Yohanes 3
3
Yesusap Nikodemusap yubu lepteka
1Farisi nimi nhon Yahudi nimi sembe nimi nubunge si Nikodemus wamog. 2Ik nhon sum ae imbaogpa, inipnag aneko Yesus wamoghag yaogti, yubu lelamogti, “Nai, yubu amohinne nubunge, andi kekneba ulamlamne neneko Allahri mikipne nimiag pipso kombana, nimi nhondi babe uanep kom. Ane sembe nu el wamap nena, an nimi amohinne Allahri poghol agheogne wamlamba, nu el wamap,” seog.
3Wene seogpa Yesusti, “Yubu sikne agha ambatnuaghen. Nimi nhon el nen mangap tangto yabin kom#3:3 nen mangap tangto yabin kom - Yesusti yubu lebogne ene Yunani yubuag ka'ebi agha, seneragna phende seneraglamnep. Nhonna, “Nen mangap tangto yabin kom,” aro seneragnep nhonna, “Tai siba mangap tangto yabin kom,” aro seneragnep. pagha tanena, el Allahri nimi saelba uhiroba lag talenge imnep kom,” seog.
4Wene seogpa, Nikodemusti Yesusag hailamogti, “Nimi nhon sabal tan tanena, welaro nen samoro mangaro yabinep? Nen ik phendepne ilindi monag wa'ina mangap tanep kom tiog,” seog.
5Wene seogpa Yesustina, “Yubu sikne agha ambatnuaghen. Nimi nhon Allahri saelba ulamsil nimi tanep ina nhonog wamlangena, nimi nhon maghap yameap ma'aro mangap tan taneogna, Allahri saelba ulamsil nimi tanep. Maghap yameap wamna komba, mangap tan tanena, Allahri saelba ulamsil nimi tanep ina aneko wa'ina wamnep kom. 6Nimi nong agha mangaro yabiropne nimi nong agha talul. Yame agha mangap tangto yabiropne yame talul. 7Nari anag lemnange, ‘A'un nen mangap tangto yabinepneog wamlulom,’ senne nene sembe yaghe aro lo'om seheng kom. 8Khao phoana#3:8 phoana - Yunani yubuag yubu lilim, “Phoana,” aro lerop tanena, “Yame” aro seneragnange sembe lemnep. ulamlari, pho alamlaag sip aneko, ‘Pinun,’ senenag palamla. Palamlaba andi ka'elamlamne khao yubu mu ana agha ka'elamlam. Khao pho alamlange neneko talaba yalamlari, tala palamla anena an babe ekon. Ane saog uro nimi etne Allah Yameag agha mangaro yabinep nimi undo wamla,” aro ambarog.
9Wene aro ambarogpa, Nikodemusti hailamogti, “Welaro nenena uro yabinep,” aro haibaog.
10Wene aro haibaogpa, Yesusti elag samoro, “An Israel nimi amohinne aghana, welaro an ekon wamlam? 11Anag yubu sikne agha ambatnuaghen. Nuri yubu lelamapne nuri el uro seneragnange agha yubu lelamap. Nuri lag nenero ambarelamsiapne nuri haingdi ibobonge agha lag nenero ambarelamsiap. Aghana nuri lag nenero ambarelamsiap yubu eneko a'undi salero sik senelamlom kom. 12Mog so'oag ane uro yabalamlange sembe nari a'unag ambatsino yubu a'undi sik sembaom kom. Tanena imag agha uro yabalamlange sembe nari a'unag ambatsinea babe welaro a'undi sik senelamlulom? 13Nimi nhon babe Allah imag urobag walerop kom. Ot el mog so'oag nimi tangtopne poneko agha imag agha kulukul yingkiamogne poneko wamla. 14Nunisag yabo pai aldesag wamekpa, Musari paghae yame sunumna sunurop paghae neneko, ‘Tiwalengero ibikti, wali taukang,’ aro kal nhonag sipto alikinag ikto towalengkaog.#Bilangan - A'iliroba 21:4-9 Ane saog uro el mog so'oag nimi tangtopne poneko babe alikinag nembanepneog wamla. 15Andarina nimi etneri elag sikne aro wana palilamikpa, sin nimi ni taneko ya'ag kamag uro unne tatsileba wamukang,” aro ambarog.
16Wene seog nena, Allahri mog so'oag nimi o'ona senelamsiog ane sembe, Elme ot nhonogne tatsiog andarina, elag sikne aro wana palirop nimi loba taukang kom aghana, sin nhin ya'ag kamag uro wamukang. 17Allahri Elme mog so'oag poghog nena, “Mog so'oag nimiag tam pelengero loba nembahilul,” aro poghog kom aghana, “Mog so'oag nimi Name pere agha taulbahinun,” aro poghog. 18Nimi elag sikne aro wana palirop nimi enekoag eldi tam pelengelamla kom. Aghana nimi etneri Allah Elme ot nhonogne poneko siag sikne aro seneragtop kom tanena, sikne aro seneragtop komne sembe Allahri nimi anekoag tam karepto pelengkanepne wero paiamog. 19Tam karepto pelengkalul nena, tibin aneko mog so'oag yaog aghana, mog so'oag nimiri yonge ulamang ane sembe, tibin aneko wail ibare agha inibinne sembe mo o'omne nenelamang. 20Yoaba aghabog urop nimi niri tibin aneko hausag senelamangdi, “Nuri yoaba uropne neneko lag nembaleag,” aro tibin anekoag yalamang kom. 21Aghana sikne urop nimi tibin anekoag yingkirop andarina, “Sikne uroba neneko ot Allahri yeptopne toman agha ulamla,” aro lag talul.
Nimi maghag pelengehiropne Yohanesti Yesus sembe lag nenero ambatsiogha
22Neneko uro yabiogpa, Yesus eldi yubu ka'ero neleptop nimiap Yudea so'oag piek. Aneko pina Yesus ik etpare sinap nhon nimi maghag pelengkihiro wamog. 23-24Yohanesti babe nimi maghag pelengelamsiogti, mog so'o Salim peramag wamoghag aneko mag lu maikno wamogne sembe si Ainon engerobag wamog. Mag maikno aneko wamog ane sembe, Yohanes anam salero kop aeag pail pin komag aneko wamogpa, nimi maikno elag sop-sop yalamekpa, anekoag eldi nimi maghag pelengelamsiog. 25Maghag pelengelamsiog abeneko yubu nenep tangka tam taog nena, sin Yahudi nimiri maghag sembenga a'alel dalameka ul pinepne sembe Yohanesti yubu ka'ero neleptop nimi tanekoap, Yahudi nimi yogneap yubu nenep tangka lel dalamek. 26Sin Yohanesag piekti, elag yubu lelamekti, “Nai, an yubu amohinne nubunge, mag Yordan kauro tara siba anap nhon wamomdi, nunag lag nenero ambatsiomne poneko sembe an el wamlam te? El ponekori babe wene nimi maghag pelengelamsilba, nimi ni yalamlonga saog uro elag nelepto palamang,” aro ambarek.
27Wene aro ambarekpa, Yohanesti sinag samoro ambarelamsiogti, “Ot Imagne ponekori nimiag tarelamsilne sunsunum uro nimiri toro salelamnep. 28Nari ambatsino yubu a'undam nimi aori ka'ebaomdi, lag nenero ambatsinep. Nari yubu ambarelamsinori, ‘Na Allahri wepto pogtopne Kristus wamna kom. El amik yanepne sembe na samenag pogneogpa yahi,’ seno. 29Elap nanapna, kelabo toro anep nengabo nhonap elkaeap saog wamnam. Nengabo kelabo tol tolamna tanena, kel eneko ot el toro alenge ponekoringe mo tanep. Kelabo toro anep nimi elkaena, kelabo toro alenge poneko yubu leplenge sembe nang-nangaro ka'eamnep. Kelabo toplenge ponekori yubu lilim ka'ebi agha elkae ponekori awi maikno sembanep. Ane saog uro nimi elap ma'ap tanepne sembe awi maikno nari wanaag teknero uaneoba wamna. 30El agha nubu taleba, na el mombolag tanepneog wamla,” aro ambatsiog.
El imag agha yanepne sembe ambatsiogha
31Paliag siba yingkiropne nia mangkina paliagne wamla. Mog so'oag siba yingkiropne mog so'oag uropti, mog so'oag uropneag agha lerop. Imag siba yingkiropne poneko nia mangkina mog so'oag wamlange paliag wamla. 32Eldi haingdi ibogne babe, aori ka'ebaogne babe lag nenero sikne ambarelamsil aghana, eldi ambatsirop yubu sikne neneko salero sik senerop nimi nhon imnep kom saog wamla. 33-34Allahri Eldamne Yame irikan koma elag tarelamla ane sembe, Allahri poghog nimi enekori Allahri yubu lelamla. Abenekoag agha nimi etneri eldi sik uro lag nenero ambatsirop yubu eneko sikne aro salerop tanena, “Allah yubu sikne lelamla,” senenne keknero nenelamla. 35Iliri Elme sembe o'ona sembaogti, nia mangkina Elme saeag pibog. 36Elmeag sikne aro wana palirop nimi tanekoag ya'ag kamag uro unne tatsileba wamukang. Ot Elmeri yubu eneko, “Sik komne,” aro ka'elorop nimi kamag uro unne imnep kom aghana, Allahri wana yo senenne undop nimiag wamlange wamle paghabog wamlul.
தற்சமயம் தேர்ந்தெடுக்கப்பட்டது:
Yohanes 3: kklKOS
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 (Active), Wycliffe Bible Translators, Inc. All rights reserved.
