SHURAI 9
9
Ramai nou Noha ye Koa Vo Souyu
1Ramai nou Noha alia puh nahpoutu maitaoye shiha peia paoe, “Tya kapaloua deiphao phoulo. 2Soukhaona, teihi raohou alia zaihi kha teitei ne hi peilai. Sütao teitei nou ne bah hi thaothou peiwure. 3Lüa hriyu khaona hrülai neto soulai, Enou vupou-a ne hi peiyu büa ha teitei neye peire. 4Ana hali, süolouzü zhe nahai nenou toulai moe, daiolouzü zhe nasü ahri raie. 5Nevei hrirai poyu nahi Enou tudeelai, nevei hrirai poyu soukhaona navei hrirai polai. 6Ramai nou Ehmai hai puh zhuh rai hinou soupei khaitoue, südonou maita linou-a mai ali southare toulouzü puh-a southalai.
7“Ne tya kaapaloua deiphao buh teitei phoulo.”
8Ramai nou Noha ae puh nah maitao hi paoe, 9“Enou chuo ne hi ae ne tyaonah maitao hi, 10alia teihi raohou, soukhaona, sakhao hinou palouyu hrikhaona hrülai hi vo ali soulai. 11Enou ne hi vo haina souwe, süolouzü hrikhaona hrülai hai dzüdu panou dakhai souha pulai more, alia dzüdu panou deiphao souhapu khailai more. 12Ne alia neye koa buyu hrikhaona hrülai, ae haithai nou velai bonakha hrülaiye donou Eye koa vo soukhai touyu vei shee nasü haihai-e: 13Enou avei rüraipao hai panou teihao hi palai. Haina nou deiphao mai hi Enou vo soukhai touyu shee soulai. 14Teihao nou teihi holoua teihao hisü rüraipao pare toulouzü, 15Enou ne hi alia hrikhaona hi soukhai touyu vo, süolouzü dzüdu panou hrikhaona souha dakhai pulai more touyu licho loulai. 16Rüraipao nahai teihao pei pare toulouzü Enou süna zhuloua deiphao hrikhaona alia ne hi Enou soukhaiyu teisa vei vo nasü tailoulai. 17Haihai deiphao hi hrikhaona hrülai alia Ahai ko hi vo soukhai touyu shee nasüe.”
Noha ae Puhnah Maitao
18Noha nahpoutu maitao sakhao hinou palouyu hai Shem, Ham ae Japheth-e. Ham hai Kanaan puoe. 19Noha nahpoutu haitao asü hinou deiphao mai hrüpaloue.
20Noha nou tahta raikhana soua darkha kipei shothoue. 21Puh nou darkhadzü keloua luloure alia sabanü pha-a puh vei sahpao hisü lou zütare. 22Kanaan puo Ham nou puh puo baitoua buyu ngaoloua puh jürai ahai hisü paopeie. 23Süthaisü Shem ae Japheth nou sahli poloua puh hai phaohi khailoua thaitsü polou puh hai puo baitoua buyu sü hopeie; puh hai nou pah pfüku loua puh hai puo nou baitoua buyu sü ngaomoe. 24Noha nou zhia buyu hinou chüpa loukhaie, puh nahpoutu anakha nanou puh hi dai soukhai toue touyu süloua,
25Puh nou paoe,
“Kanaan sü chaa pfütheo!
Puhye panou puh jürai mai qila soulai.
26Avei Ramai Mapao ye sü panou Shemye shiha peitheo,
alia Kanaan panou puh vei qila soulai.
27Ramai panou Japheth#9.27 japheth: Zhih haina hai Hebrew maila hinou “souvi peiyu” touyu lakho raiwe. ye souvi khe peitheo!
alia puhvei tyaonah khesü panou Shem vei sahpao hinou bulou theo,
alia Kanaan panou puh qila soulai.”
28Dzüdu thailo Noha nou po 350 hrüloue. 29Puhnou po 950 hrüloua thaitare.
ప్రస్తుతం ఎంపిక చేయబడింది:
SHURAI 9: POUMBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
