Luk 7
7
Ɛbtamɛ tu ni njijɔg a nɛ a nshɔja Roman
1Ɔji Jisɔs bungɔ nshɔl nyaa kpɛk kpɛ mal tɔng anɛ ba jɔ wongo atong kayɛ, a tamɛ nyi Kapanum.
2Njijɔg a nɛ a nshɔja Roman nɔ bɛlɛ ɛbkɔrkɔrɔ mɔnanjo, nɔ jɔ yam nɔngɔ gɔ nyɔ ɛbku.
3Na njijɔg a nɛ nshɔja wogo nɔ lagɛ Jisɔs, a tomo abokol Aju tuɛ, rɛ bɔ shɔng tɔngɛ aba bilim mɔnanjo ɛwɛ nɔb.
4Ɔji bɔ fɛrɛ nɔ ba gɔ ji Jisɔs, bɔ gbɔngɛ rɛ, “Nlolom nɔa ɛtinge nɛ wɔ nɔnɔb rɛ wɔ tɔbɛ lim mɔnɔwɛ nɔb, 5Teb anɛ barɛ kɔrɛ shing a shi ɛtak gɛ nkɔn ka ɛjabɛ ɛjɛ.” 6Ɔwɔ Jisɔs tamɛ na bɔ. Teb a jɔlɔm gɔ nlaba mbang ɔji njijɔg a nɛ a nshɔja tomo atɛm rɛ bɔ shɔng tɔngɛ rɛ: “Nshɔ, kǝ fige ɛna ayɔ, teb nfomom nyi litinga rɛ wɔ ba gɔ gamɛ ɛtak. 7Ɔwɔ wangɛ nki nyen ɛnamɛ na nɛ nɔ fɔmɔ nɔ rɛ aba bǝkpera. Teb rɛ a rɛ bung ɛblom rɛ mɔnanjo ɛwamɛ nɔb, akpe nɔbɔ. 8Teb gɔgama nji ɛbtom, nɛ nɔa nɔ gbalɛ shingim. Mɛ mɛfɔnɔ ntɔb gbalɛ shingɛ ashɔja nyandige. Nlitɔng nɛ awɔng rɛ, ‘Shɔng!’ Akpe tamɛ. Nlitɔng nɔndigɛ rɛ, ‘Ba!’ Akpe bagɛ. Nlitɔng mɔnanjo ɛwamɛ rɛ, ‘Lim jiya!’ Akpe lime jinu.”
9Ɔji Jisɔs wogo ɛteb biya gɔ ji njijɔg a nɛ a nshɔja, jɔlɛ ɛjomo ɛlama anyar. Akɛbɛ bɔngɔ ɛblɔng anɛ ni kpɛ tɔnɔ, kim tɔngɔ bɔ rɛ, “Ntɔng wan rɛya, mɛ nkinyenanyen nɛ awɔngawɔngɔ nɔ kpe ɛbtamɛ na nlolom nɔa gɔ ɛbjabɛ Isɛrɛl kpɛk kpɛ.”
10Ɔwɔ abolom ba bɔ tomo bɔ fɛrɛ nɔ krɛ shɔng nyen rɛ mɔnanjo nɔnu ɛbnɔb.
Jisɔs nyamɛ mɔn a nkala nkunɛ gɔ ɛbku
11Kpɛm kɔ ngarɛ, Jisɔs na batɔtɔnɔ ɛbɛ tam gɔ ɛjabɛ ji bɔ lɔngɔ rɛ Neyin, ɛblɔng anɛ tɔnɔ bɔ tam.
12Na akabɛ ɛgregba ɛjabɛ, bɔ shɔlɔ nɛ nɔ mikpɔ jɔ lɔng awɔ. Nɛ nɔ jɔlɔ mɔn awɔngawuwɔngɔ nɔ nlom ka nyen nɔ nlom mɛ kpɔ sha. Ɛblɔng anɛ gɔ ɛjabɛ jɔlɔ nanɛ.
13Ɔji Nshɔ nyenɛ nyen nkunɛ, afilɛ ndɔn. Akimawɛ tɔngɛ rɛ, “Kǝ kpɛ ling.”
14Ɔwɔ ajɛ shɔng laga abɔ gɔ ɛkpa ji bɔ shɔlɔ nkunɛ ba shishɔlɔ yimi. Jisɔs kim bungɔ rɛ, “Njankɔn, nkpe bungɔ ana tam yimi!”
15Tutu ɔ, njankɔn nyiɔ mɛlɛ jiya kimɛ abungɔ ntɔng. Jisɔs fagɛ ka nyen.
16Bɔ anɛ kpɛk kpɛ bɛlɛ ɛfalfal jɔ jige Ɛshɔwɔ. Bɔ rɛ, “Njijɔg a ntinge ateb Ɛshɔwɔ ɛbǝlɔng gɔ ɛblɔng ɛnarɛ. Ɛshɔwɔ ɛba rɛ abitɔb anɛ ɛbɛ!”
17Ɛka lagɛ Jisɔs yalɛ gɔ ɛbjabɛ Judiya na ɛbjabɛ bi le kpedekpede.
Jɔn wonga anɛ alab tomo batɔtɔnɔ ɛbɛ tu Jisɔs
18Ɔji batɔtɔnɔ Jɔn tɔngɔ Jɔn lagɛ kpɛk kpɛ nshɔl nyaa, ɔwɔ Jɔn lɔngɔ bɔ anɛ abal, 19tom bɔ tu Nshɔ rɛ bɔ shɔng babɛ rɛ, “Wɔwɔ le nɛ nɔ kpebaga, afi war babɛ nɛ nɔndigɛ?”
20Ɔji anɛ abal ba Jɔn tomo bɔ ba gɔ ji Jisɔs, bɔ rɛ, “Jɔn nwɔnga anɛ alab tomo war rɛ ɛbǝbaba rɛ, ‘Wɔwɔ le nɛ nɔ kpebaga, afi war babɛ nɛ nɔndigɛ?’ ”
21Gɔ ngarɛ nyiɔ Jisɔs ɛlim anɛ gbalɛ gbalɛ ba bɛlɛ ajɔbɔ ayam nɔb, fɛrɛ yɛge abi atɔgɔ gɔ ngɔbjing anɛ, lim alaga amar nyen.
22Ɔwɔ Jisɔs fangɛ anɛ ba Jɔn tomo bɔ rɛ, “Fɛrɛ wan nshɔng tɔng Jɔn ji aminyen nfɛrɛ wog: Alagamar ɛfɛrɛ nyen, abannɛ ɛbjɛn, anɛ ba bɛlɛ abile bɔ nɔb, alaga atong ɛbwog, anɛ ba mɔkpɔ bɔ fɛrɛ nyamɛ, akpak ɛbwog nɔbɔ ɛka Ɛshɔwɔ. 23Ɛbfolo Ɛshɔwɔ le jɔl ka anɛ ba kim fabɛ.”
24Ɔji anɛ ba Jɔn tomo bɔ ɛbtom fɛrɛ tam, Jisɔs kim bɔmɔ bungɔ tɔng ɛblɔng anɛ lagɛ Jɔn rɛ: “Jɛn ji ajɛ nyenɛ gɔ ɛwungwung? Anyɔ ajɛlɛ nya nfɛb kpe nanga? 25Tɔgɔ jɔl nɔ, jɛn ji ajɛ nyenɛ? Nlolom nɔ lebe anɔbɔ abɔm a? Anɛ ba kpejɔ lebe anɔbɔ abɔmɔ jɔ li ɛnɔb kpejɔ jɔl gɔ ɛtak gɛ ntol. 26Wɔ ɛjom aji ajɛ ɛnyenɛ? Ntinge ateb Ɛshɔwɔ a? Ee, wɔ anyɛn ji agbalɛ shing ntinge ateb Ɛshɔwɔ. 27Jɔn wɔ le nɛ nɔ nwɛr Ɛshɔwɔ yɛlɛ nɔ lagɛ rɛ: ‘Nkpe tomo nlɔgɔ ɛbtom ɛwamɛ gbɔ wan mbang, nɔ litongo aji bom wan.’
28“Nɔngɔ mɛ tɔng wan rɛ, gɔ ɛblɔng anɛ ba abǝkal mijɛl nɛ awɔngawɔngɔ lim nɔ gbalɛ shingɛ Jɔn. Wɔ nɛ nɔ ga rɛdɛ gɔ ɛjabɛ Ɛtol Ɛshɔwɔ kpe gbalɛ shinge Jɔn.”
29Anɛ kpɛk kpɛ, kpɛlɛ na ba kaga atakshi, ɔji bɔ wogo alomo Jisɔs bɔ tamɛ rɛ mbang Ɛshɔwɔ nyi le nɔba mbang, teb Jɔn ɛtɔɔgɔ wɔngɔ bɔ alab.
30Wɔ ba Afarasi na batetebe ajang a Mosis bɔ tɛnɛ mbang nyi Ɛshɔwɔ garɛ nɔ ka bɔ, teb bɔ tamim Jɔn wɔngɔ bɔ alab.
31Jisɔs shɔrashitɔng rɛ, “Ɛjomaji nlikɔ garɛ anɛ ba ɛying ji anu? Bɔ le rɛnan? 32Bɔ le na abɔnshɛ ba jig gɔ arɛɛ kpe lɔngɔ atɛm rɛ ɛwɔr nroro ka wɔ abanim: ‘Ɛyim ashɛ ɛbaal ka, wɔ abanim; ɛyim ashɛ ɛbku, wɔ alingim.’ 33Jɔn nwɔngɔ anɛ alab na aba nɔ ajɔ ji njal nshɔl alɛgɛ ajɔm li amam ajɔm wɔɔ, wan rɛ, ‘Akpe abi atɔgɔ.’ 34Mɔna Nlolom ɛba ali fɛrɛ wɔɔ, wɔ wan rɛ, ‘Bɔngɔ Nlolom nɔa! Ale nlɛgɛli na wɔga amam, ntɛma ba kaga atakshi na anɛ ba abi afɛm.’ 35Wɔ ngbɛrɛ Ɛshɔwɔ, kpejɔ teb ɛlɔgɔlɔgɔ gɔ kpɛk kpɛ anɛ ba tamɛ tu.”
Jisɔs tamɛ ka nlikal abi afɛm
36Ɔji Ɛfarasi ajing tinge Jisɔs rɛ abili nshɔl alɛgɛ ɛgong nanɛ, Jisɔs jɛ gɔ ɛtak gɛ Ɛfarasi nɔ tingɛ nɔ shɔng ji rɛ ali nshɔl alɛgɛ.
37Nlikal awɔng nɔ jɔ lima abi afɛm gɔ ɛjabɛ jiɔ wogo rɛ Jisɔs jɔ li nshɔl gɔ ɛtak gɛ Ɛfarasi, ɔwɔ ajɛ na aking nfam gɔ mɔ ɛshibin nɔ bɔ lime gɔ ɛbtal alabaster.
38Na ayimɛ gɔ njam tɔb ata ɛnye jɔ ling ashogɛ ata na abɔngɔ. A fɛrɛ kɔ nlu ɛnyɛ ranɛ, kɔ nyɔ ɛmɛ shɔdɛ ata kɔ aking nfam wɔngɛ.
39Ɔji Ɛfarasi nɔ tinge Jisɔs nyenɛ jiya, akime abungɔ tangtang rɛ, “Rɛjɔlarɛ nlolom nɔa ntinge ateb Ɛshɔwɔ wɔ, ajɔlɔ gberɛ ɛkine nlikal nɔ kpɛ laga abɔ rɛ nɛ abi afɛm wɔ.”
40Jisɔs kim fangɛ rɛ, “Sayimɔn, Nkpe ɛjom ji nyaga tɔng.” Sayimɔn rɛ, “Ntetebe tɔngim.”
41Jisɔs kim tobo ɛka jiya tɔngɛ rɛ: “Anɛ abal bɛlɛ nlolom awɔng bɔng nɔ bɔngɔ bɔ akpɔgɔ. A bɔngɔ nɛ awɔng akpɔgɔ nya kpe malɛ ring akpɔgɔ nya bɔ kpe kpɛgɛ nɛ awɔng gɔ ɛbya na ɛjang. A bɔng nɛ nɔgɔgɔ akpɔgɔ nya kpe malɛ ring akpɔgɔ nya akpe kpɛgɛ nɛ nɔ milim ɛbtom gɔ nfong atalabal na nfong ɛwobo.
42“Bɔ anɛ abalabal nɛnɛ bɛlɛm akpɔgɔ nya bɔ kpe fɛrɛ tu kayɛ, ji aleme nɔ, atamɛ ka bɔ anɛ abalabal. Gɔ ɛblɔng anɛ abal ba, nyenɛ wɔ nlolom nɔnu ligayɛkɔr?”
43Sayimɔn fangɛ rɛ, “Mɛ ntirre rɛ nɛ nɔ mbɔng ɛnye ga gbal nɔ bɔ tamɛ kayɛ wɔ liga bɛl ɛbkɔrɔ kayɛ.”
Jisɔs rɛ, “Afangɛ mbabɛ nyiɔ nɔbɔnɔbɔ.”
44Ɔwɔ akɛbɛ bɔngɔ nlikal nɔnu kim tɔngɔ Sayimɔn rɛ, “Anyɛn nlikal nɔa? Mba gɔ ga ɛtak alab amɛkam nya nkpe rogo ata, wɔ yɛ ɛshɔgɔ ata nyamɛ na abɔngɔ fɛrɛ ranɛ na nlu ɛnye. 45Wɔ amɛ walim fɛrɛ kagim nɔba nyɔ, wɔ nlikal nɔa tabɛ na nyɛlɛ gɔ gatak a mɛki ragɛ ata ashɔdɔ. 46Wɔmɛ wɔngim aking gɔ shi, wɔ yɛ ɛmim wɔngɔ aking nfam gɔ ata. 47Nɔngɔ mɛ tɔnga rɛ, ntam kayɛ gɔ abi afɛm ɛnye gbalɛgbalɛ teb njijɔg ɛbkɔrɔ nyi amiteb. Wɔ yɛ nɔ tebe mɔnshishigɔ ɛbkɔrɔ kpe tɔb bɛl mɔnshishigɔ ɛbtamɛ ka.”
48Ɔwɔ Jisɔs kim bungɔ tɔng nlikal nɔnu rɛ, “Ntam ka gɔ ga abi afɛm.”
49Anɛ bagɔgɔ ba jɔ li nshɔl nanɛ bɔ jɔ bungɔ tɔng atɛm rɛ, “Nyenɛ wɔ a nɔ kpe tamɛ ka nɛ gɔ abi afɛm?”
50Jisɔs kim tɔngɔ nlikal nɔnu rɛ, “Ɛbtamɛ tu ɛna ɛma tarɛ yagɛ; shɔng gɔ ɛbgɔmɔ.”
தற்சமயம் தேர்ந்தெடுக்கப்பட்டது:
Luk 7: NBP
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
