Yh 2

Malyelelo ŵa pa ukwati wa ku munzi wa Kana

1Pa nsiku ya citatu, kwenze malyelyelo ŵa pa ukwati ku munzi wa Kana mu calo ca Galileya. Anyina ŵake ŵa Yesu enze kwamene kwala. 2Yesu naye soti pamo na asambili ŵake eyitiwa kwamene kwala. 3Vinyu pewisila, anyina ŵake ŵa Yesu emuwuzya kuti, “Waŵasilila vinyu.”

4Yesu eyasuka kuti, “Amama, ni vinji kwa newo? Nsita yangu ikaliyofwika.”

5Apo anyina ŵake ewuzya anyanchito enzotumikila kuti, “Ciliconse catiakuwuzyeni, mucite.”

6Pamene apo penze nongo za mwala zisanu na imo, zeyikiwapo cikomo ca mwambo wozituŵisha wa Ayuda. Mu nongo iliyonse mwenzoloŵa manzi okumana malita makumi kumi (100) keno kupitililapo. 7Lomba Yesu ewuzya anyanchito ŵala kuti, “Zuzyani nongo izi na manzi.” Nipo ezizuzya mpaka mu milomo. 8Pa vuli pake eŵawuzya kuti, “Lomba tapani, twalani kwa mkulu wa malyelelo.” Ŵeve etwala cendi.

9Mkulu wa malyelelo ŵala elaŵa manzi eyaluka vinyu wala osaziŵa kwewifumila (koma anyanchito ŵala etapa manzi ŵala enzoziŵa). Lomba mkulu wa malyelelo ŵala eyita wolungula, 10nomuwuzya kuti, “Ayanu otwala vinyu uweme ngako potatika, nipo ŵanthu akakuta, oŵapa vinyu uweme patontho, koma mwewo mwasunga vinyu uweme ngako kufwikila lomba.”

11Yesu ewonesha ciziŵikilo cake cotatika ici mu munzi wa Kana mu calo ca Galileya. Pamene apo ewonesha ulemelelo wake, nipo asambili ŵake ecetekela mwa yeve.

12Pa vuli pake Yesu eluta ku Kapelenamu, pamo na anyina, enekwawo na asambili ŵake, nipo enze kwamene kwala masiku atontho.

Yesu otuŵisha Ngʼanda ya Mulungu

(Mt 21:12-13; Mk 11:15-18; Lk 1:45-46)

13Peyenze pafupi nsita ya cisangalalo ca Ayuda coyitiwa Pasaka, Yesu eyima nakuya ku Yelusalemu. 14Kwamene kwala eloŵa pa luŵanza ya Ngʼanda ya Mulungu nofwanamo ŵanthu ositisha ngʼombe, mbelele na nkhunda. Mwenze soti ŵanthu osinthisha ndalama. 15Pamene apo Yesu eŵila mkwapu wa nzinzi notatika kuŵafumya wonse kunja, pamo na mbelele na ngʼombe zawo zonse. Egudubula matebulo ŵa osinthisha ndalama, noŵamwazyila ndalama zawo. 16Nipo elamula ositisha nkhunda ŵala kuti, “Ivi vifumyemoni muno. Ngʼanda ya Atata musayiyalushe ngʼanda yocitilamo malonda.” 17 Asambili ŵake ekumbuka Malembo ŵala olaŵila kuti, “Nupangwishisha ngako kusamala Ngʼanda yanu, Mulungu.”

18Pamene apo Akulu–Akulu ŵa Ayuda emukonsha kuti, “Kansi ungatilangizye ciziŵikilo cotyani cakuti uli na ulamulilo ocita ivi?”

19Yesu eŵayasuka kuti, “Keno mungapasule Ngʼanda ino ya Mulungu, newo nizeniyimange soti pa masiku atatu.”

20Pamene apo ŵeve elaŵila kuti, “Ngʼanda ya Mulungu iyi itola vyaka makumi anayi na mphuzyo zisanu na imo (46) kuti ayimange, lomba wewo ungaimange masiku atatu tyala?”

21Koma Yesu penzolaŵila va Ngʼanda enzolaŵila va muŵili wake. 22Yeve peciwukishiwa kwa akufwa, asambili wake ecizokumbuka kuti enzeelaŵila ivi, nocetekela Malembo nipo soti malizu ŵenzeelaŵila Yesu.

Yesu oziŵa ŵanthu wonse

23Lomba Yesu penze mu Yelusalemu pa cisangalalo ca Pasaka, anyinji ecetekela mwa yeve, peciwona viziŵikilo vokanganisha venzocita. 24Koma Yesu aliyoyikepo cicetekelo pali ŵeve, pakuti yeve enzoziŵa ŵanthu wonse. 25Enzopangwalini kuti muyakine acitomuwuzya va munthu aliyense, pakuti mwine wake enzoziŵa va mu mitima mwa ŵanthu.

ప్రస్తుతం ఎంపిక చేయబడింది:

Yh 2: GMN

హైలైట్

షేర్ చేయి

కాపీ