Zowănnī 8

Amihmu Alakèḿè Dèbwè

1Jezŭ htagè d́ŏ Òlĭvo Khòlò̆kho. 2Alekă dini wòthab́ĭ Ze geb́agè d́ŏ Dèthèb́è̆ Zarādo abu, kî bija tòcò le ò khwè̆b́agè Cè. Za sanălăò thôithò̆igè lōwa tòcò. 3B́ĕnu Skrĭbāpho kî Pharizè̆pho tòcò leigè amihmu dèbwè htè zò phòni lōwa d́ŏ za lakèḿè akhî nu. Cè b́è̆lă lōwa b́ĕ bija lŏcăcè ahlò̆mò̄ kî d́ògè Jezŭ, 4“Sara, amihmu ajo dèbwè b́èphò kăkòlò̆ khŏnu lò b́ĕ za lakèḿè akhî nu. 5D́ŏ dèhmèla abu Mŏzè hna bija hwĕthĭ lo ajo tòcò nu. Mègōnu d́ō, ńò kò d́ò d́ò̆ cadè̄?” cè d́è̆ lōwa do. 6Cò d́ò lōwa gōjo ḿî cab́ô̆htè co ko b́o Jezŭ atha kî jāsò Cè nu lò. Barasă Jezŭ zogōla kî hweigè acukońŏ d́ŏ haphĭhmuklè̆ nu. 7Cè tòcò d́è̆ gudu Jezŭ d́ō, Ca b́atapla hwă Ze ne, Cò d́ò, “D́ŏ thĭ klè nu adèkhòwè tò ò ńò dèbwèbwè hwĕ ŭsubò̄ cè kî lo,” Cò d́ò lōwa do. 8Mèhwă Zo zogōla kî hwe d́ò̆ haphĭhmuklè̆ tapla be. 9Bija tòcò thîhè̆b́è dèjî̄b́è ajo d́ō, thîhè̆lage ane d́ō, gohta d́ŏ athabwe dèbwè, hwă dèbwè hwă dèbwè hèphlòḿĭ lōgè. Aòda ḿî Jezŭ kî amihmu asò̆hto ò athaklăḿè̆bŭ dèbwè be lò. 10Jezŭ b́atapla hwă ane, Za da tcahtî be bija dèbwè̆ ńò ḿî htĕ amihmu dèbwè lò d́ō, Cè d́è̆ lōwa, “Amihmu, cè tòcò ò d́òlè̄? Bija di cirrathĭgè nè dèbwè̆ ńò ā?” Cò d́ò lōwa do.

11Amihmu d́òscĭge Cè, “Dèbwè̆ ńò, Ŏ B́ĭcè,” cò d́ò lōwa do.

Mègōnu d́ō, Jezŭ d́ò, “Jè ḿî ḿî Ji di cirrathĭ nè ńò ńò. Gebò̄ kha. Hwă khŏnujo phlò̆ ahlò̆mò̄, mè be ḿè dèkhòwè ḿè,” Cò d́ò lōwa do.

Jezŭ Lākho Adèhlî̆

12Jezŭ d́ò̆sa bija tòcò, “Jî ḿî Lākho adèhlî̆. Bija alekô Je le dèbwè nu, dè hèb́è dèkhiklè̆ ńò, zi gī nib́è dèthôḿô̆ adèhlî̆ dòkhò̆,” Cò d́ò̆sagè lōwa do.

13Mègōnu, Pharizè̆pho tòcò d́ò Cè, “Na kha dò̆ Ne ne thè̆thî. Nè dèkhathè̆thî tè b́è ńò,” Cò d́ò lōwa do.

14Jezŭ d́òscĭge cè tòcò, “Ja gā kha dò̆ nòthò̆ Je ne thè̆thî lò hnò̆nu, Jè dèkhathè̆thî ḿî ab́è, manè̄ d́ō, Jî thîhè̆ Jò ò d́òlè̄ kî Jē le d́òlè̄ nu. Ḿî thĭ nu thĭ dî thîhè̆gè Jò ò d́òlè̄ kî Je gē le d́òlè̄ nu ńò. 15Thĭ cirraphame dè acab́ô̆ bija lākhopho akhò̆ lò; Ji di cirra bija dèbwè̆ ńò. 16B́eḿĕ Ji gī cirradè nu, Jè dècirra ḿî ab́è lò, manè̄ d́ō Jò tò ò dèbwè lò ńò. Ji ḿî akhathè̆thî, athodŏle Jè htè Apa nu òkô Ja kă. 17Kîd́ò̆ d́ŏ thĭ Dèhmèla abu nu ahwela htè bija gībwè adèkhathè̆thî nu ab́è lò. 18Jè ḿî akha ane thè̆thî kî Ja Pa athodŏle jè dèbwè ḿî akhathè̆thî ji nikhĭ,” Cò d́ò̆sage lōwa tòcò do.

19Mègōnu cè tòcò d́ò Cè, “Na Pa ò d́òlè̄?” cè d́è̆tca lōwa do.

Jezŭ d́òscĭge cè tòcò, “Thĭ dî thîhè̆ Jè ńò ńò, Ja Pa ńò ńò. Thĭ gî̄ thîhè̆ ma Jè nu, thĭ gî̄ thîhè̆ tèpwè Ja Pa papa,” Cò d́ò lōwa tòcò do.

20Jezŭ d́ògè dèjî̄b́è ajo tòcò d́ŏ hô̆gòlò bu, b́ĕ Zô thôithò̆idè d́ŏ Zarādo bu nu. Cè è̆ akhî tè b́è hnî̆ńò akhoacè̆, bija dò phò tèpwè Cè hnî̆ńò.

D́ŏ Jè hè Alle nu Thĭ De Le za ńò

21Jezŭ d́ò cè tòcò ahlò̆mò̄, “Jè gè̄ hè; thĭ gā wācăhlèkò̆ Jè, ḿî thĭ gī thĭkò̆ thĭ dèkhòwè abu. D́ŏ Jè hè alle nu, thĭ de le za ńò,” Cò d́ò lōwa tòcò d́o.

22Jŭdapho tòcò d́òhlèkò̆ lōwa, “D́ŏ Je hè alle nu, thĭ de le za ńò, cò d́ò do ḿî zò kòmò̆ mèthĭlage Zè ne ā?” cò d́òhlè lōwa do.

23Jezŭ d́ò cè tòcò, “Thĭ ḿî aò d́ŏ akălè̄, Jè ḿî aò d́ŏ akhohta. Thĭ ḿî ab́èkja lākho tèb́è jo. Jè ḿî atè b́èkja lākho tèb́è jo ńò. 24Mègōnu d́ō, Jò d́òkò̆ thĭ htè thĭ gī thĭkò̆ d́ŏ thĭ dèkhòwè abu nu, manè̄ d́ō, thĭ gū tu b́u ma Jè ḿî Cè ńò nu, thĭ gī thĭ tèpwè d́ŏ thĭ dèkhòwè abu nu,” Cò d́ò lōwa tòcò do.

25“Nî ḿî d́ò̆ bò̄bwè?” cè tòcò d́è̆ lōwa do.

Jezŭ d́òscĭge cè tòcò, “Jî ḿî acab́ô̆ Jò d́ò̆sagè thĭ hlĕ aŭsu nu. 26Dèjî̄b́è kî dècirra ab́èkja thĭ nu, Jò mò d́ò ò pwĕdimi, ḿî athodŏle Jè dèbwè ḿî adî̄ahma kî dè d́ŏ Jî thîhè̆b́è Cò ò tòcò nu, Jò d́ò̆sagè Lākhopho tòcò nu,” Cò d́ògè lōwa tòcò do.

27Cè tòcò dî thîhè̆gè htè Cò d́ò̆sa lōwa Ca Pa awîakè̆ nu ńò. 28Gōnu akhoacè̆, Jezŭ d́ò cè tòcò, “B́ĕ thĭ gā tad́ăhta hwă Bija Apho nu, thĭ gī thîhè̆kò̆ Cè ḿî Jè, kî Jè dè mèdò̆ da dimĭ ńò, ḿî d́ò̆htôla dè htè Ja Pa thôithò̆i Jè tòcò nu lò. 29Kîd́ò̆ athodŏle Jè dèbwè ḿî Cò òkô Ja kă. Zè dèlè̄ladēdagè Jè ńò, manè̄ d́ō Jè mèdè htĕ ab́è Ca tha tòcò nu lò,” Cò d́ò̆sa lōwa tòcò do.

30B́ĕ bija thîhè̆b́è hwă Jezŭ d́ò dè ajo tòcò nu d́ō, ab́u Cè òèòògè.

Bwèòhlô̆òla kî Zôbwè

31Mègōnu d́ō, Jezŭ d́ògè Jŭdapho ab́ugè Cè tòcò gōjo, “Thĭ ku b́u ma Jè dèjî̄b́è d́ō, thĭ gî̄ ḿî thĕbwe tèpwè Jo bōhmubicè, 32kî thĭ gî̄ thîhè̆ tèpwè dèdî̄dèhma kî dèdî̄dèhma gè̄ mèhlô̆htakò̆ thĭ,” Cò d́ò lōwa tòcò do.

33Cè tòcò d́ògè Cè, “Wî ḿî Abraham aphoali kî wî dî ḿîgè bija lewesòsŭ azôabwè dakha ńò. Mègōnu d́ō, ‘Thĭ kò òhlô̆òlakò̆ ńò kò d́ò za wa do cadè̄?’” cò d́è̆ lōwa do.

34Jezŭ d́òscĭge cè tòcò, “Jò d́ò̆sa thĭ adî̄ahma, bija amè dèkhòwè dèbwè nu, zî ḿî dèkhòwè azôabwè lò. 35Zôbwè tò òb́è thèjô̆ hibu ńò, pholi òb́è thèjô̆ hibu dòkhò̆. 36Dèpho gè̄ mèhlô̆mèla thĭ d́ō thĭ gô hlô̆gāla tèpwè. 37Jî thîhè̆ tèpwè htè thĭ ḿî Abraham aphoali tòcò nu, barasă thĭ thaè mèthĭ Jè d́ŏ Jè dèjî̄b́è tè b́ètha thĭ ńò akhoacè̆ nu. 38Jî Jî̄b́è acab́ô̆ Ja tcahtîkô Apa nu, ḿî thĭ nu, thĭ mè tèpwè acab́ô̆ thĭ pa mè nu lò,” Cò d́ò lōwa tòcò do.

39Cè tòcò d́òscĭgè, “Abraham ḿî wa pa,” cò d́ò do.

Jezŭ d́ò cè tòcò, “Thĭ gî̄ ḿî Abraham aphoali d́ō, mèbò̄ acab́ô̆ Abraham mè nu,” Cò d́ò lōwa tòcò do. 40“Barasă thĭ thaè mèthĭ Jè htè ajî̄b́èhtî thĭ d́ŏ dèdî̄dèhma abu htè Jî thîhè̆gè d́ŏ B́ĭcè ò tòcò nu. Abraham dè mègōnu ńò. 41Thĭ mèthĭpa adèmè,” Cò d́ò lōwa tòcò do.

Cè tòcò d́òscĭge Jezŭ, “Wi dî ḿî alathulakèḿè aphoali ńò. Wa Pa ò dèbwè lò htè Kib́ĭcè nu,” cò d́ò lōwa do.

42Mègōnu Jezŭ d́ò cè tòcò, “Kib́ĭcè gî̄ ḿî hnèhnè thĭ Pa d́ō, thĭ kè b́èlò̄ tèpwè Jè, manè̄ d́ō, Jò ò d́ŏ Apa ò kî Ja lagè. Ja da ladò̆ za Jo lō Ja la ńò, ḿî Zo thodŏgè Jè. 43Thĭ dî thîhè̆ za ma Jè dèjî̄b́è ńò nè? Manè̄ d́ō thĭ dò sòkhĕńe za Jè dèjî̄b́è ńò acè̆ lò. 44Mod́èlî ḿîgè thĭ Pa htè thĭ ògè d́ŏ cò ò dèbwè nu, kîd́ò̆ thĭ mè tèpwè zè dèthaèni. Hlĕ mocè̆kho nu zî ḿî amèthĭ bija kî cò tò òi dèdî̄dèhma ńò. Manè̄ d́ō, d́ŏ cò ò nu dèdî̄dèhma tò ò ńò. B́ĕ cò d́òplèdè nu, cò d́ò acab́ô̆ cò d́ò nènò, manè̄ d́ō zî ḿî aplèahlŭdè kî zî ḿî dèplè apa lò. 45Ḿî Jî jî̄b́è dî̄ jî̄b́è hma akhoacè̆ thĭ tu b́ukò̆ Jè ńò. 46D́ŏ thĭ klè̆ nu bò̄bwè d́è̆lî̄ kèhta dèkhòwè d́ŏ Jò lò nu bwè? Jî jî̄b́è dèdî̄dèhma, thĭ tu b́u ma Jè ńò nè? 47Bija aò d́ŏ Kib́ĭcè ò dèbwè sòkhĕńe Kib́ĭcè alē. Thĭ dò sòkhĕńe Kib́ĭcè alē ńò ḿî thĭ tò ò d́ŏ Cò ò ńò akhoacè̆ lò,” Cò d́ò lōwa tòcò do.

Jezŭ kî Abraham

48Mègōnu Jŭdapho tòcò d́òscĭgè Cè, “Nî ḿî Samarĭapho kî dèscidèhnè òni hîklè̆ wò d́ò do atè b́è ńò ā?” cò d́ò lōwa do.

49Jezŭ d́òscĭge Cè, “Dèscidèhnè tò òjî hîklè̆ ńò, ḿî Jè lè̄d́ŏlè̄j́a Ja Pa, barasă thĭ dèlè̄d́ŏlè̄j́a Jè ńò. 50Nòthò̆ hnò̆nu, Ja da wāhlè Jò dò Je the ńò, awāhlè kî acirradè ò dèbwè. 51Jò d́ò̆sa thĭ adî̄ahma, bija asòkhĕńe Je lē dèbwè tè kèhtîb́è dèthĭ taplă ńò,” Cò d́ò lōwa do.

52Jŭdapho tòcò d́ò, “Khŏnujo wî thîhè̆ htŏ htè nè hnè ò nu. Abraham kî prò̆fèt tòcò thĭ htŏ. Ḿî ńò d́òwe aòi Jè dèjî̄b́è dèbwè da tcahtîb́è dèthĭ taplă ńò. 53No do d́olĭbò̄ wa Pa Abraham athĭ htŏ dèbwè nu ā? Kî Prò̆fèt tòcò ḿî ḿî thĭ htŏ htŏ. Ńò d́òlad́ò̆ Ne ne bò̄bwè?” cè tòcò d́ò lōwa do.

54Jezŭ d́ògè cè tòcò, “Jè gè̄ bè̄dòbè̄the ma Je ne d́ō, Jè dè bè̄dòbè̄the ḿî ahnahnă lò. Abè̄dòbè̄the Jè ḿî Ja Pa htè thĭ d́ò thĭ B́ĭcè dèbwè nu. 55Thĭ dî thîhè̆ Cè ńò, ḿî Jî thîhè̆ Cè. Jò kò d́ò ma adî thîhè̆ Cè ńò d́ō, Ja gā la tèpwè thĭ bwèplè dèbwè lò. Barasă Jî thîhè̆ Cè kî Jò òi Zè dèjî̄b́è. 56Abraham thaganāigè d́ŏ ca thaè tcahtîb́è Ju munimuthè̆ nu. Ca tcahtîb́ègè kî ca thalōthalaigè,” Cò d́ò lōwa tòcò do.

57Jŭdapho tòcò d́òscĭge Cè, “Ńò tò ò thagò̆ thè̆ ad́e jè̄scĭ hnî̆ńò nî̄! Na gā tcahtî za Abraham cadè̄?” Cò d́ò lōwa do.

58Jezŭ d́ò cè tòcò, “Jò d́ò̆sa thĭ adî̄ahma, Abraham tò ò hnî̆ńò nu Jò ò htŏ,” Cò d́ò do.

59Mègōnu cè tòcò htula lo cab́ô̆htè Ze gē hwĕ lōwa nu, ḿî Jezŭ lè̄hu ane kî hè d́ŏ cè tòcò athaklăḿè̆bŭ kî hèhtagè Zarādo akhlŏ.

தற்சமயம் தேர்ந்தெடுக்கப்பட்டது:

Zowănnī 8: GRNT21

சிறப்புக்கூறு

பகிர்

நகல்