Luk 1
1
Luk asenging ake Tiofilus abangang Jisɔs
1Minen Tiofilus, Bane jugijugi alem boted obubɔ arɔ bɔ aseng bachɔd ma nggom bi bemarɔ tɛb wa erɔng eyida. 2Bɔ ba to wa botog bu enud ale bɔtese yi bagban ba balem ma Ɔsɔwɔ ale bane ba ajoging ake sɔ. 3Yi yifa wa nted ama, yi me minfɔni nkun nten nkɔi gɔgigɔgi feb nggom bifa to wa botog bu enud, me erɔng nseng bokobi abun ntimitimi nke we, minen Tiofilus, 4eru afa we ɔmai ɔrɔ nggom bi arannen akɔi we bele ekonekon.
Nsidi abangang ogwe wu Jɔn mi pogag mmai
5Wa nten yu Erɔd minen wu Judia ekwe minsingag besingi bi Ɔsɔwɔ wu mpi oyu akamag arɔ Sekaria. We ale efugi yi Abija, basingag ba besingi bi Ɔsɔwɔ. Minkai owu Elisabed, we erɔng arun enudi nju yi Erɔn. 6Bɔ bafaibafai bale kɔng wa boso bu Ɔsɔwɔ, bɔ anungag beben feb bi Minfɔni aken. 7Ka bɔ afɔning mmɔn kpe wud wa ntagi Elisabed ale mingom, obodi afa erɔng, bɔ bafaibafai bakoi gbɔg.
8Epo yid yi efugi yi basingag ba besingi yi Sekaria ale erom ka ali lemag erom eyi ala minsingag besingi wa boso bu Ɔsɔwɔ, 9asanging we wa erɔ yi arobing nkeri egweni eyibɔ yi basingag ba besingi ele, achag wa nju yu Minfɔni aka yegi etɛbag mmu. 10Yi nten asin yu ayegag etɛbag mmu wa nju Ɔsɔwɔ, bane ba afuging ale efi asoag nsɔm.
11Nyining minkamag befong bi Minfɔni atɛb boso obu, alami ebad yi obolom wu nchori yu esingi yi ayegag etɛbag mmu. 12Yi Sekaria arɔn we, anig botig bɔkɔ we. 13Ka minkamag befong bi Ɔsɔwɔ atɔ we arɔ, “Kan re botig, Sekaria, awog nsɔm ɔya. Minkai ɔwa Elisabed ting agwe mmɔni minine ake we, we ting ɔlang we mpi ɔrɔ Jɔn. 14We ting akɛmi bochoba bu nted obuna, ka jugijugi ting afɔn bochoba bu nted wantag yu ogwe owu. 15Da we ting akɛmi etɛmi mine wa boso bu Minfɔni. Ka we tabara ahɔ yɔ barog kpe barog ma abumobum, erɔng Nyɔganyɔ yu Ɔsɔwɔ ting akɛmi yi we ka agwe we. 16We ting atu bane ba Isrel jugijugi atisɛm ɔmɔ Minfɔni Ɔsɔwɔ owubɔ. 17Ka we ting arannen ka Minfɔni, wa nyɔganyɔ yi ɔsa wu Elaija, akpedi boted bu bansi yi banyen akɔni yi mbɔn abibɔ ka yi bakebag ba befong ajɔdi bɔ banyedi okoeken wu bamag ba nggom ba ale kɔng yi Ɔsɔwɔ, enugi eruafa we aloni bane ba Ɔsɔwɔ anungi Minfɔni.”
18Sekaria abeb minkamag befong bi Ɔsɔwɔ arɔ, “Elemag lan me nkam ndɔ yi ɔchɔding ala ele ekonekon? Me nle ekokoi mine, ka minkai ama erɔng nya eyi erab.”
19Minkamag befong bi Ɔsɔwɔ abɔri we arɔ, “Me nle Gabrel. Me nlag ekpenyid yi Ɔsɔwɔ, ka we afonging me arɔ nchɔd yi we erɔng nsidi we etingi nsidi yufa. 20Ka fafa we ɔnɔngɔ ɔchɔ emama ɔkɔngɔman ɔchɔd minchɔd tata epo yi nyum yifa etɛbag, wantagi we ɔkaming yi balem angama ma atɛbag ekonekon wa nten yu akɔning.”
21Nten ayua yud, bane ale efi aworag Sekaria erɔng akerag wa ekɛkɛmi yi we amarɔ kɛmi wa nju Ɔsɔwɔ eken erab. 22Yi we ahɔ tɛb aba efi, we ahɔman achɔd yi bɔ. Bɔ aba mai arɔ we arɔ nnɔd yu mbed wa nju Ɔsɔwɔ, wantagi we ali chɔdag babɔ yi bɔ we chang ahɔman ɔchɔd yi minyɔ.
23Yi nten yu erom eyi emaning we abugag wa nju oyu. 24Yi bifa behɔ king, minkai owu Elisabed aba bob bɔla awobi lɔ wa nju tata asi bafeng arɔn. 25We arɔ, “Minfɔni alem yifa ake me. Wa ndu yifa we atɔngi me bɔnɔ obu atisɛm alɔb me enyi wa boso bu bane.”
Barebi abangang egweag yi Jisɔs
26Yi bɔla bu Elisabed bosin bafeng arabara, Ɔsɔwɔ afong minkamag befong ebi Gabrel achag Nasaret, mpam yu ale eboi yi Galili, 27ɔmɔ mmɔni minkani wu akan mai minine wu akam arɔ anɔngɔ ke we ebai ɔmɔ minine wu ayenag we arɔ Josef, wu arun enudi nju yi Debid. Mpi yu mmɔni mindig awun akamag arɔ Meri. 28Minkamag befong bi Ɔsɔwɔ achin ɔmɔ owu aka tɔ we arɔ, “Nkobo, we wu atɔngi we bɔnɔ jugijugi, Minfɔni ale yi we.”
29Minchɔd wufa ɔrɛbing Meri. Ka we ato ɔkeri nkeri ekan ekob yifa etɛbing. 30Ka minkamag befong bi Ɔsɔwɔ atɔ we arɔ, “Meri, kan re botig, wantag yu we ote bɔnɔ bu Ɔsɔwɔ. 31We ɔnɔngɔ bob-bɔla ogwe mmɔni minine ka we ɔlangag we mpi ɔrɔ Jisɔs. 32We akɛmag etɛmi mine ka ting ayen we Mmɔn wu Ɔsɔwɔ wu achiming nlag aking. Minfɔni Ɔsɔwɔ ting ake we bɔlen bu nsi eyi Debid. 33We akɛmag minen wu enud nju yi Jekɔb yibanya. Bɔlen obu bɔhɔ fɔn nkuri.”
34Meri abeb minkamag befong bi Ɔsɔwɔ arɔ, “Elemag lan ekɛmi alafa? Me akan mai minine.”
35Minkamag befong bi Ɔsɔwɔ abɔri we arɔ, “Nyɔganyɔ yu Ɔsɔwɔ ting aba ɔwa yi ɔsa wu Ɔsɔwɔ wu ɔchiming nlag oking ɔkɛmi yi we. Ka Mmɔn wu we ɔnɔngɔ ogwe ahɔ fɔn bobe ka ayenag we Mmɔn wu Ɔsɔwɔ. 36Kpe Elisabed wu arun enudi nju eya anɔngɔ fɔn mmɔn wa bokonag obu, ka we wu arɔ ahɔman abob bɔla ale yi bɔla bu bowei bafeng arabara. 37Da elem chang yi erun Ɔsɔwɔ yi yibanya elɛmag.”
38Meri abɔri arɔ, “Me nle mingban wu Minfɔni. Nungi elem eya ekɛmi ala yi me nkeri we ɔmarɔ chɔd.” Nyining Minkamag befong bi Ɔsɔwɔ achai we.
Meri alo beyad ɔmɔ Elisabed
39Wa ndu ayia, Meri aloni beke asubi aloag ebad yi ele mpam yu ale bopup wa Judia, 40we awei nju yu Sekaria ka akob Elisabed. 41Yi Elisabed awoging ekob yi Meri, mmɔn wu ale etengi bɔla obu alo belag ka Nyɔganyɔ yu Ɔsɔwɔ awei Elisabed asoi. 42Yi elem esɔ we arɔ, “Erienɔ ele yi we erɔng yi bakani, erienɔ erɔng ele yi mmɔn wu we ɔnɔngɔ ogwe. 43Ye ka ajegi me la yi nyeni we wu Afɔning me abag ɔmɔma? 44Ebuyid yi me nwoging ekob eya, mmɔn wu ale me bɔla alo belag wa bochobag bu nted. 45Erienɔ yi we wu akaming arɔ yi Minfɔni amarɔ osidi we ting etɛb ala.”
Meri akag Ɔsɔwɔ yi ebɛn
46Ka Meri arɔ:
“Mmɛd ma nted ama akag Minfɔni
47ka nyɔganyɔ ama asoi yi bochobag bu nted yi Ɔsɔwɔ Minyanyangi ama,
48wantagi we akeri
abangang me ni minsob owu wu ale eboi eboi.
To fafa chog baku feb ayenag me minkani wu erienɔ,
49wantagi we wu agan babɔ alem betɛm bi nggom ake me.
Mpi oyu akɔning yi ejeg yi bakag.
50Nsɔn oyu asai asi bane ba areag we,
to oku wufa osi oku wuntad.
51We alem betɛm bi nggom yi ɔsa owu;
we achad bɔ ba atamag beke erɔng ba akerag betɛm bi nggom abangang lɔ.
52We abi balen eboi bɔlen obubɔ
ka we atam bɔ esɔ ba apoding lɔ.
53We ake bɔ ba ale bɔsɔng betingi bi nggom,
ka befang bi bane we akeb bɔ babɔ mmbɛd.
54We anyangi mingban owu Isrel,
atedag afɔn nsɔn
55ake Ebraham yi enudi nju eyi yibanya,
kpe nkeri we achɔn enyɔ ake bansi abida.”
56Meri akɛming yi Elisabed ala bafeng ara ka we atisɛm abugag nju oyu.
Ogwe wu Jɔn mipogag mmai
57Yi nten ahɔsi yu Elisabed agweag we aba gwe mmɔni minine. 58Bolom ba bale ekpen yid yi bane ba enudi nju oyu ahɔwog arɔ Minfɔni atɔngi we bɔnɔ gbɔg, ka bɔ atɔp we achob nted.
59Wa ndu enyebenye, bɔ aba aba sob mmɔn edɔga, ka erɔng anɔngɔ lang we mpi yu nsi eyi Sekaria, 60ka nyeni eyi akpei elem arɔ, “Chang! Ayen we Jɔn.”
61Bɔ atɔ we arɔ, “Mine kpe wud chang erɔng enudi nju eya wu ali kamag mpi ayua.”
62Nyining bɔ achɔd babɔ yi nsi mmɔn, amai mpi yu we aken arɔ alang mmɔn. 63We abeb arɔ ake we ekpara yi botiti, ka wa ɔmanag beke wu bane we aseng afa arɔ, “Mpi oyu ale Jɔn.” 64Ebuyid minyɔ owu ɔrɛbi elebi ewadi ka we ahoto minchɔd ɔchɔd akerag Ɔsɔwɔ bakag. 65Bane ba ale ekpen yid yi bɔ botig bɔ kɔ bɔ, yi feb bekpen wa mpup yu mpami Judia bane achɔdag abangang feb nggom bifa bi betɛbing 66Kpeicha mine wu awoging yi etɛbing beke bemaning we, abebag, “Mmɔn wufa abag ɔkɛmi ye?” Waoye ɔsa wu Minfɔni ole yi we.
Ebɛn yi Sekaria
67Nyɔganyɔ yu Ɔsɔwɔ asoi Sekaria ka we asidi eyammɛd yi Ɔsɔwɔ arɔ:
68“Bakag akɛmi yi Minfɔni, Ɔsɔwɔ wu Isrel,
wantagi we aba ɔmɔ bane abi aba anyangi bɔ.
69We afong etɛmi Minyanyangi ake sɔ
wu arun enudi nju yi mingban owu Debid,
70nkeri we achɔding wa balem ma barɔag ba eyammɛd abi ba ale kɔng eken erab,
71arɔ we ting atudi sɔ wa babɔ ma bane ba ojing abida
yi feb ba ajingag sɔ.
72Atɔn arɔ we ting are bansi abida ba nyanya
nsɔn yi etedang enyɔ eyi yi ele kɔng,
73ɔnwɔngɔ wu we anwɔnging yi nsi eyida Ebraham:
74atudi sɔ babɔ ma bane ba ojing abida,
elem sɔ etug we ekan fɔn botig
75wa ekwen yi kɔng, yi elemang yi ele kɔng wa boso bu Ɔsɔwɔ feb ndu eyida yi ele ekwen.
76Ka we, mmɔn ama, ting ayen we arɔ minrɔag eyammɛd yi Ɔsɔwɔ wu ɔchiming nlag oking,
wantag yu we ting ɔranen ka Minfɔni ɔka loni nnen onungi we,
77alem bane abi amai enyangang yi eruag
wa eloang acha bɔ wa bobe obubɔ,
78wantagi Ɔsɔwɔ owuda ɔkwei nsɔn
we ting ake sɔ minyanyangi, wu abag owuda ala etɛbang yi nsoi yu epo yu arun esɔ
79abad bɔ ba ali kwenag wa ejiri
yi wa babɔ ma eko,
Ɔsɔwɔ ting atɔngi sɔ nnen yu ekunakuna.”
80Ka mmɔn akoi akori wa nyɔganyɔ, we akɛming wa ekpen yi bane chang akɛmag tata we atɛb jai wa Isrel.
தற்சமயம் தேர்ந்தெடுக்கப்பட்டது:
Luk 1: NBB
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
