Matta 16
16
Saatǝm Jǝ Nʊngtǝm
(Mar 8:11-13; Luk 12:54-56)
1Kaa di nǝbɔ Farisaɨ jǝbɔ nǝbɔ Sadukiyaɨ, ja bɛ sǝ ja tɛl gǝn, sǝ ga nʊng ji kaa jǝ laatǝm kang a dʌbʌl, wʊnɨ yǝlam jim jǝ nʊngtǝm lɛɨ. 2Nǝngɔ a jǝla ji gɔ, “Na jǝ́ kuwo langǝn lul feligɔ a dʌbʌl nǝn kwaamɨɨ, jǝ́ sʊwa sʊwa jengɔ, ‘Fʌng tǝmɔ bʊm bʊm.’ 3Na nǝn kumsʌl jǝ́ kuwo langǝn lulɔ a fo a gaba dʌbʌlɔ nyɨɨ, jǝ́ sʊwa sʊwa jengɔ, ‘Dwiyen jǝ maa maa yʊwa mwɛ.’ Jǝ́ nyǝm yǝlatǝm dʌbʌl kwamagɔ, mɨsɔ jǝ́ dwal lɛ jǝ́ nyǝm jʊ yǝlatǝm joltɨn nɨ nʊng lɛɨ. 4Kal nɨ, nǝb bwɨlan, mɨ jǝ nyʊwa taal Kwaamaɨ lɛ. Jǝ swɨ lɛ ja kuwo jǝ nʊngtǝm! Mɨ kaa jʊ nɨ wo jǝ nʊng ji lɛɨ, na ke bɔ a Yunanaɨ.” Nǝngɔ a bǝla ji, a shui.
Yisti Nǝbɔ Farisaɨ Jǝbɔ A Nǝbɔ Sadukiyaɨ
(Mar 8:14-21)
5Nǝn kwama bɛtɔ mɛlalɨ gǝnɔ a lam kʌng wɨma wini, ja bʊʊla gɔ jǝ twabǝm jǝ do bɔ kʊkkʊmɔ. 6Nǝngɔ Yesu a sʊwa ji gɔ, “Bɛ jǝ́ nyǝm, jǝ́ kɨla yisti nǝbɔ Farisaɨ jǝbɔ a nǝbɔ Sadukiyaɨ.”
7Nǝngɔ ja sʊwaka a kʊm jin gɔ, “N kɛlɔ bǝ bɛ bɔ nǝn kʊkkʊmɨ.”
8Yesu a kwɛl a nyǝm bʊʊlalɨ jini, nǝngɔ a sʊwa gɔ, “Jen, jǝ́ nǝb nɨ nǝn nǝtǝm bɨlǝngkɛl nǝn dǝm nyɨɨ, n wɛ a bwɨ jǝ́ sʊwa lɛ a kʊm jen, jengɔ mɨ jen nǝn kʊkkʊmɨ? 9Jǝ́ nyǝm bɔ dwal ka? Jǝ́ bʊʊla bɔ kanga mǝ ja nǝn nǝbɔ fʊlkʊblǝn nʊ nǝn kʊkkʊmɔ nʊɨ ka? Jǝ́ bʊʊla bɔ tunɔ nyǝn jǝ́ mʊr fʌtʌlogi gǝnɨ? 10Jǝ́ bʊʊla bɔ tag jǝbɔ kʊkkʊmɔ nʌbʌl jǝbɔ nǝbɔ fʊlkʊblǝn naalɨ ka? Jǝ́ bʊʊla bɔ daltɔ tunɔ nyǝn jǝ́ yii nǝn fʌtʌlogi gǝnɔ jǝ́ mʊrɨ ka? 11N wɛ bwɨ jǝ́ nyǝm bɔ gɔ n ke bɔ kʊkkʊm mǝ sʊwa kɛl lɛ a dul gǝnɨ? Bɛ jǝ́ kɨla yisti nǝbɔ Farisaɨ jǝbɔ a nǝbɔ Sadukiyaɨ.” 12Nǝngɔ la ja nyǝm gɔ n ke bɔ yisti kʊkkʊmɨ sʊwa ji lɛɨ. Gǝ sʊwa ji mɛlalɨ kanjǝl nǝbɔ Farisaɨ jǝbɔ a nǝbɔ Sadukiyaɨ.
Sʊwatǝm Bitrusi Gɔ Yesu Nǝn Kiristi
(Mar 8:27-30; Luk 9:18-21)
13Nǝn kwama Yesu a dɔ tǝm Kaisar Filibii, nǝngɔ a bʌ bɛtɔ mɛlalɨ gǝnɔ gɔ, “Nǝbɔ gǝ sʊwa gɔ Bʊla Nǝlɨ nuwo?”
14Nǝngɔ ja jǝla gɔ, “Kaamɨ sʊwa lɛ gɔ mʊ nǝn Yohana nǝ Yʊtǝm mwɛ Sagsagɔ, kaamɨ gɔ mʊ nǝn Iliya nǝkuwotǝmkǝga, kaamɨ tag gɔ mʊ nǝn Irimiya, kaamɨ gɔ mʊ na kaa win a mʊgɔ nǝbkuwotǝmkǝga.”
15Nǝngɔ a bʌ ji gɔ, “A jenɔ jǝ́ sʊwa jengɔ mǝ nǝn nuwo?”
16Nǝngɔ Saminu Bitrus a jǝla gɔ, “Mʊ nǝn Kiristi, Bʊla Kwaamaɨ, Nǝ kʊlɨ.”
17Nǝngɔ Yesu a sʊwa gǝn gɔ, “Saminu bʊla Yunanaɨ, bɛ Kwaamagɔ a nǝ ń bwili. Ke bɔ nǝfili a nǝ ń kwaan nyǝmtǝm jʊ nɨɨ, Tɛtɛ mɨ nɨ a kwamaɨ nǝn gɔ a nʊng ń nɨ. 18Mǝ sʊwa ń nɛ, mʊ nǝn#16:18 Dun nɨ gɔ Bitrusi gǝ nʊng sunte. Bitrus, a dul sunte nɨ mǝ mɔ mʊrkalɨ nǝb bwangtǝm mǝndɨ lɛɨ, wʊnɨ bwaagɔ mɨ nǝn kwaan a dul gǝnɨ. 19Mǝ nǝ ń nǝ ń jǝ wumtǝm nyanga kantɨn fɔlɔn lɔ Kwaamaɨ. Jʊ nɨ mʊ bwa a tǝm nɨɨ, jǝ bwa bwa nyɔ a dʌbʌl kwama. Jʊ nɨ mʊ kwɨ a tǝm nɨɨ, jǝ kwɨ kwɨ nyɔ a dʌbʌl kwama.” 20Nǝngɔ a gʊ lɔl bɛtɔ mɛlalɨ gǝnɔ gɔ bɛ ka ja sʊwa lɛ kaa nǝl gɔ, gǝ nǝn Kiristi.
Yesu A Sʊwa Bwaa Gǝnɔ Jǝbɔ Guntǝm Gǝnɔ
(Mar 8:31; 9:1; Luk 9:22-27)
21A kumtɨn gɔ, Yesu a tǝl fɛta bɛtɔ mɛlalɨ gǝnɔ kɛlɔ lɛ gɔ, “A yǝlam nyɔ n yɔ a Urushalima, mǝ nɔɔ nɔɔ gaalan nǝn dʌmʌn a kang nǝb dʊʊmɨ, jǝbɔ dʊʊm nǝbkǝlamɔ jǝbɔ nǝb mɛlalɨ diilɔ. Jǝ jʌ i jʌ i. A kum na taalɔ gǝm, mǝ gun gun nǝn dʊʊmɨ.”
22Nǝngɔ Bitrus a gʊ gǝn gwanga win a tǝl wɛla gǝm lɛɨ, sʊwa lɛ gɔ, “Bɛ Kwaamagɔ a shigʌm Tɛlalɔ, tǝmɔ gun nǝngǝn, mɨ nǝn jʊ nɨ bwɨ lɛ nǝn mʊɨ.”
23Nǝngɔ Yesu a yǝla a sʊwa Bitrus gɔ, “Yǝla a gul mɨ Mamm! Mʊ tɛl fǝtǝm naa a daa mǝ woi, jʊ a bwɨɨ mʊ ya bɔ bʊʊlalɨ mʊnɔ a kanjǝl Kwaamaɨ, mʊ maa bʊʊlalɨ nǝfitʌmi.”
24Nǝngɔ Yesu a sʊwa bɛtɔ mɛlalɨ gǝnɨ gɔ, “Na nʊ nɨ swɨ lɛ a bwang mɨɨ, bɛ ga kɔ dul gǝnɔ, ga do tɨya kʊʊtǝm gǝnɔ, ga bwang mɨ. 25Nʊ nɨ swɨ lɛ a bʊʊ nǝn kʊlɨ gǝnɨ, jʊ jʊ. Na nʊ nɨ a jʊ kʊlɨ gǝnɔ a kɛl dul mɨɨ, nya nya dʊʊmɨ gǝnɔ. 26N wɛ nǝl nya lɛɨ, na nǝl a nya yooli nɨ gwam, a nya bɔ kʊlɨ gǝnɔ a lɔ Kwaamaɨ? Wɛ nǝl nǝ lɛ sǝ a yǝla a fʌto kʊlɨ gǝnɨ? 27Bʊla Nǝlɨ bɛ bɛ nǝn dʊʊlǝn Tɛtɛ gɨɨ jǝbɔ bɛtɔ twama gǝnɔ. Ywa ywa nǝbɔ win win a jʊ ja maaɨ. 28Bɨlǝngkɛl mǝ sʊwa jen nɛɨ, kaam nǝb nɨ tɨlam fǝɨ, mɨsɔ jǝ bʊla lɛ, na ja kuwo bɔ Bʊla Nǝlɨ bɛ lɛ a mʊgɔ fɔlɔn gǝnɔ gǝmɨ.”
தற்சமயம் தேர்ந்தெடுக்கப்பட்டது:
Matta 16: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
