Matta 22
22
Mʊsǝn Kɛl A Dul Kangwaal
(Luk 14:15-24)
1Yesu a yǝla a sʊwa ji mʊsǝn kɛlɔ tag gɔ, 2“Fɔlɔn lɔ Kwaamaɨ jǝ mʊrka gǝn jǝbɔ kɛl kaa fɔlɔ wʊnɨ a swɨ bʊla gɔ gǝm kangwaalɨ. 3A twam jwaalɛb gǝnɔ gɔ ya ja jo nǝbɔ ga sʊwa ji kɛl kangwaalɔ ga swɨɨ ja bɛ. Ja kɔ bɛtǝmɔ.
4“Nǝngɔ a twam kaam jwaalɛbɔ gɔ, ‘Jǝ́ sʊwa nǝbɔ jengɔ, “N wɔ n fɛka jǝjalǝnɔ, n beta nɛɛtɨnɔ jǝbɔ nɛɛtɨn nɨ mǝ tuum tuumi a dʊʊla nǝn lʊglʊg nyɨɨ, wʊnɨ mǝ fɛka a kɛl kangwaal nɨɨ, n fɛka kanjǝlɔ gwam. Jǝ́ bɛ kangwaalɔ!” ’
5“Ja swa bɔ lɔl, ja shu. Kaa a shu a twam gǝn. Kaa a shu a gamdʌbo. 6Kaamɨ a ta bɛtɔ jwaalɛnɔ, ja maa jim bʊgǝn, ja jʌbom ji. 7Fɔlɔgɔ a kal nǝl dangǝn. A twam sʊwajaamtɨn gǝnɔ gɔ ja jʌbom nǝb nɨ a dǝg jʌtǝm duli, ja twɨm tuulɔ jinɔ nǝn pʌd.
8“Nǝngɔ a sʊwa jwaalɛb gǝnɔ gɔ, ‘Ja dɨ fɛkalɨ kangwaalɔ, nǝbɔ mǝ joi ja daa bɔ tʌgo a kangwaalɔ gǝm. 9Jǝ́ yɔ a daa mʊrkalɨtɨnɔ gǝm jǝ́ sʊwa nǝbɔ jǝ́ nyaɨ jengɔ ja bɛ kangwaalɔ.’ 10Bɛtɔ jwaalɛb nɨ ja bwangtǝn daa mʊrkalɨtɨnɔ, ja jo nǝbɔ gwam ja nyaɨ, nǝb nyanɔ, jǝbɔ nǝb bwɨlamɔ, talɨ kangwaalɔ a yii nǝn faabǝm.
11“Nǝn kwamagɔ fɔlɔgɔ a dɔ sǝ a dʌng nǝbɨɨ, a kuwo kaa nǝl mɨ nǝn bɛllɛ kangwaalɔ. 12Nǝngɔ a sʊwa nʊ gɔ gɔ, ‘Fwalgɔ, a maa nyǝn mʊ dɔ fɔ mʊ mal bɔ bɛllɛ kangwaalɨ?’ Nʊgɔ a nyǝm bɔ jʊ gǝ gar gǝm lɛɨ. 13Nǝngɔ fɔlɔgɔ a sʊwa nǝb fɛkalɨ maajɨ kangwaalɔ gɔ, ‘Jǝ́ bwabam kang gǝnɔ jǝbɔ naa gǝnɔ, jǝ́ mal gǝn a yooli, a kumtojili, n daa nɨ jǝ jim wi lɛ nǝn kʊʊtǝm nungʌni.’
14“Ja jo nǝbɔ a lada, nǝn dǝm nyɔ ja jǝgamɨ.”
Bʌtʌm Kɛl A Dul Ywatǝm Kemʌn Tǝm Kaisarɨ
(Mar 12:13-17; Luk 20:20-26)
15Nǝngɔ nǝbɔ Farisaɨ ja yɔ ya ja fwam kanga jǝ shim Yesu gǝm lanɔ lɛ a mʊgɔ jʊ gǝ sʊwa lɛɨ. 16Nǝngɔ ja twam bɛtɔ mɛlalɨ jinɔ jǝbɔ kaam nǝbam Hiridusi a daa gǝ woi gɔ, “Nǝ mɛlalɨ, nǝn nyǝm mʊ nǝ bɨlǝngkɛl, mʊ mɛla gola Kwaamaɨ lɛ nǝn bɨlǝngǝn, nǝbɔ pʌd win a daa mʊ woi, mʊ do bɔ kaa nǝl a laa a wini. 17Sʊwa nǝn, a mʊnɔ bʊʊlalɨgɔ, n dǝngdǝng bǝ ywa Kaisar kemʌn tǝm ka? Ka bǝ ywa lɛ ka?”
18Yesu a nyǝm bwɨlang bʊʊlalɨ jini, nǝngɔ a sʊwa gɔ, “Jǝ́ nǝb fentogɔ, n wɛ a bwɨ jǝ́ swɨ lɛ jǝ́ tɛl ɨɨ? 19Jǝ́ nʊng ɨ kemʌn nɨ jǝ ywam kemʌn tǝm lɛɨ.” Nǝngɔ ja bɛ gǝm nǝn kemʌn sǝlǝnɨ. 20Nǝngɔ a bʌ ji gɔ, “Duuli nɨ jǝbɔ dun nɨ na a woi?”
21Nǝngɔ ja sʊwa gǝn gɔ, “Na a Kaisarɨ.” Nǝngɔ Yesu a sʊwa ji gɔ, “Jǝ́ nǝ Kaisar jʊ nɨ na a Kaisarɨ, jǝ́ nǝ Kwaama jʊ nɨ na a Kwaamaɨ.” 22Ja nyʊwa nyɨɨ, nǝngɔ ja ta kang a nyiyoi, ja bǝla gǝn, ja shui.
Bʌtʌm Kɛl A Dul Guntǝm A Bwaa
(Mar 12:18-27; Luk 20:27-40)
23A kum gɔ, kaam nǝbɔ Sadukiyaɨ ja bɛ a daa Yesu woi. Nǝji jǝ sʊwa lɛ gɔ, mɨ guntǝm wo a bwaaɨ. Nǝngɔ ja bʌ gǝn gɔ, 24“Feyi, Musa a sʊwa gɔ, ‘Na nǝl a bʊla, a bʌ bɔ bwɛɨ, bɛ kɨla gɔ a naa nɔɔkʊlagɔ sǝ a bʌ kɨla gɔ gǝm bɛtɨ.’ 25Kaam kɛb batǝn wo jǝ nʌbʌl a kʊm nǝn. Bwɛ tɨkǝgagɔ a naa nɔɔlɨ, nǝngɔ a bʊlaɨ, a bʌ bɔ bwɛ, a bǝla kɨla gɔ gǝm nwala gɔ. 26N jʊ a bwɨ nǝn na yogɨɨ, jǝbɔ na taalɨ, a yɔ nǝn a na nʌbʌlɔ gǝmɨ. 27A dɨltǝmɔ gǝm, nǝngɔ nɔɔlɨgɔ a bʊlaɨ. 28A kɔkɔ guntǝmɔ a bwaaɨ, yǝlam nwala woi a kʊm jin? Jʊ a bwɨɨ gwam jinɔ ja naa gǝn wo.”
29Yesu a jǝla ji gɔ, “Bʊʊlalɨ jenɔ mɨ dǝngdǝng, jʊ a bwɨɨ jǝ́ nyǝm bɔ mʊlalɨ kɛl Kwaamaɨ wo, jǝ́ nyǝm bɔ kwaan Kwaamaɨ wo tag. 30A guntǝmɔ a bwaaɨ, mɨ naakan wo, mɨsɔ jǝ nǝ naakan nɛ, nǝbɔ yǝlam na bɛtɔ twama Kwaamaɨ a dʌbʌl. 31A kɛl guntǝmɔ a bwaaɨ, jǝ́ kiyo bɔ jʊ Kwaama a sʊwa jeni ka? Ja mʊla gɔ, 32‘Nǝmǝ mǝ Kwaama Ibrahimi, Kwaama Ishakui, jǝbɔ Kwaama Yakubui.’ Nǝn gɔ Kwaama nǝb nɨ nǝn kʊlɨɨ, n ke bɔ a nǝb nɨ mɨ nǝn kʊlɨɨ.”
33Kwama nǝbɔ a nyʊwa kɛl nɨɨ, nǝngɔ ja ta kang a nyiyo a mɛlalɨ gǝnɔ gǝmɨ.
Diil Nɨ A Kwam Kwamɨ
(Mar 12:28-34; Luk 10:25-28)
34Kwama nǝbɔ Farisaɨ a nyʊwa a laa nǝbɔ Sadukiyaɨ kɛlɨ, nǝngɔ ja mʊrkaɨ. 35Kaa nǝ mɛlatǝm diil a kʊm jin a maa Yesu gǝm bʌtʌm kɛl tɛltǝm gɔ, 36“Nǝ mɛlalɨ, n diil won a laa tangǝnɔ gwam a mʊgɔ diili?” 37Nǝngɔ Yesu a jǝla gǝn gɔ, “ ‘Bɛ ń swɨ Tɛlalɔ Kwaama mʊnɔ nǝn nǝl mʊnɔ gwam, nǝn dʊʊmɨ mʊnɔ gwam, jǝbɔ bʊʊlalɨ mʊnɔ gwam.’ 38Wʊnɨ n diil na win. N nʊ a laa tangǝnɨ. 39Na yogɔ a jelka na winɔ, ‘Bɛ ń swɨ fwalɨ yɨm mʊnɔ kanga mʊ swɨm dul mʊnɔ lɛɨ.’ 40Gwam diilɔ jǝbɔ mɛlalɨ nǝbkuwotǝmkǝgagɨɨ, gǝ na a mʊgɔ diil nɨ yoi.”
Bʌtʌm Kɛl A Dul Kiristii
(Mar 12:35-37; Luk 20:40-44)
41Kwama nɨ nǝbɔ Farisaɨ a mʊrka daagɔ wini, nǝngɔ Yesu a bʌ ji gɔ, 42“Bʊʊlalɨ jenɔ a nʊng nyǝn a dul Kiristii? Nǝn bʊla woi?”
Nǝngɔ ja sʊwa gǝn gɔ, “Nǝn bʊla Daudaɨ.”
43Nǝngɔ Yesu a sʊwa ji gɔ, “Dauda nǝn kwaan Yʊwa Kwaamaɨ, a jo gǝn gɔ, ‘Tɛlalɔ,’ a maa nyǝn? Dauda gɔ,
44“ ‘Tɛlalɔ a sʊwa Tɛlalɔ mɨ gɔ,
“Yɨ fɔ a kang jajǝng mɨ,
ba la nǝn kwama nɨ
mǝ ya ń nɛ a dul
fatǝm kiim mʊnɨ.” ’
45Na Dauda a jo gǝn gɔ, ‘Tɛlalɔɨ,’ a maa nyǝn la a yǝlam bʊla gɔ tagɨ?” 46Ja nyǝm bɔ jʊ jǝ gar gǝm lɛɨ. A ta a kum gɨɨ, mɨ nǝn nʊ nɨ a mwɨ a bʌ gǝn kɛl tagɨ.
தற்சமயம் தேர்ந்தெடுக்கப்பட்டது:
Matta 22: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
