Luk 5
5
Jisɔs lɔngɔ agbɔgɔ mbang a batɔtɔnɔ ɛbɛ
(Matiyu 4.18-22; Mak 1.16-20)
1Ɛfong abɔng Jisɔs yimi gɔ ɛbga Jɛnɛsari, jɔ bung alom Ɛshɔwɔ ɛblɔng anɛ shingɛ kag jɔ wogɛ. 2Akim nyenɛ agbang abal gɔ ɛbga; ni ba sharɛ nsharɛ tamɛ sha jɔ ro arimɛ bɔ. 3Akim yɛlɛ gɔ ɛgbang abɔng, bi Sayimɔn, Kimawɛ tɔng rɛ atimɛ tilim kag gɔ alab. Kim jige gɔ atang ɛgbang jɔ teb anɛ ba jɔlɔ ɔ. 4Ɔji Jisɔs mobung mal, Akim tɔngɔ Sayimɔn rɛ, “Tim ɛgbang kag gɔ ɛji ji alab kpe rabɛ, wan kag ɛrim bɔb nsharɛ.”
5Sayimɔn kim fangɛ rɛ, “Nshɔ, war lime nkongo ɛbtom atu nyaa kpɛk kpɛ ɛjomjom ɛbɔbim. Wɔ ɔji amobung nɔ, nkpe kagɛ arim gɔ alab.” 6Ɔji bɔ lime nɔ, bɔ bɔbɔ nsharɛ gbalɛgbalɛ nyi arimɛ bɔ kime jagɛ. 7Ɔwɔ bɔ magɛ atɛm gɔ ɛgbang bǝgɔ rɛ bɔ ba bǝtɔb bɔ. Bɔ ba bǝtɔb bɔ kpo nsharɛ kag gɔ agbang abal abal tɛtɛ ror tɛr. 8Ɔji Sayimɔn Pita nyenɛ ji milim, a jama alang gɔ ata Jisɔs a rɛ, “Nshɔ; Yagim wɔ shɔng, mɛ nɛ abi afɛm wɔ!” 9Pita na anɛ bagɔ kpɛk kpɛ ba jɔlɔ na nɛɛ, lamɛ bɔ anyar gɔ ɛgbelɛ nsharɛ nyi bɔ bɔbɔ nɔ. 10Abɔnɔ Sɛbɛdɛ, atɛmɛ Sayimɔn Jɛmshi na Jɔn ba jɔlɔ ɔ, tɔb lamɛ bɔ anyar. Ɔwɔ Jisɔs kim tɔngɔ Sayimɔn rɛ, “Kǝfal; bɔma anu shɔngɔ alijɔ sharɛ anɛ.” 11Ɔwɔ bɔ tɔngɔ agbang kono gɔ ɛbga, tam ajingajingɛ sha, tɔnɔ Jisɔs.
Jisɔs lime nɛ abile nɔb
(Matiyu 8.1-4; Mak 1.40-45)
12Na Jisɔs jɔlɔ gɔ ɛjabɛ ajing, bɛlɛ nlolom awɔng nɔ jɔ yam abile. Ɔji a nyenɛ Jisɔs, agbɔ kɔgɔ ɛshimar gɔ ndi jɔ gbɔngɛ rɛ, “Nshɔ, rɛkɔra, akpim malɛ lim nɔb.”
13Jisɔs tannɛ ɛbɔ lagɛ, arɛ “Kpim kɔrɔ, nɔb.” Tutu ɔ abile lamɛ gɔ ngɔbjing. 14Jisɔs kayɛ ɛbrɛgɛ rɛ, “Kǝ tɔng nɛ awɔngawɔngɔ, shɔng gɔ ji njɔmanjɔm Ɛshɔwɔ shɔng tebɛ ɛna, wɔ folo nshing nyi amobar na njang a Mosis tɔngɔ nɔ, nɔngɔ teb nɛ awɔngawɔngɔ rɛ a nɔb.” 15Tu ɔji a ka ɛbrɛgɛ, ɛteb lagɛ Jisɔs yalɛ shɔngɔ, tɔnɔ ɔ ɛblɔng anɛ ba rɛ bɔ bowogɛ afɛrɛ lim bɔ ayam. 16Wɔ Jisɔs tir titam gɔ mbɛlɛ ɛji, shɔng kag ɛrɔ.
Jisɔs lime nɛ nɔ lɔngɔ ɛbɔ na ɛta nɔb
(Matiyu 9.1-8; Mak 2.1-12)
17Ɛfong abɔng na Jisɔs jɔ teb, Afarasi na batetebe ajang a Mosis ba lɔng gɔ ɛbjabɛ bi Galili na Judiya na Jɛrushɛlɛm ba, ji ɔ. Ɛkɔ ji Ɛshɔwɔ jɔlɔ na Jisɔs ji alelim anɛ ba ayam nɔb. 18Anɛ bandige shɔlɔ nɛ awɔng nɔ lɔngɔ ɛbɔ lɔngɔ ɛta gɔ ɛkpa jɔ nɔg rɛ bɔ shing nanɛ yɛl gɔ njo shɔng bɔmɛ gɔ ata Jisɔs. 19Ɔji bɔ ki nyen ɛyagɛ teb nror anɛ, bɔ shɔlɛ war gɔ ɛbolo ɛtak, lingɛ ɛbolo ɛtak radɛ gɔ ɛkpa bom gɔ ɛbka anɛ, gɔ ɛshimar Jisɔs.
20Ɔji Jisɔs nyenɛ ɛbtamɛ ni bɔ kpenɔ, arɛ, “Mbe, ntam ka gɔ abi afɛm ɛnya.”
21Afarasi na batetebe ajang a Mosis kimɛ ɛkɛrɛ gɔ nteme bɔ rɛ, “Nyenɛ wɔ aa nɔ ki kpe ɛkpono ka Ɛshɔwɔ? Nyenɛ wɔ limal tam ka nɛ gɔ abi afɛm nɔ shingɛ Ɛshɔwɔ ntangtang?”
22Jisɔs gbɛgbɛrɛ ji bɔ jɔ kɛrɛ, akim babɛ bɔ rɛ, “Jɛn ji wangɛ nkpe kɛrɛ abɛmɛ nshɔl nyaa gɔ ntem ɛnyenɛ? 23Jin ji le ga jɔl mkpɔdɔkpɔdɔ rɛ abung, ‘Ntam ka gɔ abi afɛm ɛnya,’ afi ale bung rɛ, ‘Tam yimi wɔ jɛn’? 24Wɔ nkpa lime agbɛrɛ rɛ, Mɔna Nlolom kpe ɛkɔ gɔ ɛying ji akpe tamɛ ka anɛ gɔ abi afɛm.” Ɔwɔ Jisɔs kɛbɛ bɔngɔ nlolom nɔ lɔngɔ ɛbɔ lɔngɔ ɛta kimawɛ tɔngɛ rɛ, “Tam yimi, rɔd ɛkpa ɛja, wɔ shɔng krɛ!”
25Tutu ɔ amɛlɛ yimi gɔ ɛshimar nɛ awɔngawɔngɔ, tab ɛkpa ji ajɔ nɔngɔ tam krɛ, jɔ jige Ɛshɔwɔ. 26Lamɛ nɛ awɔngawɔngɔ anyar bɔ jɔ jige Ɛshɔwɔ. Ɛfalfal bɔb bɔ, “Bɔ rɛ ɛnyen ajɛnɛ nshɔl lɛl.”
Jisɔs lɔngɔ Lefi
(Matiyu 9.9-13; Mak 2.13-17)
27Na jiɔ shingɛ nɔ, Jisɔs tamɛ shɔng nyen nkaga atakshi Matiyu nɔ bɔ jɔ tɔb lɔngɛ rɛ Lefi jig gɔ nji ɛbtom ɛnye. Jisɔs kimawɛ tɔng rɛ, “Tɔnɔm,” 28Lefi mɛlɛ yimi, tam ajingajingɛ sha, tɔnɛ.
29Lefi lime njijɔg ɛbkak gɔ ɛtak ɛjɛ ka Jisɔs, ni ɛblɔngɔ ba kaga atakshi gbalɛgbalɛ na anɛ bagɔ jɔ li nshɔl na bɔ.
30Afarasi na batetebe ajang a Mosis bandige ba wɔb ɛblɔngɔ bɔ, babɛ batɔtɔnɔ Jisɔs rɛ, “Jɛn ji wangɛ nkpe lɛgɛ nfɛrɛ jɔ wɔɔ na ba kaga atakshi na anɛ ba abi afɛm?”
31Jisɔs kim fangɛ bɔ rɛ, “Anɛ ba klɛ yamɛ shang kpejɔ shɛb nlima akam, anɛ ba ayam ba kpejɔ shɛb nɛ ɛkam. 32Mɛ mbam ka anɛ ba kpe ɛtinge ɛbjini, mba ka anɛ ba abi afɛm rɛ bɔ bɛl ɛbyangɛ tɔnɔ Ɛshɔwɔ.”
Bɔ babɛ Jisɔs lagɛ ɛbama anyɔ
(Matiyu 9.14-17; Mak 2.18-22)
33Ɛfong abɔng anɛ bandige tɔngɔ Jisɔs rɛ, “Batɔtɔnɔ Jɔn jɔ ji njal ngarɛ anyinganyingɛ jɔ kag ɛrɔ, nɔwɔ batɔtɔnɔ Afarasi jɔ tɔb lim fufɔ, wɔ ba ba ba kpe lɛgɛ wɔgɔ ngarɛ anyinganyingɛ.”
34Jisɔs kim fangɛ bɔ rɛ, “Atɛmɛ nkɔga nkal nim jɔ ji njal ɔji nkɔga nkal kpagɛ le na bɔ. 35Wɔ ngarɛ kpe bagɛ nyi bɔ le tab nkɔga nkal tam awɔ, ɔwɔ bɔ le ji njal.” 36Jisɔs kim tobo bɔ ɛbganɛ niya rɛ: “Nɛ lim nɔ kpejɔ kim njaga bɔmɔ a nfɛnfɛ kɔ badɛ nkpokola bɔmɔ. Teb arɛlim nɔ, arangɛ bɔmɔ a nfɛnfɛ, mɔgɔ mikpokolo nim nɔb gɔ amar teb kpejɔlɔ ɛbi. 37Anɛ nim jɔ kag amamɛ nfɛnfɛ gɔ mkpokolo ɛbamɛ nkpango anyam. Teb arɛlim nɔ amam nfɛnfɛ kpe wagɛ ɛbam, amam wɔng, ɛbam rangɛ. 38Nɔbɔ rɛ, bɔ kag amamɛ nfɛnfɛ gɔ ɛbamɛ nkpango anyam a nfɛnfɛ! 39Nɛ lim nɔ kpe wɔgɔ ɛkang amam kpe shɛb nya nfɛnfɛ. A rɛ, ‘Teb ɛkang amam ji kpe gagɛ nɔb.’ ”
தற்சமயம் தேர்ந்தெடுக்கப்பட்டது:
Luk 5: NBP
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
