Luke 23

O Jisu ena Mata i Pailato

(Maciu 27.1-2,11-14; Mari 15.1-5; Joni 18.28-38)

1Era sa qai tucake kece sara ka kauti Jisu kivei Pailato. 2Sa tekivu me ra beitaki koya, ka kaya, “Keimami sa kunea na tamata oqo ni sa vagolei ira vakatani na noda tamata, ka sa tarova me keimami soli i vakacavacava vei Sisa, ka sa kaya voli ni sai koya na Mesaia, e dua na tui.”

3Sa qai tarogi koya o Pailato, “Sa i iko li na nodra Tui na Jiu?”

Sa qai sauma o Jisu, ka kaya, “Oqori na ka o sa kaya.”

4Sa mani kaya o Pailato vei ira na bete levu kei ira na lewe vuqa, “Au sa sega ni raica e dua na cala vua na tamata oqo.”

5Ia era sa qai cike ga vakaukauwa ka kaya, “Sa vakayavalati ira tiko na tamata e Jutia taucoko o koya ena nona i vakavuvuli, mai Kalili ka yaco sara mai ki na vanua oqo.”

Sa Kau o Jisu vei Eroti

6Ni sa rogoca o ya o Pailato, sa mani taroga sara se sa kai Kalili o koya se segai. 7Ia ni sa rogoca ni sa lewe ni yasana e veiliutaki kina o Eroti o Jisu, sa mani vakauti koya sara vei Eroti, ka a tiko voli e Jerusalemi ena gauna vata o ya. 8Ia ni sa raici Jisu o Eroti sa marau sara, ni sa dede na gauna e via raici koya tiko kina. A sa dau rogoca voli ga o Eroti na ka e baleti koya, ka nuitaka talega me na raici koya ni cakava eso na caka mana. 9E a mani vakatarogi koya kina vakabalavu, ia sa sega ga ni bau sauma e dua na ka o Jisu. 10Era a tu voleka tu e kea na bete levu kei ira na daunilawa, ka beitaki koya vakaukauwa. 11Era sa qai vakasewasewani koya ka vakalialiai koya, o Eroti kei ira na nona sotia, ka ra vakasuluma ena dua na i sulu totoka, ka vakauti koya tale vei Pailato. 12A mani yaco me rau sa qai veivinakati tale o Eroti kei Pailato ena siga o ya, ka ni rau a veicati tu e liu.

Sa Tau na Lewa me Mate o Jisu

(Maciu 27.15-26; Mari 15.6-15; Joni 18.39–19.16)

13Sa qai soqoni ira vata na bete levu o Pailato, kei ira na i liuliu kei ira na tamata, 14ka kaya vei ira, “O ni kauta mai vei au na tamata oqo me vaka e dua e vagolei ira vakatani na tamata, ia ni'u sa vaqaqai koya oti ena matamuni, mo ni kila, ni'u a sega ni raica ni cala na tamata oqo ena dua na ka o ni beitaki koya kina. 15E a sega talega ni kunea vakakina e dua nona cala o Eroti, ni sa vakauti koya tale mai vei au. Sa sega sara ni dua na ka cala sa cakava o koya oqo me vakamatei kina. 16O koya oqo ka'u na vakanakuitataka ga ka sereki koya me lako.” 17(A sa dau sereka vei ira o Pailato e dua na kaivesu ena veigauna kece ni Solevu ni Lakosivia.)

18Era sa qai kailavaka kece yani, “Vakamatei koya! Sereki Parapa mai vei keimami!” 19(Sa i Parapa oqo na tamata ka a biu ki na valeniveivesu ena vuku ni dua na veisei ka a tubu ena koro levu o ya, kei na dua talega na laba.)

20Ia ni sa gadreva tiko o Pailato me sereki Jisu sa vosa tale kina vakadua vei ira o koya. 21Ia era sa qai kaila ga ka kaya, “Vakota ga ki na kauveilatai! Vakota ga ki na kauveilatai!”

22Sa qai kaya tale vei ira o Pailato ena i katolu ni gauna, “A ca cava e kitaka o koya? Au sega ni kunea vua e dua na ka sa dodonu me mate kina. O koya oqo au sa na vakanakuitataki koya ga kina ka sereka.”

23Ia era a cikevi koya matua ena domolevu, ka kerea me lauvako ga o Jisu ena kauveilatai. Sa mani rogoci na domodra. 24Sa qai lewa o Pailato me sa vakayacori ga na ka era kerea na tamata. 25A sa sereka o koya na tamata era a kerea; o koya ka a biu ki na valeniveivesu ena vuku ni veisei kei na laba, ia sa soli Jisu vei ira me ra cakava vua na ka e lomadra.

Sa Vakoti o Jisu ki na Kauveilatai

(Maciu 27.23-44; Mari 15.21-32; Joni 19.17-27)

26Ia ni ra sa kauti Jisu tiko, era sa qai tauri Saimoni, e dua na kai Kirini, (ni a se qai lako tiko mai loma ni vanua me curu ki na koro,) ka vakataqara vua na kauveilatai, me colata ka muri Jisu.

27Era sa qai muri Jisu e lewe vuqa sara; ka maliwai ira eso na yalewa era a tagi ka osivaki koya voli. 28Sa qai vuki kivei ira o Jisu ka kaya, “Oi kemudou na yalewa ni Jerusalemi, dou kakua ni tagicaki au, ia dou tagicaki kemudou ga kei ira na luvemudou. 29Dou kila, sa voleka mai na gauna era na kaya kina na tamata, ‘Sa kalougata o ira na yalewa sa sega ni vakaluveni, kei na kete sa sega ni sucu mai kina na gone, kei na matanisucu sa sega ni qarava na gone!’ 30Oqori na gauna era na tekivu kaya kina na tamata ki na veiulunivanua, ‘Baleti keimami mai!’ ka kaya talega ki na veidelana, ‘Ubi keimami mai.’#Osea 10.8; Vtaki 6.16 31Ni kevaka era sa cakava na veika oqo ni se drokadroka tu na kau, na cava li ena qai yaco ena gauna sa madu kina?”

32E lewe rua talega na tamata, ka rau kaivesu, e rau a la'ki vakamatei vata kei koya. 33Ni ra sa yaco ki na vanua sa vakatokai “Na Qavokavoka”, era sa mani vakoti koya e kea kei rau na kaivesu; e dua ena yasana i matau ka dua ena yasana i mawi. 34Sa qai kaya o Jisu, “I Tamaqu, ni vosoti ira! Era sa sega ni kila na ka era sa vakayacora tiko oqo.”#Same 22.18

Era sa qai vakawiri madigi me ra wase na nona i sulu. 35Era a tu cake tu e kea na tamata, ka vakararai tu; ia o ira na nodra i liuliu na Jiu, era a vakalialiai koya, ka ra kaya, “Sa dau vakabulai ira na tani o koya; ia me tei vakabulai koya mada kevaka sai koya dina na Mesaia ka sa digitaka na Kalou!”#Same 22.7

36Era a vakalialiai koya talega na sotia, ka ra lako cake yani ka solia vua na wai wiwi,#Same 69.21 37ka kaya, “Mo vakabulai iko mada kevaka sai iko dina na nodra tui na Jiu!”

38A sa volai toka e cake vua na vosa oqo, “Oqo na nodra Tui na Jiu.”

39Sa qai vosa vakacataki koya e dua vei rau na kaivesu ka ratou rube vata tu, ka kaya, “E sega li ni o iko na Mesaia? Mo vakabulai iko mada vata kei keirau!”

40Ia sa qai vunauci koya o koya kadua, ka kaya, “O sega beka ni rerevaka na Kalou, ni o sa lewai mo mate talega vakataki koya o iko? 41Sa dodonu na lewa e tau vei kedaru, ni sa rauti kedaru ga na i sau ni nodaru i valavala, ia na tamata oqo sa sega ni dua na cala e vakayacora.” 42Sa qai kaya vei Jisu, “Mo ni qai nanumi au mai, Jisu, ni o ni sa lako mai ena nomuni kaukauwa vakatui!”

43Sa qai kaya vua o Jisu, “Au sa yalataka oqo vei iko ni edaidai ga e daru na tiko vata kina mai Parataisi.”

Na Mate i Jisu

(Maciu 27.45-56; Mari 15.33-41; Joni 19.28-30)

44Ni rauta toka na tinikarua na kaloko ena sigalevu tutu, a sa solega na vuravura taucoko na butobuto me la'ki yacova na tolu na kaloko ena yakavi; 45ni sa sega ni dua na rarama mai na matanisiga ka sa kasei rua na i latilati ni Valenisoro.#Lako 26.31-33 46Sa qai kaci ena domo levu o Jisu, ka kaya, “I Tamaqu! Au sa solia na yaloqu ki na ligamuni!” Ni sa cavuta oti ga o ya, sa qai cavuka sara na nona i cegu.#Same 31.5

47E a raica na veika kece sa yaco oqo na turaganivalu, ka sa vakacaucautaka na Kalou, ka kaya, “Sa dina sara ni oqo e dua na tamata vinaka!”

48Vei ira kece na lewe vuqa era a soqoni yani ki kea, era sa tavia ga na lomaseredra ena rarawa ka lesu tale ki vale ni ra sarava oti na veika kece sa yaco. 49Era a tu cake vakayawa tu ga yani ka raica na veika o ya o ira kece na i tokani voleka i Jisu kei iratou na yalewa ka muri koya voli mai Kalili.#Luke 8.2,3

Na Bulu i Jisu

(Maciu 27.57-61; Mari 15.42-47; Joni 19.38-42)

50O Iosefo e dua na lewe ni bose; e tamata vinaka ka dodonu. 51E a sega ni lomavata o koya kei na nodra i naki kei na ka era cakava o ira na kena vo. E kai Arimacea o koya; o Arimacea e dua na koro ena yasana o Jutia. A bau waraka voli talega o koya na yaco mai ni matanitu ni Kalou. 52Sa qai lako na tamata oqo vei Pailato ka la'ki kerea na yago i Jisu. 53Sa qai luvata ki ra na yago o Iosefo ka solega ena dua na i sole lineni, ka la'ki vakotora ena dua na i bulubulu ta ena vatu, ka sa bera ni bau vakotori kina e dua e liu. 54Ia na siga o ya na siga ni Vakaraubuka, ka sa toso voleka mai na Siga ni Vakacecegu.

55Sa qai lako vata kei Iosefo o iratou na yalewa ka muri Jisu mai Kalili ka ratou la'ki raica sara na i bulubulu kei na kena vakotori na yago i Jisu. 56E ratou sa mani lesu ka vakarautaka na i saluwaki kei na waiwai boi vinaka.#Lako 20.10; Vrua 5.14

E ratou a vakacegu ga ena Siga ni Vakacecegu me vaka sa vakaroti ena Lawa.

தற்சமயம் தேர்ந்தெடுக்கப்பட்டது:

Luke 23: FNVDC12

சிறப்புக்கூறு

பகிர்

நகல்