Nuk 15
15
Nɛgana atub njɔɔ ya atana
1Ɛmɛsi yi ba ɛtaba ntab ɛjibɛ ka ba ane abibia nsɔn agbaá asibi Jisɛs si ayɔghɛ 2Ka ba Farasi ka ba Kpɨne ajighi akpɛn si, “Nnɛ nyɔ akpere abibi anɛ ka anɛghɛ ka abɔɔ.”
3Ka Jisɛs atub nɛgana atɔ abɔɔ: 4“Arena yi nnɛ ɛwi ka ɛbɔŋɔ ɛja akpe njɔɔ atana arɔn ka ɛyi ama tan. Átɨmɛm atana anɛ ka nɛko ka anɛ ya asaa anɛghɛ nsɔn ama sɛb ɛyi nyi ya atana tɛtɛ ayɛɛ? 5Ka nden yi ayɛɛ, asɔnɛ akɨno ka akparafaŋ ka ɛyɛbɛ netem 6akru ka ɛtik. Ka abiŋ atɛm ka nkɨnɛtik ɛyɛ agbaa ka atɔ abɔɔ si ‘Ba ba ɛyɛbɛ netem si mmi yɛɛ njɔ ɛyɨŋa ya atana.’ 7Ntɔ war si etɨmɛ ɛjɔn ntakpa ɛyɛbɛ netem ka bɛsɔ ka nden yi nnɛ abibia nsɔn ɛwi ayáŋa nɛwɛmɛ ɛga anɛ atan anɛ ka nɛko ka anɛ ba ami sisi afɔm atubsi árɛ kpɛ sɛb nɛyaŋa niku.
Nɛgana atub ɛkpugha ji ɛtana
8“Ána yi maŋka akpe ɛkpugha wɔbɔ ka ɛkpugha ɛji ɛfɔrɛ ɛtan, Ámɔnɔm ngon afɛŋɛ njo asɛb ka ɛtiŋitiŋi tɛtɛ ayɛ? 9Ka amɨna na yɛɛ, abɨŋi atɛm abɛ ka nkɨnɛtik ɛyɛ atɔ abɔɔ si ‘Ba ba ɛyɛbé netem si mmi yɛɛ ɛkpugha ɛjɨŋa ji ɛtana.’ 10Kanakan, ntɔ war si ɛyɛbɛ netem ɛfɨŋa faŋ ka ɛbɨŋɔ bɛsɔna-ateb Ɛsɔwɔ ka nden yi nnɛ abibia nsɔn ɛwii ayáŋa nekpen ɛnɛ.”
Nɛgana atub mɔ yɔ atana
11Jisɛs akpɛ tub nɛgana nintiŋi si “Ɛjɔnɔ nnɛ ɛwi yɔ abɛnɛ abɔannom abaa. 12Mmɔ yɔnsɛ atɔ nsɛ si. ‘Nsɔjɨŋa, kɛm mbaŋa ɛyɨŋa ka nsɔn yi okpe.’ Ka nsɛ abaŋa nsɔn ɛyɛ akɛɛ abɔɔ.
13“Ɛrɛ jɔjɔn, mɔɔ nyɔ yɔnsɛ, átoŋo nsɔn ya akiɛ kprɔb atam ama jɔn ka ndaba mbaa ɛjibɛ ama nɛ ɛjɔbɔ nekpen ka abibi atɛm. 14Nden yi nsɔn kpakpa ɛkinɛ, ka ntakpa ɛgbá ɛba ka ɛjibɛ, árɛ kpɛ maa afɨne ɛnɛ. 15Ara mu ama jɔn mɔanjoa nnɛ yɔ aru ɛjibɛ ji yɔ atoɛ si ama baba ɛgbɛ akuk ɛjɛ. 16Yɛ amu ka nkater si ára nɛ ɛjonɛnɛghɛ akuk, ka nnɛ yoku ya árɛ kɛɛ ɛjom jiku.
17“Nden yi amar asarɛ, arag ka netem si, ‘Ánɛ kpakpa ba ara ne nɛtom akɛ nsɔjiŋa akpe ji anɛghɛ ɛsasaa, ka mmɛ nde mfa mkpɔghɔ njan! 18Mfɨnɛ mfɛnɛ ka mfoa nsɔjiŋa mma ntɔɛ si: Ntaa, mmi nem ɛbibi ka ɛsiamar Ɛsɔwɔ ka ɛsiamar ɛja. 19Ndɛ kpɛsi yi ɔbiŋim si mɔ wa; kɔm ka nɛa nɛtom ɛwa.’ 20Ka atam afɛnɛ ka mfoa nsɛ.
“Ka ɛsika nsɛ ayɛɛ ka ndaba mbaa, abɛn ɛkpɔghɔsi akɛɛ, abɛ frifri ama kɔŋɔ mɔ ɛwɛ, akɛ́mmɛ, asɔrɛ ka akpɔghɔ ka ɛyɛbɛ netem.
21“Mɔɔ ára tɔ nsɔjɛ si ‘Ntaa, mmi nem ɛbibi ka ɛsiamar Ɛsɔwɔ ka ɛsiamar ɛja. Ndɛkpɛsi yi ɔbiŋim si mɔ ɛwa.’
22“Ka nsɛ akpeghe atɔ abɔanjo abɛ si, ‘Frifri! Ba ba ka ɛtiŋi ɛnebe ba yɔbɛ. Ba kɨghɛ ɛben ɛbɔ ka nyighibɔ ka akpɨghata ka ata. Ɛtɔŋɔ si nsɛ ami fɨnɛ akɔɛ ka mɔɔ ɛwɛ. 23Ba ba ka ɛfaa mfɔŋ ji ɛma yon. Ba nɨŋɔ war ɛyighi, ɛfɨnɛ ɛyɛbɛ netem. 24Atubsi mɔ ɛwɨŋa nnyɔ akpɔkpɔ ka ami fɛnɛ anyimi; atátan ka ɛmi fɛnɛ ɛteɛ.’ Ka abɔɔ ajam ɛyighi.
25“Ayighiyighi na, mgbɔghamba mɔɔ ɛwɛ áyɔb ɛgbɛ ane nɛtom. Ɛsika ára kru ɛgbɛ ajɛnɛ akpere ɛtik, ayɔk anɛ ka akubu ka abɨnɛ bɛsɛ. 26Yɛ abiŋ mɔanjo ɛwi abɔmɔ ji ɛmi ru ka ɛtik ka anɛ ára yighi. 27‘Mɔanjo ɛwɛ atɔɛ si,’ ɛkɨno ɛja ami fɛnɛ, ‘Ka nsɔja ami,’ ‘Yon ɛfaa mfɔŋ nyi ane ɛyighi akiɛ atubsi mmɔ ɛwɛ ami kruu ká ɛkoro bɛji.’
28“Ɛkɨno ɛjɛ ji nkɔgho áyɔghɔ na, asak netem atɛn nɛnɨmɛ ka njo. Nsɛ aru ka nina ama gɔrɛ. 29Ka yɛ akpɛ nsɛ si ‘Ntaa, gbɔnter ka abembem anya, ya nde mfa ka na, nne ntom nkɛa ka nyɔgha nna wusi nde njó. Ka mɔrɛtɨghɔ kɛkɛ mɔa mbon si nnem ɛyighi ka atɛm abɨŋa. 30Ka ɛnɛɛ yi mɔɔ wa yɔ ara kɔra ama arɔbɔ nɛbenɛ ɛna ka asasaa akru ɛtik, yɔ ɔmi yón ɛfaa mfɔŋ nyi ɔkɛɛ.’
31“ ‘Mɔɔ ɛwɨŋa’ nsɛ abiŋɛ, ‘wɔ ɔre mfa ka nɨŋa, ka jiku jiku ji mkpe ji ja. 32Ka ɛnɔnɔb si war ɛyighi ɛfɨnɛ ɛyɛbɛ netem atubsi ɛkɨno ɛja nji ɛkpɔkpɔ ka ami fɛnɛ anyimi; atátan ka ɛmi fɨnɛ ɛtɨɛ.’ ”
தற்சமயம் தேர்ந்தெடுக்கப்பட்டது:
Nuk 15: NDD-011
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
