Joni 5

Na Veivakabulai ena i Sisili

1Ni sa oti na veika o ya, sa qai yaco e dua na nodra solevu na Jiu, ka a mani lako cake kina ki Jerusalemi o Jisu. 2E tiko volekata na Matamata ni Sipi mai Jerusalemi e dua na i sisili ka yacana ena vosa vakaiperiu o Pecisaita, ka tiko kina e lima na kena vale. 3Era davo tu kina e lewe vuqa na tauvimate - o ira na mataboko, na lokiloki, na wamalai [ka ra waraka tiko me vakayavalati na wai. 4E dau lako sobu ki na i sisili e dua na agilosi ena so na gauna ka vakayavalata na wai. Ia o koya ga e sobu e liu ki wai ena gauna e vakayavalati kina sa vakabulai sara mai na mate kecega e tauvi koya.] 5A sa tiko e kea e dua na tamata ka sa yabaki 38 na dede ni nona tauvimate tu. 6Ni sa raici koya o Jisu ni davo koto, ka sa kila ni sa tauvimate vakabalavu voli mai, a sa qai kaya vua, “O via bula se segai?”

7A sauma na tamata tauvimate ka kaya, “Sa sega saka ni dua na tamata me kauti au ki na i sisili ni sa vakayavalati na wai; ia ni'u sa dau sasaga tiko kina, sa lako tale mai e dua ka mai liu vei au.”

8Sa qai kaya vua o Jisu, “Tu cake, taura na nomu i davodavo, ka lako.” 9E a bula vakasauri sara o koya, ka taura na nona i davodavo ka vakatekivu me lako.

Ia na siga o ya na Siga ni Vakacecegu, 10ka ra sa kaya kina na Jiu vua na tamata sa vakabulai, “Oqo na Siga ni Vakacecegu, e vakatabui ena noda Lawa mo colata tu o iko na nomu i davodavo.”#Nie 13.19; Jere 17.21

11Ia sa qai sauma vei ira o koya, ka kaya, “Na tamata ka sa vakabulai au sa tukuna vei au me'u taura na noqu i davodavo ka lako.”

12Era sa qai tarogi koya tale, “O cei na tamata sa kaya vei iko mo cakava na ka oqo?”

13Ia sa sega ni kilai Jisu na tamata ka sa vakabulai, baleta ni ra sa lewe vuqa era sa tu e kea, ni sa lako lo yani o Jisu.

14Ni sa oti na veika o ya, sa qai kunei koya o Jisu ena Valenisoro, ka kaya vua, “Rogoca, o sa bula vinaka oqo; mo kakua ni valavala ca tale, de qai yaco vei iko e dua na ka e ca vakalevu cake.”

15Sa qai lako na tamata o ya ka tukuna vei ira na Jiu ni sai Jisu ga sa vakabulai koya. 16Era sa qai tekivu vakacacani Jisu na Jiu, baleta ni a cakava na veika o ya ena Siga ni Vakacecegu. 17A sa mani kaya kina vei ira o Jisu, “Sa cakacaka tikoga o Tamaqu, ka'u sa cakacaka talega oi au.”

18Na vosa oqo e qai vakavuna me ra lomakatakata ga kina vakalevu na Jiu me ra vakamatei koya; ni sega walega ni a vakacacana na Siga ni Vakacecegu o koya, ia sa tukuna talega ni sa Tamana dina na Kalou, ka sa vakavuna kina me rau tautauvata kei na Kalou.#Ym 2.16

Na Lewa sa Tu Vua na Luve ni Kalou

19E a qai sauma kina o Jisu ka kaya vei ira, “Au tukuna vakadodonu sara vei kemuni: ni sega ni dua na ka e cakava vakai koya ga na Luvena, sa cakava ga na ka e raica ni cakava tiko o Tamana. Na veika ga sa cakava na Tamana, sa cakava talega na Luvena. 20Ni sa lomana na Luvena o Tamana ka vakaraitaka kina vua na veika kece sa vakayacora. Ena vakaraitaka vua na veicakacaka e lelevu cake mai na ka oqo, mo ni na kurabui kece kina. 21Me vaka sa vakaturi ira cake na mate o Tamana, ka vakabulai ira, sa vakakina na Luvena, sa vakabulai ira sa vinakata o koya. 22Sa sega talega ni lewa e dua na tamata o Tamana, ia sa lesia na Luvena me vakatau lewa ena ka kecega, 23me ra vakarokorokotaka kina na Luvena na tamata kecega me vaka era vakarokorokotaka na Tamana. O koya e sega ni vakarokorokotaka na Luvena e sega talega ni vakarokorokotaka na Tamana, o koya ka a talai koya mai.

24“Au sa tukuna vakadodonu sara vei kemuni ni o koya sa rogoca na noqu vosa, ka vakabauti koya sa talai au mai, sa nona na bula tawamudu; ena sega ni lewai me cudruvi, ia sa toki ga mai na mate ki na bula. 25Au sa tukuna vakadodonu sara vei kemuni: sa lako tiko mai na gauna, io sa yaco dina mai, era na rogoca kina na mate na domo ni Luve ni Kalou, ka ra na bula o ira era sa rogoca. 26Me vaka sa bula vakai koya ga na Tamana, sa solia vakakina vua na Luvena me bula vakai koya ga; 27ka sa solia na kaukauwa me vakatauca na lewa, ni sa Luve ni Tamata o koya. 28Dou kakua ni kurabuitaka na ka oqo; ni sa lako tiko mai na gauna era na rogoca kina na domona o ira kecega na mate 29ka ra na lako cake mai na nodra i bulubulu: o ira era i valavala vinaka era na tu cake tale ka bula, ia o ira era i valavala ca era na tu cake tale ka cudruvi.

Na Veivakadinadina ka Baleti Jisu

30“Sa sega ni dua na ka au sa cakava rawa ena noqu kaukauwa ga vakataki au; au sa vakataulewa ga me vaka na ka sa tukuna vei au na Kalou. Sa dodonu kina na noqu lewa, baleta ni'u sa sega ni via muria ga na lomaqu, ia na loma i koya ga sa talai au mai.

31“Kevaka au sa tukuni au tikoga vakai au, sa sega kina ni dina na noqu i tukutuku. 32Ia sa tiko tale e dua ka sa mai tukuni au, ka'u sa kila ni sa dina na nona i tukutuku me baleti au. 33Sa i Joni na tamata o ni a tala vua eso na nomuni tamata, ka sa tukuna o koya na ka dina.#Joni 1.19-27; 3.27-30 34E sega ni kena i balebale o ya ni'u sa vakararavi oi au ki na i tukutuku ni tamata; ia au sa tukuna ga na ka oqo mo ni vakabulai kina. 35Sa vaka e dua na cina o Joni, sa caudre ka serau mai, ka o ni a rekitaka na nona rarama ena dua na gauna lekaleka.#Sr 48.1 36Ia sa tu oqo na i vakadinadina ena vukuqu ka sa levu cake mai na kena sa solia o Joni: na veika ka'u sa cakava, o ya na veicakacaka sa solia mai vei au o Tamaqu me'u vakayacora, era sai vakadinadina oqo ena vukuqu ka vakaraitaka ni sa talai au mai o Tamaqu. 37Ia o Tamaqu, o koya sa talai au mai, sa dau tukuni au talega. O ni se sega mada ni bau rogoca na domona se raica na matana,#Maciu 3.17; Mari 1.11; Luke 3.22 38ka o ni sega talega ni maroroya na nona vosa e lomamuni, baleta ni o ni sa sega ni vakabauti koya ka sa tala mai. 39O ni sa vulica na i Vola Tabu baleta ni o ni sa nanuma mo ni na kunea kina na bula tawamudu. Ia na i Vola Tabu oqo sa tukuni au ga!#Br 4.1 40Ia o ni sa bese ga ni lako mai vei au me nomuni kina na bula.

41“Au sa sega ni vakasaqara na veivakarokorokotaki ni tamata. 42Ia au sa kilai kemuni, ka'u sa kila ni sa sega ni tiko e lomamuni na yalo ni lomana na Kalou. 43Au sa lako mai ena kaukauwa i Tamaqu, ia o ni sa sega ni ciqomi au; ia, ke lako ga mai e dua ena nona kaukauwa ga vakai koya, o ni sa ciqoma. 44O ni sa dau vinakata ga mo ni veivakacerecerei vakataki kemuni, ka sega ni tovolea mo ni vakacerecerei mai vua na Kalou e duabau ga. Mo ni na qai vakabauti au li vakacava? 45Ni kakua kina ni nanuma ni'u na beitaki kemuni vei Tamaqu. O Mosese, o koya o ni sa nuitaka vakalevu, sai koya ga ena beitaki kemuni. 46Kevaka o ni sa vakabauti Mosese vakaidina, o ni na vakabauti au talega vakakina, baleta ni sa vola o koya na veika me baleti au. 47Ia me vaka na nomuni sa sega ni vakabauta na veika sa volai, o ni na qai vakabauta li vakacava na noqu vosa?”

தற்சமயம் தேர்ந்தெடுக்கப்பட்டது:

Joni 5: FNVDC12

சிறப்புக்கூறு

பகிர்

நகல்