Luka 24

Yeso ʉjʉkana akʉ ingyo

(Mat 28:1-10; Mak 16:1-8; Yʉa 20:1-10)

1Ɓisi ɓʉ bɛlɛsɛ#24:1 Ɓisi ɓʉ pɛɛ mbise ʉ ɓisi ɓʉ humuo. kʉɓa ɓʉ kpi, ɓoi ɓambʉsa akʉ ɓʉnzaʉ, ɓambʉchɨka malazi ngua ɓi꞉nye ɓʉʉtambanakeni. 2Ɓambʉgbʉka ikopi yɛɛ ɨja ngia ɓi꞉nye ɓukuteni nayɔ ihoo yɨ ɓʉnzaʉ, tiga itite anambamba. 3Iya ɓa꞉kumunio amati, ɓa꞉gbʉkakɔmʉ ɓata ndʉtʉ yɨ Makʉʉɓɨɨ Yeso ɨkwaise nanɨ. 4Kʉ ati ngiinanɨ ɓambikinye‑ɔɔ kʉmbɨa ɓɔ ɓakyɨa tanɨ ekoo ʉ moni ngikʉnanɨ, ɓa꞉jʉkanɨa tʉkʉ ɓugue ɓapɨnɨ nʉ lɨpʉkʉ lɔɔ lɨjɨɛ ɓʉmaɨ anambamba ʉndaɓʉ ɓʉ gba. 5Kija ɓa꞉kwa ʉɓa nadɨndɨ ikanzi ngia ɓɔ ɓi꞉nye tii ɓuchukumoke mesu tʉkʉ akɛsɨ. Ɓugue ngiɓʉnanɨ ɓambuɓusigio ɓɔ: « Akʉ moni kʉ ɨmanɨ nakʉhata mombi ngia a kʉkʉʉ ati ʉ mɨnda? 6Ambʉkɔmʉ tii ɓata aka, ɨkyɛmɨngana ʉ꞉jʉkana akʉ ingyo jʉkanaa. Tungueni tʉkʉ moni ngika a꞉nɨngakɨa jɛnɛ anʉ Galilaya ɓɔ: 7‹ Yɨkwanana ɓɔ ɓombi ɓunanzo ɛmɛ Mwana ngia ʉ Mombi akʉ lɨkɔndɔ lʉ ɓombi ɓʉ ɓʉɓɨɓɨ, ɓʉnaɓakaka ekoo ʉ mʉsalaba, mbise ʉ makwaa kaatʉ mambʉjʉkana akʉ ingyo. › » 8Kija ɓoi ngiɓʉnanɨ ɓa꞉tunguo moni ngika Yeso i꞉nye ʉyakeni.

9Ɓambʉʉngwa na akʉ ɓʉnzaʉ, ɓambʉtʉa kʉngakɨa ɓatitima kumi nʉ mʉngana, nʉ ɓombi nga ɓɔmɔ kʉ ɓuɓomu, moni kʉ muɓomu ngika ɓa꞉na. 10Ɓoi ngiɓʉnanɨ ɓi꞉nye ɓɔ Malɨa ʉ Magadala, Janɨ nʉ Malɨa inye ʉ Yakɔbɔ, ɨzɔ nʉ ɓoi nga ɓɔmɔ ngiɓa ɓi꞉nye naɓɔ akʉ ɓʉnzaʉ. Ɓambʉngakɨa ɓatitima tʉkʉ ɨsaʉ mɨngana ngiinanɨ. 11Ɨkyɛmɨngana, ɓatitima ɓa꞉na moni ngikʉnanɨ ɓoi ɓa꞉ɓʉngakɨa tʉkʉ ndʉ ʉnzɛɛ, chʉkɔmʉ ɓambʉkʉbaya. 12Pɛtɛlɔ ambʉʉngwa ɨkʉʉ, kija a꞉sa bangʉ akʉ ɓʉnzaʉ. Iya a꞉ɓʉya nani, ambʉtʉkʉma, ambʉna tʉkʉ magba kʉ lɨpʉkʉ ngila ɓa꞉sangaka nalɔ mʉnda. Mbise ngiinanɨ, ambʉtʉa kʉ andɔngɔ, moni ngikʉnanɨ ka꞉kyɨanɨa ki꞉nye nayɔ tii tʉkʉ kʉmbangɨa.

Yeso ʉnganɨa kɨnda nʉ ɓakpataka ɓapɨnɨ nɨngbaa yɨ Ɛmausi

(Mak 16:12-13)

13Kʉ isiinanɨ, ɓakpataka ɓʉ Yeso ɓapɨnɨ ɓi꞉nye kʉsa akʉ ɨkʉmbʉ mɨngana ngia ɓi꞉nye isoko ɓɔ Ɛmausi iya yi꞉nye tine tine ndʉ ɓʉdanga ɓʉ kilɔmɛtɛlɛ kumi nʉ mʉngana#24:13 Tinene ndʉ kɨnda yɨ saa ɓepini. kʉʉngwa anʉ Yelusalɛma. 14Ɓi꞉nye kʉchwa uduɓa wʉ moni kʉ muɓomu ngika ki꞉nye kʉkyɨanɨeni. 15Kʉ ati ngiinanɨ ɓi꞉nye‑ɔɔ kʉchwa uduɓa nguʉnanɨ nʉ ngakanaka ekoo ɔngɔ, Yeso tʉkʉ ɛyɔ gbagba a꞉ka kʉ tinene naɓɔ ambʉnganɨa kɨnda ɨzɔ naɓɔ. 16Ɓi꞉nye nayɔ kʉna, ɨkyɛmɨngana chʉkɔmʉ ɓambumupimiso. 17Yeso ambuɓuɓukuo ɓɔ: « Moni tɨmanɨ ika nakʉngakanaka ekoo ɔngɔ nʉ kɨnda akɛ? » Kija ɓa꞉maa, ɓuhue nʉ ikoko.

18Mʉngana ati ʉndaɓʉ, iya i꞉nye ino ɓɔ Kɛlɛɔpa ambumuɓukuo ɓɔ: « Ɓiɛ, tʉkʉ ɔwɛ wa 'ubika amati ʉ Yelusalɛma aka, iya wambʉkɔmʉ kʉmbɨa moni ngika ka꞉kyɨanɨa bɛ amati ʉ makwaa ngikakɛ? » 19Kija a꞉ɓuɓukuo ɓata ɓɔ: « Moni tɨmanɨ? » Ɓambumutisio ɓɔ: « Moni ngika ka꞉gbʉka bɛ Yeso ngia a mombi ʉ ɨkʉmbʉ yɨ Najalɛtɛ! Ɛyɔ i꞉nye ɨgbɛ yɛɛ mbɨanɨɛ apɛɛ ʉ Asʉɓɨɨ nʉ apɛɛ ʉ ɓombi kʉ ɓuɓomu. Nʉ kyananaka ngiangɔ nʉ moni kʉ muɓomu ngika i꞉nye yaka ki꞉nye nʉ angu. 20Ɓangama ɓʉ ɓakumu‑kumu ngiɓʉndɛsʉ, nʉ ɓangama ɓʉ ɨkʉmbʉ ngiindɛsʉ ɓa꞉munzo pongo akʉ lɨkɔndɔ lʉ ɓombi aka ekoo ngia ɓɔ ɓʉtɨna 'ʉkɔmbɔ nguangɔ ɓɔ ɓʉmʉwa tʉkʉ waa. Kija ɓa꞉mʉɓakaka pongo ekoo ʉ mʉsalaba.

21Ʉna tɔ, ki꞉nye pongo kʉnapɨa itungwio ekoo angɔ ɓɔ ɛyɔ kʉ a꞊ɓonoko Ɨsalaɛlɛ akʉ ɓubayo. Nʉ yɨ꞉pa makwaa kaatʉ, kʉʉngwa aka moni ngikʉnanɨ ka꞉kyɨanɨa bɛ‑ɔɔ. 22Tiga ɓata ɓoi ngana ngana akʉ undindo nguʉndɛsʉ ɓutiduiso piɛ 'ʉtʉma, ati ngia ɓʉsa piɛ‑ɔɔ kʉɓa ɓʉ kpi akʉ ɓʉnzaʉ. 23Ɨkyɛmɨngana, ɓʉgbʉkakɔmʉ tii ɓata ndʉtʉ yɨ Yeso nani. Kija ɓʉka nisu kʉngakɨa ɓɔ ɓʉna moni kɔɔ mʉmbangɛ, ɓamalaika ɓʉɓʉɓwanɨa ɓambuɓusigio ɓɔ: Yeso a kʉkʉʉ. 24Ɓombi ngana ngana ati ʉndɛsʉ ɓʉ꞉sa piɛ akʉ ɓʉnzaʉ ɓambʉna moni kʉ muɓomu ngbanga tʉkʉ ndʉ akʉ ɓoi ngiɓʉnanɨ ɓi꞉nye ɓʉɓʉngakieni‑ɔɔ, ɨkyɛmɨngana ɓʉmʉnakɔmʉ tʉkʉ ɛyɔ. »

25Kija Yeso a꞉ɓusigio ɓɔ: « Inu ɓombi ngiɓa nʉya mbɨmbanaka! Nanʉ mɨtʉma yɛɛ ɓʉmʉ, nʉ nambakabaya moni kʉ muɓomu ngika lɨgbɛ lʉ Asʉɓɨɨ la꞉ngaka. 26Ajʉ yɨkwananakɔmʉ‑zʉ ɓɔ Masɨa ʉdya ɓʉka‑ɓʉkaɨ ɓwanɨ pɛɛ ngia a꞊kumunio‑ɔɔ amati ʉ ɨbɨba ngiangɔ ɓiɛ? » 27Ambʉɓʉngakɨa moni kʉ muɓomu ngika ɓa꞉sigo ekoo angɔ amati ʉ Mubio kʉ Asʉɓɨɨ. A꞉faniso tʉkʉ amati ʉ lɨtaɓʉ lʉ Mʉsa, kʉɓʉya akʉ mubio kʉ muɓomu ngika kʉ lɨgbɛ lʉ Asʉɓɨɨ.

28Tiga ndʉ ɓi꞉nye kʉhʉyakɨa ɨkʉmbʉ ngia ɓi꞉nye‑ɛɛ kʉsa, Yeso ambʉkyɨa ndʉ akʉsa danga nadɨndɨ, 29kija ɓa꞉munangyo kusigo ɓɔ: « Tukuo‑zʉ kʉ ɨzɔ nisu aka, jʉ ɨpá yɨkwa tiga kʉ kwanɨ, nʉ ɓisi ɓa tiga kʉ kuwo. » Kija a꞉ɓundono, ɓi꞉nye tiga ɨzɔ naɓɔ. 30Ati ngia i꞉nye tiga‑ɔɔ kʉdyakaka ɨzɔ naɓɔ, a꞉chɨka mukati ambutuisio Asʉɓɨɨ ɨbɨba, ambuuɓundo ambuɓunzo. 31Kija mesu ngikʉndaɓʉ ka꞉ɓʉgananɨa tiga nayɔ kʉmbɨa, ɨkyɛmɨngana kʉ nɨma ngiinanɨ ambʉgɨtɨa akʉ mesu kʉndaɓʉ. 32Ɓambuɓukuono ati ʉndaɓʉ kusigo ɓɔ: « Ajʉ mɨtʉma ngiindɛsʉ yambakakya‑sa‑zʉ kubomboko nʉ ɨgyagya ati ngia kaakyasa‑ɔɔ kʉyakanaka naɓɔ, nʉ iya i꞉nye‑ɔɔ nisu kukwananakisio Mubio kʉ Asʉɓɨɨ ɓiɛ? »

33Tʉkʉ nɨma ngiinanɨ, ɓambʉʉngwa, ɓambʉtʉa kʉ anʉ Yelusalɛma. Ɓambʉsa kʉgbʉka ɓatitima kumi nʉ mʉngana ɓʉmʉmanieni ɨzɔ nʉ ɓombi ngiɓa ɓi꞉nye naɓɔ. 34Ɓambʉngakɨa ɓakpataka ɓapɨnɨ ngiɓʉnanɨ ɓɔ: « Kingono, Makʉʉɓɨɨ ʉ꞉jʉkana akʉ ingyo jʉkanaa! Simoni ʉ꞉mʉna naa. » 35Kija ɛɓɔ ɓakpataka ɓapɨnɨ ngiɓʉnanɨ ɓambʉɓʉngakɨa moni ngikʉnanɨ ngbanga tʉkʉ ndʉ akʉ ki꞉nye kʉkyɨanɨeni‑ɔɔ nɨngbaa, nʉ aka ɓa꞉mbɨa‑ɔɔ Yeso, nʉ ati ngia a꞉ɓundo‑ɔɔ mukati.

Yeso ʉɓwanɨa ɓakpataka

(Mat 28:16-20; Mak 16:14-18; Yʉa 20:19-23; Kya 1:6-8)

36Kʉ ati ngiinanɨ ɓakpataka ɓapɨnɨ ɓi꞉nye‑ɔɔ kʉngaka moni ngikʉnanɨ, Yeso tʉkʉ ɛyɔ mambɨnyɔngɔ ambʉmaa ati ʉndaɓʉ ɓʉ gba, ambusigo ɓɔ: « Majɨɔ kuɓio ɨzɔ ninu. » 37Ɓambʉkwa ʉɓa nʉ gʉgʉma na akʉ aɓʉɓwanɨa‑ɔɔ ɓʉ fata, ɓi꞉nye yo ɓɔ mabɨa. 38Ɨkyɛmɨngana, Yeso ambuɓusigio ɓɔ: « Jʉ tanɨ‑zʉ nakʉgʉgʉma nʉ kwa ɓatanga akʉ mɨtʉma giindɛnʉ? 39Kangeni‑zʉ lɨkɔndɔ nʉ lɨgbata ngilʉsɛmɛ, tʉkʉ ɛmɛ gbagba iyakɛ. Naɓoteni‑zʉ nambʉna ɓɔ mabɨa wambʉkɔmʉ nʉ ndʉtʉ gʉkʉ muho ndʉ ika nanɛmɛ kʉna nakɔ akɛ. » 40Iya a꞉ngaka moni ngikʉnanɨ, ambʉɓʉpana tiga lɨkɔndɔ ngilangɔ nʉ lɨgbata. 41Ndʉ ɓambikinye‑zʉ kʉbaya moni ngikʉnanɨ, aka ekoo ʉ ɨgyagya ɨzɔ nʉ moni naɓɔ kʉmbangɨa, ambuɓuɓukuo aka ɓɔ: « Ajʉ nambʉkɔmʉ nʉ ɨkyɛmɛ yɛɛ dyɛ aka ɓɔmʉ ɓiɛ? » 42Kija ɓa꞉munzo igbiti yɨ 'usipe wɔɔ upombe, 43ambʉʉchɨka, ambʉʉdya tʉkʉ na apɛɛ ʉndaɓʉ.

44Ambuɓusigio ɓɔ: « Moni ngika mi꞉nye nɨɓɨa ati ngia ki꞉nye‑ɔɔ ninu ɨkɔ ika, kusigo ɓɔ: moni ngika ɓa꞉tɨndakɨa ekoo asɛmɛ amati ʉ ɨtaɓʉ yɨ mapanʉ ngia yɨ Mʉsa, nʉ amati ʉ lɨtaɓʉ lʉ lɨgbɛ ngila lʉ Asʉɓɨɨ, nʉ lɨtaɓʉ ngila lʉ Mʉmbɔ, kʉkwanana kʉkyananakɨa tʉkʉ kʉ muɓomu. » 45Kija a꞉ɓʉgana mbɨmbanaka ɓɔ ɓupimiso Mubio kʉ Asʉɓɨɨ. 46Ambuɓusigio ɓɔ: « Ʉkeni moni ngika ɓa꞉tɨndakɨa ɓɔ: Klisito ʉkwanana kʉdya ɓʉka‑ɓʉkaɨ, nʉ jʉkana akʉ ingyo ɓisi ɓʉ kaatʉ. 47Ɓambʉtɨndakɨa ɓata kʉ ɓɔ: Yɨkwanana ɓɔ ɓombi ɓʉɓɨakɨa Ɨsaʉ yɛɛ Iɗo ngiangɔ apɛɛ ʉ ɓombi nʉ mababa kʉ ɓombi kʉ muɓomu, kufaniso tʉkʉ anʉ Yelusalɛma. Ɨsaʉ yɛɛ Iɗo ngiinanɨ ya ɓɔ ɓombi ɓunicho mɨtʉma ɓambʉnyɨa nʉ ʉpɨa wʉ ɓʉɓɨɓɨ akʉ ino ngiangɔ. 48Inu na ɓatɛmʉ ɓʉ moni ngika. 49Nʉ ɛmɛ mambɨnyɔngɔ ma꞊nɨtʉmɨa ɨkyɛmɛ ngia Tidoo ngiasɛmɛ a꞉nɨpanaka. Tiga inu, tukueni tʉkʉ amati ʉ gʉlʉ ngia, kʉɓʉya tʉkʉ aka na꞊huo‑ɔɔ nʉ angu kʉʉngwa ɔɔ Asʉɓɨɨ. »

Asʉɓɨɨ ʉchɨka Yeso ekoo ʉ ɓisi

(Mak 16:19-20; Kya 1:9-11)

50Kija Yeso a꞉sa naɓɔ aɓei ʉ gʉlʉ ʉ Yelusalɛma, tinene nʉ Betania. Tiga nani, a꞉zono lɨkɔndɔ nɨkʉʉ ambuɓumbuiso. 51Kʉ ati ngiinanɨ i꞉nye‑ɔɔ naɓɔ kumbuiso ambʉsɨana naɓɔ, ambufuɓunio kʉsa ekoo ʉ ɓisi. 52Kija ɓa꞉bibiso Asʉɓɨɨ, ɓambʉtʉa kʉ anʉ Yelusalɛma ɓuhueni nʉ ɨgyagya yɛɛ ɨja. 53Ɓi꞉nye kyɨa ati kʉ 'uɓomu tii tʉkʉ amati ʉ ɨkáa yɨ Asʉɓɨɨ nayɔ kubibiso.

தற்சமயம் தேர்ந்தெடுக்கப்பட்டது:

Luka 24: BudKoya

சிறப்புக்கூறு

பகிர்

நகல்