Joni 3

O Jisu kei Nikotimo

1E dua na nodra i liuliu na Jiu, a yacana o Nikotimo, ka lewe ni lawalawa ka ra vakatokai na Farisi. 2A qai lako o koya vei Jisu ena dua na bogi ka kaya vua, “Vakavuvuli, keimami sa kila ni o ni sa lako mai vua na Kalou me i vakavuvuli, ni sega ni dua na tamata e cakava rawa na veicakacaka mana o ni sa cakava oqo ke sega ni tiko vata kei koya na Kalou.”

3Sa qai sauma o Jisu ka kaya vua, “Au tukuna vakadodonu sara vei iko: kevaka e sega ni sucu tale e dua na tamata, ena sega ni raica rawa na matanitu ni Kalou.”

4Sa kaya vua o Nikotimo, “Ena sucu rawa vakaevei e dua na tamata ni sa tamata bula tu? E rawa li ni curu tale ki na kete i tinana ka me qai la'ki sucu tale mai?”

5Sa qai kaya o Jisu, “Au tukuna vakadodonu sara vei iko: kevaka e sega ni sucu e dua na tamata ena wai kei na Yalo Tabu, ena sega ni curu rawa ki na matanitu ni Kalou. 6Sa vakayago o koya sa sucu ena yago, ka sa vakayalo o koya sa sucu ena Yalo Tabu. 7Kakua ni kurabui ni'u sa kaya vei iko, ‘E dodonu mo sucu tale.’ 8Sa dau liwa na cagi ki na yasana e digitaka; o sa rogoca ga na kena rorogo, ia o sega ga ni kila na yasana e lako mai kina se na yasana sa lako yani kina. Sa vaka talega kina o ira yadua era sa sucu ena Yalo Tabu.”

9Sa qai vosa o Nikotimo ka kaya vua, “Ena yaco rawa vakaevei na veika oqo?”

10Sa qai sauma o Jisu ka kaya vua, “O iko e dua na nodra i vakavuvuli levu na Isireli, ia o qai sega tu ni kila na veika oqo, ne? 11Au tukuna vakadodonu sara vei iko, keitou sa kaya tiko na veika keitou sa kila, ka tukuna na veika keitou sa raica; ia sa sega ga ni dua vei kemudou sa gadreva me vakabauta na neitou i tukutuku. 12Kevaka au sa tukuna vei kemudou na veika vakavuravura ka dou sa sega ni vakabauta, dou na qai vakabauta rawa vakaevei kevaka au sa tukuna vei kemudou na veika vakalomalagi?#Ym 9.16,17 13Sa sega ni dua na tamata e se bau lako cake oti ki lomalagi ka vakavo duadua ga na Luve ni Tamata, o koya ka sa lako sobu mai lomalagi.”#Br 3.29

14Me vaka ga na nona sa laveta cake na gata parasa o Mosese mai na loma ni vanua lala, sa dodonu me na laveti cake talega vakakina na Luve ni Tamata,#Tiko 21.9; Ym 16.5-7 15me nodra kina na bula tawamudu o ira vakayadua era sa vakabauti koya. 16Ni sa lomani vuravura sara vakalevu vakaoqo na Kalou, sa solia kina na Luvena e duabau ga, me ra kakua ni mate kina o ira yadua era sa vakabauti koya, ia me nodra ga na bula tawamudu. 17Ni sa sega ni tala mai na Luvena ki vuravura na Kalou me veilewaitaki vuravura, ia me ra vakabulai ga na kai vuravura ena vukuna.

18O ira sa vakabauta na Luvena era na sega ni lewai; ia o ira era sa sega ni vakabauta sa lewai oti tu, baleta ni ra sa sega ni vakabauta na Luve ni Kalou e duabau ga. 19Oqo na yavu e tau kina na lewa: a sa lako mai na rarama ki vuravura, ia era sa vinakata ga na tamata na butobuto ka cata na rarama, baleta ni sa rui vakasisila na nodra i valavala. 20O ira kece sa kitaka na i valavala ca era sa cata na rarama ka sega ni lako mai ki na rarama, baleta ni ra besetaka me kunei na nodra i tovo vakasisila. 21Ia o ira sa vakayacora na ka dina sa lako mai ki na rarama. Oqo me vakaraitaki kina ni veika era sa kitaka sa vakayacori mai na nodra talairawarawa vua na Kalou.

O Jisu kei Joni

22Ni sa oti na veika o ya, e ratou sa qai lako o Jisu kei iratou na nona tisaipeli ki na vanua o Jutia; a sa tiko mai kina kei ira ka veipapitaisotaki. 23A veipapitaisotaki tale tikoga o Joni mai Enoni, voleka ki Selimi, ka ni levu kina na wai. Era sa lako tikoga yani vua na tamata ka sa papitaisotaki ira o koya. 24(E a se bera ni biu o Joni ki na valeniveivesu ena gauna o ya.)#Maciu 14.3; Mari 6.17; Luke 3.19,20

25E a tubu e dua na veileti vei ira na tisaipeli i Joni kei na dua na Jiu ena vuku ni veivakasavasavataki. 26E ratou sa qai lako vei Joni na nona tisaipeli ka kaya vua, “Vakavuvuli, o ni nanuma tiko na tamata o drau a tiko vata mai na tai kadua ni Joritani, o koya o ni a mai tukuna tiko, e sa veipapitaisotaki tiko ena gauna oqo o koya, ka ra sa lako kece tikoga vua na tamata!”

27Sa qai sauma o Joni ka kaya, “E sega ni dua na tamata e rawata e dua na ka, kevaka e sega ni soli vua mai lomalagi. 28Oi kemudou vakai kemudou e rawa ni o dou vakadinadinataka ni'u a kaya, ‘Ni'u sega ni Mesaia oi au, ia ni'u a talai ga me'u liu mai vua.’#Joni 1.20 29Sa nona ga na tagane vou na yalewa vou; ia na i tokani ni tagane vou, o koya ka tu voli e kea ka vakarorogo tiko, sa reki ni sa rogoca sara na domo ni tagane vou. Oqo na vuna au sa rui marau dina kina vakalevu. 30Sa dodonu me levu cake tikoga o koya, ka me'u lailai sobu tikoga oi au.”

O Koya sa Lako mai Lomalagi

31O koya sa lako mai cake, sa levu cake vei keda kecega; o koya sa tubu e vuravura sa kai vuravura ga ka sa vosataka ga na veika vakavuravura. O koya sa lako mai lomalagi sa levu cake vei keda kecega. 32Sa mai tukuna o koya na ka sa raica ka rogoca, ia e sega ga ni dua e vakabauta na nona i tukutuku. 33Ia o koya sa vakabauta na nona i tukutuku sa vakadinadinataka kina ni sa dina ga na Kalou. 34O koya sa tala mai na Kalou sa mai tukuna na vosa ni Kalou; sa tukuna rawa ena vuku ni Yalo Tabu ka a solia vakayauyau vua na Kalou. 35Sa lomana na Luvena na Tamana ka sa solia ki ligana na veika kecega.#Maciu 11.27; Luke 10.22 36O koya sa vakabauta na Luvena sa nona na bula tawamudu; ia o koya sa talaidredre vua na Luvena ena sega ni raica na bula, ia ena tiko ga vua na cudru ni Kalou ka tawamudu.

தற்சமயம் தேர்ந்தெடுக்கப்பட்டது:

Joni 3: FNVDC12

சிறப்புக்கூறு

பகிர்

நகல்