Camba 16
16
Raakuukaŋ Ismaayla
1 Saraay yi ɓiti Ibram, a raakɗeeɗi ɗe kuɓu, waaye a raakeen ñaam teeku Haajara pulohee Misra. 2Saraay ɓooffa po a woosa Ibram ne : « Fu hotiɗ ne Nikiɗi hondohiɗ to raak kuɓu, huna na Haajara. Wa miniɗ nik a raak kuɓu, yi nikan yiŋ ngo. » Wa a woo Ibram ineem, a teyɗukka. 3Saraay, ɓiti Ibram, ɓayya ñaamiŋ ɗe pulohee Misra, Haajara, eɗta ƴaar ce Ibram ɗe, a tummba ɗe ɓitiɓ. Weem, raak Ibram tumiɗ kiis ndaŋkiyaah ŋ Kanaan.
4Wa a hun na ɗe, a ammba rook. A inahha ne a ɓarang haa, a yappa ɓoyaŋ ɗe Saraay. 5A yi Saraay a woosa Ibram ne : « In ci jen ya fu ɓek ca ; e ñam deg Haajara ŋ yaah ciŋ ɗa, waaye ina a amboh rook poyi, a kerhiɗisɗi so. Nikiɗi teeɓohaat yi nik ŋ keeh ŋ harmban mi na ɗa. » 6Ibram loffa ɗe ne : « Haajara deey, a ris ñaamiŋ ɗa poyi, in na neɓ ɗa ɗah, fu miniɗ ɗe wa tum. » A camboh ɗe iifiɗ ɗaa, a tumeeɗa ɗe in miskiɗ po a saandohha.
7A kaɗoh kaɗoh po a nikka ŋ sero laaha ŋ waas Suur, ŋ keheƴ hulang ; malaakaaniŋ Nikiɗi raakka ɗe nga, 8a woosa ɗe ne : « Haajara, ñaamiŋ Saraay, fu kurkoh nde ? Fu na kaɗe nde ? » A loffa ɗe ne : « Mi na nupe ɓoyiŋ ngo Saraay. » 9Malaakaaniŋ Nikiɗi woosa ɗe ne : « Wiirka ŋ ɓoyiŋ ɗa, Saraay, fu ree ɗah, ruhsiɗa haf fu ŋ fikiice. » 10A woyissa ɗe ne : « Ŋ hey tume ɓi rimkohan nga ɗa laay po ɓo' minuu ɓa kind. » 11A ɓaatiɗta ɗe nga ne : « Ɗiski fu nik ndii, fu ɓarang haa ; fu hey raake kuɓu ƴaar, teekaa ɗe Ismaayla (Kooh kerhiɗ) laam Nikiɗi kerhiɗ miskiɗiŋ ɗa. 12Kuɓkiŋ ɗa pesan na haf ce findi mbaam sif raakaaɗi heɗ, a heyɗi kerhiɗohe na ɓooɓa, ɓooɓa kerhiɗohanɗi na ɗe. A genan saɓsukohiɗ na ɓaah ciŋ ɗe. » 13Haajara teekka Nikiɗi woyee na ɗe "Ata-El-Roy" (Kooh yi na hote), laam a woo ne : « Moo ŋ hotiɗ Yi na hotee so e ? » 14Ineem tahha po laaheem teekuusa "Lahay-Roy" (Pesɗi na hotee so) ; wa ɗaa ŋ harmban Kades na Bered.
15Ŋ finho ineem, Haajara raakka kuɓu, Ibram teekka ɗe Ismaayla. 16Ibram raakeen kiis ndaŋkiyaah-yasna-kaahay na kiis yasna-yino (86), wa Haajara raakiɗ ɗe Ismaayla.
தற்சமயம் தேர்ந்தெடுக்கப்பட்டது:
Camba 16: YM
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© Wycliffe Bible Translators, Inc