Yohanna 2
2
Mbukamsa kon toone wa, a put Galili wa
1A tǝrma taatǝn ma, ɓaa tom mbukamsa kon toone wa, a ur Kana a put Galili wa. Maa Yeso ya kǝnso, 2ɓaa kǝna Yeso ma emfǝɗkaa ɓisa ɓǝ wo a han mbukamsa kon toone kaɓa. 3Pa mbraa emngwate inabi ma feɗsǝ wa, maa Yeso ya, yaa nkee me, “Mbraa emngwate inabi ɓosa feɗen.”
4Yeso yaa kak me, “Maane, mbu kwaa mbi ngǝ wosǝ a naniu, fer nwaano kan sundu ra.”
5Pa maa Yeso ya, yǝ nkee hoota sǝɓa me, “Nsaad mbu yǝ nkeesǝsǝ me sǝ tom ɓa, sǝ tomo.”
6A hansǝsǝ wiina huna kǝsa kǝn kǝnso mindike u wǝrkǝsǝ ma dungate wa, huna sǝsa, hana nawa yǝn se kumta mbraa ta mindike mindike. Ɓaa Yahudawa ɓa, ɓǝn tom tinima ma huna sǝsa ɓaa tom soɓɓo ɗekɗek u alˈada ɓoso wa.
7Pa Yeso yǝ nkee ɓan tinima sǝ ɓa me, “Sǝ kung huna sǝsa ma mbraa.” Pa ɓǝ kung kwak kwak nsaad.
8Pa yǝɓǝ nkee me, “Nwa sǝ paa saa ko pap mbukamsa ya.”
Pa ɓǝ tom maaso, 9pa pap mbukamsa siya, yǝ pǝtasǝ mbraa u kǝrtǝsǝ a kang mbraa emngwate inabi ma wa, pa yǝ maa han fiɗsǝ ɓa ra, pa hoota ɓǝ nkweesǝ mbraa ɓa, ɓoso ɓǝ maan. Payǝ yar ker kaya a kalla, 10yaa nkee me, “Hana yamni yǝn ntii yǝ na mbraa emngwate inabi u yaɓ wa, a ntiiri nhe, ndiira ɓeta weesǝ ɓǝ maa wa, pa ya fiɗ ma u kan u kaka wa ra wa. Pa nwaango ngǝ nhuukǝ mbraa emngwate inabi u yaɓ wa, ngǝn fiɗsǝ fiɗ waso.”
11U nwa ǝn ntiiri mbu nhiinyanhiinya Yeso yǝ tomsǝ wa, yǝ tom mbusǝsa a ur Kana a put Galili wa, yǝ nwanyǝ too usu, emfǝɗkaa ɓǝsa ɗǝm ɓǝ na ɓongtǝra ma sase.
12Ndiira maaso wa, pa Yeso yǝ ham yǝ ko Kafarnahum, ma maasi ma ɓaata ɓisa ma ɗǝm emfǝɗkaa ɓǝsa. Ɓǝ tom kaɗɗo tǝro ngeek kǝnso.
Yeso a hit Kaa Urshalima wa
13A fer mbukamsa taɗko u ɓaa Yahudawa ɓa tomsǝ kǝk wa, pa Yeso yǝ ko Urshalima. 14A taanda Hit ɓǝɗ Kaa Urshalima wa, yǝ taa ɓeta ɓǝn fang naa ma tǝmnkaa ma mukta ma ɓan paaki koɓa ɓa, ɓǝ kaɗsǝ a mbu kaɗ ɓosa. 15Pa Yeso yǝ saɗ lǝɓra kura ra, yǝɓǝ pǝǝ nsaad a taanda Hit ɓǝɗ Kaa Urshalima wa, nsaad ma tǝmnkaa ma naa, ɗǝm yǝ yaasǝ ɓan paaki koɓaa sǝɓa, yǝ nwee han ɓǝn nhiisǝ koɓa ɓosa ɓa. 16Pa Yeso yǝ nkee ɓaa ɓǝn fangsǝ mukta sǝɓǝ me, “Sǝ fiɗ ma mbusǝsa a ham ɓa! Sǝ kang ɗuur paane wa a tom lumu ra.”
17Pa emfǝɗkaa ɓǝsa ɓǝ ɗim me ɓaa wee nyoron me, “Yauma nǝsǝ ma siso a ɗuur nwaango wa, ǝn kǝɗ nǝ nga ara.”
18Pa ɓaa Yahudawa ɓa, ɓǝ taa Yeso me, “Yaa ǝn mbu nhiinyanhiinya mbiu kǝ ngǝtǝn weɗɗa me ngǝma kwangto ngǝ tom nsaad mbu ɓau?”
19Yeso yǝɓǝ kak me, “Sǝ ookǝ hit Kaa wa, nase kǝn kǝna mar a tǝro taatǝn.”
20Pa ɓaa Yahudawa ɓa, ɓaa taa me, “Too meeta pu kuru haa mindike pa a mar hit Kaa wa, pa ngase ngǝ nkee me, kǝ ngǝ mar a tǝro taatǝn nǝu?” 21Pa hit Kaa u Yeso yǝn kansǝ a si wa, ǝn maabiri isi. 22Ndiira ɓaa niksǝ Yeso a woɗɗa wa, emfǝɗkaa ɓǝsa ɓǝ ɗim ma mbu Yeso yǝ nkeesǝ ɓa, pa ɓǝ na ɓongtǝra ma likarkar ɗǝm ma mara Yeso yǝ nkeesǝ ra.
Yeso yǝ maa kuti ɓeta yan nsaad
23A fer Yeso yǝsǝ Urshalima me hiira mbukamsa tadko ra wa, ɓeta dem ɓǝ wǝr mbu nhiinyanhiinya yǝ tomsǝ ɓan, pa ɓǝ na ɓongtǝra ma ɗǝnda ira. 24Pa Yeso yǝ yau ma ɓosa ra, me yǝ maa kuti ɓosen nsaad. 25Yǝn taa yaake me yaa nkee mbuka a ɗuura ete ra ra, me yǝ maa mbu yǝsǝ a kuɗa ete ran.
தற்சமயம் தேர்ந்தெடுக்கப்பட்டது:
Yohanna 2: LLA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2023 Seed Company in collaboration with Language Developers and Bible Translators Association
