Genese 9
9
Aualari i Noa ila ve okoare
1Aualari Noa i akoremari ila lei momorapupe, kai mariape: “E akoremari eravahaeai oaria leivahaeaki, heroe, kai meahaiapo v'ila kopurapakive. 2Meahaiapo apealula animala oaria, kai ori oaria, kai hai loalula eharu oaria, kai ma ureve la ekaka oaria, ero oaoka leivahaeakilai; ara erero eve mai ve le aiara. 3Ovokake ila eharu oaria eve eapai hovea leikilai; hovea hovea ara kora mere ero aiarape, lahovea ara ero eharu oaria aiarakilai. 4Aka, apu ila la aivau, ovokake eharu la, e kalalavahaelue. 5O iele, eve apu, eve ovokake ve apu, ara kavale ikivere leikilai, animala oaria ve mai ve ara arero ikivere leikilai, haela haela ve mai ve, haela oaria ve apoheari ve mai ve, ara haela ve ovokake la ikivere leikilai. 6Haela ve apu hakaitapaki la haela, areve apu haela hakaitapakilai; ehovea Aualari areve maea hovea haela karikipe. 7E va akoremari erakilai, kai maeakoko leivahaeakilai, meahaiapo ureve oaria leivahaeakilai.”
8Kahara, Aualari Noa i areve akoremari ila maria maeape: 9“Iapaila, o iele, ara e v'ila mea oaria aeaki okoare arilai, a i ave meavohula oaria kara; 10aeka, e i hareho apealula ovokake eharu, ori, maraha animala, kai meahaiapo apealula animala merava oaria, vevaea ve kihoahukape la eharu oaria kara. 11Arave okoare e v'ila maria arilai — aireaki hoa ara mea oaria aivau haela oaria ve oki ma haa v'ila haerapa va ka, kai aireaki hoa ma haa meahaiapo hai ka lei va ka.” 12Aualari maeape: “Ara e i hareho apealula ovokake eharu aiai aireaki vilakao oaria kara, okoare ve ihova ma: 13arave biae ara meuru ureve aepakilai, are va ara i meahaiapo ila ve la okoare ve ihova leikilai. 14Ara meahaiapo akea ve meuru uku paparaehaki, kai arave biae la meuru ureve hihika leiki la hoa, 15ara va arave okoare iki kekelakilai, ara e i hareho apealula aivau ve eharu oaria v'ila la okoare; ma aireaki haa ha va ka, ehovea aivau haela oaria hai ka leivahaeakive. 16Biae va meuru ureve aeaki la hoa, ara arero ovohae eavakilai; ara va Aualari, meahaiapo apealula aivau ve ovokake haela oaria v'ila leipe kai mea oaria aeavila la okoare, ara iki kekelakilai.” 17Aualari Noa maeape: “Ma va ara i meahaiapo apealula aivau haela oaria ila leipe la okoare ve ihova iele ma.”
Noa i areve akoremari ila
18Vevaea kihoahukape Noa ve akoremari ve rare va Sema, Hamu i Iapeta; Hamu va Kanana ve oa. 19Noa ve akoremari ilehoila ma, kai ere v'ila meahaiapo ureve haela maeakoko leivahaeape. 20Kahara, Noa va oropa kekele ihaki haela. Are vine oru hahape: 21are wine oaria lala ihape le leipe; are areve pura oavi uvi ureve naoae maheare uavape. 22Hamu, Kanana ve oa, areve oa ve maheare ovohae eavape; are mahokaea ve areve apo i heari maeaeape. 23Sema i Iapeta ila pura kaivi, elare horo ve horeai aupe; erealila aireaki auvahaeape, kai erealilave oa ve maheare le kokaukape; erealila ve oropape aireaki helari, laelave erealila oa ve maheare au eavaila. 24Noa wine ve la ihape hoa karia lei ovokake leipe la hoa, areve aireaki akore arero leipe la mai are ore le leipe; 25are mariape: “Kanana lei heaha leikilai, are va apoheari ve au hahaki haela leikilai.” 26Are aeka maeape: “Iehova arave Aualari Sema lei morapaeakilai; Kanana areve horova leikilai. 27Aualari Iapeta lei eapapo leikilai, are Sema ve kovo uvi aeakilai, Kanana areve horova haela leikilai.” 28Kahara, Noa ma haa aruru karia leipe la hoa, are va hitolo 350 aeka leipe. 29Noa ve meahaiapo hareho aeaveape hitolo va hitolo 950; kahara, are le apape.
தற்சமயம் தேர்ந்தெடுக்கப்பட்டது:
Genese 9: ORO
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published by the British and Foreign Bible Society 1963-1972