Márke 16
16
Toma a Zezú a hûl
(Mat 28:1-8; Luk 24:1-12; Zâŋ 20:1-10)
1Gelka nâm ɔʼɔ tá dáy, Marí a Makdala rá̧ Marí mâa a Ják rá̧ Salomɛ́, sé zé mára̧ yámbó, ɓay a sé fere kɔ̧ mûn a Zezú. 2Ɗambɛl nâm péna a kú ɗí ɓá: «Dimásí» a gel a típélé ka sêe kaw tɛ̧́nay, kú mbí ŋgboro ɓay a sé tûlpâl. 3Kú sa a bazeŋ a kuriri ɓá: «A gé e gé gíkra gáŋ saw gefal ka nzáʼa lɔ̂ʼɔ hí̧ nárí̧ lé?» 4Dáy, gelka kú mbí nûn a kuriri, kú kó gáŋ saw ka nzáʼa lɔ̂ʼɔ, gíkra gefal dá. 5Kú gí ri ɓil pɔ̂ny, a kú kó kaban njuku a há̧na, ka kaw ka ŋgboro a lâʼa, ka a ri gáŋ gári ɓá Pukí. Dáy wɔ́w ŋgbá kuriri. 6Kaban njuku ráy sa hí̧ kuriri ɓá: «Í ŋgú wɔ́w yá! I kaw ɛ́ Zezú a Nazarɛ́t, mɛ̌ a kú ɓara nɛ́ ka̧n tûl dii vbatay; ké toma a hûl dá, ké tí ka gelé mbaa. Í kó, gelka kú ɓá nɛ́ nárú̧y. 7Ŋgɛŋnɛ́, í sé sa hí̧ Píyɛ́r rá̧ gárá gunbɛʼɛri ɓá: “Zezú e zoko wǎyri ka Galilê. A goló pé i e gé kó nɛ́ ɓá báŋké a ké tí sa hí̧ wǎyri.”» 8Kú tɛ̧́ a lɔ̂ʼɔpâl, ka ŋgú ka wɔ́w, ka mûn tɔ́na, kú zi saɓay a há̧na mbêw hí̧ njuku yá, ɓayhí̧lé kú kaw ka wɔ́w.
Zezú tɔ́ʼɔ mûn nɛ́ hí̧ Marí a Makdala
(Mat 28:9-10; Zâŋ 20:11-18)
9Típélé dimásí ka Zezú toma ka hûl, ké tí tɔ́ʼɔ mɔ nɛ́ ɗambɛl hí̧ Marí a Makdala, a ké ní têm ɓékéri zíndɔ̂ʼɔsáy ka mûn nɛ́. 10Marí a Makdala sé saɓayké hí̧ gunbɛʼɛri, ka kaw ka lawyíra a kaw vúnay. 11Dáy gelka kú lá Marí sa ɓá: «Zezú erú ka nûn! Mi kó nɛ́!» Kú zi zibɔʼɔké hí̧ nɛ́ nyá.
Zezú tɔ́ʼɔ mûn nɛ́ hí̧ gunbɛʼɛri sére
(Mat 28:9-10; Zâŋ 20:11-18)
12Falké Zezú tɔ́ʼɔ mûn nɛ́ ɓórí hí̧ gunbɛʼɛri sére ka e ka tûl ŋgboro ɓay a sé gun pû há̧na. 13Kú regí, a gí saɓayké hí̧ gunbɔʼɔ a ǎ̧wrí̧, dáy kú zi zibɔʼɔké hí̧ kuriri yá kɔ́.
Zezú tɔ́ʼɔ mûn nɛ́ hí̧ gunbɛʼɛri bôo ka mbêw
(Mat 28:16-20; Luk 24:36-49; Zâŋ 20:19-23; Pap 1:6-8)
14A falké kpay ɓáy, Zezú tɔ́ʼɔ mûn nɛ́ hí̧ gunbɛʼɛri bôo ka mbêw, ka kaw sɔ̧́lâʼa. Ké nzáʼa ziŋ kuriri sé tûl kpúlaw a kuriri, rá̧ zibɔʼɔ ɓay yá a kuriri hí̧ njukuri ka kó nɛ́ ka nûn. 15Falké, Zezú sa hí̧ kuriri: «Í sé tísiri too, a í tɔ́ʼɔ Bélaɓay hí̧ njukuri too. 16Njuku ka e láɓulaw, ka a nyá batêm, e pɛ̧́na, dáy a njuku ka zi láɓulaw yáy, walɓay a Gáŋvbôn e ŋgbá nɛ́. 17Í kó ŋgána, ka e tɔ́ʼɔ ɓá njukuri láɓulaw: kú e ní têm ɓékéri ka rɛŋ ní, kú e sa nzáʼaɓay a ŋgɛŋkéri. 18Kú mí ŋgbá sôy ka ndɔ̂ʼɔ a kuriri, malé kú mí nzó pom, tí niŋ kuriri ɓékéhɛ̧ a há̧na mbêw yá. Kú e ɓá ndɔ̂ʼɔ kuriri kɔ̧ tûl a njuku záŋmári̧, njuku záŋmákéri e ziŋ ŋgɛ́rɛ.»
Héna a Zezú sé nûnalê
(Luk 24:50-53; Pap 1:9-11)
19A falké ka Gáŋmbây Zezú ɔrɔ saɓay nɔ́ hí̧ kuriri, Gáŋvbôn lú nɛ́ sé nûnalê sé kaw ŋgboro a lâʼa a mɛ̌. 20A gunbɛʼɛri, kú sé tɔ́ʼɔ Bélaɓay lágelri too. Gáŋmbây niŋ péna kuu kuriri, a hí̧ kuriri kpɔ́ŋa niŋ hɛ̧ a yérkéri, ɓay a tɔ́ʼɔ ɓá, tɔ́ʼɔɓay a kuriri ɓá gbátɓay.
தற்சமயம் தேர்ந்தெடுக்கப்பட்டது:
Márke 16: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
