पठालोबितामन 1
1
पयचान
1हे थिऊफिलुस, मय पईल किताब हुन सपाय गोठमन चो बारे ने लिकले, जोन के ईशु मुरयालो आउर करते आउर सिकाते रलो,
2हुन दिन ले जिदलदाय हुन-हुन पठालोबितामन चो जोनमन के हुन चुनुन रलो, पवितर आत्मा चो बाटले हुकुम देऊन भाती उपरे उठाया नी गेलो।
3आउर हुन दुख उठालोर पाचे खुबे असन पक्का सबुतमन ले आपन खुद के हुनमन के जीवता दकालो, आउर चालीस दिन ले हुन हुनमन के दका देते रलो, आउर माहापुरू चो राज चो गोठमन करते रलो।
पवितर आत्मा चो बायदा
4आउर चेलामन ले मिलुन भाती हुनमन के हुकुम दिलो, “यरूशलेम के नी छांड़ा, मान्तर बुआ चो हुन बायदा चो पुरा होतोर बाट टाकु राआ, जेचो गोठ बात तुमी मोचो ले सुनलासास।”
5“कसनबल्लोने यूहन्ना तो पानी ने डूबन दिलो से मान्तर खिन्डिक दिनमन चो पाचे तुमी पवितर आत्मा ले डूबन पाआ से।”
6आउर हुनमन रूंड़ा होऊन भाती हुनचो ले पचारला, “हे परबु, काय तुय ऐई समया इस्राएल चो राज फेरून दे से?”
7हुन हुनमन ले बल्लो, “हुन समयामन नाहले जोगमन के जानतोर, जेके बुआ आपलो ची अधिकार ने संगालो से, तुमचो काम नुआय।”
8“मान्तर जिदलदाय पवितर आत्मा तुमचो उपरे ऐये दे तेबे तुमी सामरत पाआ से; आउर यरूशलेम आउर सपाय यहूदिया आउर सामरिया ने, आउर धरतनी चो कोना-कोना ले मोचो गोहई हुआ से।”
ईशु चो सरग जातोर
9ऐ बोलुन भाती हुन हुनमन चो दकते-दकते उपरे उठाया गेलो, आउर बादरी हुनके हुनमन चो आँईक ले लुकाली।
10हुनचो जातो समया जिदलदाय हुनमन बादरी बाटे दकते रवत, तेबे दका, दुय झान सरगदूत पंडरा फटीई पिन्दलोर हुनमन चो लगे ऐऊन उबा होला,
11आउर हुनमन ले बल्ला, “हे गलीली मानेमन, तुमी केंव उबा बादरी चो बाटे दकेसास? ऐई ईशु, जोन तुमचो लगले सरग उपरे उठाया गेलो से, जोन रीति ले तुमी हुनके सरग चो बाटे जातोर दकलासास, हुनी रीति ले हुन फेर ऐये दे।”
गुट पारथना
12तेबे हुनमन जैतून नाव चो डोंगरी ले जोन यरूशलेम चो लगे गोटक सब्त चो दिन चो लापी ने आसे, यरूशलेम ने ईला।
13जिदलदाय हुनमन हुता अमरला तेबे हुन अटारी उपरे गेला, जोन थाने पतरस आउर यूहन्ना आउर याकूब आउर अन्द्रियास आउर फिलिप्पुस आउर थोमा आउर बरतुल्मय आउर मत्ती आउर हलफई चो बेटा याकूब आउर शिमोन जेलोतेस आउर याकूब चो बेटा यहूदा रते रवत।
14ऐ सपाय कितलो बायले लेकी आउर ईशु चो आया मरियम आउर हुनचो भाईमन चो संगे गोटक मन होऊन भाती पारथना ने लगुन रवत।
गोटक नवा पठालोबिता चो चुनाव
15हुन दिनमन ने पतरस भाईमन चो मंजी ने जोन छय कोड़ी लोग चो अमरा अमरी रवत, उबा होऊन भाती बोलुक मुरयालो,
16“हे भाईमन, जरूरी रये कि पवितर शास्त्र चो हुन लेखा पुरा होओ जोन पवितर आत्मा ने दाऊद चो टोंड ले यहूदा चो बारे ने, जोन ईशु के धरातो बितामन चो अगुवा रलो, पयले ले बोलु रलो।”
17कसनबल्लोने हुन तो आमचो ने गेना गेलो, आउर ऐ सेवा काम ने शामिल होलो।
18(हुन अधरम चो कमाई ले गोटक बेड़ा घेनलो, आउर मुण्ड चो बल घसरलो आउर हुनचो पेट फाटून गेली आउर हुनचो सपाय ओन्डकीमन निकरून पढ़ली।
19ऐ गोठ के यरूशलेम चो सपाय रतो बितामन जानुन गेला, ऐथा ले कि हुन बेड़ा चो नाव हुनमन चो भाषा ने “हकलदमा” बल्लोने “लऊ चो बेड़ा” पडुन गेली।)
20“भजनगीत ने लिकलोर आसे,
‘हुनचो घर उजरुन जाओ,
आउर हुता कोनी नी बसोत,’
आउर ‘हुनचो पद कोनी दुसर धरोत।’
21“ऐईकाजे जितरो दिन ले परबु ईशु आमचो संगे ऐते जाते रलो बल्लोने यूहन्ना चो डूबन ले धरून हुनचो आमचो लगले उठाया जाओत ले जोन लोग बराबर आमचो संगे रला,
22“नगत आय कि हुनमन चो ले गोटक माने आमचो संगे हुनचो जीव उठतोर गोहई होऊन जाओत।”
23तेबे हुनमन दुय झान के उबा करला, गोटक यूसुफ के जोन बरसबा बलाया जाऊ आय, जेचो दुसर नाव युस्तुस आय, दुसर मत्तियाह के,
24आउर ऐ पारथना करला, “हे परबु, तुय जोन सपाय चो मन जानु आस, ऐ उजागर कर कि ऐ मन दुनो ले तुय काके चुनली सीस,
25“कि हुन ऐ सेवा काम आउर पठालोबिता काम चो पद धरो, जेके यहूदा छांडुन भाती आपलो जगा ने जाते गेलो।”
26तेबे हुनमन-हुनमन चो बारे ने चिठ्ठीमन डालला, आउर चिठ्ठी मत्तियाह चो नाव थाने निकरली। आउर हुन गियारा पठालोबितामन चो संगे गेना गेलो।
தற்சமயம் தேர்ந்தெடுக்கப்பட்டது:
पठालोबितामन 1: HLBNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Halbi Bible by The Love Fellowship is licensed under Creative Commons Attribution-ShareAlike 4.0 License.
