Genese 2
2
1Laria, kaia i meahaiapo ila karikivahaeape horova karia le leipe, eharu oaria hovea hovea. 2Hare 7 ila, Aualari horova karia le leipe. Are hare 7 ila are leivahaeape horova oaria v'ila iki le paraeape. 3Aualari hare 7 ila lei morapaeape, kai lei hehe leipe, ehovea la hare are iki paraeape, kai horova aeva au leila.
4Ma va kaia i meahaiapo ila ve karikivahaeape eharu ve hoa hoa oaria, Aualari meahaiapo i kaia ila karikivahaeape la hare. 5La hoa kekele ureve kora mere karia, kai oru ve la hohe au aheaila, ehovea Aualari lai ihaukive au maeaila, kai kekele ihaki haela karia. 6Aka mea oro meahaiapo ve pekape, kai kekele hoa haroapo lei huruhuru leipe. 7La hoa Iehova Aualari haela kekele ve mahuvu karikipe, kai areve overa ura ureve ovokake ve mea hohoape; kahara, haela va ovokake iele le leipe.
Edena la Oru
8Iehova Aualari Edena ureve, kauri ukai ve, oru hahape. Are karikipe la haela are leia aepape. 9Maea mekaka i eapai mekaka ila la kora oaria Iehova Aualari kekele ve lei aheaupe; oru ve aru hihi ve are Ovokake ve la kora aporape, kai Veveke i Heaha ila lei ore leiki la kora kara.
10Mai ma Edena ve leia horerape, ehovea oru ma veveke avarakive: are leia kovaela mai titaeka hari ila leipe. 11Oropa mai ve rare va Pisona, are Havila la ita hoa haroapo helarivila la ita va gold ila. 12Areve gold veveke hiki, bedeliuma i onika ila have kara le apearo. 13Mai orahokaila ve rare va Gihona; la mai va Kusa ve ita hoa haroapo helarivila. 14Mai ilehoila ve rare va Hidekela, are Asiria ve kauri ukai ve horerave, kai mai hari ila ve rare va Euperate.
15Iehova Aualari haela kaivi Edena oru le paraeape, ehovea kekele ihakive, kai oru kiva leikive. 16Iehova Aualari haela ape karava maeape: “A va oru ureve la kora hae oaria larive heroe. 17Aka veveke i heaha ila lei ore leiki la kora ve hae a v'ila pupu leipe, a le v'arekaea. Ehovea a larikilai la hare a le apakilai”.
18Iehova Aualari mariape: “Veveke ka, haela lahua aeakive; ara areve koarai aeaki kake haropakilai”. 19Laelave, Iehova Aualari loa loalula eharu oaria i akea ve la ori oaria, karikivahaeape; are erero haela ve leia kari auvahaeape, ehovea are erero rare itavakive; haela ereve rare itavape la rare, la va ereve rare iele le leivahaeape. 20Haela boromakau oaria ve rare itavape, kai ori oaria kara, kai loa loalula eharu oaria kara; aka haela ve koarai aeaki kake karia. 21Laelave, Iehova Aualari haela avuku huru le avarape; are avuku uavape la hoa Iehova Aualari areve kararapi haroapo hareavape kai areve la ita aivau le kokaukape. 22Iehova Aualari haela ve hareavape la kararapi v'ila uamari karikipe; are arero haela ve leia lai aupe. 23La hoa haela maeape: “Ma va arave uki ve uki, kai arave aivau ve aivau; arero rare Uamari rare itavakilai, ehovea are haela ve maea ve hareavape”. 24Laelave haela areve oa i lou ila haitapai uva havahu i hareho aeakilai; erealila aivau haroapo leikilai. 25Vila i uva ila maheheare ila apearoape, kai maea makiri au leila.
தற்சமயம் தேர்ந்தெடுக்கப்பட்டது:
Genese 2: ORO
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published by the British and Foreign Bible Society 1963-1972