Mak 15
15
Jisas tedi boswos lemtan Paelet
1Tei jubung bwaleh ba saleanni le valin God ram sasabisi mini goah rat wuhu Temwat bi lemtan tarutni bi goah ratei tarutnan toptowan, bi ram leli no hal. Raboji bata Jisas bi ramali ban ben Paelet. 2Paelet muhleli vehuran ini bep nuhu, “Kik ba kobi subunan Jiusni?” Jisas balu ini bep nuhu, “Nana nanong go kobep.” 3Saleanni le valin God rabep leut ah rat kapma vanokon Jisas. 4Paelet muhleli mwetani ini nuhu, “Apma tebulong ah koma walu vehuranni rahe ini? Kita leut halkawu lengleng ah rabep vanokom ah rat kapma.” 5Tehu ba Jisas teba vepte vehuran mase bwaleh nga. Paelet tetkoh tokol i apma nong.
Paelet teveveik i Jisas nuhu man mat radanae
6Tedok nei le taron kanleutnan Pasova ba Paelet tedok neling gabarani aji dini ut le valin illan niah Jiusni rat uhleli ini. 7Tei le to nanong ba aji tedi le valin illan tei han ah Barabas, mini ajini ah rat bwale dobo mini aji kawunan vini. Bi ratok neih las i ajini. 8Entorah tarutni rat sasabisi utbwaleh bi ram uhleli i Paelet nuhu nemaleli tapmak goah tedok neleli. 9Paelet muhleli i ni nuhu, “Kamdoni nuhu nama ling gabarani subunan Jiusni mini gimi?” 10Tevep tapmak gonani tekita goah saleanni le valin God, ba rat telngi Jisas li ngan, tei ninge u gonani rat kitriani Jisas. 11Saleanni le valin God rabinvine jinen tarutni nuhu ran ba uhlelite Jisas an ba ran uhleli Barabas. 12Paelet modoptop bep nuhu, “Kamdoni nuhu namaleli apma mini aji ah kamahu i subu non Jiusni?” 13Ram nga bamul ban mini rabep nuhu, “Kowah bata vanokon kawolwol.” 14Ba Paelet muhleli i ni bep nuhu, “Kapmwaan apma ah teleli?” Tehu ba ram ngaa ngate, rabep nuhu, “Kowah bata vanokon kawolwol.” 15Paelet mwiling gabarani Barabas nuhu bat leli ba tarutni rabatti ronga. Mweleli ram riji Jisas bi malngi ban mini ni u goah rama wah bata vanokon kawolwol.
Soldiani rat mamaplel i Jisas
16Soldiani ramali Jisas mwesak le koron valin Paelet. Tei han ut iginan ah Praetoriam. Bi ramahu riaknan soldiani mapma ut bwaleh. 17Rat koro bwelakte tememe vanokon Jisas. Ramali kawa ah rowon tedi bi ramleli tedoki bujun, bi ramabwesani lin. 18Rabawo netrani ngaa mini tekeni goah rabat vihni meresnan. Rabep mini nuhu, “Kabihni meresnam subunan Jiusni.” 19Ramriji bwelan bujun i nguduka, bi ram gasu vanokon. Ramaiah li bukulsu bi ramdingdu nokon. 20Entorah rat mamaplel sera ini, bi ram goro bwelakte tememe bahka niah tei tekeni bwelan subu, bi ramgo bamula bwelan vanokon. Bi ram matkae ban ut ah ratwah bata vanokon kawolwol iginan.
Ratwah bata Jisas vanokon kawolwol
21Entorah rat van li hal ba soldiani rabutdihi aji han ah Saemon. Tei ni aji at li vini ah Saerin. Tei teman Aleksanda nuru Rupas. Ramdi jukun nuhu, nemaselkani kawolwol non Jisas. 22Ramali Jisas ban ut ah rat tehu i Golgota. Meramnan nuhu, “Ut ah tei tekeni sun bujun mete.” 23Ramaskak dopmi waen ah rat leli mini apma tekaka nuhu nemamni, ba Jisas tebaleptenga. 24Rabwah bata vanokon kawolwol, bi rabahtani bwelanni mapma mase. Rabohni dais metan goah rabat wutdihi nuhu itan ah batlepte nokon. 25Tei le to telapet jubung, entorah ratwah bata Jisas vanokon kawolwol. 26Ratul bata vehuranni niah rat wutdihi nokon Jisas. Vehuran i rat teulu nong ba tevep nuhu, “Subunan Jiusni ahe.” Ram dakrani vehuran nong nokon kawolwol non Jisas. 27Ramali ajinan lasan karu, bi rabwah bata nuru nokon kawolwol go maun Jisas. Rat takrani go li maun ah mwiji bi go li maun ah mwii. 28Tega rop bwiswis nanong nagoah rat vep le ululan at mate niah tevep nuhu, “Tewulkian mini ajinan lasanni.”
29Tarutni ah rat hural li hal, ramdok nebohni buju bi ram raji bi rabep nuhu, “Aha, kik naah niah kot vep nuhu kon sengsegelani valin God bi kom lel lihi i goah teraba, niah maneli ren kajil nge ba monok? 30Kosipma dopmi tavan dini kawolwol, bi kobamwesa bamula kik.” 31Saleanni le valin God, bi goah rat wuhu Temwat ramdima nebep mini ni nuhu, “Tevamwesa aji watwatnendeni, u apma ba teba vamwesa bamulani nga?” Ramdi nemanih lelei. 32“Tekabis nuhu Kraes niah subunan Isrelni nesupmulma dini kawolwol metan goah tan vihni mwetaknganan.” Ajinan lasan nuru niah rat tehi nuru maun Jisas ratru sok masen goah rat raji Jisas.
Jisas temat
33Tei loloknan ren ba bwera wulmet morori vini nong, tei aoa kajil ngate. 34Tei le to kajil ba Jisas mwenga rah bwerakte bep nuhu, “Eloi, Eloi, lema sabaktani?” Meramnan nuhu, “Nok God, nok God, u apma ba komling gabarani nama tapmak ahe?” 35Datngin tarutni ah rat rongo, rabep nuhu, “Karu rongo mahu Elaeja.” 36Aji rei ni ban mali koten bi mosongi le waen bi ban maskani nokonwaka vawan bongon Jisas. Bep nuhu, “Asi, tam gita gitasi nuhu Elaeja man sipma nesru vatavan dini kawolwol?” 37Jisas mwenga rah bwerakte bi mat. 38Bwera sereul ah tetka goro ut sangbak le valin God mamret loloknan. Tevawora mere bi mamret mwisip tavan. 39Salenan soldiani tedi sasari kawolwol non Jisas. Bep nuhu, “Mwetaknga letlet nangate nuhu tei Nujun God ahe.”
40Havinni ratti nge nawut negit. Goah rat sok masen havinni nong ba tei Meri niah tei aji havin at Magdala, bi Salome, bi Meri, niah tei dajin Jemes niah tei jihikte, bi Joses. 41Ratahkuru Jisas, entorah tedi Galili bi rat tok nebeji. Havinni go halkawu lengleng ratmudi iginan le to nanong, niah rat tepma jukun dini ut Jerusalem.
Rat tipmi Jisas
42-43Tevan sasari ut tebwarek ba Josep aji at Aramatia mapmabis. Tei ni datngin ajinan toptowan, niah rat rong mwetani. Bi tewovani ut kokon non God niah batgapma. Ren ah Sabat ba tei tepma sasarite, Josep ban bi muhleli mamjin Jisas i Paelet ah tei tebamtaji tenga. 44Paelet tetkoh tokol i goah terong goah Jisas temat vilbwaleh. Mahu aji le salenan soldiani bi muhleli ini nuhu, “Jisas temate?” 45Tei limalen goah Paelet terongo apma ah salenan soldiani tevep, bi mwegamko i mamjin Jisas mini Josep. 46Josep tekele sereul tedap masi. Ban masru mamjin Jisas dini kawolwol bi mulubwa i sereul nong. Ban malngi le muu niah rat leli le vet. Balihli bwera vet goro wan muu nong. 47Meri niah tei aji havin at Magdala, bi Meri goah tei dajin Joses ratti negita, bi rat kita ut ah rat telngi Jisas iginan.
தற்சமயம் தேர்ந்தெடுக்கப்பட்டது:
Mak 15: APMA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published by the Bible Society of the South Pacific in 1977.
