Mat 6

Kupa wotamana

1“Cenjelani kuti musacite nchito zanu za cilungamo pa menso pa ŵanthu, kuti akuwoneni. Keno mucita tetyo, mukapokelelini cilambu kufuma kwa Awusu wanu ŵa Kululu.

2“Tetyo, pakupa wotamana, osaŵilizya ngani mwakucitila wolipazya mu makacisi ŵa Ayuda na mu misewu, kuti ŵanthu aŵacinzike. Nukuwuzyani kuti apokelelatu cilambu cawo conse. 3Koma pakupa wotamana, osati kwanja yanu yakumanzyele iziŵe vayucita kwanja ya kwendi, 4kuti cawanzi canu ciŵe mu cisinsi. Nipo Awusu wanu, owona vucitika mu cisinsi, akupeni cilambu.”

Lombelo ya Asikulu

(Mk 11:25-26; Lk 11:2-4)

5“Pamulomba, osacita ngani wolipazya, pakuti ŵeve otemwa kulomba copeneme mu makacisi ŵa Ayuda na mu mbali mwa njila kuti ŵanthu aŵawone. Nukuwuzyani vyendi kuti apokelelatu cilambu cawo conse. 6Koma polomba, ulute mu cipinda cako, novala ciseko, nolomba kwa Awusu wako asawoneka. Tetyo, Awusu wako owona vonse vucitika mu cisinsi akakupe cilambu.

7“Nipo polomba, osayingowelezyela malizu ŵamo na ŵamo mwakucitila asali Ayuda, pakuti woyezya kuti amvwiwe cikomo ca malizu ŵawo anyinji. 8Osaŵa ngani ŵeve, pakuti Awusu wanu woziŵa vamupangwa mukaliyosenga. 9Lombani moteti,

‘Awusu wasu muli Kululu,

Zina yanu ituŵishiwe.

10Ufumu wanu uwele.

Kupangwa kwanu kucitiwe

pano pansi ngani Kululu.

11Mutipe lelo cakulya casu ca lelo.

12Mutilekelele viyipa vasu

ngani mwatulekelelela otiyifyila.

13Musazomezye kuti tiyezyewe.

Mutipulumushe kwa Muyipa Wala#6:13 Mutipulumushe kwa muyipa wala keno kuti Mutipulumushe ku viyipa #6:13 Mu mabuku ayakine olaŵila kuti, Cikomo Ufumu, mphamvu, na ulemelelo ni vanu nsita zonse. Amen..’

14“Keno mulekelela okuyifyilani, Awusu wanu ŵa Kululu akulekeleleni namwe viyipa vanu. 15Koma keno mulekelelalini ayanu viyipa vawo, Awusu wanu akulekelelenilini macimo ŵanu.”

Kulilesha kulya

16“Pamulilesha kulya, osawonesha cinso cokwinyilila ngani mwakucitila wolipazya, woyifya ku menso nowonesha ŵanthu kuti olilesha kulya. Nukuwuzyani vyendi kuti apokelelatu cilambu cawo. 17Koma pamulilesha kulya, mosamba ku menso nozolela mafuta, 18kuti ŵanthu asaziŵe kuti mulilesha kulya, koma tyala Awusu wanu, owona vinthu vosawoneka; nipo Awusu wanu owona vucitika mwa cisinsi akakupeni cilambu.”

Kuyika cuma Kululu

(Lk 12:33-34)

19“Musaziwunjikile cuma pano pansi, pakuti muswe na nguwe zingaceneke, nipo akawalala angaiŵe. 20Koma ziwunjikileni cuma Kululu, kuliye muswe na nguwe, na akawalala otyolalini noyiŵa. 21Pakuti kuli cuma cako, mtima wako soti ukuŵa kwamene uko.”

Menso niye nyale ya muŵili

(Lk 11:34-36)

22“Menso niye nyale yosanikila muŵili wako. Tetyo, keno menso ŵako ali luweme, mu muŵili mwako monse mukuŵa kuŵala. 23Koma keno menso ŵako ni ayipa, muŵili wonse uŵe na mfinzi. Nipo keno nyale ili mwa wewo ni mfinzi, niye kuti mfinzi iyi ni ikulu ngako.”

Mulungu na cuma

(Lk 16:13; 12:22-31)

24“Paliye angatweshe kutumikila asikulu aŵili, pakuti keno azeatinkhane na yumo notemwa muyakine wala, keno azeazitwale kwa yumo notafulila muyakine wala. Ungatweshelini kutumikila wonse aŵili, Mulungu na cuma.

25“Ni cikomo cake, nukuwuzyani osacitila nkhawa moyo wanu, kuti mulyenji na kuti mumwenji, keno muŵili wanu, kuti muvwalenji. Pakuti moyo upula cakulya, nipo muŵili upula vovwala. 26Wonani vinyoni va mululu; vukomolalini keno kuwezya, keno kuyika mu cimphaka, koma Awusu wanu wa Kululu ovilyesha. Kansi mwewo muvipulalini vinyoni ivi? 27Ni ŵani mwa mwewo na malingililo ankhawa angatweshe kuyangizyila cukanga nsiku imo pa umoyo wake?

28“Mucitilanji nkhawa na vovwala? Wonani maluŵa mwakukulila. Oseŵenzalini, keno kusoka nyula, 29koma nukuwuzyani, cukanga Mfumu Solomoni wamene, mu ulemelelo wake wonse, enzovwalalini iweme kulingana na imo yeka ya maluŵa aŵa. 30Koma keno Mulungu ovwalika uzu wa ku sanga, uli na moyo lelo yeka nipo mailo ukapozewe mu mulilo, kansi mwewo ŵa cicetekelo citontho angakuvwalikenilini?

31“Tetyo, osaŵa na nkhawa kuti, ‘Tilye vinji?’ keno kuti, ‘Timwe vinji?’ keno kuti, ‘Tivwale vinji?’ 32Pakuti ŵa kunja osakila vonse ivi vinthu, nipo Awusu wanu ŵa Kululu woziŵa kuti muvipangwa vonse. 33Koma potatika sakilani Ufumu wa Mulungu, na cilungamo cake, nipo ivi vonse vikayikiliwepo pa mwewo. 34Osaŵa na nkhawa pa va mailo, pakuti mailo ikaŵe na nkhawa yake. Nsiku iliyonse ili na matamano ŵake.”

ప్రస్తుతం ఎంపిక చేయబడింది:

Mat 6: GMN

హైలైట్

షేర్ చేయి

కాపీ