Genese 12
12
Aualari Aberamo itavape
1Kahara, Iehova Aberamo maria maeape: “A elare ita, elare apavara, elare oa ve uvi, haitapai, iki ara aro kileaki la ita aukive. 2Ara aro meavohula ve ita vilaipi lei eapapo leikilai; ara aro lei morapaeakilai, kai ave rare lei eapapo leikilai, a va haela oaria lei mekaka leivahaeakilai. 3Aro lei mekaka leiki la haela ara lei mekaka leivahaeakilai; aro o heaha maeaki la haela ara o heaha maeakilai. Ave oki ve meahaiapo ve lalava oaria lei mekaka leivahaeakilai.”
4Laelave, Aberamo Iehova maeape la oharo hovea, hahi le aupe. Lota are i hareho aupe. Aberamo Harana harepape hoa are va hitolo 75 leipe. 5Aberamo areve uva Sarai, kai areve akoreheari ve akore Lota, kai ere korukaivahaeape eharu oaria, kai ereve horova haela oaria, ere Harana leia korukaiavahaeape la haela oaria; ere hoahukape, ehovea Kanana la mea haropakive, kai Kanana ita le koarape, 6Ere Kanana la ita koarape la hoa, Aberamo la ita ve aru hihi ve hahi lei lei Sekema leia, More la ita heheapa kihoaupe. La hoa Kanana haela ita apearoape. 7Iehova Aberamo oropa ve kihoai mariape: “Ara ma ita eve meavohula avarakilai.” Laelave are leia arura haha ukape, ehovea Iehova leia areve oropa ve hihika leipe. 8Are leia harepai, Betela ve kauri ukaki la kela leia pekape, are leia elare kovo uvi kupe, Betela va hurava ukai, kai Ai va kauri ukai ve, areve kovo ita va aru hihi ve; are leia Iehova ve arura haha ukape, kai Iehova ve rare itavape. 9Kahara, Aberamo aeka hahi leipe, aiai diho hoa.
Aberamo Aigupito leia
10Ita hohera leipe, laelave Aberamo Aigupito leia aeakive hoaupe, ehovea ita hohera eapapo leipe. 11Kahara, are Aigupito leia araeakive kekelape la hoa, are elare uva Sarai maeape: “Ara v'ore a va uamari hevehe iele; 12Aigupito haela aro eavaki hoa ere maeakilai ‘Ma va areve uva’; ere araro harilai, aka aro lai ovokake leikilai. 13A va mari ari ‘Ara areve mariheari’, laria ara va veveke la koarakilai, kai ehovea ave la maea mekakure, ere va araro kara he va ka.” 14Aberamo Aigupito hoaupe la hoa, Aigupito haela uamari ovohae eavape, are va uamari hevehe iele. 15Kahara, Parao ve amua harokou haela arero eavape la hoa, ere arero Parao ve oropa ve morapaeape. Laelave ere la uamari Parao ve uvi lai pekape. 16Ehovea la uamari, Parao Aberamo lei veveke leipe; are va mamoe, boromakau, asini mea, horova haela, horova marita, asini abu, kai kamela aiarape.
17Aka Iehova Parao i areve lalava haela ila maea heahaha oaria v'ila hararuape, ehovea Sarai, Aberamo ve uva ila. 18Laelave Parao Aberamo itavi mariape: “A va araro learia leipe ha? Ehovealeve a va araro au kimaeaila, are va ave uva? 19Ehovealeve a va araro kimaeape are va ave mariheari, laelave ara arero arave uva hovea laeape? A iapa! Ave uva ma! Arero elavelave lai aukive.” 20Parao areve haela uku maeaeape — ere erero paparaehakive, are i areve uva i areve eharu oaria ila, hareho.
தற்சமயம் தேர்ந்தெடுக்கப்பட்டது:
Genese 12: ORO
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published by the British and Foreign Bible Society 1963-1972