ᐅᐸᓓᑭᔅ ᒫᑎᐤ 7

ᐁᑳᐎᓚ ᑎᐹᔅᑯᓂᑫᒃ

(ᓘᒃ 6:37–38, 41–42)

1ᐁᑳᐎᓚ ᑎᐹᔅᑯᓂᑫᒃ, ᐁᑳ ᑭᓚᐗᐤ ᑭᒋ ᑎᐹᔅᑯᓂᑲᐎᔦᒃ᙮ 2ᐁᑯ ᐊᓂᒪ ᑎᐹᔅᑯᓂᑫᐎᒃ ᑫ ᐃᔑ ᑎᐹᔅᑯᓂᑫᔦᒃ, ᐁᑯ ᓀᔥᑕ ᑭᓚᐗᐤ ᑫ ᐃᔑ ᑎᐹᔅᑯᓂᑲᐎᔦᒃ: ᐊᓂᒪ ᑎᐹᔨᑲᓐ ᓀᔥᑕ ᑫ ᐃᔑ ᑎᐹᔨᑫᔦᒃ, ᐁᑯ ᓀᔥᑕ ᑭᓚᐗᐤ ᑫ ᐃᔑ ᑎᐸᐊᒫᑲᐎᔦᒃ᙮ 3ᑖᓀᑭ ᐌᒋ ᓀᔥᑕ ᓈᑲᑕᐙᐸᑕᒶᑦ ᑭᒋᔖᓐ ᑳ ᐱᓯᓂᑦ, ᐁᑳ ᒫᑲ ᐁ ᓈᑲᑕᐌᓕᑕᒪᓐ ᐱᒥᑕᐗᐸᔓ ᑎᐱᓚᐌ ᑭᔅᑭᔑᑯᒃ ᑳ ᐃᑕᑾᒃ? 4ᓀᔥᑕᐱᑯ ᑖᓂ ᑫ ᑮ ᐃᔑ ᐃᑕᑦ ᑭᒋᔖᓐ, ᐁᑯᔑ ᓂ ᑳ ᐗᓚᐎᐱᑌᓐ ᑳ ᐱᓯᓂᔭᓐ; ᒫᑎᑲ, ᒫᑲ ᐱᒥᑕᐗᐸᔓ ᐃᑕᑾᓐ ᑎᐱᓚᐌ ᑭᔅᑭᔑᑯᒃ᙮ 5ᑭᓚ ᐅᑖᔭᒥᐁᑳᓱᔉ, ᓃᔥᑕᒻ ᐗᓚᐎᐌᐱᓇ ᐱᒥᑕᐗᐸᔓ ᑭᔅᑭᔑᑯᒃ ᐅᒋ; ᐁᑯ ᒫᑲ ᑫ ᓇᐋᐱᔭᓐ ᑭᒋ ᐗᓚᐎᐱᑕᒶᑦ ᑳ ᐱᓯᓂᑦ ᑭᒋᔖᓐ᙮

6ᐁᑳᐎᓚ ᒥᓕᑯᒃ ᐊᑎᒶᒃ ᑳ ᐸᓓᑲᓂᓕᒃ, ᐁᑳ ᓀᔥᑕ ᐌᐱᓇᒫᑯᒃ ᑯᑯᔕᒃ ᑭ ᐙᐌᔑᐅᓂᐙᐗ, ᒫᔅᑯᒡ ᐎᓚ ᑲᑕ ᑕᑕᑯᔅᑳᑕᒶᒃ, ᓀᔥᑕ ᐁ ᐊᐸᒦᔅᑕᑖᑾᒃ ᑭᒋ ᐅᔑᑯᐃᑖᑾᒃ᙮

ᓇᑐᑕᒫᑫᒃ, ᓈᓇᑕᐌᓕᑕᒧᒃ, ᐹᐸᐙᔨᑫᒃ

(ᓘᒃ 11:9–13)

7ᓇᑐᑕᒫᑫᒃ, ᑭ ᑳ ᒥᓕᑲᐎᓈᐗᐤ ᒫᑲ; ᓈᓇᑕᐌᓕᑕᒧᒃ, ᑭ ᑳ ᒥᔅᑫᓇᐗᐤ ᒫᑲ ᐹᐸᐙᔨᑫᒃ, ᑭ ᑳ ᐹᔅᑭᑌᓇᒫᑲᐎᓇᐗᐤ ᒫᑲ᙮ 8ᐌᓴ ᒥᓯᐌ ᑕᑐ ᐊᐌᓇ ᑳ ᓇᑐᑕᒫᑦ, ᒥᓛᑲᓂᐎᐤ; ᐊᓇ ᒫᑲ ᑳ ᓈᓇᑕᐌᓕᑕᒃ ᒥᔅᑲᒻ; ᐊᓇ ᒫᑲ ᑳ ᐹᐸᐙᔨᑫᑦ ᐹᔅᑭᑌᓇᒪᐗᐤ᙮ 9ᓀᔥᑕᐱᑯ ᑫᑯ ᐃᓕᓕᐤ ᐁ ᐃᑕᔑᔦᒃ, ᑮᔥᐱᓐ ᓇᑐᑕᒫᑯᑦ ᐅᑯᓯᓴ ᐊᓚᑯᓇᐗ, ᐊᓯᓂᔭ ᓈ ᑲᑕ ᒥᓓᐤ? 10ᓀᔥᑕᐱᑯ ᑮᔥᐱᓐ ᓇᑐᑕᒫᑯᑦ ᓇᒣᓴ, ᑭᓀᐱᑾ ᓈ ᑲᑕ ᒥᓓᐤ? 11ᑮᔥᐱᓐ ᒫᑲ ᑭᓚᐗᐤ ᐁ ᐋᑕ ᒪᒋᑣᔦᒃ ᑫᔅᑫᓂᑕᒧᐌᑴ ᑭᒋ ᐃᔑ ᒥᓓᑾᒃ ᒥᓗ ᒥᓕᐌᐎᓇ ᑭᑦ ᐊᐙᔑᒥᔑᐙᐗᒃ, ᑖᓂ ᒫᑲ ᐃᔥᐱᔥ ᐊᐙᓯᑌ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᑫ ᐎ ᒥᓛᑦ ᒥᓗ ᑫᒀᓇ ᐊᓂᐃ ᑳ ᓇᑐᑕᒫᑯᑦ?

12ᐁᐗᑯ ᐅᒋ ᒫᑲ ᒥᓯᐌ ᑫᒀᓇ ᐁ ᐃᔑ ᓇᑕᐌᓕᒣᑾᒃ ᐃᓕᓕᐗᒃ ᑭᒋ ᑐᑕᑖᑾᒃ, ᐁᑯ ᓀᔥᑕ ᑐᑖᑯᒃ: ᐌᓴ ᐁᐗᑯ ᐅᒪ ᐅᓚᔓᐌᐎᓐ ᓀᔥᑕ ᑳ ᐯᒋ ᐃᑗᒋᒃ ᐅᑭᔅᑭᐙᐃᑫᐗᒃ᙮

ᑳ ᔖᑯᐗᒃ ᐃᔥᒀᑌᒻ

(ᓘᒃ 13:24)

13ᐱᑐᑫᒃ ᑳ ᔖᑯᐙᒃ ᐃᔥᒀᑌᒻ: ᐌᓴ ᐋᓚᑲᔥᑲᐤ ᐃᔥᒀᑌᒻ, ᓀᔥᑕ ᑌᓂᔕᐗᐤ ᒣᔅᑲᓇᐤ ᓂᔑᐗᓈᑎᓯᐎᓂᒃ ᑳ ᐃᑕᒧᒃ, ᒥᒉᑎᐗᒃ ᒫᑲ ᐊᓂᐁᓕᐤ ᑳ ᒥᑎᒣᒋᒃ᙮ 14ᐌᓴ ᔖᑲᐗᐤ ᐃᔥᒀᑌᒻ, ᓀᔥᑕ ᔖᑲᐗᒧ ᒣᔅᑲᓇᐤ ᐱᒫᑎᓯᐎᓂᒃ ᑳ ᐃᑕᒧᒃ, ᒐᑲᐙᔑᔑᐗᒃ ᒫᑲ ᑳ ᒥᔅᑲᑭᒃ᙮

ᐁ ᐃᔑ ᓂᑖᐎᑭᑦ ᒥᓈᑎᒃ

(ᓘᒃ 6:43–44)

15ᔮᒀᒥᔅᑖᑯᒃ ᓇᔅᐹᒡ ᐅᑭᔅᑭᐙᐃᑫᐗᒃ ᑳ ᐯᒋ ᓈᑎᑖᑾᒃ ᒫᓂᔥᒑᓂᔑᒃ ᑳ ᐃᔑᐅᒋᒃ, ᐊᑖᒥᒃ ᒫᑲ ᒪᐃᑲᓇᐗᒃ ᑳ ᐅᑳᔑᑭᒥᒋᒃ᙮ 16ᐅᑦ ᐃᑖᑎᓯᐎᓂᐙᐗ ᑭ ᑳ ᐅᒋ ᑭᔅᑫᓕᒪᐙᐗᒃ, ᐃᓕᓕᐗᒃ ᓈ ᒪᐗᓱᐗᒃ ᔓᒥᓇ ᒥᔑᑲᐎᒥᓇᑯᔒᒃ ᐅᒋ, ᓀᔥᑕᐱᑯ ᐸᑫᓵᒥᓂᓈᓇᒃ ᑳᔓᑌᐎᒥᓇᑯᔒᒃ ᐅᒋ? 17ᐁᑯ ᐃᔑ ᒫᑲ ᒥᓯᐌ ᑕᑐ ᒥᓗ ᒥᓈᑎᒃ ᓂᑖᐎᑭᑕᐤ ᒥᓗᒥᓇ; ᒫᑲ ᒪᒋ ᒥᓈᑎᒃ ᓂᑖᐎᑭᑕᐤ ᒪᒋᒥᓇ᙮ 18ᒥᓗ ᒥᓈᑎᒃ ᓇᒪᐎᓚ ᑲᑕ ᑭ ᓂᑖᐎᑭᑕᐤ ᒪᒋᒥᓇ, ᓇᒪ ᓀᔥᑕ ᒪᒋ ᒥᓈᑎᒃ ᑲᑕ ᑭ ᓂᑖᐎᑭᑕᐤ ᒥᓗᒥᓇ᙮ 19ᒥᓯᐌ ᑕᑐ ᒥᓈᑎᒃ ᐁᑳ ᑳ ᓂᑖᐎᑭᑖᑦ ᒥᓗᒥᓇ ᑲᐗᐙᑲᓂᐎᐤ, ᐃᔥᑯᑌᒃ ᒫᑲ ᐌᐱᓈᑲᓂᐎᐤ᙮ 20ᐊᓂᐃ ᐃᔑᑣᐎᓇ ᑳ ᓂᑖᐎᑭᑖᒋᒃ ᑭ ᑳ ᐅᒋ ᑭᔅᑫᓕᒪᐙᐗᒃ᙮

ᐋᑎᑦ ᑲᑕ ᐃᑕᑲᓂᐎᐗᒃ, ᓇᒪᐎᔅᑳᒡ ᑭ ᐅᒋ ᑭᔅᑫᓕᒥᑎᓇᐗᐤ

(ᓘᒃ 13:25–27)

21ᓇᒪᐎᓚ ᒥᓯᐌ ᑕᑐ ᐊᐌᓇ ᑳ ᐃᔑᑦ, ᑌᐯᓕᒋᑫᔭᓐ, ᑌᐯᓕᒋᑫᔭᓐ, ᑲᑕ ᐱᑐᑫᐤ ᑭᒋᑭᔑᑳᐎ ᐅᑭᒫᐎᐎᓂᒃ; ᒫᑲ ᐊᓇ ᑳ ᑐᑕᒸᑦ ᐅᑦ ᐃᑌᓕᑕᒧᐎᓂᓕᐤ ᓄᑖᐎᔭ ᑭᒋᑭᔑᑯᒃ ᑳ ᐃᑖᓕᒋ᙮ 22ᒥᒉᑦ ᓂ ᑳ ᐃᑎᑾᒃ ᐁᐗᑯ ᑫ ᑭᔑᑳᒃ, ᑌᐯᓕᒋᑫᔭᓐ, ᓇᒪ ᓈ ᓂ ᑮ ᐅᒋ ᑭᔅᑭᐙᐃᑳᓈᓐ ᑭᑦ ᐃᔑᓂᑳᓱᐎᓐ? ᓀᔥᑕ ᑭᑦ ᐃᔑᓂᑳᓱᐎᓂᒃ ᓂ ᑮ ᐗᓚᐎᐌᐱᓈᓈᓇᒃ ᒪᒋ ᐊᒑᑾᒃ? ᓀᔥᑕ ᑭᑦ ᐃᔑᓂᑳᓱᐎᓂᒃ ᓂ ᑮ ᑐᑌᓇᓐ ᒥᒉᑦ ᒫᒪᔅᑳᒋ ᐊᑑᔅᑫᐎᓇ? 23ᐁᑯ ᒫᑲ ᑫ ᐃᑕᑭᒃ, ᓇᒪᐎᔅᑳᑦ ᑭ ᐅᒋ ᑭᔅᑫᓕᒥᑎᓇᐗᐤ: ᐊᐗᔅ ᓇᑲᔒᒃ ᑭᓚᐗᐤ ᑳ ᒪᒋᑐᑕᒣᒃ᙮

ᓃᔓ ᐊᐌᓈᓇᒃ ᑳ ᑮ ᐙᔅᑲᐃᑲᓂᑫᒋᒃ

(ᓘᒃ 6:47–49)

24ᐁᐗᑯ ᐌᒋ ᐊᐌᓇ ᐱᐁᑕᒧᑴ ᐅᐅ ᓂᑦ ᐃᑗᐎᓇ, ᑎᐅᑕᒧᑴ ᒫᑲ, ᓂ ᑳ ᐃᑣᓐ ᐁ ᓇᔅᐱᑕᐙᑦ ᐃᓕᓕᐗ ᑳ ᑲᑫᑕᐌᓕᑕᒥᓕᒋ, ᑳ ᑮ ᐅᔑᑖᓕᒋ ᐅ ᐙᔅᑳᔨᑲᓂᒥᓕᐤ ᑌᑖᐱᔅᑳᒃ᙮ 25ᑭᒥᐗᓈᐳ ᒫᑲ ᑮ ᐸᑭᑎᓐ, ᑮ ᓕᔅᑭᐳᑌᐤ ᒫᑲ, ᑮ ᓗᑎᓐ ᒫᑲ, ᐁ ᐸᑲᒥᐸᓕᒃ ᐊᓂᒪ ᐙᔅᑳᔨᑲᓂᒃ; ᓇᒪᐎᓚ ᒫᑲ ᑮ ᐸᑭᑎᓐ: ᐌᓴ ᑮ ᐅᔑᑖᓂᐗᓐ ᑌᑖᐱᔅᑳᒃ᙮

26ᒥᓯᐌ ᑕᑐ ᐊᐌᓇ ᒫᑲ ᑳ ᐯᑕᒃ ᓂᑦ ᐃᑗᐎᓇ, ᐁᑳ ᒫᑲ ᑳ ᑐᑕᒃ, ᓇᔅᐱᑕᐌᐤ ᐃᓕᓕᐗ ᑳ ᑲᑫᐹᑎᓯᓕᒋ, ᑳ ᑮ ᐅᔑᑖᓕᒋ ᐅ ᐙᔅᑳᔨᑲᓂᒥᓕᐤ ᓓᑳᒃ: 27ᑭᒥᐗᓈᐳ ᒫᑲ ᑮ ᐸᑭᑎᓐ, ᑮ ᓕᔅᑭᐳᑌᐤ ᒫᑲ, ᑮ ᓗᑎᓐ ᒫᑲ ᐁ ᐸᑲᒥᐸᓕᒃ ᐊᓂᒪ ᐙᔅᑳᔨᑲᓂᒃ; ᑮ ᐸᑭᑎᓐ ᒫᑲ: ᓈᔅᐱᒡ ᒫᑲ ᑮ ᑯᔅᑖᒥᑾᓐ ᐁ ᐸᑭᑎᒃ᙮

ᒋᓴᔅ ᐅᑲᔥᑭᐅᐎᓐ

28ᑮ ᐃᑭᓐ ᒫᑲ, ᐃᔅᐱ ᒋᓴᔅ ᑳ ᑮ ᑭᔑᐃᑗᑦ ᐅᐅ ᐃᑗᐎᓇ, ᐃᓕᓕᐗᒃ ᑮ ᒫᒪᔅᑳᑕᒬᐗᒃ ᐅ ᑭᔅᑭᓄᐊᒫᑫᐎᓂᓕᐤ; 29ᐌᓴ ᑮ ᑭᔅᑭᓄᐊᒪᐌᐤ ᑖᐱᔅᑯᒡ ᐊᐌᓇ ᐁ ᐋᔮᑦ ᑲᔥᑭᐅᐎᓂᓕᐤ, ᓇᒪᐎᓚ ᒫᑲ ᑖᐱᔅᑯᒡ ᐅᒪᓯᓇᐃᑫᐗᒃ᙮

தற்சமயம் தேர்ந்தெடுக்கப்பட்டது:

ᐅᐸᓓᑭᔅ ᒫᑎᐤ 7: MCNT91

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

The text of the Bible in Moose Cree is in the public domain.

ᐅᔅᑭ ᑎᔅᑌᒥᓐᑦ பற்றி மேலும் அறிக