Luk 11

Tha Jisas 'e to'odoo sulia fo'alaa

(Matiu 6:9-13; 7:7-11)

1'Ana te'e fa thato, tha Jisas 'e fo'a 'ana te'e si kula. Ma si manga 'e fo'a ka sui na'a, te'e wane 'ana disaepol nia ki ka ba'e 'una 'eri uri nia, “Wane'inoto 'ae, 'o to'olangania fo'alaa 'i samili'a, 'uria la'u bo'o tha Jon 'e to'olangania fo'alaa 'i sana disaepol nia baa ki.”

2Tha Jisas ka ba'e sore'a 'i sada, “Si manga muki fo'a, muka sore'a,

“ ‘Maka 'ae,

imole ki sui keka fa'aba'itaa 'ada thatamu na 'e abu.

'Inotoa 'oe kai lae mai.

3Ma 'oko falea mai si fanga 'i famili'a na 'e tala'ana teete'e fa thato.

4Ma 'oko manatalubea na abula ta'alaa kamali'a ki, ka 'uria la'u bo'o na miki manatalubea ta'alaa na imole ki na kera abula ta'aa 'i amili'a.

Ma 'osi talai kamali'a 'i laa ilito'oa.’ ”

5Ma tha Jisas ka ba'e 'una 'eri 'i sana disaepol nia ki, “Mada sa ta wane 'ani kamalu'a ka lae ura luma ta wane kwaimani nia la 'inito'ona rodo, ma ka ba'e 'una 'eri uri nia, ‘Wane kwaimaani nau 'ae, 'oki falea si mai ta ulu fa berete 'i faku, 6uria 'aku te'e wane kwaimani 'e too mai 'ana te'e laea ka fula 'i saku, sui taa 'e a'i kwasi too 'ana ta si fanga fasi kwa falea 'i ana.’ 7Ma wane kwaimani 'eri 'e too mai luma ka ba'e 'una 'eri, ‘'e a'i 'osi fa'a'aberota'i nau la'u! Nga 'olofolo 'e fono na'a, nau ma wela nau ki mika ni na'a 'i laa thamata'ia. 'E 'afeta'i na'a uria na kwai tata'e la'u ura falelana ta si doo 'i femu.’ 8Ku fa'arongo kamalu'a, do'anitaa wane 'eri ka lalakwa mena 'ana ililana ta si doo fana wane kwaimaani nia, nunufana kwaimaania keero'a, ma nunufana suusu'ulaa 'ana ganilaa nia, wane kwaimaani nia 'eri kai tata'e ma ka falea bona'a taa ni bana 'e 'ato'ia. 9Kwai fa'arongo kamalu'a; Muki gani, muka todaa doo ki na mulu gani uria. Muka rofe, ma muki rikia. Muki kiikidi, ma 'olofolo kai 'ifi 'i famalu'a. 10Sulia na imole ki sui na kera gani, keki todaa si doo na kera gani uria. Ma imole ki sui na kera rofe, keki fulato'ona. Ma imole ki sui na kera kiikidi, na 'olofolo kai 'ifi fada.

11“Ma tei 'i amalu'a maka ki, mada sa ta wela 'oe ka gania ta si i'a, ma 'oko falea 'amu'a loi fana? 12Ma mada sa ta wela 'oe ka gani uria ta thaalu na kukua, 'oko falea 'amu'a ta faafari fana? 'E a'i bona'a! 13Ma to'a muka ta'aa mena, mulu thaito'omana falelana si doo le'a ki fana wela kamalu'a ki, sui Maka kamalu'a 'i thalo 'e le'a ka tatha ka talu kamalu'a fata'i sulia nia kai falea Mango'edoo Abu fana imole ki na kera gani nia!”

Tha Jisas ma tha Saetana

(Matiu 12:2-30; Mak 3:20-27)

14'Ana te'e si manga, tha Jisas 'e taria te'e ano'edo ta'a fasia te'e wane na fokona 'e 'ato. Ma si manga na ano'edo ta'a 'eri 'e thaka fasia, wane 'eri ka thafali ngata bona'a. Ma imole 'oro na kera ofu 'i kula 'eri, keka kwele 'asia na'a. 15Ma tei imole ki 'i ada keka ba'e 'una 'eri, “Tha Jisas 'e taria ano'edo ta'a ki 'ana suukwa'ia tha Saetana nena, na gwaunga'i 'ana ano'edo ta'a ki.”#11:15 Ta thata 'ana tha Saetana la'u bo'o na tha Bielsebul.

16Ma tei to'a 'i ada keka ilito'ona tha Jisas, ma keka gani uria na kai ilia ta si doo ni kwelelaa 'ania, fasi ka faatania na nia 'e too 'ana suukwa'ia fasia tha God. 17Ma sulia tha Jisas 'e thaito'omana bana na manatalada, nia ka ba'e 'una 'eri fada, “Mada sa ta 'inotoa ba'ita kera firu 'i ma'alutada kwailiu keki tagalo. Ma mada sa ta bi'uwane firua ka too 'i ma'alutada, keki ukali kwailiu. 18Ma laalae tha Saetana ka firu la'u bana bia toaa nia, 'una 'eri, 'inotoa nia ka takwe 'ufita? Nau ku sore'a si doo 'eki sulia mulu sore'a nau ku arasia ano'edo ta'a ki 'ana suukwa'ia tha Saetana. 19Mada sa ku arasia ano'edo ta'a ki 'ana suukwa'ia tha Saetana, 'una 'eri ma suukwa'ia ni tei 'ana na tei wane kwairo'omi kamalu'a ki kera 'aruto'ona ura arasilana ano'edo ta'a ki? Adelana bo'o neri, kera na keki sore'a garolamalu'a. 20Mada sa ku arasia ano'edo ta'a ki 'ana suukwa'ia tha God, nia 'e faatania na'a famalu'a na 'inotoa tha God 'e fula na'a ma'alutamalu'a neri.”

21“Si manga ta wane suukwa'i ka alua 'ana si ra'uma ni firulaa nia ki ma nia ka fonoto'i le'a su'usia toaa nia, na aludooa nia ki ka fono ka la'u. 22Sui si manga ta wane na 'e suukwa'i ka talu nia la'u 'e lae mai ma ka firu bii nia, ma ka siitatha faafi nia, na wane 'eri kai ngali te'efau bona'a na ra'uma ni firulaa nia ki na 'e fito'ona, ma ka tolingia doo 'eki sui fana wane kwaimani nia ki.

23“Ma tei na 'e a'i si lae mai buriku, nia na ma'alimae nau. Ma tei na 'e a'i si konidoo bii nau, nia kai tagalanga'idoo.”

Olilana mai na ano'edo ta'a

(Matiu 12:43-45)

24Tha Jisas 'e ba'e la'u 'una 'eri, “Si manga kera arasia ano'edo ta'a ka lae fasia ta wane, nia ka tatha laa na fanua raarange'a, ma ka rofea ta si kula na kai too la'u 'iei. Ma si manga 'e rofe ma ka a'i na'a, nia ka manata 'una 'eri, ‘Nau kwai oli uria na wane ba ku tootoo mai 'i ana 'i na'o sui kwa lae mai fasia.’ 25'Ana si manga 'e oli mai ka fula, nia ka rikia wane ba 'e 'uria ta luma na 'e faalu ma keka kokotoa te'efau. 26Si manga na 'e rikia, nia ka oli la'u ma ka talaia la'u mai ta fiu ano'edo ta'a ka talu nia la'u, ma keka lae mai, keka too la'u laa na wane ba. 'Ana si manga 'eri, wane 'eri ka bi'i ta'a ka talua fata'i manga baa 'i na'o.”

Na se'ethathalalaa mamana

27Si manga tha Jisas 'e sore'a si doo 'eki, te'e kini laa na figua 'eri 'e 'ai ka 'una 'eri, “'E le'a ka tatha 'i fana na kini na 'e fa'afuta 'oe ma ka susufa'i 'oe mai.”

28Sui, tha Jisas 'e lu'ua ka 'una 'eri 'ana, “Mamana, ma 'e le'a ka tatha fata'i fana imole 'eki na kera rongoa ba'elana tha God, ma keka adesulia.”

Imole ki kera thathamia tha Jisas kai ilia ta si doo ni kwelelaa 'ania

(Matiu 12:38-42)

29Ma si manga kera ofu 'oro mai kalia tha Jisas, nia ka ba'e 'una 'eri 'i sada, “Kamalu'a na uni'i wane ta'aa ne'e. Mulu thathami rikia ta si maamalafoa ni kwelelaa 'ania, sui taa 'e a'i kesi falea, talito'ona bana na maamalafoa ba tha profet Jonaa.#11:29 Rikia Matiu 12:40 30Sulia taa na 'e fuli 'ana tha Jonaa na nga maamalafoa fana imole ki 'i Ninifaa na tha God 'e fale nia mai, taa na kai fuli 'ana kaluwane imole na nga maamalafoa fana uni'i wane ne'e na tha God 'e fale nia mai. 31Ma 'ana fa thato na tha God kai ketoa imole ki, na kini ba na 'e gwaunga'i 'ana ma'etoaa 'i Siba kai tata'e, ma kai faatania na ta'alaa kamalu'a ki bare'e wane 'ana uni'i wane ne'e: sula nia 'e lae tau mai fasia susuilana fanu na iano, ura rongolana lioto'oa tha Solomon. Sui taa, wane 'e ba'ita ka tatha ka talua tha Solomon 'e ni 'i se'e, sui musi rongo nia bo'o. 32'Ana fa thato na tha God kai ketoa imole ki, to'a nai Ninifaa keki faatania ta'alaa kamalu'a ki, sulia kera manata oli te'efau na'a fasia garolaa kera ki si manga kera rongoa ngatalana tha Jonaa. Sui ta, wane ba'ita ka tatha ka talua tha Jonaa 'e ni kuna'i.”

Kwaifa'amanataia na tha Jisas 'e 'uria ta la'afa

(Matiu 5:15; 6:22-23)

33Tha Jisas ka ba'e 'una 'eri, “'E a'i ta imole si fa'atharua ta la'afa, ma ka tha'ufunia 'ana, mada ka alua 'i faara ta kwade'e doo. Si manga 'e fa'atharua na la'afa sui, ka alua fuila, fasia ni tei na 'e kotho mai luma, nia ka rikia laala'alana. 34Maamu na la'afa fana se'emu. Manga maamu 'e le'a, se'emu ka fungu 'ana laala'aa. Sui manga maamu 'e ta'aa, ma se'emu ka fungu la'u bo'o 'ana ma'erodo. 35Muka rikile'a 'ania, 'ana na laala'aa na ni 'ani 'oe na ma'erodo ni bana. 36Adelana bo'o mada sa se'emu ka fungu 'ana laala'aa, ma a'i na'a ta si kula si too 'ana ma'erodo, nia kai fungu 'ana laala'aa ka 'uria si manga na laala'aa 'ana kwethu 'e la'afi 'oe.”

Tha Jisas 'e ngatafia na Farasi ki bia wane to'odoo ki

(Matiu 23:1-36; Mak 12:38-40)

37'Ana si manga tha Jisas 'e ngata ka sui na'a, te'e wane 'ana na Farasi ki ka alunga'i nia kai lae ura fangalaa 'i luma nia. Tha Jisas ka lae biia ma ka teo reri na'a 'i sana kula ni fangalaa. 38Ma Farasi 'eri ka kwele 'asia na'a, sulia 'e rikia tha Jisas si sa'u 'aba bo'o sui ka fanga. 39Ma tha Lord ka ba'e 'una 'eri fana, “Kamalu'a Farasi ki, mulu manata isifuufuli 'asia na'a ura sa'ulana bana na bali 'i maa 'ana tiitiu ni ku'u ma fangalaa ki. Sui taa, 'i laa na ruuru'umulu'a 'e fungu 'ana ta'alaa ki sui. 40Guna ki! Musi thaito'omana bo'o, God na 'e thaungania bali 'i maa bana na 'e raa la'u bo'o 'ana bali na 'i laala? 41Aia, muka falea si doo ki na 'e too laa na tiitiu ni ku'ulaa bia doo ni fangalaa kamalu'a ki fana wane siofa'a ki, fasia muki faalu te'efau 'i maana tha God.

42“'E ta'aa famalu'a na Farasi ki, mulu falea na tangafuula si doo 'ana kaala si fanga#11:42 Fanga: Si doo ki na kera alua laa na fanga fasi ka makwa le'a ma na 'ani ka. 'i laa raa kamalu'a ki, sui ta, 'e a'i musi manata ba'ita bo'o ura abula kokotolaa 'i ma'alutana imole ki bia liothaualaa 'ana tha God. Muki falea tangafuula si doo 'ana aludooa kamalu'a ki, sui musi manata fa'ekwa 'ana kokotolaa bia liothaulaa 'ana tha God.”

43“Ka ta'aa famalu'a nga Farasi ki, sulia si manga mulu lae laa na bi'u ni fo'a, muka thathami 'ono 'ana si kula ni 'onolaa wane 'inoto ki. Ma si manga mulu lae 'i maana usia ki, mulu thathamia imole ki keka fa'aba'ita kamalu'a. 44Ka ta'aa famalu'a nga Farasi ki, sulia mulu 'uria na kwainga'ia na a'i kesi 'uia bo'o ta sulufau fafona, si manga wane ki kera fali mena 'i fafona, kera sua, ma 'e a'i kesi thaito'omana bo'o#11:44 Biibirangaa Jiu ki, laalae wane 'e lae fafona kwainga'ia kai sua.”

45Sui te'e wane ni kwafa'amanatai 'ana biibirangaa ka ba'e 'una 'eri, “Wane to'odoo 'ae, si manga 'o ba'e 'una 'eri, 'o ba'e labata'i kamali'a la'u bo'o neri.”

46Ma tha Jisas ka ba'e 'una 'eri, “'E ta'aa famalu'a wane to'odoo ki 'ana biibirangaa, sulia mulu thaungania biibirangaa 'afeta'i 'oro ki fana imole ki, ma ka 'afeta'i 'asia na'a fada ura ro'olaa sulia. Ma ka a'i musi 'adomida la'u bo'o. 47Ka ta'aa famalu'a, sulia mulu raa 'ana sulufau le'a ki 'ana kwainga'ia fana 'aina profet ki, sui doo 'aina koko'o abu kamalu'a ki bana na kera thaumaelida. 48Sulia si doo 'eki, na 'e faatania na mulu alafaafia si doo ta'aa baa ki na kooko'o abu kamalu'a ki na kera ilia. Kera thaungia na profet 'eki, sui kamalu'a muka thaungania kwainga'ia 'i fada. 49Adelana bo'o, tha God 'i laa na lioto'oa nia, ka ba'e 'una 'eri, ‘Nau kwai falea kau na profet ma aposol ki fada, sui ta, kera keki thaumaelia tei wane ada, ma keki ilamatania la'u bo'o tei wane ada.’ 50Nia bo'o na tha God ka falea kwaakwa'ea fana imole ki 'ana uni'i wane ne'e, sulia kera thaumaelia na profet ki sui, 'ita mai 'ana thafalilana fanu na iano, 51thafali mai 'ana maelana tha 'Eibolo ka fula 'ana maelana tha Sakaraea#11:51 Tha 'Eibolo na wane kokota uluna'o na kera thaumaelia laa na Alaofua ba 'i Na'o. Ma tha Sakaraea na wane kokota 'i'isi na kera thaumaelia la'u bo'o laana na Alaofua ba 'i Na'o. na wane ba kera thaumaelia 'i laa lalo ni ta'e 'i ma'alutana era ni afufua ma lalo abu. Si doo mamana ku sore'a 'i samulu'a, tha God kai ketoa imole ki 'ana uni'i wane ne'e, faafia maelana wane 'eki.

52“Ka ta'aa famalu'a wane to'odoo ki 'ana biibirangaa, sulia mulu thau'ufunia na biranga ura thaito'omanalaa 'ana tha God. 'E a'i musi manata mamana la'u bo'o 'ania, ma muka su'usia imole ki fasia thaito'omanalana.”

53Ma 'ana si manga tha Jisas 'e lae na'a fasia ma'etoaa 'eri, na wane ni kwaifa'amanatai ki 'ana biibirangaa ma Farasi ki, ma keka thafali ngata kali nia 'ana soeto'onalaa 'oro ki. 54Ma keka ili ura fulato'onalana ta si doo na tha Jisas kai sore'a mada sa kai garo.

தற்சமயம் தேர்ந்தெடுக்கப்பட்டது:

Luk 11: MLU

சிறப்புக்கூறு

பகிர்

நகல்