Lukas 18

Tenpu solu ner tamna gum di, moronapu kuramua tep, pepu upu

1Yesusdi, ‘Ne nyapuda, tamna gum di, Allah moronapu pio kunkamenge’ tenen, putapupa, ‘Ukupmanto upu pepnepa kael kepkamenge,’ tenepudi aupu pepu.

2Tenpu ati arum doramya neitamai nimi upu bongdina deiyo ngebo kuramu. Angeboda, Allah teka men tenemnga cadi, Allah er si men eremamu. Tonda, yuk neng tep, bicau pio men teneramu. 3Ange kuramu dinin, akati arum neitamaida, solu ner tenpu kuramudi, aupu bongdin deiyo ngebo tep, pio mororyakaramudi aupu peramu. “Yuk ngebodi mali kupra deipneua tep, kandi upu lepsikra bokra deipnetume,” pepra tupa-tupa mororyakaramu.

4-5Atumi-atumi yuma, aupupu pepra mororyakaramu dinin, aupu bongdin ngebodi, “Kan upu men lepsisikra bokeipkukene,” pepra yamdongoramu. Ukuramu dinin, siryada, angebodi pepu. “Allah teka men tenenedi, yuk neng tep bicau men tenenun dinin, asolu ner tamna gum di, pio tupa-tupa mororyakanapu kunerya tep, er tep upu lepsikra bokeipkamne. Erda pio mororyakanapu kunerepa, dabal kunerya tep, ukuda er tep mali kweipu ngebo, er upu lepsikra bokeipkamne,” pepu.

6Yesusdi ukupmanto upu pepu dingeda, aupu ton cap dukdongopra pepu.

“Aupu bongdina deiyo ngebo dumsisi men kuramu dinin, sirya taru pepu ngeda, moupra tenenkamrume. 7Allahdi wepra deiamu nesala tep, yuk nengdi sun nong deiki ikin keca weik deriramengepa, sun yu neng tep, Allah er nyapudi, ‘Nun nai Allah, upu lepsikra bokeipseredi, teleppu deipkamser’ tenen, keteng komuni pe, lukunda pe tupa-tupa moronapu kununge. Allah er nyapudi ukununga cadi, Allahdi sik pirinkamre do? 8Gume, ne tek sisi pepsene. Allahdi er nyapu sun ikin kupsere keca tep, menmena upu lepsikra bokeipredi, telep kupra deipkamre. Allahdi ukunkamre dinin, neda, Nimi Mi Sisa Utopu Ngebo tuai mutu tamupra yankamne taruda, Allah teka tenenge neng tupa akunmangepa, epkamne do? Ikin tep tapmengepa, teka tenena neng gum kupmengopda, men epkamne do?” Yesusdi pepu.

Allahdi ton nesala ereipkamre, ton nesalada dudeipkamra tep, pepu upu

9Tonda, Yesusdi er upu gekenmai neng tep, aupu pepu. “Ton nengda, sun dipruai mali keca akapmarepapu, sun pedi sun pe tep, ‘Nunda pio dumsisipu kunupe. Nunda pio telep neng dinin, yuk nesala yumada, mali nengpu kununge’ tenen, dipru erepra kununge. Ukunung neng, ‘Sun kunge keca kael kepkurum’ tenen, ukupmanto upu pepkusene,” Yesusdi er nyapu tep pepu. Upepudi aupu ton pepu.

10Uda, tenpu taruda, nimi butene, ton ngeboda, Farisi ngebo kuramu. Ton ngeboda, amutu talenge deiyo neng, Roma mutu neng karena tep, pajak co bo bulupra derina ngebo, mali kuna weik ngebo kuramu. Tenpu taru dipu, sun yuk-yuk dinin, sun butene Yahudi yala nesaladi, ‘Allah er si erepra, er tep moropkunem’ tenen, Yahudi yala nesala yuma, Allah tep karerbaramidi, er si eremami ati berei. Bereidi, sun yuk-yuk Allah moronmarei taru di ukuprei.

11Bereidi, Farisi ngebo tekrapudi, Allah moronmaua neitamai di, er pe kun keca tepapu tenepra, aupu pepu. “Ne nai Allah, yuk nesala yuma mali kuramengtopu men kununa tep, telepe pepkene. Anengda, ukununge. Ton ngeda, ‘Weika di dopropkamep’ tenen, yuk neng ke karepingepu gum dinin, weike ton cap tapakrap tamupra doronge neng kununge. Ton ngeda, pio mali-mali kunge neng cap, sun domi nerapu gum dinin, tali nerapu nyangna neng cap kununge. Sun kunge utopu men kunune. Tonda, ortekmar ngebo co bo dekangepa, upula dororamre utopu, neda men kunune.

12Neda, kan gispal dona tep, tenpu minggu neitamai, tumi butene deiki di jen jena gum di, si tepra, ne nai Allah kan tep morokunune. Tonda, ne dororamne keca yuma bokra, kan tep tupa seper sepuluh#18:12 Seper sepuluh pepu ngeda, seratus ribu (100.000) kaptu teptoda, sepuluh ribu (10.000) kareptue. Sepuluh ribu kaptu teptoda, seribu kareptue. karekunune. Ada, ware keca do, yuma, sepuluh dopropnyopda, tenpu bokra karekunune.” Farisi ngebodi, Allah tep pepra moropu.

13Farisi ngebo upepu dinin, ‘Amutu talena deiyo neng karepkamne’ tenen, pajak co bo bulupra derina ngebodi, yambul karenai tekudi, ‘Neda pio mali ngebo’ tenen, mambul kange doupra, ‘Allah kuryai men dinkune’ tenen, giso talepra genepdongoprapudi, Allah moropudi upepu. “Uo, ne nai Allah, neda pio mali ngebo kununa cadi, ito popnetum dinin, ‘Bicau tenepneremdi, lyepnetum’ tenen, moropkene,” pepra Allah moropu. Yesusdi pepu.

14Upepu dingeda, aupu ton cap dukdongopra pepu. “Uda ne tek sisi pepsene. Allahdi pajak co bo bulupra derina deiyo ngebo tep, er mali kun keca gum kupra deipudi lyepu. Allahdi tenepu ngeda, ‘Angeboda konum lyepnepa telep kunkamre,’ tenepu. Dinino, Farisi ngebo tep nengeda, Allahdi men lyepu. Allahdi tenepu ngeda, angeboda, ‘Neda telep ngebo,’ tenepka tep, men lyepkamne, tenepu. Angeda, tali tep gume. Ware nesala do yuma, sun pedi sun pe tep, eremdindaramenge nengda, Allahdi aneng dopra amngai dudeipkamre. Dinino, sun dipru boun kupra amngai kunge nengda, Allahdi erepra deipkamre.” Yesusdi er upu gekenmai neng tep pepu.

Yesusdi wepra deipupa, er nyapu sisa tep, pepu upu

15Yuk taruda, ‘Yesus er buru sun nong deiki deipredi, telep kupra deipkamre’ tenen, sun nai yapu cap, sun nin yapu capdi, sun metek nyapu weika di Yesus damai dopra duyai. Duyakanmaipa, Yesusdi wepra deiamupa, er upu gekepra melipra embarami nengdi, anyapu sun nai yapu cap, sun nin yapu cap tep, “Nyapu dekana yapso,” pepra upu sengmai. 16Upu sengmai dinin, Yesus er nyapu tep derepudi, aupu pepu.

“Metek nyapudi ne damai yakanmangada, telepe. Sun anyapu tep upu sengmarumada, meme. Allah lyepredi taleprepa, Allah er nyapu kunkameng nesalada, ametek nyapu utopu kunge nesalapu, Allah er nyapu kunkamenge. 17Ne tek sisi pepsene. Anyapudi tali lupra teka tenepra kungetopu men kunge nesalada, Allah teka men teneptenga tep, Allah nesala lyepredi dipru taleseryada, men doronkamenge. Ato nesalada, Allahdi men dopropkamra cadi, men lyeprepa, anengda im deiki men wekamenge,” Yesusdi pepu.

Isomka ngebo tenpu Yesus damai yaudi, pepu upu

18Yesusdi anyapu tep, Allah konum moropkopda, sakotepra baupane, isomka ngebo tenpu, Yesus damai beudi, Yesus tep asipetepu. “Naio, kanda, peteremna telep ngebo kuruma cadi, ware telep pel doptenepa, Allah lyepnetu deiki di, bol koptapra pio gam kuna deiyo keca doproptene do?” pepra asipetepu. 19Asipterepupa, Yesusdi tamupra pepu. “Tuai ban-ban yuma kunge nesalada, tenpu ngebo peda, telep neng ton men kununge. Allah er tenpupu telep ngebo kurura cadi, ware keca deiyo tep, kandi, ‘Telep ngebo,’ pepmanerem do? 20Allahdi, ‘Ukunkamrume, angeda men kunkamrume,’ peipupa, Musadi sekeiamu upu neitamai, mem upu kupu ngeda, kan konum kael kemrume.

‘Ada, ner tali-tali nyangdana gume. Nimi tali portamna gume. Upula dorona gume. Yuk neng tep, minina upu pena gume. Sun nai yapu cap, sun nin yapu cap tep, bicau tenepra gispal donkamrume,’ pepra sekeiamseue. Musadi sekeiamseu upuda#18:20 Musa sekeiamu upu – Aupuda Ulangan 5:16-20 cap, Keluaran 20:12-16 cap neitamai akapmare. pepkene,” Yesusdi isomka ngebo tep pepu. 21Upepupa, isomka ngebodi tamupra pepu. “Naio, kan pepmanerem upuda, ne yambul taru di gekeramsidi kuramsi,” pepu.

22Upepupa, Yesusdi angebo tep tamupra pepu. “Ange tep nengeda, ‘Dumsisipu kutene’ tenen, putapkeryopda, nedi pepkuken keca, tapmum kecada ukupkurume. Kan talerum keca yuma, co bo benkunupmemdi, kankan kunge nesala yuma tep, aco bo karepkamarume. Talerum keca kunupra kankan kunge nesala karepmem pangeda, Allahdi pio telep keca, im deiki deiamkerepa ben dopropkamreme. Kankan nesala konum karepmem dingeda, ne upu gekepra domyankamnurume,” Yesusdi pepu.

23Yesusdi aupu pepu pangeda, isomka ngebo yupropudi, mali kange doupra, genepdongopudi beu. Angeboda, akeca-keca weika di taleamu ngebo cadi, ‘Apepnere ngeda men kuptene’ tenen, mali kange doupra genepdongopra beu. 24Ukupu pangeda, Yesusdi angebo dipterepudi aupu pepu. “Allahdi nesala weika di lyepredi, sun kange dipru talepredi peprepa, er amngai bukra kunkamenge yumada, isomka nesalada ikin kuprepa, kange mun kange dipapu gekenunge. Kanam dipu teka men teneptenge. Ikin dipapu Allah er nyapu kunkamenge. Ada, isomka nengdi, sun talenge keca deiki, sun kange derinunga tepa.” Yesusdi pepu.

25Upepudi, aupu ton dukdongopra pepu. “Uda, ukupmanto upu pepkune. Unta bisamda, nong weik bisam dinin, ila unta bisamda, opkal wirameng yumbi bon wengnada kanam dipu wektue. Dinino, Allahdi nimi lyepredi sun kange cap, dipru cap, talepredi peiprepa, er nyapu kunkamenge yumada, isomka nengda kanam dipu gekepra men dombetenge. Ikin kange doupra kunga deiki dipu, Allah er nyapu kupmengedi, im deiki benkamenge. Ada, isomka nengdi, sun talenge keca tep, ‘Nun bungada ila mambule,’ tenen, akeca deiki, sun kange derinunga tepa,” Yesusdi pepu.

26Upepu pangeda, Yesus er upu gekenmai nengdi, ‘Uo,’ tenepra lolopidi, Yesus tep asipetepi. “Ange tep nengeda, Allahdi wareto nesala lyepkamre do?” pepra asipetepi. 27Asipetepipa, Yesusdi tamupra pepu. “Nimi puto deiki di nimi men lyepdatenge. Dinino, nimidi men kupmanto keca yumada, Allah er dingeda, kanampu kurure. Allah er dipapu mali neng pe, telep neng pe, kanam dipu lyemrure. Akeca-keca yuma, Allah er puto deiki dipapu kanampu kurure. Allahda ikin men kuptua tep, Allahdi lyepkamre nesalada, kanam dipapu lyepkamre. Ikine men kuptue.” Yesusdi pepu. 28Upepupa, Peterusdi tamupra pepu. “Naio, kan melimna tep, nun taleamupu keca yuma tapmupudi, kan upu gekepra domyakakenupe,” pepu.

29Upepupa, Yesusdi wepra deiamu neng yuma tep pepu. “Ne tek sisi pepsene. Ware ngebo do, ware ner do? Allahdi, sun lyepra sun dipru talerepa, Allah er bisi dombana tep, sun men di taleramenge keca tapmengedi, ne upu gekepra, ne amnyo tara domyakaramnenge nesalada, sundi tapmenge keca utopu keca denge weik, ataru neitamaipu doronkamenge. 30Ada, sun kuramenge mutu cap, sun ati cap, sun weit yapu cap, sun du yapu cap, sun nin yapu cap, sun nai yapu cap, sun pe nyapu cap, ayuma tamamenga tep nengeda, ataru neitamaipu akeca utopu keca, denge weik doronkamenge. Tonda, amenda yankamre taruda, gam pio kuna tep deiyo keca dopropmengedi, pio gam kunkamenge, pepsene.” Yesusdi pepu.

Mali kunge nengdi Yesus popkamya tep, Yesusdi lap pepu upu

31Amendada, Yerusalem mutu benkamiya tep, yuk nengda taprapudi, erdi wepra deiamu neng, 12 nengpu dopra yukai beudi, aupu lap pepu. Ada amenda kupkaminge tep, lap pepu. “Nun yuma Yerusalem mutu welepmepe pangeda, neda Nimi Mi Sisa Utopu Ngebo tep, Allah upu lap perami neng, nabi-nabi nengdi peramneitopu kupkamnenge.

32Ne napra benengepa, Allah karena tep deiyo neng cap, Musa sekeiamu upu peteremna deiyo neng capdi, ‘Poipserume,’ pepra, Yahudi yala gum neng, amutu talena nimi deiyo neng tep karepkamnenge. Karepnenge pangeda, nong bol deiki naleprap nyek-nyek pena cap, silong tuluna cap, balana nong deiki pona cap, ukupnengedi, ne nong dopra, sengdin co deiki di popkamnenge. 33Popnengopda, depmanyanen, u weneri tumi konum kupyopda, neda Nimi Mi Sisa Utopu ngebodi tamupra gam bukamne,” Yesusdi pepu. 34Yesusdi upepu dinin, er nyapu 12 nengdi moupra men gekepi. Ada, Allahdi Yesus penmau upu inipka tep, Yesus aupu penmau taruda, ‘Deiyo ake’ tenen, men kael kepi.

Yesusdi asuru puamu ngebo perekeipu upu

35Yesusdi upepupa, sun yuma amutu tapra, bisi mapbaramyanen, Yeriko mutu ati arum doramya damai, Yesus cap, yuk nesala gung weike cap, banmai. Banmaipane, asuru puamu ngebo, sun banmai bisai pirman bukmau. Bukmaudi, abisi embanmai neng tep, ‘Co bo tali karepkuneng’ tenen, moronmau. 36Er abukmaudi moronmau taruda, Yesus cap, embanmai nengda, nimi gung weike embanmaiya cadi, lelim gekepudi, ‘Ware keca tep, embanmang do?’ tenepudi, asipetepu. 37Asipetepupa, yuk nengdi, “Yesus Nasaret mutu ngebo yakanmare,” pepi.

38Upepipa, gekepudi ila upu di penmau. “Yesuso, kanda Raja Daud er yala nengdi deipkei ngebo#18:38 Daud yala nengdi deipkei – Asuru puamu ngebodi, ‘Daud yala nengdi deipkei ngebo’ pepu ngeda, mesum tep men pepu. Sun Yahudi yala nengdi, ‘Amenda taru, Daud yala ngebo, nun Lyemna Deiyo Ngebo yankamsere,’ teneramya tep, angebodi, Yesus tep teka tenepudi aupu pepu. cadi, bicau tenepra makupneo,” pepra moronmau. 39Upepra moronmaupane, sun menepra banmai nengdi, “Upena yapo,” pepra upu seki. Upu seki dinino, asuru puamu ngebodi, ‘Yesus gekepkuner’ tenen, ila di ton cap, ngolongmaudi aupu penmau. “Kanda Daud yala nengdi deipkei ngeboda, ne tep bicau tenepra makupneo,” pepra ila di moronmau.

40Moronmaupa, Yesus banmauanen, gekepu dingeda, abena tekudi, akunmai neng tep, “Angebo dopra, ne damai duyaneso,” pepupa, duyai. Duyai pangeda, asuru puamu ngebo tep, aupu pepu. 41“Kanda, ‘Ware kupra deipnetu’ tenen, putanmakerpa, moronmanerem do?” pepu. Upepupa, asuru puamu ngebodi tamupra pepu. “Naio, ne asuru di akeca-keca dina tep, ‘Kwetepnetum’ tenen, putanmanera tep, moronmakene,” pepu. 42Upepupa, Yesusdi angebo tep, aupu pepu. “Kandi ne tep, teka tenepmanerema deiki di, kan asuru perekeipkene,” pepu. 43Yesusdi aupu pepupnen, ataru dipapu, angebo er asuru telep kupupa, akeca-keca yuma epudi, Yesus bisi banmaupa, angebodi amenda banmaudi, “Allahda pio telepe,” pepra Allah si eremau. Yesusdi angebo er asuru perekeipupa, er cap embanmai neng yuma epidi, sun peda, “Allah er pio telepe,” pepra er si eremai.

தற்சமயம் தேர்ந்தெடுக்கப்பட்டது:

Lukas 18: KNTOT

சிறப்புக்கூறு

பகிர்

நகல்