Yh 4

Yesu olaŵila na mwanakazi wa ku Samaliya

1Afalisi ecimvwa kuti Yesu enzokoka nobatiza asambili anyinji kupula Yohane 2(koma enzobatiza ni Yesulini, koma asambili wake). 3Yesu pecimvwa ivi efumako ku Yudeya nakuya soti ku Galileya. 4Pa ulwendo uyo enzowamila kupitila mu calo ca Samaliya. 5Lomba efwika ku munzi wa ku Samaliya, zina yake Sikali, pafupi na munda Yakobo wecipa mwana wake Yosefe. 6Kwamene kwala kwenze cisime ca Yakobo. Yesu enkhala pansi pa citwa pa cisime cala, cikomo enze evupa na ulwendo. Mwenze mzuŵa.

7-8Asambili ŵake enze eluta ku munzi kuyosita cakulya. Pa nsita iyo pewela mwanakazi wa ku Samaliya kuzotapa manzi, Yesu emusenga kuti, “Nipenkoni manzi akumwa.”

9Mwanakazi wa ku Samaliya wala eyasuka elaŵila kuti, “Mwewo Ayuda, mungasenge tyani manzi kwa newo, mwanakazi wa ku Samaliya?” (Pakuti Ayuda na ŵanthu ŵa ku Samaliya oyendelanalini.)

10Yesu elaŵila kuti, “Kuti mwenzoziŵa cawanzi ca Mulungu, nipo mwenzoziŵa soti osenga manzi akumwa, sembe mwamusenga ni mwewo, yeve nokupani manzi okupa moyo.”

11Mwanakazi wala elaŵila kuti, “Mwewo, muliye na cotapilamo kumo, nipo cisime ici ni conoka. Nga manzi akupa moyo uyo muŵatole kuni? 12Kansi mwewo mulingilila kuti nimwe wopula kolo yasu Yakobo, etipa cisime ici? Mwewo mungatipe manzi aweme tyani kupula manzi ŵamene yeve, na ŵana wake, na viŵeto vake ŵenzokumwa?”

13Yesu elaŵila kuti, “Munthu aliyense womwako manzi aŵa, azeamvwe soti njota. 14Koma aliyense ŵatiazeamwe manzi ŵanitinizemupe newo, azeamvwelini soti njota mpaka nsita zosasila. Manzi ŵanitinizemupe azotumphuka mwa yeve ngani nyenje ya manzi akupa moyo, nakupa moyo wosasila.”

15Mwanakazi ŵala elaŵila kuti, “Mwewo, nipenkoni manzi awo, kuti osati nikokumvwa soti njota keno kuzotapa soti manzi kuno.”

16Yesu elaŵila kuti, “Nkhoyani mukayite mwanalume wanu, mukawele soti kuno.”

17Mwanakazi wala elaŵila kuti, “Niliye mwanalume.”

Yesu elaŵila kuti, “Mwalaŵila vyendi kuti muliye mwanalume. 18Pala mwalunguliwapo kale na analume asanu, nipo mwanalume wa muli naye lomba ni wanulini soti. Vamwalaŵila ivi ni vyendi.”

19Mwanakazi wala elaŵila kuti, “Mwewo Asikulu naziŵa lomba kuti nimwe mneneli. 20Makolo ŵasu ŵa ku Samaliya enzolombela Mulungu pa lupili iyi, koma mwewo Ayuda mukuti ni ku Yelusalemu kwakuwamila ŵanthu kuyolombelako.”

21Yesu emuwuzya kuti, “Mwanakazi, ni cendi ikuza nsita yatimuzelombele Atata, osati pa lupili iyi keno soti ku Yelusalemu yayi. 22Asamaliya mwewo mulombela Mulungu wamusaziŵa. Sewo Ayuda tulombela Mulungu watuziŵa, pakuti Mulungu elayizya cipulumusho kupitila mwa Ayuda. 23Koma nsita ikuza, nipo yafwika kale, pati Mzimu Mtuŵa azeawulule ku ŵanthu mwalili Atata mu vyendi#4:23 pati Mzimu Mtuŵa azeawulule ku ŵanthu mwalili Atata mu vyendi Mu Cigiliki olaŵila kuti pamene ŵanthu olomba ngako–ngako azealombe Atata mu mzimu na vyendi . Atata otemwa ŵanthu woteti kuti ni womulombela. 24Mulungu ni mzimu, nipo omulambila owamila kumulambila mu Mzimu na mu vyendi.”

25Mwanakazi ŵala elaŵila kuti, “Nuziŵa kuti akuza Mesiya, Mpulumushi Wolayizyiwa wala. Yeve akazowela, azeatikonkhololele vonse.”

26Yesu emuwuzya kuti, “Ni newo wamene nulaŵila namwe.”

27Nsita yamene iyo asambili ŵake ŵa Yesu ewela, nipo ekanganishiwa ngako kuti yeve enzolaŵila na mwanakazi. Koma penzeve emukonsha kuti, “Vankhala tyani tetyo?” keno kuti, “Ni cikomo canji mulaŵila naye?”

28Mwanakazi wala esiya nongo yake ya manzi nakuya ku munzi kuyowuzya ŵanthu, 29“Tiyeni, mukawone munthu waniwuzya vonse venenzocita newo. Kansi uyu angaŵelini Mpulumushi Wolayizyiwa wala?” 30Pamene apo ŵanthu ŵala efuma mu munzi mwala nakuza kwa Yesu.

31Pa nsita iyo asambili ŵake ŵa Yesu enzomusenga kuti, “Asambizyi, lyani.”

32Koma yeve eŵawuzya kuti, “Newo nili naco cakulya camusaziŵa mwewo.”

33Pamene apo asambili ŵala etatika kukonshana kuti, “Kansi muyakine wazomupa kale cakulya?”

34Koma Yesu elaŵila kuti, “Cakulya cangu ni kucita cakupangwa Atata enituma, kuti nisilizye nchito yecinipa ŵeve. 35Pala ŵanthu olaŵila kuti, ‘Ikapita miyezi inayi, niye kuti yafwika nsita yowezya.’ Koma cendi wonani mu minda mwala, kansi muwonalini kuti mbuto zapya kale kuzomelezyewa kuwezya? 36Wowezya atatika kale kupokela malipilo nowunjika vitwalo ku moyo wosasila, kuti wokomola na wowezya asangalale pamo. 37Pala olaŵila vyendi ŵala olaŵila kuti, ‘Okomola ni muyakine, owezya ni muyakine soti.’ 38Newo nikutumani kuyowezya vitwalo vamuliyokomole. Ŵanthu ayakine niye eseŵenza, mwewo muyingopokelapo phindu ya nchito zawo.”

39Asamaliya anyinji ŵa mu munzi mwala eyika cicetekelo cawo mwa Yesu cikomo ca umboni wa mwanakazi wala, wakuti, “Yeve waniwuzya vonse venicita.” 40Lomba pecifwika Asamaliya kwa Yesu, emusenga kuti aŵe nawo kwawo kwala. Nipo enze nawo cendi kwala masiku aŵili. 41Pamene apo ŵanthu ayakine soti anyinji ecetekela cikomo ca malizu ŵa Yesu.

42Mwakuti ewuzya mwanakazi wala kuti, “Tacetekela lomba, osati cikomo ca malizu ŵako, koma cikomo tazimvwila seka. Taziŵa kuti uyu ni Mpulumushi cendi wa ŵanthu wonse ŵa pa calo conse ca pansi.”

Yesu opozya mwana wa nduna ya mfumu

(Mt 8:5-13; Lk 7:1-10)

43Pecipita masiku aŵili ŵala, Yesu efumako nakuya ku Galileya. (44Mwine wake enzeelaŵila kuti, “Mneneli, ŵanthu ŵa kwawo omupalini mcinzi.”) 45Koma pecifwika Yesu ku Galileya, Agalileya emupokela pakuti enekwawo nawo soti eluta ku Yelusalemu ku cisangalalo ca Pasaka, nipo ewona vonse vecicita Yesu pa cisangalalo cala.

46Yesu eluta soti ku munzi wa Kana ku Galileya, kweciyalusha manzi kuŵa vinyu. Penze nduna iyakine ya mfumu yamene mwana wake enzolwala ku Kapilinamu. 47Pecimvwa kuti Yesu wafwika ku Galileya kufumila ku Yudeya, ewela kwa yeve nomusenga kuti alute naye ku Kapelenamu, kuti akapozye mwana wake enze pafupi kufwa.

48Yesu eŵawuzya kuti, “Mwewo ŵanthu mukakana kuwona viziŵikilo na vokanganisha, mucetekelelini yayi.”

49Nduna yala yeciti, “Tiyeni Asikulu nukusengani, mwana wangu pakaliyokufwa.”

50Yesu elaŵila kuti kwa yeve, “Nkhoya! Mwana wako wapola.” Munthu wala ecetekela malizu ŵa Yesu nipo eluta kwawo.

51Pa njila, ekumana na anyanchito ŵake, nipo ŵeve emuwuzya kuti, “Mwana wanu wapola.” 52Eŵakonsha nsita yecicililamo mwana wala, ŵeve elaŵila kuti, “Malungo ŵake emusiya mailo nsita ya 1 koloko mzuŵa#4:52 1 koloko mzuŵa keno 13:00 hrs.”

53Nduna yala yekumbuka kuti yenze nsita yamene iyo pecimuwuzya Yesu kuti, “Mwana wako wapola.” Lomba yeve eyika cicetekelo pali yeve pamo na wonse ŵa mu banja mwake.

54Iyi yenze nsita ya ciŵili Yesu pecifuma ku Yudeya kuya ku Galileya pecicita cokanganisha.

ప్రస్తుతం ఎంపిక చేయబడింది:

Yh 4: GMN

హైలైట్

షేర్ చేయి

కాపీ