది:

Amatie 10: gurDBL

హైలైట్

షేర్ చేయి

కాపీ