Luk 6
6
Wane'inoto 'ana Sabat
(Matiu 12:1-14; Mak 2:23; 3:6)
1Te'e fa Sabat, tha Jisas bia disaepol nia ki kera tatha 'i laa te'e o'ole'e witi. Ma disaepol nia ki keka tabia tei fungi'i witi, ma keka 'akathaa 'i laa na 'abada sui keka 'ania mige'e doo 'eki. 2Ma tei Farasii ki keka soeto'oda, “Ura taa na muka ilia doo na biibirangaa abu 'e lufia musi ilia 'ana sabat?”
3Tha Jisas 'e lu'uda ka 'una 'eri, “Musi te'emania bo'o laa na buka Abu sulia si doo baa tha Deved 'e ilia si manga nia bia wane nia ki kera thaofa baa? 4Nia 'e lae 'i laa na bi'u Abu tha God, ma ka ngalia berete na kera fa'aabua fana tha God ma ka 'ania bia ka falea la'u bo'o fana to'a nia ki. Sui, na biibirangaa abu kulu 'e lufia ta 'atona imole ni bana si 'ania berete 'eri talito'ona bo'o na'a wane ni fo'a ki tha God keki 'ania.”#1 Samuel 21:1-6; Levitikas 24:9 5Sui tha Jisas ka sore'a 'i sada, “Na Kaluwane imole na wane 'inoto 'ana Sabat.”
6Ma 'ana te'e fa Sabat la'u bo'o, tha Jisas 'e lae laa na te'e bi'u ni fo'a ma ka to'o doo 'i kula 'eri. Ma te'e wane na 'aba a'ola nia 'e mae 'e nii la'u bo'o kula 'eri. 7Ma tei wane ni to'o doo ki 'ana biibirangaa, ma tei Farasii ki, kera too la'u bo'o kula 'eri, ma keki lio bada 'ana tha Jisas ka raa bana 'ana fa'a'akwaalaa 'ana Sabat, fasi keka feengi nia 'ana garolaa. 8Sui, tha Jisas 'e thaito'omana bana manatada, ma nia ka ba'e 'una 'eri fana wane 'eri, “Tata'e 'oko takwe 'i na'ofana imole ne'e ki sui.” Ma wane 'eri 'e tata'e ma ka takwe 'i na'ofana imole 'eki sui. 9Ma tha Jisas ka ba'e 'una 'eri 'i fada, “Kwai soeto'omulu'a fasi, taa na biibirangaa abu kulu 'e alamatania fasi kuki ilia 'ana sabat? Ililana doo le'a ki, mada a'i, ililana doo ta'a ki? Fa'amarukilana ta wane, mada a'i, thaungilana ta wane?” 10Tha Jisas 'e lio ura kera sui bo'o, sui ka ba'e 'una 'eri ura wane 'eri 'abana 'e mae neri, “Tekwasia mai 'abamu.” Ma nia ka tekwasia mai 'abana, ma 'abana ka le'a bona'a. 11Si manga 'eri keka rake'iri 'asia na'a, ma keka ba'e ofu 'i ma'alutada kwailiu ura ta si taa na keki ilia 'ana tha Jisas.
Tha Jisas 'e filia na Aposol nia ki
(Matiu 10:1-4; Mak 3:13-19)
12'Ana te'e si manga la'u bo'o, tha Jisas 'e ta'e gwauna te'e fa tolo ura fo'alaa. Ma nia ka too fa rodo laula'u 'eri 'ana ba'etalelana tha God 'ana fo'alaa. 13Fanua 'e dani, nia ka 'ai uria disaepol nia ki 'i sana, ma ka filia taafulu wane ma roo wane na 'e 'alangida 'ana aposol ki: 14Tha Saemon na tha Jisas 'e 'alangia 'ana tha Pita, bia do'orana na tha Adaru, tha Demesi ma tha Jon, tha Filip ma tha Batolomiu, 15tha Matiu ma tha Tomas, tha Demesi kaluwane tha Alfias, ma tha Saemon na kera 'alangia la'u bo'o 'ana na Silot#6:15 Silot, Wane Jiu ki na kera thathami tarilana 'ai na to'a Rom fasia Israel., 16tha Jiudas na kaluwane tha Demesi, bia tha Jiudas Iskariot, wane na kai 'oloa maelana tha Jisas fana ma'alimae nia ki.
Nia 'e to'odoo ma ka fa'a'akwaa imole ki
(Matiu 4:23-25)
17Tha Jisas 'e sifo mai fasia gwauna fa tolo 'eri bia aposol nia ki, ma ka takwe te'e si kula deedema bia tei disaepol 'oro nia ki la'u. Ma tei imole 'oro ki la'u bo'o na kera too 'i kula 'eri, kera lae mai fasia balifanua 'i Jiudia, ma fasi Jerusalem, ma fasi ma'e toaa susu ki 'i Taea ma 'i Sidon na kera too karangia amali. 18Kera lae mai ura rongolana ba'elana tha Jisas, ma fasi tha Jisas ka fa'a'akwada fasia mata'ia kera ki. Ma wane na kera too 'ana ano'edoo ta'a ki kera lae la'u bo'o mai, ma tha Jisas ka fa'a'akwada la'u bo'o. 19Na imole 'eki sui keka ili ura sualana tha Jisas, sulia na suukwa'ia 'eri na 'e lae mai fasi nia, 'e fa'a'akwa imole ki sui.
Se'ethaathalalaa ma liodilalaa
(Matiu 5:1-12)
20Tha Jisas 'e lio kau fana disaepol nia ki ma ka sore'a,
“'E le'a famalu'a imole ki na mulu siofa'a, sulia 'inotoa tha God doo kamalu'a.
21'E le'a famalu'a imole ki na mulu thaofa si manga 'eri, sulia kamalu'a muki aabusu.
'E le'a famalu'a imole ki na mulu aangi si manga 'eri, sulia kamalu'a muki waela.
22'E le'a famalu'a si manga na imole ki kera lalakwata'i kamalu'a, keka kwalangi kamalu'a, keka ngata labata'i kamalu'a, ma keka su'a 'ani kamalu'a nunufana Kaluwane imole.
23Muka se'ethaathala ma muka wa'e si manga doo 'eki 'e fuli, sulia na kwaiaraa ba'ita 'e ma'akwali kamalu'a na'a 'i thalo. Sulia kooko'o kera ki kera ilia la'u bo'o doo 'eki 'ana profet ki 'i na'o mai.
24Sui, 'e ta'aa ka tatha famalu'a na imole ki na mulu riki'i doo si manga 'eri, sulia na mulu todaa sui na'a na too le'alaa kamalu'a.
25'E ta'a ka tatha famalu'a imole ki na mulu fanga aabusu si manga 'eri, sulia kamalu'a muki thaofa.
'E ta'a ka tatha famalu'a imole ki na mulu waela si manga 'eri, sulia kamalu'a muki liodila, ma muki aangi.
26'E ta'a ka tatha famalu'a si manga na imole ki sui kera ba'e le'a suli kamalu'a, sulia na kooko'o kera ki kera ilia la'u bo'o si doo 'eki 'ana profet na kesi mamana ki.”
Jisas 'e ngata sulia liothaulaa 'ana ma'alimae ki
(Matiu 5:38-48; 7:12)
27“Sui ku sore'a famalu'a imole na mulu rongoa ba'elaku, muka liothau 'ana ma'alimae kamalu'a ki, ma muka ade le'a ura imole ki na kera su'alanga'i kamalu'a. 28Muka fo'a ura ade le'alaa tha God fana imole ki na kera aranga'i kamalu'a, ma muka fo'a ura imole ki na kera ade ta'aa 'ani kamalu'a. 29Ma mada sa ta wane ka fidalia babalimu, 'oko falea ka fidalia la'u bo'o ruana babali. Ma mada sa ta imole ka ngalia na to'oni ba'ita 'oe, 'oko alamatania ka ngalia la'u bo'o to'oni fa'ekwa 'oe. 30'Oko fale 'ana imole ki na kera gani 'oe ura ta si doo, ma mada sa ta imole ka ngalia ta si doo 'amu'a, a'i 'osi gania la'u ura olita'ilana fasi nia. 31Ma ta si taa na muka thathamia na imole 'ee'eta ki keki ilia famalu'a, muka ilia la'u bo'o 'i fada.”
32“Mada sa mulu liothau bamalu'a 'ana imole ki na kera liothau 'ani kamalu'a, muki todaa kwaiaraa ura taa? Sulia imole abula ta'aa ki mena kera liothau badalu'a 'ana imole ki na kera liothau 'ani kera. 33Ma mada sa mulu ade le'a bamalu'a fana imole ki na kera ade le'a famalu'a, muki todaa kwaiaraa ura taa? Sulia imole abula ta'aa ki mena kera ilia la'u bo'o si doo 'una 'eri. 34Ma mada sa mulu fale doo bamalu'a fana imole ki na mulu thaito'omana keki du'ua, muki todaa kwaiaraa ura taa? Sulia imole abula ta'aa ki mena kera fale la'u bo'o fana imole abula ta'aa ki, fasi keka todaa la'u bada du'ulana falelaa kera ki. 35A'i, muka liothau 'ana ma'alimae kamalu'a ki, ma muka ade le'a fada, ma muka fale doo ma a'i musi ma'asia la'u keki du'ua. Mada sa muka ade 'una 'eri, na kwaiaraa kamalu'a kai ba'ita, ma muki abula mala maka kamalu'a tha God na 'e 'inoto ka tatha. Sulia nia 'e ade le'a fana imole ta'aa ki ma imole ki na birangada si le'a. 36Muka too 'ana tatakomia 'uria la'u bo'o na Maka kamalu'a wane 'ana tatakomia.
Na to'o dooa sulia keeketoa
(Matiu 7:1-5)
37“'E a'i musi ketoa ta imole, fasi God a'i si keto kamalu'a la'u bo'o. Ma a'i musi falea kwaakwa'elaa fana ta imole, fasi God a'i si falea la'u bo'o kwaakwa'elaa famalu'a. Muka manatalubea imole ki, fasi tha God ka manatalube kamalu'a la'u bo'o. 38Muka fale 'ana imole ki, fasi tha God ka fale famalu'a la'u bo'o. Ma tha God kai falea na falelaa nia famalu'a ka 'uria ta wa'i na kera lulaa ma keka felesia, ma keka dedea ka fungu ma ka olomaalinga bo'o. Ma tha God kai fale famalu'a, ka 'uria la'u bo'o na falelaa na mulu fale fana imole 'ee'eta ki.”
39Sui tha Jisas ka ba'e 'ana u'unua ni tarifula la'u fada: “Ta wane na maana 'e rodo 'e 'afeta'i ka talaia ta wane na maana 'e rodo la'u bo'o. Laalae 'e ade 'una 'eri, keki 'asi keero'a laa na ta kilu. 40Na wane ki na kera to'o doo 'i sada, 'e 'afeta'i keka ba'ita talua na wane na kai to'o doo. Sui laalae na wane 'eki na kera fafurongo keka ngali te'efau 'ana to'odooa 'eki, keki 'uria la'u bo'o na wane ni to'o doo 'eri.”
41“Ura taa na 'oko rikia si geegeo 'i laa na maana do'oramu, sui 'osi rikia bo'o si kade'e 'ai ba'ita na 'e too 'i laa na maamu? 42Ura taa na 'oko fa'arongoa do'oramu, ‘do'ora 'ae, alamatania kwai lafua na geegeo 'ena fasi maamu,’ sui 'osi tala rikia bo'o na kade'e 'ai na 'e ni la maamu? 'O agufaafi! Etana, 'oki lafua fasi kade'e 'ai 'eri fasia maamu, sui fata'i 'e tala'ana 'oki rikia na geegeo 'i laa na maana do'oramu.”
Na 'Ai bia Foana
(Matiu 7:16-20; 12:33-35)
43“Na 'ai le'a, 'e 'afeta'i ka fungu 'ana foofo'e doo ta'aa ki. Ka 'uria la'u bo'o, na 'ai ta'aa, 'e 'afeta'i ka fungu 'ana foofo'e doo le'a ki. 44'Ai ki sui kuki thaito'omana kwa'i 'ai 'ufita 'ana fo'e doo na 'e fungu 'ania. 'E a'i 'osi fufua fo'e 'ai le'a ki fasia na kwalotootore. 45Na wane le'a 'e ilia la'u bo'o doo le'a ki sulia si manatale'e doo le'a na 'e too 'i liona. Na wane ta'aa 'e ilia la'u bo'o doo ta'aa ki sulia si manatale'e doo ta'aa 'e too 'i liona. Sulia si doo na 'e too 'i liona wane, nia na kai kwalusitafa mai 'ana ba'elana.”
Rowane kera kasi Biu
(Matiu 7:24-27)
46“Ura taa na muka 'alangi nau 'ana Lord, sui musi ilia bo'o si doo ki na ku sore'a 'i samulu'a? 47Ma tei bana na 'e lae mai saku, ka rongoa ba'elaku, ma ka ade sulia, nau kwai faatania samulu'a taana 'e uria. 48Nia 'e 'uria na wane na 'e kasia bi'u nia fafona gwa fau, ma ka 'ili ka sifo la fau 'eri ura boalana biu 'eri. Ma si manga na dani 'e 'aru, ma kafo ka lu'u ma ka fungu mai, 'e 'afeta'i ka 'isua bi'u 'eri, sulia wane 'eri kasi le'a 'ana biu 'eri. 49Ma wane na 'e rongoa na ba'elaku, ma si ade sulia, 'e 'uria wane na 'e kasia bi'u nia fafona tha'egano, ma a'i si boaa 'ana ta si doo. Si manga na kafo 'e lu'u ma ka fungu mai, ma ka to'o 'ana bi'u 'eri, ma bi'u 'eri ka 'asia ma ka oge te'efau.”
தற்சமயம் தேர்ந்தெடுக்கப்பட்டது:
Luk 6: MLU
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024, SITAG
