Mateo 15

Ri cach'ulan re ri ticawex

(Mr. 7:1-23)

1Ec'uchiri', jujun chique ri fariseos y raj c'utunel re ri tzijpixab e petinak Jerusalem, xekib ruc' ri Jesús y xquitz'onoj che:

2—¿Su'chac ri tijo'n la caquipalajij ri quic'utu'n can ri kati'-kamam? Ma rique na caquich'aj ta ri quik'ab nabe na echiri' quewa'ic —xecha'.

3Ec'u ri Jesús xutz'onoj chique:

—¿Su'chac ralak capalajij alak Rutzij Upixab ri Dios ruma e ca'an alak tak ri quic'utu'n can ri mam alak? 4Ma ri Dios jewa' xtakan che:

Chalok'oj quik'ij rachu-akaw Éx. 20:12

yey

We c'o junok quebuyaj ruchu-ukaw ruc' itzel ch'a'tem,

ri' lic takal che cacamisaxic Éx. 21:17

xcha ri Dios.

5»No'j ralak cabi'ij alak: “Utz we junok cubi'ij chique ruchu-ukaw: Na utz taj canto' alak, ma ri to'bal cajawax che alak, nubi'tisim chic re nukasa'n chwach ri Dios.” 6Yey chiwach ralak, china ri cabi'n re wa', na chirajawaxic ta chi che quebuto' ruchu-ukaw. Jec'ula' 'anom alak che Rutzij Upixab ri Dios pacha' na jinta uchac, ma e takem alak ri xa no'jibal alak.

7»¡Xa queb palaj alak! Lic c'u katzij ri ubi'im lo ri Dios pawi' alak ruma ri k'alajisanel Isaías, echiri' xubi'ij:

8Wa' wa tinamit xa ruc' ruwaque' caquiyac nuk'ij,

no'j ri canima' lic naj c'o wi chwe.

9Na jinta c'ana cutikoj caquilok'oj nuk'ij,

ma ri c'utunic caqui'ano xa takanic que achijab Is. 29:13

—xcha'.

10Ec'uchiri', xebusiq'uij ruq'uiyal winak y xubi'ij chique:

—Lic tape alak y lic maja alak usuc' wa': 11Ri coc bi puchi' ri ticawex na e ta ri cach'ulan re; no'j ri ch'a'tem quel lo puchi', e wa' ri cach'ulan re —xcha'.

12E tak c'u rutijo'n xekib ruc' y xquibi'ij che:

—Kajawal, ¿xeta'maj la lic xpe coyowal ri fariseos echiri' xquita ri xbi'ij la? —xecha'.

13Ri Jesús xuc'ul uwach:

—Wa' wa'chijab na jinta runa'oj ri Dios cuc', pacha' e tico'n na e ta ticom ruma ri Nukaw c'o chila' chicaj; ruma c'u ri', camich' bi c'a pa ratz'ayak. 14Mixoc il chique, ma rique pacha' e potz' e c'amal quiwach cach e potz'. Yey we juna potz' cuc'am uwach juna chic potz', quicabichal c'u ri' quebe'tzak bi pa siwan —xcha'.

15Ec'uchiri', ri Pedro xubi'ij che ri Jesús:

—K'alajisaj la chike sa' que'elawi wa jun c'ambal na'oj —xcha'.

16Xubi'ij c'u ri Jesús chique:

—¿Ix neba cuq'uil ri na jinta quina'oj puwi wa'? 17¿Na quimaj ta neba usuc'? Ma e janipa ri coc bi puchi' ri ticawex que'ec pa rupa y tec'uchiri', cu'pamaj bi. 18No'j ri ch'a'tem quel lo puchi', pa ranima' cawinakir wulok y ec'u wa' ri cach'ulan re ri ticawex. 19Ma pa ranima' ri ticawex quel wi lo tak wa': ritzel na'oj, ri camisanic, ri macunic chirij ri c'ulaniquil, ri caretz'abej uwa uk'ij ruc' jun chic na uc'ulel taj, ri elek', ri rak'ubal y ri itzel ch'a'tem chirij junok. 20E tak wa' ri cach'ulan que ri ticawex. No'j ri cawa' junok yey na cuch'aj ta ruk'ab nabe, wa' na cuch'ulaj ta rubinic junok —xcha'.

Ri cubulibal uc'u'x jun ixok na cuq'uil ta ri aj judi'ab

(Mr. 7:24-30)

21Ri Jesús xel bi chiri' y xopon pa tak ri luwar re Tiro y re Sidón. 22C'o c'u jun ixok aj Canaán jekel chiri', rire casiq'uinic xc'un chwach ri Jesús, jewa' cubi'ij:

—¡Wajawal, lal ri Ralc'o'al can ri rey David, chinjuch' ca'n co che'la! Ma c'o jun walit lic c'ax uc'ulumam ruma c'o puk'ab jun itzel uxlabixel —xcha'.

23No'j ri Jesús na xuc'ul ta c'ana uwach. Ec'u rutijo'n xekib ruc' y lic xebelaj che ri Jesús:

—Ch'a'bej can la li'xok ma lic casiq'uinic teran lo chikij —xecha'.

24Ec'uchiri', xubi'ij ri Jesús:

—Ri'in intakom lo xew cuma rutinamit ri Dios e aj Israel, ri pacha' e bexex e sachinak —xcha'.

25No'j rixok xkib ruc' ri Jesús, xuxuc rib chwach y xubi'ij che:

—¡Wajawal, chinto'o co la! —xcha'.

26Ri Jesús xubi'ij che:

—Na usuc' taj we c'o junok cumaj ri quiwa ri ralc'o'al y cuc'ak chiquiwa ri tz'i' —xcha'.

27Xubi'ij c'u rixok:

—Katzij, Wajawal, pero ri tz'i' caquitij ne ruc'aj ri wa catzak chuxe' rumexa ri cajaw —xcha'.

28Ec'uchiri', xubi'ij ri Jesús che:

—¡Ixok, lic nim ri cubulibal c'u'x la! E chu'ana uc' la sa' ri ca'aj la —xcha'. Chupa c'u ri' la jok'otaj ri ralit xcunutajic.

Ri Jesús quebucunaj uq'uiyal yewa'ib

29Ri Jesús xel bi chiri' y xic'ow chuchi' ri mar re Galilea; tec'uchiri', xak'an chwa ri juyub y xtz'uyi'ic. 30Uq'uiyal c'u winak xebopon chila' pa c'o wi Rire. Yey xequic'am lo ri e sic, ri e potz', ri e me't, ri e t'um cakan quik'ab y uq'uiyal yewa'ib chic. Xequiya c'u chwach ri Jesús, y Rire xebucunaj conoje. 31Ec'u ri winak lic xcam canima' che echiri' xquilo xech'aw ri e me't, ri e t'um cakan quik'ab quecunutajic, ri e sic quebinic, ri e potz' quetzu'nic. Y xquijek c'u caquiyac uk'ij ri Dios re Israel.

Ri Jesús quebutzuk cajib mil achijab

(Mr. 8:1-10)

32Ec'uchiri', ri Jesús xebusiq'uij rutijo'n y xubi'ij chique:

—Lic cajuch' ca'n nuc'u'x chique wa ticawex, ma e urox k'ij wa' e c'o wuc' yey na jinta chi quiwa. Na cuaj taj quebenutak bi chicocho e la' na jinta c'o quitijom, ma c'axtaj quebe'k'ochk'ob pa be —xcha'.

33Xquibi'ij c'u rutijo'n che:

—¿Pa que'karika wi wa re quebekatzuk wa uq'uiyal ticawex? Ma chupa wa luwar na jinta ne c'o e jekelic —xecha'.

34Ri Jesús xutz'onoj chique:

—¿Janipa chi pam c'o iwuc'? —xcha'.

Rique xquibi'ij:

—Wukub pam c'o kuc' y jujun raltak co car —xecha'.

35Ec'uchiri', ri Jesús xtakan che quetz'uyi' ri ticawex chu'lew. 36Xuc'am c'u ri wukub pam puk'ab ruc' tak ri car, y xtioxin chwach ri Dios puwi wa'. Tec'uchiri' xuwech' upa y xuya bi chique rutijo'n yey rique xquijach chique ri winak. 37Conoje xewa'ic y lic xenoj chi utz. Tec'uchiri', ruc' tak rukax ri wa'im xquimolo, xquinojisaj wukub chacach. 38Ri xewa'ic e cajib mil chi achijab yey na xebajilax tane rixokib y rac'alab.

39Ec'uchiri', ri Jesús xebuch'a'bej can ri winak; xoc bi pa jun barco y xe'ec pa tak ri luwar re Magdala.

தற்சமயம் தேர்ந்தெடுக்கப்பட்டது:

Mateo 15: acrT

சிறப்புக்கூறு

பகிர்

நகல்