Matta 20
20
Nǝb Maajɨ A Tɔtwam Fogfogi
1“Fɔlɔn lɔ Kwaamaɨ gǝ na na kaa tɛlalɔ nɨ a jel nǝn kumsʌl butʌb sǝ ya saa nǝb nɨ ya maa gǝm maajɨ lɛ a mʊgɔ tɔtwam fogfogi gǝnɨ. 2A jǝla gɔ gǝ ywa ji ywa kemʌn sǝlǝnɔ kanga jǝ ywam nǝb maajɨgɔ lɛ a kɔkɔɨ, nǝngɔ a tʊng ji a tɔtwam fogfogi gǝnɨ.
3“Nǝn kemʌnɔ tʊlkʊb nǝngɔ a jel a kuwo kaam nǝb a gamdʌboi, yǝmam ja maa bɔ kaa maajɨ. 4Nǝngɔ a sʊwa ji gɔ, ‘Jǝ́ yɔ tʌjen a tɔtwam mɨ ya jǝ́ maa maajɨgɔ, mǝ ywa jen ywa dǝngdǝng jʊ jǝ ywa lɛɨ.’ 5Nǝngɔ ja shui.
“A yǝla a jel nǝn sɨ kɔkɔ tagɨ, a do kaam nǝb maajɨ sǝ gǝ ywa ji nyɔ tʌjii. A yǝla a jel tag kemʌnɔ taal nǝn kwaamɨɨ, a do kaam nǝbɔ. 6Nǝn kemʌnɔ nʊ na kwaamɨ a jel tagɨ, a kuwo kaam nǝb tɨm nǝn kwan ja maa bɔ kaa jǝl, nǝngɔ a sʊwa ji gɔ, ‘N wɛ a bwɨ jǝ́ tɨm nǝn kwan jǝ́ maa bɔ kaa jǝlɨ?’
7“Nǝngɔ ja sʊwa gɔ, ‘Mɨ nʊ nɨ wo a nǝ nǝn maajɨ maatǝmɨ.’
“Nǝngɔ a sʊwa ji gɔ, ‘Jen tʌjen jǝ́ yɔ a tɔtwam mɨ.’
8“Nǝn kwaamɨ, nǝngɔ nǝ tɔtwamɔ a sʊwa nǝ dʊʊgɔ gɔ, ‘Jo nǝb maajɨgɔ, ń ywa ji kemʌn maajɨ jinɔ, tǝl nǝn nǝb maajɨ kwaamɨgɔ dɨsɔ ń dɨl nǝn nǝb kumsʌlɔ.’
9“Nǝb nɨ a yɔ kemʌnɔ nʊ na kwaamɨɨ, gwam jinɔ a ywa ji kemʌn sǝlǝnɔ kanga gǝ ywam lɛ a kɔkɔɨ. 10Nǝb nɨ a yɔ nǝn kumsʌli, ja do gɔ, kɛna gǝ ywa ji ywa a laa a nǝb kwaamɨgɨɨ. Gwam jinɔ a ywa ji kemʌn sǝlǝn kanga gǝ ywam lɛ a kɔkɔɨ, a ywa ji dǝngdǝng jǝbɔ nǝb kwaamɨgɔ. 11Ja yoi, nǝngɔ jǝ kʊnga lɛ a dul nǝ tɔtwamɨ, 12jǝ sʊwa lɛ gɔ, ‘Nǝb nɨ ja bɛ nǝn guli, n maajɨ kemʌnɔ win na kɔkɔ ja maaɨ, ń ywa ji dǝngdǝng jǝbɔ nǝn, gwam kɔkɔ nɨ a dɨ nǝm a bʊtɔ nǝn maa maajɨ lɛ, nǝn fǝb bɔ wo.’
13“Nǝngɔ a sʊwa win a kʊm jin gɔ, ‘Fwalgɔ, mǝ bǝm ń bɔ. Bǝ kiyo bɔ kiyoi mǝʊ mǝ ywa kemʌn sǝlǝn kanga jǝ ywam nǝbɔ lɛ a kɔkɔɨ ka? 14Yo jʊ nɨ na a mʊɨ, yɔ ń shu. N swɨtǝm mɨ n ywa nǝbɔ a bɛ nǝn guli, kanga mǝ ywa ńɨ. 15Mǝ la bɔ n maa jʊ mǝ swɨ lɛɨ nǝn jʊ nɨ na a mɨɨ ka? Mʊ maa nungon nǝn lǝmagɔ mǝ maa tangǝnɔ gǝmɨ ka?’
16“Nǝb gulɔ yǝlam nǝb kǝgam, nǝb kǝgamɔ yǝlam nǝb gul.”
Yesu A Sʊwa Kɛl Bwaa Gǝnɔ Tag
(Mar 10:32-34; Luk 18:31-34)
17Yesu jǝbɔ bɛtɔ mɛlalɨ gǝnɔ ja gwi jǝ shu lɛ a Urushalimaɨ, nǝngɔ a gʊ ji a kʌng golang a sʊwa ji gɔ, 18“N wɔ bǝ gwi bǝ yi a Urushalima. Jǝ nǝ nǝ Bʊla Nǝlɨ a kang dʊʊm nǝbkǝlamɨɨ, jǝbɔ nǝb mɛlalɨ diilɔ. Jǝ mwatɨ gǝm borang jʌtǝm. 19Sǝla ja nǝ Bʌtʌbɔ, sǝ ja mog gǝn, ja tʊm gǝn, ja kʊʊ gǝn a dʌbʌl tɨya kʊʊtǝm. A kum na taal gun gun.”
Keli Nɛnɛ Yakubui Jǝbɔ Kɨla Gɔ Yohana
(Mar 10:35-45)
20Nǝn kwama nɛnɛ bɛtɔ lɔ Zabadii a bɛ a daa Yesu woi jǝbɔ bɛtɔ lɔ gɨɨ, nǝngɔ a ba jʊng a kǝga gǝn a kela gǝn kaa jǝlɨ.
21Nǝngɔ a bʌ gǝn gɔ, “N wɛ mʊ swɨ lɛɨ?”
Nǝngɔ a sʊwa gǝn gɔ, “Dǝg bɛtɔ lɔ mɨɨ nɨ jǝ yoi ja yɨɨ a kang jajǝng jǝbɔ kang fɔlɔng mʊn a mʊgɔ fɔlɔn lɔ mɔ.”
22Nǝngɔ Yesu a jǝla gɔ, “Jǝ́ nyǝm bɔ jʊ jǝ́ kela lɛɨ. Jǝ́ mwɨ mwɨ jǝ́ nɔɔ gaalan nɨ mǝ nɔɔ lɛɨ ka?”
Nǝngɔ ja jǝla gǝn gɔ, “Nǝn mwɨ mwɨ.”
23Nǝngɔ a sʊwa ji gɔ, “N nyǝm nyɔ, jǝ́ mwɨ mwɨ jǝ́ tɨ, jǝ́ nɔɔ gaalanɔ na mǝ. Mǝ sʊwa jen nɛ, kɛl yɨm a kang jajǝng jǝbɔ kang fɔlɔng mɨ, mɨ mǝ nǝn fɔlɔn nɨ mǝ nǝ jen nɛɨ. Tɛtɛ mɨ nɨ a kwamaɨ a fɛm nǝbɔ ga jǝgamɨ daatɨnɔ.”
24Tangǝn bɛtɔ mɛlalɨgɔ kʊb ja nyʊwa kɛl nɨ nyɨɨ, nǝngɔ ja kal nǝl nǝn kɛtǝlam jinɔ nɨ yoi. 25Yesu a jo ji a daa gǝ woi a sʊwa gɔ, “Jǝ́ nyǝm kanga fɔlɔlɔm nɨ n Bʌtʌbi jǝ nʊng fɔlɔn nɛ a dul nǝbam jini, nǝb dʊʊm jinɔ nʊng nǝbam jinɔ kwaan nɛ. 26Ka yǝlam lɛ nyɔ a kʊm jen. Na nʊ nɨ swɨ lɛ a yǝlam dʊʊ a kʊm jeni, bɛ ga yǝlam bwɛ jwaalɛ a kʊm jen. 27Na nʊ nɨ swɨ lɛ a yǝlam dʊʊ kotere a kʊm jen tagɨ, bɛ ga yǝlam bwɛ jwaalɛ tangǝnɨ. 28A na nyɔ Bʊla Nǝlɨ a bɛ bɔ sǝ ja nǝ gǝn dʊʊn, a bɛ sǝ ba jʊng, sǝ a nǝ kʊlɨ gǝnɔ sǝ a jǝg nǝbɔ a lada.”
Kululʌmɔ Yo Ja Nya Kuwotǝm Daa
(Mar 10:46-52)
29Kwama Yesu jǝbɔ bɛtɔ mɛlalɨ gǝnɔ jǝ bǝla Yerikogɔ lɛɨ, nǝbɔ a lada na ja bwang gǝmɨ. 30Kaam kululʌmɔ yo yǝmam a kʌng gola, ja nyʊwa Yesu shu lɛɨ, nǝngɔ jǝ sʊwa kɛlɔ lɛ nǝn diil gɔ, “Tɛlalɔ, Bʊla Daudaɨ! Ji bʊnǝn nǝnɔ!”
31Nǝbɔ a ga ji gɔ, ja yɨɨ shig. Nǝngɔ ja sʊtǝn diilɔ jǝ sʊwa lɛ gɔ, “Tɛlalɔ, Bʊla Daudaɨ! Ji bʊnǝn nǝnɔ!”
32Nǝngɔ Yesu a tɨ a jo jii, a bʌ ji gɔ, “N wɛ jǝ́ swɨ lɛ n maa jemi?”
33Nǝngɔ ja sʊwa gǝn gɔ, “Tɛlalɔ, nǝn swɨ lɛ nǝn kuwo daa.”
34Yesu a ji bʊnǝn jini, nǝngɔ a ke nu jini, tʌgo a kang jǝ kuwo daagɔ lɛ, nǝngɔ ja bwang gǝmɨ.
தற்சமயம் தேர்ந்தெடுக்கப்பட்டது:
Matta 20: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
