Matthieu 7
7
Inyanginy’a Jésus o bokoli. Bochambe botote o beka, byango bidi o ch’a motema ma baninga edi ebè. Iwo iyonga beka na Nzambe. Manè mabale. Bayekuchi ba bwanya. Echingane a mina. Batongi babale.
1”Tochambake bato botòtè o beka, byango bidi o ch’a mitema ma bango,
2ko, beni bochambe ba bango bona, nà bango tachamba nà ba beni. Na momèko, mwango beni bomèke bato bango tamèka na beni mwango dyòkò.
3K’oyiche boyènè monchèlo modi o dichò a mwanyango bwe, k’oyènè moyikako modi o dichò a kò ka?
4Mo k’òlobe na mwanyango bwe: Tika nga miche monchèlo modi o dichò a kò, ko, moyikako modi o dichò a kò.
5Ko moto a bwanya, phota bomiche moyikako ma kò nò dyò, owana kò toyènè monchèlo, mwango modi o dichò a mwanyango nonyòngò.
6Tophèke bampwande eyeka èchwa, na tobwakake mindiki o bocho ba bangoya, owana bango tachekola manchoto ma bango na takaya beni nchandi.
7Boyonga, bango taphè beni, boyenga, beni todwa, bokotele, bango tadiphola beni.
8Tonga moto ikika eyonge, wango tayamba, koncha eyenge, wango tadwa, na koncha ekotele, bango tadiphola wango.
9Moto otete a beni mo mwan’a wango ayonge mapha, ephè mwana iboko nda?
10Mo mwana ayenge mochwe na wango, ephè mwana mochèmè nda?
11Kobona beni bato babè, mo beni boyebe bophè bana ba beni beka binyòngò, mo beni boyonge Chango a beni ikolo, wango tiphè beni beka bilèki bonyòngò?
12Bokiela na bato beka bichò, byango beni bodinge bango bakiele na beni. Tonga miyeko ma Moise na mawò ma mibandi ma Nzambe madi kobona.
13Bokolaka ekuki a kongele, tonga manè ma kungungu edi manè m’ichumbana, ko bato bakama batambole o mango.
14N’ekuki a kongele na manè ma kongele mapholize bato o bomwè, edwe mango ko bato baki phencha.
15Bokiekaka n’ikièngu tonga bayekuchi ba bwanya bango baya o ma beni, bachwe ekoto a bagbata, ko, mitema ma bango midi ko bangwe b’ibèli bona.
16Beni toyeba bango na mpuk’a bango. Bato oyimba chabu o molange ma milo ka, iyò nyongè o ibangamba ka.
17Kobona milange michò minyòngò mibote mpuka inyòngò, ko, milange mibè mibote mpuka ibè.
18Molange monyòngò oyicha bobote mpuka inyòngò ka.
19Molange mwango mobobota mpuka inyòngò ka, takòtè mwango na tabwaka mwango o meya.
20Kobona beni toyeba bato na mpuk’a bango.
21Moto wango etange nga bwe: Mokonchi, Mokonchi, tikoli o bokonchi b’ikolo, tekola ko koncha ekiele bodingo ba Chango a nga ikolo phencha.
22Bato bakama taloba na nga bucha bwango: Mokonchi, Mokonchi, banga bobochiakola bato mawò ma kò o kombo a kò ka? Banga bobotuziza biyaye bibè o kombo a kò ka? Banga bobokiela matoma machimube makama o kombo a kò ka?
23Bucha bwango nga tachiakola bango bwe: Nga boyeba beni ka, niè, bolangwaka ma nga, beni bato ba matoma mabè.
24O moto ikika awoke mawò ma nga n’akiele ko wango awokaki bona, nga tange wango moto a bokièngu, atongaki ndako a wango a bokoli b’iboko.
25Mbula anoki, na bibale bitombamaki, na binguchi bidumbaki ndako, ko, yango ebokwa ka, tonga yango etongibaki o bokoli b’iboko.
26Ko, moto ikika awoke mawò ma nga, ko, okiela ko wango awokaki bona ka, nga tange wango emèmè.
27Na mbula anoki, na bibale bitombamaki, na binguchi bidumbaki ndako, na yango ekwaki, n’ebimbo ebèki enè.”
28O Jésus achilizaki bolobe mawò ma, bibuliki ba bato biyemèlèki wango, tonga wango adikizaki kobona.
29Tonga wango achiakolaki bato ko moto a nguli bona, wango abodyala ko bato ba bokièngu ba mikanda ba bango bona ka.
தற்சமயம் தேர்ந்தெடுக்கப்பட்டது:
Matthieu 7: BUI1947
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
