Popodalaina 9
9
Na Vinaego sa roitinia na Tamasa tai Noa
1Beto poni sa mananiria na Tamasa sira Noa beto na tuna marene, pira sauniria, Mu vua, mu soku, beto mu pugelia na abana. 2Mai matagutu neneqerenigou agou sa doru mamanugu mamade nene pirudi pa abana beto doru mamanugu tatava pa vavagalo eqa, doru mamanugu qai rijo kanoko pa peso, beto pa doru igana pa kolo. Qai kole lao pa limamiu agou sa aipira. 3Doruna na sakasava toadi qai rijo kanoko sa na tetekuna tamugou. Vei tugu qa vanigou ira na umuma sa, kopira qa vanigou ara sa doru sakasava.
4Ba na masa isa sa korapa kolea na orungu toana, sa munake isongo tekua. 5Beto na orunguna na toa tamugou sa qa nyoroguania sosoto mana gigilai na vavakatona. Mana nyoroguania tugu vei sa na vavakato pa doru mamanugu mamade nenedi. Beto pa okokoto tinoni ba mana nyoroguania tugu sa na vavakatona na tavitina sa vamatea.
6<<Na tinoni mina vamate tinoni,
Na tinoni tugu mina vamatea sisa;
Ura pa kirena na Tamasa
Sa roitinia sa na tinoni.
7Goto agou sa, mu vua beto mu soku beto mu vaivapipidoko pa abana ko mu vasokua?>> sau Sisa.
8Beto sa paranga na Tamasa lao pa tai Noa tavitiria na tuna marene, pira sau, 9<<Kopira qa vatoqoa ara sa na qua vinaego ko qa vatoqonigou agou beto ko ira na tutimiu pa liguna lao 10beto ira na mamanugu toadi qai suvere tavitigou- na mamanugu tatava, na mamanugu papausu, beto doru mamanugu mamade nene pirudi, doruna tugu qai tuti votugou pa aka- doruna mamanugu toadi pa abana. 11Qa vatoqoa ara sa na qua vinaego ko qa vatoqonigou agou: Minake isongo tateku pale ligu pa popogosona na kolo sa doru na toa, minake isongo lame ligu sa na popogoso kolo ko mina piaria sa na abana,>> sauniria.
12Beto sa paranga mutu sa na Tamasa, <<Alepi sa na vinagigilana na vinaego qa roitinia ara tamugou beto tadira doruna mamanugu toadi qai suvere tavitigou, na vinaego tana doru sasae tinoni korapa lame. 13Qa vakolea ara pa lei sa na bibigo ko isa sa na vinagigilana na vinaego pa vaikorapaiqu ara beto na kasia abana. 14Totonai mana valamea ara sa na lei papauku pa arena na abana ko mina bola votu sa na bibigo, poni sa 15mana roroqu kamua ara sa na qua vinaego tamugou beto ko tadira doru okokoto puku mamanugu toadi. Minake isongo lame ligu sa na popogoso kolo isa mina piaria doruna na toa. 16Totonai mina bola votu sa na bibigo pa lei, poni sa mana batia beto ko mana roroqu kamua ara sa na qua vinaego kole jolana pa vaikorapaina na Tamasa beto tadira doru okokoto gogoto mamanugu toadi pa abana,>> sau.
17Ko na Tamasa sa parangia si Noa, <<Alepi sa na vinagigilana na vinaego qa vatoqoa ara ko qa vatoqonisiu mekaqu beto ira doruna na toa qai kole pa abana,>> saunia.
Ira Na Tuna Marene i Noa
18Ira na tuna marene i Noa qai votu pa aka sira Semu, i Gami beto i Japeti. I Gami sa vaporea si Kenani. 19Aipira sira kue tuna marene i Noa, beto ko tadira qai koko lame vei sira na tinoni qai qaqatia tinganai vei eqa pa abana.
20Ego i Noa sa kai tinoni umuma, sa podalai roitinia gu sa kai inuma qurepi. 21Totonai sa bukua kaki kolona na qurepi, poni sa sa digere ko na gagadona gu sa sa kole putagana pa leona nona aqaqo. 22I Gami isa na tamana i Kenani sa sa bati poai sa na gagadona na tamana ko sa ule vaniria sira karu tugana pa peguru. 23Ba ira Semu i Japeti sa qai tekua kai poko ko qai vakole pala karovia pa varadi beto ko qai rerege togolo mule pokoto taria sa na tamadi ko qai tuki vapaea. Qai bata vasoudia ko maike batia sa na gagadona na tamadi qarigu.
24Totonai sa dorava pa liguna sa buku vadigerenia si Noa beto sa gigilai na sa qi roitinia tana na tuna marene pa ligu, 25sa pira sau,,
<<Mi taleve si Kenani!
Mina pinausu tadira na pinausu sisa
Ko mina vei tugu sisa tadira na tugana,>> sau.
26Beto pira sau,
<<Mi tavatarasae si Iahova, na Tamasa tai Semu!
Mi nona pinausu i Semu si Kenani.
27Na Tamasa mi varijo valavatia sa na pikata ia tai Japeti;
Mi suvere pa aqaqo tai Semu si Japeti,
Beto i Kenani mi nona pinausu isa,>> sau sisa.
28Pa liguna na popogoso kolo sa, sa suvere kue gogoto lima ngavuluputa aoro mutu si Noa. 29Ko na vaikamuna na aoro sa suveria i Noa sa ka sia gogoto lima ngavuluputa aoro, beto sa sa mate.
தற்சமயம் தேர்ந்தெடுக்கப்பட்டது:
Popodalaina 9: LGA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024, Islands Bible Ministries. All rights reserved.