Nuk 12
12
Jisɛs abom Asɔgba abɛ nɛnɛ
1Ɛsika anɛ atuu na agbaa bantiŋi agbɨghɔ anyighɛ atɛm, Jisɛs agbɔmba arag ka anɛ ba ɛkan ɛjɛ si: “Ba babaó ɛrɛ tama nɛwɛmɛ ba Farasi ɛsiŋi war, ni arɨgha nkam anem nkam. 2Jiku ɛrem ji ɛnyighɛ ji arɨghɛ gbɛrɛ ka jiku ji abrɛ ji ɛrɨghɛ jibi. 3Jiku ji ɔrɨgha ka ɛnokon anɛ ayɔghɔ ka ɛfen ka jiku ji ɔrɨgha ka awiwa ka nna ɛkpɔ ara kpaŋa kpaŋ ka ɛsi nɛbɨno.
4“Ba nno, ntɔ́ war ɛdidɨghɛ nna ka atɛm, ba krɛ bɛ anɛ ba ayono bɛji kantiŋ arɛma akpɛ nem ɛjom jiku. 5Ka ntɨŋɔ war nnɛ yɔ ɛbɨghɛ: Ba bɛ nnɛ yɔ amia na yon, atɨma bɛn nɛyɔ ni afɨna atuba akak ka ngɔŋɔa nebe ni nnɛjiŋ. Ka ɛdidɨghɛ ba bɛɛ. 6Mfreayɔŋɔ ndɔn saŋ ara goro ka peni ɛbaa? Ka yiku arem yi Ɛsɔwɔ arɛ jɔnɔ agbɔghɔ nter. 7Áraga si nnu ɛya ka ɛsi, anyinyi mfán. Mfom ariakub; war ɛtoɛ ka amar ɛga abembem mfreayɔŋɔ.
8“Ntɔ́ war si, nnɛ yɔku yɔ aru ka ɛbɔŋɔ atɔ anɛ si yɛ ayim ka nɨŋa, Mɔanɛ yɔ Ɛsɔwɔ akɨno atɨma gerɛ atɔɛ bɛsɔna-ateb Ɛsɔwɔ. 9Ka nnɛ yɔku yɔ atɛ́nɛm ka amar anɛ mmɛ ntam ntɛnɛ ka ɛsi amara bɛsɔna-ateb Ɛsɔwɔ. 10Ka nnɛ arɨgha na ɛbibi ɛjom atub, Mmɔanɛ yɔ Ɛsɔwɔ akɨno, Ɛsɔwɔ atɨmɛ tam asighɛ, ka atɨmɛm asig nnɛ yɔku yɔ arɨgha ɛbibi atub ɛfɔfɔ Nɛfɛb Ɛsɔwɔ.
11“Amia na biŋ ka bɛnam ka ɛkɔnɔ ba Jus ka ɛsi mar aton ka atakpa anɛa abɔɔ, kre feghe ɛna ayɔ si neé naŋ ka mfɔr, ndɨgha naŋ, 12atubsi Nɛfɛb Ɛsɔwɔ ɛkpɨna kpɨne ji ɔrɨoghgha.”
Nɛgana atub ɛkɛmɛ kɛmɛ ɛfɨŋa nnɛ
13Nnɛ ɛwi ka ɛbɨŋɔ atɔɛ si, “Nkpikpɨne, tɔ ɛkɨno ɛjɨŋa ji nom si abaŋa nsɔn yi nsɔjɨrɛ akpɔ asighɛ ka nɨŋa.” 14Jisɛs abɔmɛ si, “Mɔannom, yɛnɛ anɨŋɔm mkpegha benaam ka mbaŋa nsɔn akɛɛ war?” 15Ka atɔ abɔɔ si, “Ba babaó! Ba yighi amar ka nden nden yiku ka nsɔn ɛbara nkɔŋ; ɛtiŋi nekpen ɛrɨmem ka ɛbembem nɛbɛnɛ.” 16Ka atɔ abɔɔ nɛgana nni: nsise anɔbɔ mɔanom ɛwi ɛnem ɛgbɛ ɛjɛ ɛkak yɛ́ afu ka ɛtiŋitiŋi. 17Yɛ abɔmɔ bɛji ɛbɛ si, “Nne naŋ? Nkpem mfom bi nkagha ebembem nsɔn yi mfuu na.”
18Nyaa, “Mmi gbɛrɛ ji nné. Ntɛmmɛ ɛboŋo nji ntub, nsi ntakpa ji nkɨgha nsɔn nnyi. 19Ka ntɔ́ ninɨŋa si, Ɔmi bɛn nsɔnɔ nɛnɛghɛ yi ɛbeŋa ka abembem anya. Krɛ kpɛ feghe ɛna ayɔ; nɛ nekpen, nɛ, wɔ, yɛbɛ netem.”
20“Ka Ɛsɔwɔ atɔɛ si, ‘Nkɛmɛa nnɛ! Nsɛbɛ nekpen ɛna ka ɛnokon nji ɛnɛɛ. Ka yɛnnɛ ákɨghɔ nɛbɛnɛ ni ɔmi toŋo ɔnɔŋɔ ɛna?’
21“Jisɛs ájibi nɛgana ni si, ‘Ɛjɔnɔ na ɛkɛɛ anɛ ba átoŋo nsɔn ákɛɛ bɛji abɔɔ kantiŋ ataan nter ya nɛ ne ji ɛkɔrɔ Ɛsɔwɔ.’ ”
Ba krɛ gaá feghe ɛnɨrɛ ayɔɔ
22Ka Jisɛs atɔ anɛba ɛkan ɛjɛ: “Nntɔ war si, ba krɛ feghe ɛnɨrɛ ayɔ ka nekpen, atub ji ɛnɨghɛ, atub bɛji ɛbrɛ, ka nsɔn yi ɛyɔbɔ. 23Atubsi nekpen ɛgaa ɛjonɛnɛghɛ, ɛsika bɛji ɛgaa nsɔn yi ɛyɔbɔ. 24Bri akpojak: jiku arɨma bɨmɔ ka ma fufu, akpem mfom bi ánoŋo nsɔn nna ka ɛboŋo; ka Ɛsɔwɔ ara kɛɛ abɔɔ ji anɛghɛ ka ɛfofo biku. Kafaŋa war ba ɛgaa nsisɔk! 25Yɛnnɛ mfa yɔ ɛfegheayɔ ɛma ɛkpɛnɛ ma nden ka nekpen ɛnɛ? 26Ɔrɛna maa ɔnem ma njom na ka nyɔ, ɔfeghe ɛna ayɔ ka jɛɛ?
27“Yɛɛ ka afɛm ya nte ara rɨmɛ. Nɛtom arɨma neé ka afɨna atiŋ ábɔɔ. Ɛjɔn ka na, ɛfaŋa nnɛ na ka Sɔnɔmɔn árɛ nebe abeŋe nna ka ɛte ji ɛmɨna mfɛm. 28Arena yi Ɛsɔwɔ ane nwɛn ɛnɔb na, yi ɔyɛ ɛnɛ ɛwanna ɛmi kpɔ akak ka ngon, ane naŋ árɛa wɔ kɛɛ ábɔɔ, war ba ɛrɛghɛ gaa bɛn ɛkɨnamar! 29Ka ba krɛ ter ɛtub ji ɛnɨghe ka ji ɛwɔghɔ; ɛrɛ war feghe ayɔ. 30Atubsi nsɔn nnyi yi ɛrɛ fana anɛ ba ɛyiŋi Sɔtan, ka Nsɔjɨrɛ anyinyi ji war ɛsɛ́bɛ. 31Ka tɨghɔ sɛb ɛtono Ɛsɔwɔ, kasɔŋ ákpɛna kpakpa nsɔn nnyi titi.
32“Ba krɛ bɛ ɛkub, si ɛrena ka abra ɛjɔɔ ɛbɨŋa, atubsi Nsɔjɨrɛ akpe ɛyɛbɛ netem si ákɛɛ war ɛton ɛbɛ. 33Ba goro nsɔn yi ɛkpe war ɛkɔ ɛfine akpak, kasɔŋ ɛbɛn bɛbam bi ɛrɨghɛ kon, bi ɛnoŋo ka bɛsɔ yi ɛrɨghɛ war tan atubsi anyaju ka ɛtaan ga arem yi ɛrɔbɔ nsɔn. 34Atubsi, mfom bi afaŋ aya áre, netem ɛna ɛtɨmɛ jɔn fa.
35“Ba kan abɔɔ akoro war ka ɛbon ka ɛtoŋo bɛji netom ɛfɨna ɛmɔnɔ agon ɛjɔn ɛbrim, 36nna ka anɛ ba ara bri nsɛnjo abɔɔ si akru ɛyighi nɛban ni amu, kasɔŋ nden nden yi akubu ka mbu abɔɔ ájibɛ mbu fri fri. 37Ɛnɔnɔb ɛkɛɛ abɔanjo ba nsɛ abɔɔ akru ama kɔŋɔ abɔɔ mber; ka ɛdidɨghɛ, ntɔ war si yɛ ayaŋa nsɔn, ana bɛji ayɔbɔ atiŋi nsɔn, ka abiŋ abɔɔ ajɔn nji, ka akɛɛ abɔɔ ɛjonɛnɛghɛ. 38Ka abá na ka ɛtiŋi ɛnokon ama kɔŋɔ abɔɔ mber, ɛnabiji ɛnɔb ka abɔɔ. 39Ba gbɔnter si mfɔna njo ágbɛrɛ na nden yi anyaju abɨgha, atɨmem asig njo ɛyɛ anɔŋɔ abɔɔ áwa anam. 40Ba tam toŋo bɛji si Mmɔanɛ yɔ ákɨno abɨgha nkɨbɛ nkɨbɛ.”
41Pita abɔmɛ si “Ntaa, ɔtubu nɛgana ni ɔkɛɛ war kasɛ anɛ kpakpa?”
42Jisɛs afɨna akpɛ ji Pita arɨgha ka nɛgana si, “Bɨgha mɔanjo yɔ anyi jom afɨna jɔn nnɛ ya ara yɔghɔ Nsɛnjo, yɔ nsɛnjo nyɔ árɨghɛ nɨŋɔ ka ɛsi si ábaaba nna njo ɛyɛ, ara kɛɛ nnɛ nnɛ ɛjonɛnɛghɛ ji ɛfumu ka nnɛ nyɔ ka ɛtiŋi nden? 43Ɛnɔnɔb ɛkɛɛ mɔanjo nyɔ yɔ nsɛnjo abɨgha akɔŋɛ ka ara ne ji atɔɛ. 44Ka ɛdidɨghɛ, ntɔa si, ákɨnoɛ ka ɛsi si abaaba afɨŋa ayɛ kprɔb. 45Ka arɛna yi mɔanjo atimi si, ‘Nsɔjɨŋa njo awaŋam afɛnɛ,’ ajam nɛmɔbɔ abɔnsɛ ka abɔanjo baga, ka anɛghɛ, áwɔghɔ ka ábumu. 46Nsɛnjo nnyɔ afɛnɛ ka ɛfo bi yɛ árɛ kɨnokpo, ka nden yi arɨghɛ gbɛrɛ, ka akamɛ akak ka ntakpa nɛyiri ka ɛbɔŋɔ abibi anɛ.
47“Mɔanjo yɔ agbɛrɛ na ji nsɛnjo atimi, ka atɛn nɛ ne, ana bɛji amɔbɛ nɛru ka ɛtiŋitiŋi. 48Ka yɔfa yɔ árɛ gbɛrɛ, anemga ji ka amɔbɛ kɛtiŋɨtiŋi, ara mɔbɛ tinim. Nnɛ yɔku yɔ akɛɛ ɛtutu, atɨma asɛb si yɛ akɛ ɛtu; ka nnɛ yɔ akɛa ntakpa nɛtom si abába, Ntaa atɨma abriɛ si yɛ anem ɛfaŋ.
Ntɔra nɛnaa saŋ, yi nɛbaŋa yi
49“Mbaa si ma mkpe naam ka ngon ka ɛyiŋ; ka ɛkɔrɔm mmɛ kɔr kpɛsi mmi sisi nkak ngon bi! 50Mkpe ntakpa nɛyiri ni ɛrɛ brim ka ɛsi ji ɛre feghem ayɔ tɛtɛ ɛkɨgha na kan! 51Ɛkɨnoamar si mbaa ma ŋkɛ nɛna ka ɛyiŋ? Na saŋ, nkɨgha nɛbaŋa. 52Atubsi, jam ka nɛmaŋ, njo abɛnɛna anɛ arɔn, asaa agaŋa ka abaa, abaa agaŋa ka asaa. 53Nsɛ agaŋa ka mɔ yɔ nnom, mɔ yɔ nnom agaŋa ka nsɛ, nnyɛɛ agaŋa ka mɔ yɔ nkaa, yɔ nkaa agaŋa ka nnyɛɛ, nnyɛɛ nnom ka nkaa mɔ agaŋagaŋa ka atɛm.”
Nɛgbɛrɛ nden
54Akpeghe atɔ ɛbɨŋɔ ji ɛgba fa si “Ɛmɨna yɛɛ ka nɛbo ɛnyigha ka ɛbɔkaa, ka ɛrag si ‘Anab akpi na,’ ka anab ána. 55Ka mfeb aruna ka njam ɛjɨbɛ, war ɛrag si ‘Njon ayigha akɛɛ ɛfiba mfom,’ ɛfɨnɛ ɛjɔn na 56War ba ɛrɨgha nkam ɛnem nkam! Ɛnyi ka ɛgbɛrɛ ɛtub nse ka nɛbo; naŋ ka ɛkɨgha ma ɛgbɛrɛ nden yi ɛre maŋ?
57“Ka ɛgbɔɔnaŋ ka war abafɔnɔ ɛrɛ jɔnɔ ɛgbɛrɛ si ɛbɛn nɛná ka Ɛsɔwɔ? 58Nnɛ akɔana si ɛmu ka ɛsub, nyɔghɔ wɔ bɛn nɛnaa ka mbaa, kasɔŋ arɛa sighi abɔɔ akɛɛ mkpegha bɛnam, yɔ asigha abɔɔ akɛɛ nnɛ yɔ atona akak ka mgbakɔbɔ. 59Ntɔa ɛdidɨghɛ, ɔfɔrɔm ka mgbakɔbɔ tɛtɛ ɔganɛ akpugha kprɔb ya okpeɛ mbɔɔ.”
தற்சமயம் தேர்ந்தெடுக்கப்பட்டது:
Nuk 12: NDD-011
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
