Luk 17

Ta'alaa

(Matiu 18:6-7,21-22; Mak 9:42)

1Jisas ka ba'e uria 'aina disaepol nia ki, “Si doo ki na kai adea imole kai abula ta'aa keki lae bona'a mai, sui taa 'e ta'aa ka tatha fana wane 'eri na kai adea imole ki keki abula ta'aa. 2Mada sa ta wane ka adea ta imole fa'ekwa ne'e ki keka abula ta'aa, nia kai le'a fana wane 'eri ki mada sa keki 'uu 'anida la 'amali bia ta fa ma'e fau ba'ita keki kania 'aena luada. 3Adelana bo'o muka rikile'a 'ana abulalamalu'a! Mada sa do'oramu ka abula ta'aa, 'oko ngatafia. Mada sa 'e manata akela, 'oko manatalubea.

4“Doo'anitaa abulalada ka ta'aa 'i femu fiu si manga 'i laa te'e fa thato, ma fiu si manga keka lae mai, keka gani uria manatalubelaa, 'oki manatalube kera bona'a.”

5Ma 'aina aposol nia ki keka sore'a sana Lord, “'O fa'asuukwa'ia fiito'oa kamali'a!”

6Ma nia ka sore'a 'una 'eri, “Mada sa 'oko too mena 'amu'a 'ana na fito'oa mala ta kali mige'e mastad, 'e tala'ana bana 'oki sore'a sana thaame'e 'ai ba'ita ne'e, ‘'oki tata'e fa lalimu ma 'oki fa'ata'e 'oe 'i tala'amu 'i laa 'amali fuu,’ ma nia kai adesuli 'oe.

7“Mada sa ta wane amalu'a 'e too 'ana ta wanenira na kai aafuia tha'egano, mada kai fonoto'i kalia sifisifi. Nia kai fa'arongoa 'ufita 'ana wanenira nia si manga 'e fula mai fasia raa nia, ‘Lae mai 'oko 'ono 'oko fanga fasi?’ 8'E a'i, nia kai sore'a, ‘Kwaithathai 'amu'a 'ana fanga nau, sui 'oko ngalia mai fasia kwa fanga ma kwa ku'u, sui 'oko faafanga 'amu'a.’ 9'Ufita, nia kai sorele'a la'u 'ana wanenira nia uria na 'e ilia si doo na 'e sore'a 'i sana na kai ilia? 'E a'i la'u. 10Ka 'una 'eri la'u bo'o, si manga na 'o adesuli nau, 'oki sore'a 'una 'eri, ‘kamali'a to'anira ni bana, 'e a'i si tala'ana keki 'arata'i le'a 'ani kamali'a sulia mili ilia si raa na sa miki ilia 'uu bo'o.’ ”

Jisas 'e fa'a'akwaa te'e taafulu wane uru 'e thaungida

11Ma Jisas ka lae na'a uria Jerusalem, nia ka tatha 'i ma'alutana balifanua 'i Samaria biia Galili. 12Si manga nia 'e lae na kau uria te'e ma'e toaa, te'e taafulu wane na uru 'e thaungida keka toda nia. Kera takwe tau kau fasi nia 13ma keka 'ai ba'ita, “Jisas, Wane'inoto, 'oko tatakomi kamali'a mai!”

14Nia ka lio uri kera, ka sore'a, “Lae muka faata'i kamalu'a 'i sana na wanenifo'a ki.” Ma si manga kera lae, ma uru ba ka sigi bona'a fasia se'eda. 15Te'e wane 'i ada, si manga na 'e riki nia 'e 'akwaa na'a, 'e oli mai sana tha Jisas ka tangoa tha God 'ana linge'e doo na 'e ba'ita. 16Nia ka 'aru 'i maana 'aena tha Jisas ma ka tango nia. Wane 'eri na wane fasi Samaria.

17Jisas ka soeto'ona, “A'i la'u na taafulu wane ki na ku fa'afaaluda? Ma sikwa wane ki kera ni fei? 18Kera kesi oli bo'o mai ura sorele'alaa talea tha God, talito'ona bana wanekwa'itaa?” 19Sui ka sore'a 'i sana wane 'eri, “Tata'e, 'oko lae, fito'oa 'oe 'e ade 'oe 'oko 'akwaa.”

Fulalana mai na 'Inotoa tha God

(Matiu 24:23-28,37-41)

20Te'e si manga, tei Farasi ki kera soeto'ona ura si manga taa na 'inotoa tha God kai fula, Jisas ka lu'uda, “Na 'inotoa tha God na doo 'e a'i kesi lio filoa, 21fasia to'a keka sore'a, ‘Nia ne'e,’ mada ‘Nia la ko'o,’ sulia na 'inotoa tha God 'e ni sui na'a 'i ma'alutamalu'a.”

22Ma nia ka sore'a 'i sana disaepol nia ki, “Tootoo kai fula mai si manga na muki 'eesiwane'ae ura rikilana fa thato Kaluwane imole, sui sa muka rikia 'e a'i. 23Imole ki keka sore'a, ‘Nia ne'e!’ Mada ‘Nia ko'o!’ A'i musi tari burida. 24Sulia fa thato Kaluwane imole kai fula, kai 'uria na maanu na 'e la'afia te'e bali 'ana thalo loo ka fula 'ana ruana bali. 25Sui taa Kaluwane imole kai fulato'ona se'efiia ba'ita fasi, ma uni'i wane ne'e keki lalakwata'i nia.

26“Fa thato Kaluwane imole ki kai 'uria fa thato tha Noa ki. 27Imole baa ki kera fanga, ku'u, luma'aa ka fuli ki laalae ka fula bana 'ana si manga tha Noa ka kotho la 'Aka ba. Sui na kafo olo baa ka fula ma ka thaungi kera te'e fau.

28“Ka 'uria la'u bo'o fa thato baa ki tha Lot. Imole baa ki kera fanga ma keka ku'u, keka uusia ma uusi 'ani doo ki, keka fasi doo ki ma keka kasi bi'u ki. 29Sui taa fa thato ba tha Lot 'e 'akwasia Sodom, na era fau 'aa'ako ka 'asia mai fasi la thalo loo ma ka thaungi kera te'efau.

30“Nia kai 'una 'eri la'u bo'o 'ana fa thato kaluwane imole kai fula mai. 31'Ana fa thato 'eri na imole na 'e too maa 'e a'i si oli la'u laa luma uria aludooa nia ki. To'a na kera too laa raa keka 'una 'eri la'u bo'o, kesi oli la'u ura aludooa kera 'i luma. 32Manatato'ona kwaina tha Lot! 33Tei bana na kai ili ura ra'u ngadolaa 'ana marukia nia kai fa'adolaa, ma tei bana na 'e eekwa 'ana marukia nia kai fa'amarukia. 34Ku fa'arongo kamalu'a, 'ana fa rodo 'eri roo imole keki teo laa te'e thamata'ia, te'e imole keki ngalia ma te'e imole ka too. 35-36Roo kini keki raa ofu, te'e kini keki ngalia, ma te'e kini ka too.”

37Ma disaepol nia ki keka soeto'ona, “Fei na doo 'eki kai fuli Lord?” Ma nia ka lu'uda ka 'una 'eri, “Fei bana na se'edoo mae 'e ni 'i ei, na tha'aro na kai 'ania doo mae ka ni la'u bo'o 'i ei.”

தற்சமயம் தேர்ந்தெடுக்கப்பட்டது:

Luk 17: MLU

சிறப்புக்கூறு

பகிர்

நகல்