Luka 22
22
Njila yopayilamo Yesu
(Mt 26:1-5,14-16; Mk 14:1-2,10-11; Yh 11:45-53)
1Nsita yocitila cisangalalo ca mkate uliye cofufumishila ifwika. Cisangalalo ico cenzoyitiwa Pasaka. 2Akulu ŵa Ansembe na Asambizyi ŵa Matetulo enzosakila njila yakuti amupayilemo Yesu. Pakuti ŵeve enzoyopa ŵanthu.
Yudasi opangana na Akulu ŵa Ayuda votwala Yesu
(Mt 26:14-16; Mk 14:10-11)
3Lomba Satana emuloŵa Yudasi woyitiwa Isikaliyoti, wamene enze yumo wa asambili ŵala ŵa Yesu kumi na aŵili. 4Yudasi wala eluta kuyopangana na Akulu ŵa Ansembe na acitangulila ŵa amalonda ŵa ku Ngʼanda ya Mulungu za njila yatiatwalilemo Yesu kwa ŵeve. 5Ŵeve etemwa, nolayizya kumupa ndalama. 6Yudasi ezomela, notatika kusakila mpata wakuti amutwalilemo kwa ŵeve, paliye winji wa ŵanthu.
Yesu okonzekela kucita malyelelo ŵa Pasaka
(Mt 26:17-25; Mk 14:12-21; Yh 13:21-30)
7Nsiku ya mkate uliye cofufumishila ifwika, niye nsiku yakupaya ŵana ŵa mbelele ocitila cisangalalo ca Pasaka. 8Yesu etuma Petulo na Yohane noŵawuzya kuti, “Nkhoyani mukatiwamyile malyelelo ŵa Pasaka kuti tikalye.”
9Ŵeve emukonsha kuti, “Kansi tikakuwamyileni kuni malo olyelako?”
10Yesu elaŵila kuti, “Mvwani! Mukayingoloŵa mu munzi mwala, mukumane na munthu mwanalume watakula nongo ya manzi. Mukamukonkhe mpaka ku ngʼanda kwatiakaloŵe. 11Mukawuzye mwine wa ngʼanda iyo kuti, ‘Asambizyi okonsha kuti, kansi cipinda ni cotyani catiazelyelemo malyelelo ŵa Pasaka ŵeve na asambili ŵawo?’ 12Yeve akakuwonesheni cipinda cikulu ca palulu, mwawamyiwa vonse vupangwika. Mwamene umo mukatiwamyile cakulya.” 13Tetyo, ŵeve eluta nocifwana mweciŵawuzyila, nipo ewamya malyelelo ŵa Pasaka.
Cakulya cosilizyila ca Asikulu
(Mt 26:26-30; Mk 14:22-26; 1Ak 11:23-25)
14Nsita peyifwika, Yesu enzokulya pamo na nthumi zake zala. 15Lomba eziwuzya kuti, “Napangwisha ngako kulya malyelelo aŵa ŵa Pasaka pamo na mwewo panikaliyotatika kunzunziwa. 16Pakuti kulaŵila vyendi, nizalyelini soti Pasaka, mpaka Pasaka iyi ikatwesheke mu Ufumu wa Mulungu.”
17Tetyo, Yesu etola nthumo, nipo pecitembezya Mulungu, elaŵila kuti, “Tolani, mwamoni monse umu. 18Ni cendi nulaŵilisha kuti kutatikila lomba nizamwelini soti vinyu, mpaka Ufumu wa Mulungu ukawele.”
19Nipo Yesu etola mkate, notembezya Mulungu, nowusuna–suna, noyaŵila asambili ŵala, nipo elaŵila kuti, “Uyu ni muŵili wangu utwaliwa mu malo mwa mwewo. Mukocita ivi kuti mukonikumbuka.”
20Pecisilizya kulya, eŵapa soti nthumo, nolaŵila kuti, “Nthumo iyi ni cipangano ca lomba cosimikizyika na mlopa wangu, yutayiwa cikomo ca mwewo.
21“Wonani, ni cendi kwanja yawonitwala kwa alwani ili pamo na yangu polyela. 22Mwana wa Munthu akuya, ngani mweciviwamyilatu kale Mulungu. Koma ali na shamu munthu watiakatwale Mwana wa Munthu.”
23Apo wonse etatika kukonshana kuti, “Kansi ni ŵani mwa sewo angacite voteti?”
Asambili osushana va ukulu
24Tetyo, asambili ŵala etatika kusushana kuti, “Kansi mwa sewo olaŵila kuti mkulu ni ŵani?”
25Yesu eŵawuzya kuti, “Pakati pa ŵanthu ŵa kunja, mafumu olyela ŵanthu ŵawo masuku pa mutu, nipo oseŵenzesha mphamvu zawo mwa nkhanza, koma cukanga ni tetyo oliyita ‘Ayawo ŵa ŵanthu.’” 26Koma pakati panu osati viwotetyo yayi. Ngako–ngako mkulu mwa mwewo awokuŵa ngani mtontho mwa wonse, nipo citangulila awokuŵa ngani ni wotumikila. 27Kansi mkulu ni ŵani? Ni wala akulya, keno otumikila? Kansi ni walalini akulya? Koma newo nili pakati panu ngani wotumikila.
28“Mwewo mwaŵa na newo pa manzunzo ŵangu wonse. 29Ni cikomo cake, ngani Atata enipa Ufumu, nane nukupani Ufumu. 30Nikazoloŵa mu Ufumu wangu, mukokuzokulya na kumwa pamo na newo, nipo muzemuŵe pa mipando ya cifumu nopingula mikoka kumi na iŵili ya Isilayeli.”
Yesu olaŵililatu kuti Petulo azeamukane
(Mt 26:31-35; Mk 14:27-31; Yh 13:36-38)
31“Simoni, Simoni, nkhala celu! Satana wasenga kuti akuyezyeni mwewo monse ngani mwanakazi mwakupepetela vincheŵele. 32Koma newo nakulombela kuti, osati cicetekelo cako cisile. Nipo wewo ukayaluka mtima, ukaŵakoseshe enekwanu aŵa.”
33Apo Petulo elaŵila kuti, “Asikulu, nine wokonzeka kuluta namwe ku jele, cukanga kufwa kwamene.”
34Koma Yesu emuyasuka kuti, “Nukuwuzya, wewo Petulo, kuti lelo yamene, kombwe akaliyolila, unikane katatu kuti newo uniziŵalini.”
Kutakula matumba na cingwandali
35Yesu eŵakonsha kuti, “Nsita iyakine nikutumani muliye thumba ya ndalama keno thumba ya pa ulwendo, keno soti nkhwaŵilo. Kansi pala mwisoŵapo kanthu?”
Ŵeve elaŵila kuti, “Yayi.”
36Yesu eŵawuzya kuti, “Koma lomba wamene ali na thumba ya ndalama, asayisiye. Cimozi–mozi soti thumba yake ya pa ulwendo. Nipo wamene aliye cingwandali, asitishe mkhanjo wake, nosita cingwandali. 37 Nipo nulaŵilisha kuti, vuwamila kukwanilishiwa mwa newo vecilaŵila Malembo kuti, ‘Emuyesa yumo wa ŵanthu ofwaya Matetulo.’ Nipo umoyo wangu ukuza ku nsililo lombapano.”
38Asambili ŵala elaŵila kuti, “Asikulu, ivi vingwandali, tili navo kale viŵili.”
Yesu eŵawuzya kuti, “Ciweme, mphela.”
Lombelo ya Yesu pa Lupili ya Olivi
(Mt 26:36-46; Mk 14:32-42)
39Pa vuli pake, Yesu efuma mu mzinda nakuya ku Lupili ya Olivi ngani mweciyoŵelelela. Nipo asambili ŵake eluta naye. 40Pecifwika uko, Yesu eŵawuzya kuti, “Lombani, kuti mungapone mu mayeselo.” 41Tetyo, epatukana nawo patontho pataliko. Apo efukama pansi notatika kulomba. 42Elaŵila kuti, “Atata keno mupangwa, munifumyilepo nthumo ya manzunzo aŵa. Koma mucite mwamupangwila mwewo osati mwanupangwila newo yayi.” [43Pamene apo mngelo ofumila Kululu ewonekela nomukosesha mtima. 44Koma Yesu etamana koyofya mtima, nolombela na mphamvu kupula kale. Koma ciŵe cenze ngani madontho akulu–akulu ŵa milopa oponela pansi.]
45Pecilomba epanama nakuya kwa asambili ŵake. Eŵafwana ali mtulo cikomo ca cisoni. 46Nipo eŵakonsha kuti, “Mulalilanji? Ukani nakulomba, kuti mungapone mu mayeselo.”
Yesu okatiwa
(Mt 26:47-56; Mk 14:43-50; Yh 18:3-11)
47Yesu penzolaŵila tetyo, pewela winji wa ŵanthu. Enze citangulila wawo ni Yudasi, yumo mwa asambili kumi na aŵili ŵala. Yeve eciza pafupi na Yesu kuti amupyopyone. 48Koma Yesu emukonsha kuti, “Yudasi, utwala Mwana wa Munthu kwa alwani pakumumfyomfyona?”
49Asambili enze pafupi na Yesu peciwona venze kuti vicitike, ekonsha Yesu kuti, “Asikulu tiŵateme na cingwandali?” 50Yumo mwa ŵeve etema cendi nyanchito wa Mkulu wa Ansembe, mpaka kumutenda kwatu ya ku kwanja kwendi.
51Koma Yesu elaŵila kuti, “Mphela, lekani.” Pecicita tetyo ekumya kwatu ya munthu wala nomupozya.
52Yesu elaŵila nawo wonse ŵala ewela kuzomukata, Akulu ŵa Ansembe na acitangulila ŵa amalonda ŵa ku Ngʼanda ya Mulungu, nipo na Akulu ŵa Ayuda. Eŵakonsha kuti, “Ni cinji mwacitonitolela vingwandali na nkholi kuti keno nine nyankapondo? 53Nsiku na nsiku nenze namwe pa luŵanza ya Ngʼanda ya Mulungu, mwewo osanikata. Koma lomba ni nsita yanu nipo soti na mphamvu ya mfinzi.”
Petulo okana Yesu
(Mt 26:57-58,69-75; Mk 14:53-54,66-72; Yh 18:12-18,25-27)
54Ŵanthu ŵala emukata Yesu, nakuya naye ku ngʼanda ya Mkulu wa Ansembe. Petulo enzoŵakonkha ca pataliko. 55Ŵeve ekozya mulilo mkati mwa mpanda wa ngʼanda iyo, nonkhala pansi. Petulo naye soti enkhala pakati pawo. 56Msimbi nyanchito emuwona pecinkhala nawo pa mulilo pala. Emulolesha ngako, elaŵila kuti, “Aŵa soti enze naye.”
57Koma Petulo ekana, elaŵila kuti, “Wewo msimbi, numuziŵalini uyu.”
58Pepepita kansita katontho, munthu muyakine pecimuwona elaŵila kuti, “Mwewo, nimwe soti yumo mwa ŵala.”
Koma Petulo elaŵila kuti, “Wewo munthu, yayi cendi, ni newolini.”
59Pepepita ngani ola imo, munthu muyakine soti esimikizya kuti, “Ni cendi aŵa soti enze naye, pakuti ni ŵa ku Galileya.”
60Koma Petulo elaŵila kuti, “Wewo munthu, nuviziŵalini vawulaŵila.” Nipo pamene apo, peenze akalulaŵila, kombwe elila. 61Asikulu ecewuka nololesha Petulo. Pamene apo Petulo ekumbuka malizu ŵecimuwuzya Asikulu kuti, “Lelo yamene, kombwe akaliyolila, unikane katatu.” 62Pamene apo efuma panja, na kuyolila ngako.
Oseka Yesu nomunyata
(Mt 26:67-68; Mk 14:65)
63Tetyo, ŵanthu wonse ŵala enzosunga Yesu etatika kumuseka nomunyata. 64Emumanga nyula ku menso nomukonsha kuti, “Nenela, wakunyata ni ŵani?” 65Nipo emulaŵilila malizu ayakine anyinji ayipa.
Yesu ku Kaupo Kakulu ka Ayuda
(Mt 26:59-66; Mk 14:55-64; Yh 18:19-24)
66Pekwecica, Kaupo Kakulu ka Ayuda kewungana, niye kuti Akulu ŵa Ansembe na Asambizyi ŵa Matetulo. Emutola Yesu nakuya naye ku nsaka yawo. 67Emuwuzya kuti, “Keno niwe Mpulumushi Wolayizyiwa wala, utiwuzye mosafisa.”
Koma Yeve eŵayasuka kuti, “Cukanga kuti nikuwuzyeni, munganicetekelelini, 68nipo nikakukonshani mwewo munganiyasukelini. 69Koma kutatika lomba Mwana wa Munthu ali nkhezi ku kwanja kwendi kwa Mulungu wa mphamvu.”
70Wonse ŵala elaŵila kuti, “Kansi niye kuti niwe Mwana wa Mulungu?”
Yesu elaŵila kuti, “Mwalaŵila mweka nine wamene.”
71Pamene apo ŵeve ŵala elaŵila kuti, “Tusakilila vinji umboni uyakine? Tazimvwila seka malizu ŵake aŵa.”
ప్రస్తుతం ఎంపిక చేయబడింది:
Luka 22: GMN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nsenga New Testament © The Bible Society of Zambia, 2015.
