Jenesis 50
50
1Na Josep mehwi tlole, aya wagli lëlefe, na bu matawa laniwa tobetle na tako ye tletle, na bubë nolo momotlë tletle. 2Na tokwafe Josep u mogo kë ululu sle mogotomabë home, gali tlome, “Sobo ayame lëkalu malasini atome gogwa eletelome, bu ato lëkalu feilawa kë jwa nalëgletleme na ato fla jwa lëletleme.” Na kwe u mogo kë ululu sle mogotomabë ho, bu melë mëtla, Josep fene gali tlome. 3Na iniwa u mogo kë ululu sle mogotomabë ho bu kë lëkalu malasini bubë ato mëta gogwa motokoutlabë olë këniji 40. Na bubë ato fla jwa tletle na kokowa tëbetle. Na Isip life mago oneho bu Jekopme 70 olë ye mëtletla.
4Manibo mëtlabë olë yawe motlola na Josep eso hobë wege enëneme gali tlome, “Masiwafe, sobo lalowa bobë gali eso home gali egujuwelëlomene. Sobo bume megali egujuwelëlome, 5eso ho, bobë aya glime nounou tëglena, bu bome megali latlonë, ‘Ju bome gali sle enonë, ju bome mogo ehunëme, na bo Kenan life mëta bo tobana kë go tëglelëbë aniji fuluju mëta gwa eutanëme.’ Na bo bume wagali sle tlolë. Këme nëgeme, bo metole nanelë, ju bome lalewa gali eglonëmene bo aya mogome gwa nanugujuwetlëme. Na bo ita nisime.”
6Na eso ho Josepbë gali aholokwane tlole na gali metafu tëtatle, “Ju lalewa egujume, na blijaya mogome gwa eujuwetleme, ju blijayame fene gali sle tlole.”
7Na kwe, Josep bu bolijaya mogome gwame tuju. Na eso hobë wege enënena bubë letitabo ho na Isip life magobë letitabo ho bu iniwa Josepme nagi mëtlëla. 8Na Josepbë ilawa mago hona bolijahanina bolijayabë ilawa mago hona iniwa aniji fulujuwa mutuja. Kwe tokwëtokwë nëbale hana mutuja. Nëbale na bulmakau kleli, sipsip kleli, mëmë kleli, Gosen lifate mëta lulu mëtla. 9Na kalë loha wesibi na hos kleli matawa kë tafa mogolekefëyabë hona iniwa Josepna mutuja. Lebutako enënemu mutuja.
10Na bu Atat life elime fwa mutula, Jodan tu nogowelëme. Kë Atat life kënegebë bu witi lijibë jibo fokwefokwe mototokwefëma na bubë afabo glo mëtla, hi namëglame. Na bu kë life mëta tako manibomu lamëtletla na feilawa ye mëtla. Na Josep bu 7 olëna bolijayame manibomu latletle na ye tletle. 11Na Kenan life mago oneho, ye kë mëtletlabë onehome hwi motloma na bu megali mëtla, “Isip life mago oneho bu tako manibomu lamëletla, na tako ye mëletla.” Këme nëgeme, bu kë life weniji mefë mototla, “Abel Misraim.” Abel Misraim gali ebë Hibru gali na ebë kë gali fenene, “Isip life mago oneho ye mëletla.” Ebë life Jodan tubë nogowelë lëbe.
12Na Jekop bowenenino bu melë mëtla, bolijaya fene gali tlome. 13Na bume Kenan lifewa mëtehula, na bume aniji fuluju mëta gwa mototla. Kë aniji fuluju bu Makpela life mëta lo elamë, Mamre life li mëta. Ëtani Abraham bu kë aniji fuluju Efronna balitina hihijika mëtelo. Bubë matëmatëmu fata nalëgletleme. Efron Hitbë bolijafuju. 14Na Josep bu bolijayame wagwa totle. Na kwe Josepna, bolijahanina, na fli enëne buna kë mutujabë, iniwa Isip lifewa ita mitimiya.
Josep bolijahani bume kë tëbo mototlabë lowene hana lehole, aholokwana wati tle
15Bubë bolijaya wagli tletëme, na kwe Josepbë bolijahani blalo megëgali mëtla, “Josep bu seme mana wame logloname nawa. Na sebo bume kë tëbo togotlabë bu seme kofaya tëbo lëgëtaname nawa.” 16Na këme nëgeme, bu Josepme këme gali mëtelokwakla. Ebë gali melë, “Ëtani sebobë aya mana tafa tëglena bu seme megali latlona, 17sobo bobë gali Josepme sagali elolo. Bobë gali melë, ‘Josep bo jume tokwëfo takune. Masiwafe. Jume blijahani kë tëbo mëtëtobë lowene asa ehwagule, aholokwana ti egleme.’ Na kwe sebo, sebobë ayabë Gotobë wege enëne, jume takune nolëyo, ‘Masiwafe, sebo jume kë tëbo tëgëtobë lowene asa ehole, aholokwana ti ele.’ ” Na Josep kë gali yafe aholokwane tle na bolijahanime manibo tletëme na feilawa ye tle.
18Tokwafe, Josepbë bolijahani, bume hwime mutuja. Na bubë elebo li mëta bubusu mëtletla. Na bume gali motlola, “Sebo, jubë manawa wege ho, ju belë nisiya.”
19Kwe Josep gali tlome, “Sobo tutune asa elo. Bo Goto nane, some kë tëbo nogotome. Weyewa. 20Sobo ëtani iniwa melowene latelo, bome tëbo naegëtaname. Kwe Goto bu kë tëbo lowene, bubë lale lowenena wahihijika tle, bu metole tëgleme nëgeme, bome Isip life onehobë eso ho aniji naloglonëme. Na lebutako onehome nëgaitamë nanëgelëme, bu foneme gigli jwa namëglame. Na ëje sobo kë wesibi wafi hwi elolo. 21Këme nëgeme sobo tutune asa elo. Bo some na sobobë nëbale name iniwa tafa nëglelëyome na nëgaitome.” Na Josep bolijahanime flalego gëgalina lowene sle tëtatëme.
Josepbë gli
22Na Josep bolijayabë ilawa mago ho, Isip life mëta nibowai mëtla. Na Josep bu 110 tlibutu këniji tafa tle. 23Josep mana tafa tle, Efraimbë nëbaleme hwi tlome na kë nëbale kë nëbaneni mëtëglabë nëbaleme mata hwi tlome. Na Makir mata nëbaneni tle na këbë nëbale mata Josep belë mëtleluma. Na bu sësle totome na ameijume gogwa tle. Makir ebë Manasebë bowene. 24Na tokwafe Josep bubë ilawa mago home gali tlome, “Bo gli nëgelëme nounou ekë nelë. Kwe Goto bu some tafa lëglagujome na bu some ebë life mago nëno lëleme na lale lifewa sei lujuwelëyome. Ëtani Goto bu Abrahamna Aisakna Jekopname iniyafe galime megali sle tlome, ‘Sobo ebë lale life hwi ejuwelëlome, na bo tokwafe some ebë lale life yo nolëyome. Na tokwafe Goto bu some kë lale lifewa sei lugujuwelëyome.’ ”
25Tokwafe Josep bubë ilawa mago home gali tlome, “Sobo bome iniyafeme megali sle egloname. Tokwafe Goto some lëgaitome ligisi tëyona na some li lifewa sei lugujelëyona, sobo bo mogome ebë life mago saehulo.” Na Josep bubë ilawa mago home gali tlome, “Sobo bome sogëna asa enona. Sobo Gotobë naba lime iniyafeme fwa gali sle egloname.” Na bu gali motlola, “Sebo jume iniyafememu gali nolëyo.” 26Na Josep bu 110 tlibutu këniji tafa tle, na bu Isip life mëta mana gli tle. Na bu lëkalu malasini ato mëta gogwa mëtletla, ato lëkalu kë jwa na lëgletleme na ato fla jwa nalëgletleme. Na bu mogome bokis mëta gwa mototla.
தற்சமயம் தேர்ந்தெடுக்கப்பட்டது:
Jenesis 50: NCE
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 (Active), Wycliffe Bible Translators, Inc. All rights reserved.