Maatiyos 18
18
Ummannimko nabati miyatto kinni?
(Markos 9:33-37; Luukas 9:46-48)
1Amaa saacadde katattaynit Yeesusulle alle yemeetiinih: “Carshi nigsinnadde ummannimko nabati miyatto kinni?” akko yerhxin. 2Yeesus lel wuli cindhookah ishelle akah deecimeyaako ten fanadde kaa hayeh, 3tahe akko yerhxe: “Gaxe wayteenimko kee balih cindham akke wayteenimko, carshi nigsinnadde caduruh orobtoona makitiinim rummah sinak arhxiyuk ane. 4Ta cindhooka balih ishe ascundhdhuwinnanti carshi nigsinnadde ummannimko naba tiya kinni.
5Yi migacalle amah iggidin cindhooka kabbaatinnanti yotta kabbaata. 6Ta yottah yaamine cindha-maraako inketta zambedde sayshe tiyah, naba marhxan fillak akko tumudhdhuweh badti baaxatadde yamundhucem akah ashshe dhadhdhe.
Zambedde sayaanam
(Markos 9:42-48; Luukas 17:1-2)
7Xiyaw zambedde sayishshamhi zacabah caalam ku careyta! Zambedde sayishsham tamaato raacinnixem kinni. Amaa zambedde sayishsham kaa sabbatah akko takko leti laakin kaa careyta! 8Ku gaba hido ku ibi zambedde ku sayshemko, tigriceyaako cid. Lamma gaba kee lamma ibaalih umman geedit giradde ciddittamko, ishi amankas hido xankiishoolih aniinadde orobtam koh tashshe. 9Ku intit zambedde ku sayshemko, eyyecaaki cid. Lamma intiilih jahannab giradde ciddittamko, inki intiilih aniinadde orobtam koh tashshe.
Telee ciidoh aymassal
(Luukas 15:3-7)
10Ta cindha-maraako walaa inketta ilactaanak, selita. Amayim lel ten malaykut carshelle umman gedda carshelle geytima yi Abbah nif yabliinimhi sabbatah kinam sinak arhxiyuk ane. [11Xiyawti Barhi teleem gargeero yemeetemhi sabbatah kinni.] 12Ayim takkaliini? Bool ciidottiya leti, amayimko inketta akko teleemko, amaa boolsagla kee sagal koomamalle xabah, amaa telee inkettahi goronuh yadiyeh makiho? 13Geyemko lel, amaa caduruh alayinnixe boolsagla kee sagalko ziyaada teyah xedenam rummah sinak arhxiyuk ane. 14Amaydo, ta cindha-maraako walaa inketti yalayem, carshelle geytima yi Abbah farhi maki.
Ku sacal zambe kok abemko
15Ku sacal zambe kok abemko, aduwaaki kaa zambe ulah ishe kee kaahi fanadde akah warish. Ku yoobbemko ishi sacal tiksibeh tanito. 16Aabbe wayemko laakin, akkinnan gondo lamma hido adooxa shaahid-hi seththeeh dhishshimtamhi sabbatah, wuli aki inketta hido lamma isheelih bee. #Gabbaacime Sercat 19:15 17Tena yaabbo xinemko, kaniisah warish. Kaniisa gantah yaabbo xinemko lel Aki-mara kee miiri yaskatte kolle yakkoo. 18Baarholle tarhuynim carshelle gantah yamadhdhaw kinni, baarholle taftixiinim lel carshelle yamfattaxo kinam rummah sinak arhxiyuk ane. 19Malammih, lammik baarholle alle tensemeemeciinih esserteenim carshelle geytima yi Abbah araxah akah takko kinam sinak arhxiyuk ane. 20Amayim lel, lamma hido adox yi migacalle alle yekettinille, anu ten fanadde aniyomhi sabbatah kinni.”
Bixilla-arhxinnixe khaddaamhi aymassal
21Sarrah Bithroos yemeeteyaako tahe akko yerhxe: “Maddara, yi sacal ayidhdhale gedda zambe yok abemko kinni, anu alle xabo liyom? Malxina gedda fanah?” 22Yeesus akko yerhxe: “Malxintomon kee malxin kibah malxina gedda kok maarhxe.
23Amaydo, carshi nigsinna, ishi garuuzaalih xisaab abo farha nugusuh higgida. 24Xisaab abo erherhishe gedda, tamana shiix talantoonya#18:24 “Talanton” solaadit cayna tekkeh, inki talantoon koonan kee taman iggidiyaako bukallehi maahiya kuuk tine. adde le tiya alle baahen. 25Yadabbo taane gedda lel kaa maddari, ishe kee ishi numa, kee ishi cindhamlih inkoh lem yeebexeh yadabbo kaa yeemere. 26Amaymih amaa garuzzi gulubulle akko radeyaako: ‘Dagum yolle cur kibah, inkoh koh adabbo kiyo’ yerhxeh kaa dhaacime. 27Amaa maddari lel raxmah uluc akko xarheyaako, kaa dhirhiyeh cida inkoh akah xabe. 28Amaa garuzzi amakkeeko yewce gedda, wuli bool diinaariya#18:28 “Diinaar” inki maxti maahiya kuuk yine adde luuk yine kaa zoobatto kin garuzzo geyeyaako: ‘Kodde liyom yoh edebba’ arhxuk yibbirheh kaa yisniqhe. 29Amaymih amaa kaa zoobatto kin garuzzi: ‘Dagum yolle cur kibah, inkoh adabbo kiyo’ yerhxeh radeyaako kaa dhaacime. 30Usuk lel xineyaako yedeyih aykee kaa cida akah yadabbendah kaa yurhuwe. 31Amaa kaa zoobit kin garuuza tekkem inkoh yublin gedda, mangum yixziniinih, yedeyinyaako amaa tekkem inkoh sinni maddarah warishen. 32Kaa maddari lel akah deecimeyaako: ‘Ko uma garuzzo! Yi dhaacimtemhi sabbatah amaa cida inkoh koh xabe. 33Anu akah kolle naxruuruteekah, ishi zoobatto kin garuzzolle naxrurto kolle mitane?’ akko yerhxe. 34Kaa maddari lel kurrayeyaako ishi cida inkoh yadabbendah, kaa yacizzibe maralle yoxoye. 35Amaydo, sinni sacalalle sinni afcaadooko alle xabe wayteenimko, carshelle geytima yi Abba gantah umbuka sinak amayim balih sinak abo kinni.”
தற்சமயம் தேர்ந்தெடுக்கப்பட்டது:
Maatiyos 18: SCC
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Wycliffe Ethiopia
