Génesis 8
8
Nnu̱un nute
1I̱ña̱jée nna̱ꞌán Ndiosíꞌ néꞌyá re̱ꞌ Noé jín nɨꞌɨ rá kitɨ yúkú jín rá sa̱na̱ꞌ ñúꞌún jín re̱ꞌ iniꞌ arca, jee nsa̱ꞌá re̱ꞌ ya̱ ña̱kɨ̱ꞌɨ ta̱chi̱ꞌ víjin nu̱u̱nꞌ ñu̱ꞌún, jee nki̱jéꞌé núun nute. 2Jee nna̱kunasɨꞌ nu̱u̱nꞌ ñu̱ꞌún chi̱ji nteñúꞌún kúnú nu̱u̱nꞌ nkáku nute, jee nnu̱másúꞌ sa̱vi̱ꞌ, jee ña̱kui̱ñɨ̱ꞌ ya̱ kúun sa̱vi̱ꞌ. 3Jee kuééni kuééni kua̱ꞌa̱nꞌ nute nkuiyo‑o nu̱u̱nꞌ ñu̱ꞌún, jee ya njia̱ꞌa sientúꞌ vi̱xiko u̱ji̱ꞌ (150) ki̱vɨ̱ꞌ núun nute ka̱ꞌ, 4jee ki̱vɨ̱ꞌ xaꞌúnꞌ u̱vi̱ꞌ (17) ya̱ yo̱o̱ꞌ uxáꞌ ña̱kɨtuvi arca nu̱u̱nꞌ rá yuku Ararat. 5Saáni va̱ji núun ka̱ꞌ nute ne̱ yo̱o̱ꞌ ujíꞌ, jee nnatu̱vi rá xi̱ni̱ꞌ yuku ki̱vɨ̱ꞌ xíꞌnañúꞌún yo̱o̱ꞌ ujíꞌ.
6Jee njia̱ꞌa vi̱xiko (40) ki̱vɨ̱ꞌ ka̱ꞌ jee nine Noé ventana arca ya̱ nsa̱ꞌá re̱ꞌ. 7Jee nchu̱ichí re̱ꞌ ti̱ka̱ká ya̱ta̱ꞌ arca nkene ti̱ꞌ. Soo ti̱ka̱ká nnava ti̱ꞌ yaꞌá yukuán ne̱ ni̱chi̱ꞌ nute nu̱u̱nꞌ ñu̱ꞌún. 8Jee kuíre nchu̱ichí re̱ꞌ ɨɨn kúku kene ti̱ꞌ sáva kuniꞌ re̱ꞌ retú ya̱ nkuiyo nute nu̱u̱nꞌ ñu̱ꞌún. 9Soo ntu nnániꞌinꞌ ti̱ꞌ nu̱u̱nꞌ kiko̱o ti̱ꞌ najia̱ví ti̱ꞌ, jee nni̱kó ti̱ꞌ nu̱u̱nꞌ Noé iniꞌ arca, chi násɨ́ꞌ i̱i̱ꞌ nute nu̱u̱nꞌ ñu̱ꞌún, jee nsi̱kááꞌ re̱ꞌ naꞌá re̱ꞌ nna̱keꞌen re̱ꞌ kúku jee nxi̱nívɨ re̱ꞌ ti̱ꞌ iniꞌ arca jín re̱ꞌ.
10Jee nnetu re̱ꞌ u̱xa̱ꞌ ki̱vɨ̱ꞌ ka̱ꞌ, jee tukuni nchu̱ichí re̱ꞌ kúku nkene ti̱ꞌ arca. 11Nni̱kó kúku yánini jee yɨ́ꞌɨ́ ɨɨn tu̱yukúꞌ lúlí olivo teꞌya ti̱ꞌ, saájee nku̱káꞌnú iniꞌ Noé ya̱ ya nkuiyo nute ka̱ꞌ nu̱u̱nꞌ ñu̱ꞌún. 12Jee tukuni nnetu re̱ꞌ u̱xa̱ꞌ ki̱vɨ̱ꞌ ka̱ꞌ, jee nchu̱ichí re̱ꞌ kúku, soo ntu nníkó tuku ti̱ꞌ ka̱ꞌ nu̱u̱nꞌ re̱ꞌ.
13Sáá íñɨ́ Noé i̱ñu̱ꞌ sientúꞌ ɨɨn kui̱ya̱ꞌ (601) jee xíꞌnañúꞌún yo̱o̱ꞌ ki̱vɨ̱ꞌ xíꞌnañúꞌún ya ni̱chi̱ꞌ nute nu̱u̱nꞌ ñu̱ꞌún, jee nsiíyo re̱ꞌ xi̱ni̱ꞌ arca, jee niniꞌ re̱ꞌ ya̱ ya ni̱chi̱ꞌ va̱ꞌa nu̱u̱nꞌ ñu̱ꞌún. 14Jee ya̱ ókóꞌ u̱xa̱ꞌ (27) ki̱vɨ̱ꞌ yo̱o̱ꞌ uvíꞌ ya̱ níchiꞌ va̱ꞌa nu̱u̱nꞌ ñu̱ꞌún.
15Saájee nkachiꞌ Ndiosíꞌ nu̱u̱nꞌ Noé:
16“Kene nú iniꞌ arca jín ñasɨ́ꞌɨ́ nú, jín rá se̱ꞌya nú, jín rá ñasɨ́ꞌɨ́ rá se̱ꞌya nú. 17Suni tavaꞌ nɨꞌɨ rá kitɨ ñúꞌún rátíꞌ jín nú iniꞌ arca, ya̱ kúvi ntáká nu̱u̱nꞌ kitɨ íyó ñunéꞌyúꞌ: rá kitɨ íyó chi̱yo̱ꞌ, rá kitɨ, jín rá kitɨ síúꞌun maátíꞌ nu̱u̱nꞌ ñu̱ꞌún sáva kutenuun rátíꞌ nɨꞌɨ kuitɨꞌ nu̱u̱nꞌ ñu̱ꞌún jee nakuneꞌ víꞌí rátíꞌ jee nukueꞌeꞌ rátíꞌ nu̱u̱nꞌ ñu̱ꞌún.”
18I̱ña̱jée nkene Noé jín rá se̱ꞌya re̱ꞌ jín ñasɨ́ꞌɨ́ re̱ꞌ, jín rá ñasɨ́ꞌɨ́ rá se̱ꞌya re̱ꞌ. Nkene ráa jín re̱ꞌ. 19Suni nkene nɨꞌɨ rá kitɨ jíka nu̱u̱nꞌ ñu̱ꞌún, nɨꞌɨ rá kitɨ síúꞌun maátíꞌ nu̱u̱nꞌ ñu̱ꞌún, jín nɨꞌɨ rá kitɨ íyó chi̱yo̱ꞌ. Ntáká rá kitɨ nkene rátíꞌ ta nu̱u̱nꞌ sánikua̱ꞌ kitɨ kúvi rátíꞌ iniꞌ arca.
20Kuíre nsamaꞌ Noé yu̱u̱ꞌ nu̱u̱nꞌ #8:20 Altar so̱ko̱ꞌ re̱ꞌ nu̱u̱nꞌ I̱toꞌoꞌ‑ó jee ntɨɨn re̱ꞌ sava ntáká nu̱u̱nꞌ rá sa̱na̱ꞌ íyó noo [ya̱ kuvi so̱ko̱ꞌ re̱ꞌ nu̱u̱nꞌ I̱toꞌoꞌ‑ó], jín ntáká nu̱u̱nꞌ rá saaꞌ íyó noo, jee ñaꞌniꞌ re̱ꞌ rátíꞌ nte̱ñuꞌunꞌ re̱ꞌ rátíꞌ nu̱u̱nꞌ nsamaꞌ re̱ꞌ sáva so̱ko̱ꞌ re̱ꞌ rátíꞌ nu̱u̱nꞌ I̱toꞌoꞌ‑ó. 21Jee nni̱ꞌi̱nꞌ I̱toꞌoꞌ‑ó xikoꞌ jiáꞌánꞌ viiꞌ ya̱ sókóꞌ Noé jee nkachiꞌ re̱ꞌ iniꞌ ánímaꞌ re̱ꞌ nu̱u̱nꞌ maáréꞌ: “Ya nchi̱sónínu ni̱ꞌ nu̱u̱nꞌ ñɨ̱vɨ́ jie̱ꞌe̱ꞌ ñɨvɨ chi ñúꞌún niva̱ꞌa iniꞌ ánímaꞌ rá ñɨvɨ ne̱ súchí ráa, soo ni ɨɨn íchí ka̱ꞌ nsáꞌ chisónínu tuku ni̱ꞌ maa sukuán, jee nsáꞌ xináánꞌ tuku ni̱ꞌ nɨꞌɨ rá tékúꞌ sánikua̱ꞌ ya̱ nsa̱ꞌá ni̱ꞌ.
22’Ni íyó ñɨ̱vɨ́
nsáꞌ tuꞌuꞌ tiempúꞌ táji ñɨvɨ tataꞌ sáꞌá jín ya̱ nákeꞌen ráa maa,
jín tiempúꞌ sááꞌ jín tiempúꞌ kúvíjin,
jín tiempúꞌ savi jín tiempúꞌ nííꞌ maa, #8:22 “Verano” jín “invierno”
jín nuví jín yakuááꞌ.”
தற்சமயம் தேர்ந்தெடுக்கப்பட்டது:
Génesis 8: meh
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2022, Wycliffe Bible Translators, Inc. All rights reserved.