Matta 24
24
Yesu A Sʊwa Kʌbotǝm Nɨ Nya Kan Kwaamanɔ Lɛɨ
(Mar 13:1,2; Luk 21:5,6)
1Nǝn kwama Yesu a jelʌm a Kan Kwaaman shu lɛɨ, nǝngɔ bɛtɔ mɛlalɨ gǝnɔ a bɛ daa gǝ woi, ja nʊng gǝn kantɨnɔ ja mɔba a mʊgɔ talɨ Kan Kwaamanɨ. 2Nǝngɔ a bʌ ji gɔ, “Jǝ́ kuwo kanjǝl nɨ ja mɔbaɨ? N bɨlǝngkɛl mǝ sʊwa jen nɛɨ, mɨ nǝn tɛl nɨ jǝ bǝla lɛ a dʌbʌl kaa tɛlɨ. Gwam jǝ kʌbʌm kʌbʌm.”
Tǝltǝm Gaalanɔ
(Mar 13:3-13; Luk 21:7-19)
3Kwama Yesu yǝm a dʌbʌl Yem Zaituni, nǝngɔ bɛtɔ mɛlalɨ gǝnɔ ba nya gǝn kwaaji gɔ, “Sʊwa nǝn, kanjǝl nɨ bwɨ fɨyang? N wɛ nʊng bɛtǝm mʊnɔ lɛɨ, jǝbɔ dɨltǝm yooli nɨ?”
4Nǝngɔ Yesu a jǝla ji gɔ, “Bɛ jǝ́ nyǝm kage kaa nǝl a swag jen. 5Nǝbɔ a lada na bɛ lɛ a mʊgɔ dun mɨɨ, sʊwa lɛ gɔ, ‘Nǝmǝ mǝ Kiristi,’ jǝ swag swag nǝbɔ a lada. 6Jǝ́ nyʊwa nyʊwa kɛl tatǝm kun jǝbɔ fulon kun. Ka jǝ́ nyʊwa lɛ taal, kanjǝl nɨ bwɨ bwɨ nyɔ, dɨltǝm tǝmɔ a la bɔ dɨn. 7Bǝlǝntǝmɔ tabka tabka kun. Fɔlɔntɨnɔ gabka gabka kɨlan. Jǝ maa maa jʊwan bwɨla jǝbɔ mǝgatǝm tǝm a daatɨnɔ gǝm a lada. 8Wʊnɨ nǝn gɔ tǝltǝm gaalanɔ dɨnɨ.
9“Jǝ ta jen ta, jǝ nǝ jen nǝ gaalan, jǝ jʌ jen jʌ. Yooligɔ kul jen kul a kɛl dul mɨ. 10Nǝbɔ a lada nyɔ na yǝla lɛ a nǝn gul a nǝtǝm bɨlǝngkɛl jinɔ gǝmɨ, jǝ miyoka miyoka, jǝ kulko kulko. 11Nǝbkuwotǝmkǝga gabakɛlɔ gun gun a lada, jǝ swag swag nǝbɔ a lada. 12Maakatǝm shilɔ la la daa, a dul kɛl nɨɨ, kɔrɔ nǝbɨɨ swɨkatǝm jinɔ yǝla yǝla a gul. 13Nʊ nɨ a kʊ nǝl a yɔ nǝn a dɨltǝmɨ, bʊʊ bʊʊ. 14Jǝ kiyo kiyo fulon kɛl lǝmɨ fɔlɔn lɔ Kwaamaɨ a tǝmɔ gǝm gwam, sǝ a yǝlam nǝtǝm nyiyo sǝla dɨltǝm yooligɔ a bɛ.
Gaalan Bwɨla
(Mar 13:14-23; Luk 21:20-24)
15“Kwama jǝ́ kuwo jǝ bwɨla nɨ dǝg kalatǝm lɛɨ, wʊnɨ nǝkuwotǝmkǝga Daniyel a sʊwaɨ, tɨm a daa sagsagɨɨ (nǝ kiyotǝmɔ bɛ ga nyǝm), 16na jǝ́ kuwo jʊ nɨ bwɨ lɛɨ, nǝb nɨ a mʊgɔ Yahudiyaɨ bɛ ja mwala ja gwi dʌbʌl yemtɨn, 17Nʊ nɨ a dʌbʌl kanɨ, ka ga gǝla lɛ gɔ gǝ do jǝl a mʊgɔ lɔ gɔ. 18Nʊ nɨ a tɔtwamɨ, ka ga yǝla lɛ gɔ gǝ do dwang kwabtǝm gǝn. 19N mwɛ jen jǝ́ nɔɔtǝm nɨ nǝn fʌli jǝbɔ nɔɔtǝm nabwɛmɔ nǝn kwama gɔ. 20Bɛ jǝ́ maa keli ka sʊgɔl nɨ ya bwɨ lɛ nǝn shena jǝbɔ Kum Fǝbtǝm. 21A kwama gɔ jǝ maa maa gʌleng gaalan bwɨla nɨ ja maa bɔ wo nǝn tǝltǝm fwaltǝm yooli nɨ a bɛ nǝn kǝngkǝnɨ, mɨsɔ jǝ yǝla lɛ ja maa wo tag. 22Na ja mwatɨm bɔ kumtɨn nɨɨ, na mɨ nǝfili nɨ wo bʊʊ lɛɨ. Jʊ a bwɨ ja mwatɨm kumtɨn nɨɨ, n nǝb nɨ ja jǝgamɨ.
23“Nǝn kwama gɔ na nǝl a sʊwa jen gɔ, ‘Jǝ́ dʌng, Kiristi n wɔ, n wuleni,’ bɛ ka jǝ́ jǝla lɛ. 24Kiristitɨn gabakɛlɔ, jǝbɔ nǝbkuwotǝmkǝga gabakɛlɔ jela jela, jǝ maa maa gʌleng kanjǝl laatǝm kang jǝbɔ jǝ nʊngtǝm, sǝ ja swag nǝbɔ, jǝbɔ nǝb nɨ ja jǝgamɨ na jǝ nya nya golaɨ. 25N kwɛl n sʊwa jen sʊwaɨ, sǝla a bwɨɨ.
26“A dul kɛl nɨ, na ja sʊwa jen gɔ, ‘Wulen a kuuli.’ Ka jǝ́ jel lɛ. Na ja sʊwa jen tag gɔ, ‘Wulen a mʊgɔ kan a wuu wuui.’ Ka jǝ́ jǝla lɛ. 27Kanga kwamagɔ gǝ beta lɛ a twal a yɔ nǝn a diyengi, bɛtǝm Bʊla Nǝlɨ yǝlam nyɔ.#24:27 Wʊnɨ gǝ nʊng nǝbɔ gwam kuwo gǝn kuwo. 28Daa nɨ bʌlʌnɔ woi, n daagɔ jɛtɨnɔ gǝ mʊrkam lɛɨ.
Bɛtǝm Bʊla Nǝlɨɨ
(Mar 13:24-27; Luk 21:25-28)
29“Na kwama gʌleng gaalan bwɨla nɨ a shui, nu kwamagɔ fi fi kum, mɨsɔ bwaalagɔ fulo lɛ. Nyanyamɨtɨnɔ gǝla tǝla tǝla a tǝm, kanjǝl nɨ a dʌbʌli jǝ mǝga mǝga. 30A kwama gɔ jǝ kuwo kuwo kaa jǝ nʊngtǝm a dʌbʌl kwama, na Bʊla Nǝlɨ a nʊng dul gǝnɨ. Nǝbɔ a yooli nɨɨ ji ji wi bwaa, na ja kuwo Bʊla Nǝlɨ bɛ lɛ a mʊgɔ luli, nǝn kwaan jǝbɔ gʌleng dʊʊlǝn gǝnɔ. 31Twam twam bɛtɔ twama gǝnɔ sǝ ja guu jum nɨ nǝn diil dʊʊn, sǝ ja mʊr nǝb nɨ ja jǝgamɨ, jʊ a tǝl a twal a bɛ nǝn a diyengi, jǝbɔ gǝlalǝng a bɛ nǝn a gwilʌngi, jʊ a tǝl a dʌbʌl kwama a yɔ nǝn a kaa gwanga a dʌbʌl kwamaɨ.
Mɛlalɨ Nǝn Tɨya Dʌfeng
(Mar 13:28-31; Luk 21:29-33)
32“Bɛ jǝ́ mɛla kaa jǝl nǝn tɨya dʌfengɔ. Na kangtɨn gǝnɔ a tǝl to langǝn fɨgɔ lɛɨ, jǝ́ nyǝm shenagɔ a dwama. 33Gǝ na nyɔ tag, na jǝ́ kuwo kanjǝl nɨ gwamɨ, bɛ jǝ́ nyǝm a dwama, tɨm a nyanga kan. 34N bɨlǝngkɛl mǝ sʊwa jen nɛɨ, nǝbɔ kal nɨɨ, mɨsɔ jǝ bʊla lɛ, na kanjǝl nɨ gwam a bwɨ bɨɨ. 35Dʌbʌlɔ jǝbɔ tǝmɔ dɨ dɨ, kɛl mǝndɨ mɨsɔ dɨ lɛ wo.
Mɨ Nǝn Nʊ Nɨ A Nyǝm Kwama Bɛtǝm Bʊla Nǝlɨ
(Mar 13:28-31; Luk 17:26-30,34-36)
36“Mɨ nǝn nʊ nɨ a nyǝm kumɔ, jǝbɔ kemʌnɔ jʊ nɨ bwɨm lɛɨ. Bɛtɔ twama Kwaamaɨ nɨ a dʌbʌli jǝbɔ Bʊlagɔ ja nyǝm bɔ. Nǝn Tɨyagɔ kwaagɔ win a nyǝmɨ. 37Kanga ja maam nǝn jol Nuhui, jǝ maa nyɔ a bɛtǝm Bʊla Nǝlɨ. 38Nǝn kwamagɔ mwɛ nɨ a fʌlʌm tǝmɔ gwamɨ a lǝga bɔ a bɛɨ, nǝbɔ ja lɛ, nɔɔ lɛ, jǝ naaka lɛ, a bɛ ba la kwama Nuhu a dɔm tɨyamwɛngɨ. 39Nǝn kwama la ja nyǝmǝm jʊ nɨ bwɨ lɛɨ, mwɛ nɨ a fʌl tǝmɔ gwamɨ, a ba wɔɔ ji gwam. Yǝlam nyɔ nǝn bɛtǝm Bʊla Nǝlɨ. 40Nǝn kwama gɔ na nǝbɔ yo maa maajɨ lɛ a mʊgɔ tɔtwamɨ, jǝ dem dem nʊ win, ja bǝla win. 41Nɔɔtǝmɔ yo kʊwa nɛl lɛ, jǝ dem dem win, ja bǝla win.
42“Bɛ jǝ́ fɛka yɨm jenɔ, jʊ a bwɨɨ jǝ́ nyǝm bɔ kɔkɔ nɨ Tɛlalɔ jenɔ bɛm lɛɨ. 43Bɛ jǝ́ nyǝm, na nǝ lɔngɔ a nyǝm kwama nɨ nǝkuugɔ bɛm lɛ nǝn kumi, na mɨsɔ daa dum lɛ, na mɨsɔ jǝla lɛ ja dɔ gǝm lɔ. 44Gǝ na nyɔ jen tʌjen bɛ jǝ́ fɛka yɨm jenɔ, Bʊla Nǝlɨ bɛ lɛ nǝn kwama nɨ jǝ́ maa bɔ bʊʊlalɨ.
Bwɛ Jwaalɛ Nya Jǝbɔ A Bwɨla
(Luk 12:41-48)
45“Nuwo n bwɛ jwaalɛ, n nǝ tatǝm swatǝm yaa jǝbɔ nǝ yʊlanɨ? N nʊ nɨ tɛlalɔ gǝnɔ a ya gǝn dʌngtǝm lɔ gǝnɨ, ya nǝ ji jǝjalǝnɔ lɛ nǝn kwama jǝ jam lɛɨ. 46Bwiligɔ na a bwɛ jwaalɛ nɨɨ, na tɛlalɔ gǝnɔ a yǝla a bɛ ba nya gǝn maa lɛ nyɨɨ. 47N bɨlǝngǝn mǝ sʊwa jen nɛɨ, nǝ gǝn nǝ tɔɔtǝm kanjǝl gǝnɔ gwam. 48Na bwɨlang bwɛ jwaalɛ nɨ a yǝla a bʊʊla a nǝl gǝn gɔ, ‘Tɛlalɔ mɨ a tɨla,’ 49nǝngɔ a tǝl bʊgtǝm tangǝn bɛtɔ jwaalɛn nɨ jǝ dakinii, ja lɛ, nɔɔ lɛ jǝbɔ fatǝm nɔɔtǝm gǝnɔ. 50Tɛlalɔ bwɛ jwaalɛ nɨɨ bɛ nǝn kum nɨ ga ya bɔ a nǝlɨ, kwama nɨ ga nyǝm bɨɨ. 51Ba bashɨ gǝn, sǝ a maa gǝm borang jǝbɔ nǝb fentogɔ, n daa gɔ jǝ jim wi lɛ nǝn kʊʊtǝm nungʌni.
தற்சமயம் தேர்ந்தெடுக்கப்பட்டது:
Matta 24: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
