Matta 7
7
Bɛ Ka Jǝ́ Nǝbka Lɛ Bwɨlangkɛl
(Luk 6:37,38,41,42)
1“Bɛ ka jǝ́ mwatɨ lɛ borang, jen tʌjen mɨsɔ jǝ mwatɨ jem borang lɛ. 2Kanga jǝ́ mwatɨm kaamɨ gǝm borangɨɨ, jen tʌjen jǝ mwatɨ jem nyɔ. Kʌshi nɨ jǝ́ sʊwam kaamɨ gǝm nǝnɨ, jen tʌjen jǝ sʊwa jem nǝn.
3“N wɛ a bwɨ mʊ dʌng bɛ yǝlagɔ lɛ a nu kɨla mʊɨ, mʊ kuwo bɔ nyiyotɨyagɔ a nu mʊnɨ? 4N wɛ a bwɨ mʊ sʊwa kɨla mɔ, mɔʊ, ‘Yǝla, n dem mʊn kǝlɨ bɛ yǝlagɔ a mʊgɔ nu mʊnɨ,’ mʊ kuwo bɔ gʌleng nyiyotɨya nɨ a nu mʊnɨ? 5Mʊ nǝ fento! Tǝl jǝgǝm gʌleng nyiyotɨya nɨ a mʊgɔ nu mʊnɨ dɨn, sǝla ń kuwo kanga mʊ jǝgǝm kǝlɨ bɛ yǝlagɔ lɛ a nu kɨla mʊɨ.
6“Ka jǝ́ nǝ lɛ sǝgantɨnɔ kanjǝl sagsag. Ka jǝ́ tal lɛ nyiyolitɨnɔ tɛl bʊmǝntɨn. Na jǝ́ maa nyɨɨ, jǝ fala nǝn naa, sǝ ja yǝla ja nyʊwa jem twɨla.
Jǝ́ Kela, Jǝ́ Saa, Jǝ́ Ga Nyanga Kanɔ
(Luk 11:9-13)
7“Ya jǝ́ kela lɛ, jǝ nǝ jen nǝ. Ya jǝ́ saa lɛ, jǝ́ nya nya. Ya jǝ́ ga nyanga kanɔ lɛ, jǝ wum jem wum. 8Na nʊ nɨ a kelaɨ, jǝ nǝ gǝn nǝ. Nʊ nɨ a saaɨ, nya nya. Nʊ nɨ a yal jǝlɨ, jǝ wum gǝm wum nyanga kanɔ.
9“Nuwo a kʊm jen na bʊla gɔ a bʌ gǝn kʊkkʊmɨ, nǝ gǝn tɛl lɛɨ? 10Na a bʌ gǝn jʌngii, nǝ gǝn sɔɔ lɛɨ? 11Na jen jǝ́ nǝb bwɨlangkɛlɔ, jǝ́ nyǝm kanga jǝ́ nǝ bɛtɔ lɔ jeni kanjǝl nyan nɛɨ, Tɨya jen nɨ a kwamaɨ a nyǝm a laa jen, kanga nǝ kanjǝl nyan nɛ, a nǝb nɨ a kela gǝnɨ! 12Kwangkwang jǝ́ maa nǝbɔ gǝm kanga jǝ́ swɨ lɛ ja maa jemi. Wʊnɨ nǝn gɔ mɛlalɨ diil Musaɨ jǝbɔ a nǝbkuwotǝmkǝgagɨɨ.
Nyanga Kan Nɨ A Gwag Gwagɨɨ
(Luk 13:24)
13“Jǝ́ dɔ a nyanga lɔng nɨ a gwag gwagɨ. Nyanga lɔng nɨ yɔ lɛ nǝn nǝl a daa bwaaɨ a tɛɛna nyɔ, gola gɔ a bwa bɔ, nǝbɔ dɔ lɛɨ, a lada. 14Nyanga kanɔ yɔ lɛ nǝn jen a kʊlɨɨ, a gwag gwagɨ, gola gǝnɔ a bwa dɔtǝm, nǝbɔ yɔ lɛ woi a lada bɔ.
Jǝ Nyǝm Tɨyagɔ Nǝn Tʊʊl Gǝnɔ
(Luk 6:43,44)
15“Bɛ jǝ́ nyǝm nǝbkuwotǝmkǝga gabakɛlɔ. Wʊnɨ jǝ bɛ jem lɛ nǝn jelkalǝng kwamɨɨ, mʊgɔ nǝl jinɔ n bangashɨtɨn, wʊnɨ nyʊwa jʊwan bwɨla lɛɨ. 16Bǝ nyǝm nǝb nɨ nǝn maajɨ jin. Jǝ jǝg jǝg tʊʊl fogfogi a mʊgɔ nabǝrnabǝrɨ ka? Jǝ jǝg jǝg tʊʊl dʌfeng a mʊgɔ sholatɨn ka? 17Tɨya nyan gǝ tʊʊ tʊʊl nya. Tɨya bwɨla gǝ tʊʊ tʊʊl bwɨla. 18Tɨya nyan mɨsɔ dwal lɛ a tʊʊ tʊʊl bwɨla. Tɨya bwɨla mɨsɔ dwal lɛ a tʊʊ tʊʊl nyan. 19Tɨya nɨ a tʊʊ bɔ tʊʊl nyanɨ, jǝ mwatɨ gǝn jǝ mal a mʊgɔ kǝla. 20Bǝ nyǝm nǝb nɨ nǝn maajɨ jinɔ.
Mǝ Nyǝm Jen Bɔ
(Luk 13:25-27)
21“Ke bɔ nǝb nɨ gwam jo i lɛ gɔ, ‘Tɛlalɔ, Tɛlalɔɨ,’ nya dɔtǝm fɔlɔn lɔ Kwaamaɨ lɛɨ, n nǝb nɨ maa kanjǝl nɨ lɛ Tɛtɛ mɨ nɨ a kwamaɨ swɨ lɛɨ. 22Nǝbɔ a lada a kum gɔ#7:22 “Kum gɔ,” gǝ nʊng kum borang Kwaamaɨ. sʊwa sʊwa gɔ, ‘Tɛlalɔ, Tɛlalɔ, nǝn maa bɔ kuwotǝmkǝga a mʊgɔ dun mʊn ka? Nǝn kaa bɔ nǝblaamɔ a mʊgɔ dun mʊn ka? Nǝn maa bɔ jǝ laatǝm kang a mʊgɔ dun mʊn ka?’ 23Sǝla n sʊwa ji mǝʊ, ‘Mǝ nyǝm jen bɔ. Jǝ́ kʌlʌm mɨ fɔ, nǝb shil!’
Nǝb Mɔtǝm Lɔngɔ Yo
(Luk 6:47-49)
24“Nʊ nɨ a nyʊwa kɛl mǝndɨ a bwangtǝnɨ, gǝ na na nǝ yʊlan nɨ a mɔ lɔ gǝnɔ a dʌbʌl gamɨ. 25Mwɛmɔ a swiyo, tiyotɨnɔ a yiilo a gwi kʌngtɨnɔ, yʊwagɔ a maaɨ, lɔ nɨ a kʌbo bɔ, jʊ a bwɨɨ ja swa fʌlʌm gǝnɔ a dʌbʌl gam. 26Nʊ nɨ a nyʊwa kɛl mǝndɨ a bwangtǝn bɨɨ, gǝ na na nʊ nɨ a fʌm fʌmi, a mɔ lɔ gǝnɔ a dʌbʌl swiyotii. 27Nǝngɔ mwɛmɔ a swiyoi, tiyotɨnɔ a yiilo, a gwi kʌngtɨnɔ, yʊwagɔ a maaɨ, nǝngɔ a ga lɔngɨ, lɔngɔ a kʌbo, a yal, kʌbotǝm gǝnɔ a bwɨla nyɔ.”
28Nǝn kwama Yesu a dɨm sʊwatǝm kanjǝl nɨɨ, kʌm nǝb nɨ a mʊrkaɨ, ja ta kang a nyiyo nǝn mɛlalɨ gǝnɔ, 29jʊ a bwɨɨ gǝ sʊwa ji kɛlɔ na nʊ nɨ nǝn fɔlɔnɨ, ke bɔ na a nǝb mɛlalɨ diil jini.
தற்சமயம் தேர்ந்தெடுக்கப்பட்டது:
Matta 7: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
