मत्ती 22

बिहाओ भोज कर अहना

(लूका 14:15-24)

1ईसू हर फेर अहना में कहे लागीस। 2सरग कर राएज हर एगोट राजा कस हवे, जेहर अपन बेटा कर बिहाओ में नेवता देहीस। 3ओहर अपन हरवाह मन ला भेजीस कि ओमन नेवताहारी मन ला बिहाओ भोज बर बलाए के लाने, बकिन नेवताहारी मन आए बर नई चाहींन।

4तब ओहर तनीक अऊ हरवाह मन ला ए कहिके भेजीस, “नेवताहारी मन ला कहा कि भोज तियार होए गईसे, मोर बईला मन ला अऊ मोट-मोट पसू मन ला पूजे हवन अऊ सबेच चीज हर तियार होए गईसे, बिहाओ कर भोज में आवा।”

5बकिन नेवताहारी मन ओकर नेवता में धियान नई देहीन अऊ इते-ऊते चएल देहीन, कोनो हर अपन खेत में अऊ कोनो हर अपन काम-बूता में। 6बकिन बांचल नेवताहारी मन राजा कर हरवाह मन ला धरीन अऊ ओमन कर संगे मार-पीट करीन अऊ ओमन के मरुवाए दारीन। 7तब राजा हर ढेरेच गुसाए गईस अऊ ओहर अपन सेना ला भेजीस अऊ ओ जनमरवा मन ला नास कएर देहीस अऊ ओमन कर सहर ला लेस देहीस।

8तब राजा हर अपन हरवाह मन ला कहीस, “बिहाओ कर भोज तो तियार हवे, बकिन नेवताहारी मन एकर लाएक नईएं। 9तेकर ले डगर कर चऊंक में जा अऊ तुमन ला जे मईनसे मन मिलहीं, ओ सबेच झेला भोज कर नेवता देआ” 10त ओ हरवाह मन डगर में गईन अऊ ओमन ला बढ़िहां चाहे खराब जेमन मिलीन, ओ सबेच झन ला बलाए के ले लानीन अऊ बिहाओ कर मड़वा हर पहुना मन कर मारे भएर गईस।

11बकिन जब राजा हर पहुना मन ला देखे बर भीतरी आईस, त ओहर उहां एक झन मईनसे ला देखीस, जेहर देहल बिहाओ कर ओढ़ना ला नई पहिरे रहीस। 12त राजा हर ओके ला पूछीस, “ए संगी, बिहाओ कर ओढ़ना पहिरे बिगर तंए इहां कईसे आए गए।” ओ मईनसे हर कांही कहे बर नई सकीस। 13तब राजा हर हरवाह मन ला कहीस, “एकर गोड़ हाथ ला बाएंध के एला बाहरी अंधार में फेंक देआ, जिहां मईनसे मन रोंथे अऊ अपन दांत चाबथें। 14एकर बर बलाल मन तो ढेरेच हवें, बकिन चुनल मन ढेरेच थोरहें हवें।”

लगान देवाई कर बारे में सवाल

(मरकुस 12:13-17; लूका 20:20-26)

15तब फरीसी मन जाए के बिचार करीन कि ओमन कईसे ईसू ला ओकरेच गोएठ में फसाई। 16ओमन अपन चेला मन ला हेरोदी मन कर संगे ईसू जग ए पूछे बर भेजीन, “ए गुरू, हमरे जानथी कि तंए सचा हवस अऊ तंए सचाई कर संगे परमेस्वर कर डगर कर बारे में सिखाथस। तंए ककरो परवाह नई करस, काबरकि तंए ककरोच मूंह देखी नई करस। 17त हमके ला बता कि तोर का बिचार हवे? रोमी महाराजा कएसर ला लगान देथी, ओहर ठीक हवे कि नही?” 18बकिन ओमन कर खराब सोंच ला जाएन के ईसू हर कहीस, “ए ढोंगी मईनसे मन! तुमन काबर मोके ला फसाए बर करत हवा? 19मोके ओ सिक्का ला देखावा, जेला तुमन लगान पटाए बर करत हवा।” ओमन ओकर जग एक ठे सिक्का ला लानीन। 20तेकर ईसू हर ओमन ला पूछीस, “एमें काकर चेहरा कर छाप अऊ नांव हवे?” 21ओमन कहीन “रोमी राजा कर।” तब ईसू हर ओमन ला कहीस, “जेहर रोमी राजा कर हवे, ओला रोमी राजा ला देआ, अऊ जेहर परमेस्वर कर हवे, ओला परमेस्वर ला देआ।” 22एला सुईन के ओमन अचमहों में पईर गईन अऊ ईसू ला छोंएड़ के चएल देहीन।

जी उठे कर बारे में सवाल

(मरकुस 12:18-27; लूका 20:27-40)

23ओहीच दिन तनीक सदूकी मन ईसू जग आईन, जेमन ए कथें कि मरे कर पाछू मईनसे मन फेर जी के नई उठें। ओमन ईसू जग एगोट सवाल पूछीन, 24“ए गुरू, मूसा हर कहीसे कि अगर कोनो मईनसे हर बिगर लईका कर मएर जाथे, त ओकर भाई हर ओ अदावेंन ठे बिहाओ कएर ले अऊ अपन मरल भाई बरीक लईका जनमाए। 25मान लेआ कि सात ठे भाई रहीन, पहिलो हर बिहाओ करीस, बकिन ओहर बिगर लईका करे मएर गईस अऊ अपन परानी ला अपन भाई बर छोंएड़ देहीस। 26दूसर अऊ तीसर भाई ला लेके सबेच भाई कर संगे अईसनेच होईस अऊ सातो कर सातो भाई मन मएर गईन। 27आखरी में ओ सवांगीनोच हर मएर गईस। 28तेकर ले मरल में ले जी उठे कर पाछू, ओहर सातो भाई में ले काकर परानी होही? काबरकि ओ सातो झेमन ओकर ठे बिहाओ करे रहीन।” 29त ईसू हर ओमन ला जबाब देहीस, “तुमन भुलाए गए हवा, काबरकि परमेस्वर कर किताब अऊ परमेस्वर कर सामर्थ ला नई जाना? 30काबरकि जेमन मरल में ले जी उठहीं, ओमन कर सादी बिहाओ नई होही, बकिन ओमन सरग में सरगदूत मन कस होहीं। 31मरल में ले जी उठे कर बारे में परमेस्वर हर तुमन ला का कहीस हवे, का तुमन एला नई पढ़े हवा? 32कि मंए अबराहम कर परमेस्वर, इसहाक कर परमेस्वर अऊ याकूब कर परमेस्वर लागों। ओहर मरल मन कर नहीं, बकिन जीयत मन कर परमेस्वर लागे।” 33एला सुईन के भीड़ कर मईनसे मन ईसू कर उपदेस ले ढेरेच अचमहों होईन।

सबले बड़खा अगींया

(मरकुस 12:28-34; लूका 10:25-28)

34जब फरीसी मन सुनीन कि ईसू हर सदूकी मन ला चुप कराए देहीस हवे, त ओमन एक जघा जूटीन। 35ओमन में ले एक झन जेहर कानहूंन कर सिखोईया रहीस, ओहर ईसू ला परखे बर एगोट सवाल पूछीस, 36“ए गुरू, मुसा कर कानहूंन कर अनुसार सबले बड़खा अगींया कोन हर हवे?” 37ईसू हर ओके ला कहीस, “तंए अपन परभू परमेस्वर ला अपन सबेच हिरदय, अऊ अपन सबेच परान ले अऊ अपन पूरा मन ले मया कर। 38एही हर पहिलो अऊ सबले बड़खा अगींया लागे। 39अऊ दूसर अगींया एहर लागे कि अपन परोसी ला अपनेच कस मया कर। 40एही दुई ठन अगींया हर सबेच कानहूंन अऊ अगमजानी मन कर आधार हवे।”

मसीह काकर बेटा लागे

(मरकुस 12:35-37; लूका 20:41-44)

41जब फरीसी मन उहां जूटे रहीन, त ईसू हर ओमन ला पूछीस, 42“मसीह कर बारे में तुमन का सोंचथा? ओहर काकर बेटा लागे?” त ओमन कहीन, “दाऊद कर बेटा।” 43ईसू हर ओमन ला कहीस “त फेर दाऊद हर पबितर आत्मा में होए के ओके ला ‘परभू’ काबर कहथे? 44परभू हर, मोर परभू जग कहीस, मोर जवनी हाथ कती बईठ, जब तक कि मंए तोर बईरी मन ला तोर गोड़ कर खालहे नई कएर देवों। 45जब दाऊद हर ओके परभू कहथे, त फेर ओहर दाऊद कर बेटा कईसे होए सकथे?” 46कोनोच हर ओके कांही जबाब देहे नई सकीन अऊ ओ दिन ले कोनो हर ओकर जग कांही पूछे कर हिमेत नई करीन।

தற்சமயம் தேர்ந்தெடுக்கப்பட்டது:

मत्ती 22: SGJ

சிறப்புக்கூறு

பகிர்

நகல்