Luk 6
6
Zezú rá̧ nâm ɔʼɔ a Juyíf
(Mat 12:1-8; Mrk 2:23-28)
1Sêe a há̧na ka ɓá sêe ɔʼɔ a Juyífri, Zezú kaw tá a ɓil wâʼa bulé, nǎŋnɔ́ gunbɛʼɛri kúŋ tûl bulé ka ɔʼɔrɔ a ɓil ndɔ̂ʼɔ a kuriri a sɔ̧́. 2Dáy Fariziyɛ̧́ a há̧narí̧ ka kóy, sa hí̧ kuriri ɓá: «Ɓayhí̧, i niŋ hɛ̧ ka sáŋna a manárí̧ de ɓá kú niŋ ka sêe ɔʼɔ lé?» 3Dáy Zezú fere a sa hí̧ kuriri ɓá: «Í zi kɛ̧́ a ɓil Mbété a Gáŋvbôn, hɛ̧ ka Davít niŋ ka sé há̧na ka nzala í nɛ́, mɛ̌ rá̧ njuku séna a mɛ̌ri̧ nyá lé? 4Ké ri ɓil vûn a Gáŋvbôn, a fa̧ biré a kú hí̧ ɓá hɛ̧púna hí̧ Gáŋvbôn, a sɔ̧́ a wal hí̧ njuku séna a mɛ̌ri̧, a tu ɓá, ka ŋgboro a sáŋna a manárí̧ lé, kú zi ma sɔ̧́náké yá, ɓá njuku nzáʼaká̧nari̧ mbɛ́ŋ, pé ma sɔ̧́náké.» 5Zezú resa hí̧ kuriri ɓáy ɓá: «Gun a njuku, kaw ɓá gáŋnjuku a nâm ɔʼɔ.»
Zezú ŋgɛ́rɛ njuku ndɔ̂ʼɔ a hûlké
(Mat 12:9-14; Mrk 3:1-6)
6Sêe ɔʼɔ a féké ɓáy, Zezú ri vûn gɔ́ŋ Gáŋvbôn a kaw tɔ́ʼɔhɛ̧, dáy njuku a há̧na ka ndɔ̂ʼɛ a lâʼa huhúy, e ka gelké. 7Njuku tɔ́ʼɔ sáŋnari̧ rá̧ Fariziyɛ̧́ri̧ kaw ka ɓɛʼɛ nɛ́ ɓay kú kó há̧na Zezú e ŋgɛ́rɛ njuku záŋmá nɔ́ a sêe ɔʼɔ lé. Ɓayhí̧lé, kú kaw ɛ́ ŋgboro ɓay ɓá ɓay ŋgbá nɛ́. 8Dáy Zezú tu kɛrɛ a kuriri too, a sa hí̧ njuku ndɔ̂ʼɔ hûlké ɓá: «Mɔ́ uru! A mɔ gí ew gelé a mbɛl a njukuri too!» Dáy ké uru a gí ew mbɛl a njukuri. 9Zezú sa hí̧ njuku tɔ́ʼɔ sáŋnari̧ rá̧ Fariziyɛ̧́ri̧: «Mi vbí wǎyri hɛ̧ mbêw: Sêe ɔʼɔ, a̧hí̧ sáŋna a manárí̧ tɔ́ʼɔ ɓá ná niŋ lé? Niŋ béla malé niŋ ɓéké lé? Pɛ̧́ ndísɛ̌ʼɛ a njuku malé í nɛ́ lé?» 10Zezú ɛ̧rɛ̧ kuriri mbêw mbêw too, falké ké sa hí̧ njuku ráy ɓá: «Mɔ́ ndara ndɔ̂ʼɔ!» Dáy ké ndara ndɔ̂ʼɛ, lé ndɔ̂ʼɛ ŋgɛ́rɛ!
11Dáy njuku tɔ́ʼɔ sáŋnari̧ rá̧ Fariziyɛ̧́ri̧ mbá ka hɛ́rɛ, a tí mɔny ɓay a bazeŋ a kuriri, ɓay a tu hɛ̧ a kú e niŋáké ziŋ Zezú.
Zezú ten apotereri bôo a sére
(Mat 10:1-4; Mrk 3:13-19)
12Sêe a há̧na, Zezú he sé tûl kon, sé gɔ́ŋ Gáŋvbôn dáy, a gé gɔ́ŋ Gáŋvbôn sû̧ŋ sû̧ŋ. 13Gelka gel táŋ dáy, ké ɗí gunbɛʼɛri a ten a bazeŋ kuriri njukuri bôo a sére, a ɗí kuriri ɓá apotere. 14Dáy rɛŋ a kuriri ɓá: Simɔŋ a kú zi rɛŋɛ́ ɓá Píyɛ́r kɔ́y, Anderé nyîn nɛ́, Ják rá̧ Zâŋ, Filíp kuu Bartelemí, 15Matiye rá̧ Toma, Ják gun a Alfé rá̧ Simɔŋ a kú ɗí ɓá Zélot#6:15 Zélot zi ɓay a sa ɓá gun pû malé gun tísiriké., 16Jude gun a Ják rá̧ Judas Ɛskariyót, njuku ka e zé Zezú.
Zezú tɔ́ʼɔhɛ̧ a ŋgɛ́rɛ njuku záŋmári̧
(Mat 4:23-25)
17Zezú ɗere ka tûl kon kuu apotere a mɛ̌ri̧ gí ew ɓil mbuku, gel ka gunbɛʼɛri ɓá ŋgɛ̧́náké erúy. A gelké nɔ́, njukuri ɓá ŋgɛ̧́náké erú kɔ́, njukuri, a gí ka tísiri a Judé, Zerúzalɛ̂m, rá̧ ɓil gáŋ pûri ka e a gbaŋ mbii a Tîr rá̧ Sidɔ̂ŋ, 18kú gí ɓay a lá tɔ́ʼɔɓay a Zezú, a zi ɓá Zezú ké ŋgɛ́rɛ záŋmá a kuriri kɔ́. Dáy njukuri too ka têm ɓéké kaw dɔʼɔlɔ kuriri ziŋ ŋgɛ́rɛ. 19Njuku too ɛ́ ŋgboro ɗá nɛ́, ɓayhí̧lé kpɔ́ŋa a há̧na kaw tɛ̧́ ka mûn nɛ́ a ŋgɛ́rɛ njukuri.
Béla káwa rá̧ tɔ́ʼɔsêe
(Mat 5:1-12)
20A falké, Zezú ɛ̧rɛ̧ gunbɛʼɛri a sa:
«Béla a Gáŋvbôn ké hí̧ wǎyri, wǎyri njuku fóyári,
ɓayhí̧lé Pû Mbây a Gáŋvbôn ɓá ɓala a wǎyri!»
21Béla a Gáŋvbôn ké hí̧ wǎyri, wǎyri ka e a ɓil nzala a ŋgɛŋnɛ́y,
ɓayhí̧lé i e ziŋ hɛ̧lâʼari ɓá ŋgɛ̧́náké!
Béla a Gáŋvbôn ké hí̧ wǎyri, wǎyri ka e a ɓil vúna a ŋgɛŋnɛ́y,
ɓayhí̧lé i e a ɓil sáʼa!
22«Béla a Gáŋvbôn ké hí̧ wǎyri, wǎyri ka njukuri fɔny wǎyri, ka a sáŋ wǎyri, ka a fára wǎyri, a saɓay belyáké sé tûl a wǎyri, ɓay ka i láɓulaw hí̧ Gun a njukuy.
23Dáy, í záymûn a wǎyri ka sêe ka hɛ̧ké e niŋáy, a í rí mûn a wǎyri, ɓayhí̧lé kpáʼandɔ̂ʼɔ péna a wǎyri e hɔ̧́ mambá a nûnalê. Ɓayhí̧lé ɓá nǎŋnɔ́ pé zîi a kuriri ɓá porofɛ́tri tɔ́ʼɔsêe.
24Lelêe hí̧ wǎyri njuku hɛ̧zíŋári̧,
ɓayhí̧lé, i ziŋ béla a wǎyri dá!
25Lelêe hí̧ wǎyri, njukuri ka erú ka hɛ̧ri̧ ɓá ŋgɛ̧́náké a ŋgɛŋnɛ́y,
ɓayhí̧lé nzala e ŋgbá wǎyri!
Lelêe hí̧ wǎyri, wǎyri ka e a ɓil sáʼa a ŋgɛŋnɛ́y,
ɓayhí̧lé, i e a ɓil tɔ́ʼɔsêe rá̧ vúna!
26Lelêe hí̧ wǎyri, ka njukuri too mí saɓay a wǎyri ɓá béláké,
ɓayhí̧lé nǎŋnɔ́ pé zîi a kuriri niŋ hí̧ porofɛ́t a manyákéri!»
Tɔ́ʼɔ zína hí̧ njuku ŋgá̧nari̧
(Mat 5:38-48; 7:12a)
27«Dáy, mi sa hí̧ wǎyri, wǎyri ka kaw lá mí, ɓá í zi njuku ŋgá̧na a wǎyri, a í niŋ béla hí̧ njukuri ka fɔny wǎyri. 28Í ɗí ɓay a béláké kɔ̧ tûl a njukuri ka kaw ɗí ɓéké ɓay kɔ̧ tûl a wǎyri, a í gɔ́ŋ Gáŋvbôn kɔ̧ tûl a njukuri ka kaw ɓál rɛŋ a wǎyri. 29Njuku mí vbá̧ ɓil nûn nɔ́ a ŋgboro a mbêw lé, mɔ́ pɔŋ ké vbá̧ ɓil nûn nɔ́ a ŋgboro a ǎ̧w kɔ́. A njuku mí zi ɓay naʼa gáŋ laa a mɔ̌ lé, mɔ́ pɔŋ nɛ́ ké naʼa gárí a mɔ̌ kɔ́. 30Mɔ́ hí̧ njuku too, ka gɔ́ŋ mɔ́ hɛ̧, a njuku mí mbí hɛ̧ a mɔ̌ ka ŋgɛ́rɛ lé, mɔ́ vbí nɛ́ nyá. 31Hɛ̧ ka i zi ɓá njukuri kú niŋ hí̧ wǎyri, wǎyri kɔ́, í niŋ ɓá báŋké nɔ́ hí̧ kuriri. 32Dáy, wǎyri mí zi ɓá njukuri ka zi wǎyriy, ɓayhí̧ í zoko ɓá kú zi awá hí̧ wǎyri mbɛ́ŋ lé? Nǎŋnɔ́ kɔ́ ɓéké njukuri, zi ɓá njukuri ka zi kuririy! 33Nǎŋnɔ́ kɔ́, wǎyri mí niŋ béla hí̧ ɓá njukuri ka niŋ béla hí̧ wǎyriy, ɓayhí̧ rá̧ í zoko, ɓá kú zi awá hí̧ wǎyri mbɛ́ŋ lé? Ɓéké njukuri kɔ́ niŋ ɓá báŋké nɔ́! 34Dáy wǎyri mi hí̧ túna lari, hí̧ ɓá njukuri ka i tuy, ɓay kú ma rerú hí̧ wǎyri ɓá báŋké nɔ́y, ɓayhí̧rá̧, i zoko ɓá kú zi awá hí̧ wǎyri mbɛ́ŋ lé? Ɓá báŋké nɔ́, njuku ɓékéhɛ̧ri̧, hí̧ túna lari hí̧ njuku ɓékéhɛ̧ri̧ ɓá báŋa kuriri kɔ́, a kaw zoko, ɓá kú rerú hí̧ kuriri, ɓá báŋké nɔ́ kɔ́! 35Hɛ̧ ka belɓá í niŋ, ɓá í zi njuku ŋgá̧na a wǎyri, a í niŋ béla hí̧ kuriri. Í hí̧ túna lari hí̧ njukuri too, táŋ zoko ɓá kú rerú hí̧ wǎyri. Wǎyri mí niŋ nǎŋnɔ́, i e ziŋ kpáʼandɔ̂ʼɔ péna a wǎyri ɓá ŋgɛ̧́náké a gel a Gáŋvbôn, nǎŋnɔ́ kɔ́, i e kaw ɓá gun a Gáŋvbôn a nûnalê. Ɓayhí̧lé, ké kaw ɓá Gáŋvbôn ka niŋ béla hí̧ njukuri ka zi tu béla yáy rá̧ njuku a ŋgbɔ́rɔkéri kɔ́. 36Dáy, í mbá ka béla law ɓá báŋké ka Bâa a wǎyri kɔ́, mbá ka bélalaw.»
Walɓay kɔ̧ tûl a mbɔ́ŋnɔ́ nyá
(Mat 7:1-5)
37«Í walɓay kɔ̧ tûl a mbáŋa a wǎyri yá, ɓá Gáŋvbôn, ké tí ná walɓay kɔ̧ tûl a wǎyri kɔ́. Í ɓá ɓay ŋgbá mbáŋa a wǎyri yá, ɓá Gáŋvbôn, ké tí ná ɓá ɓay ŋgbá wǎyri kɔ́. Í vbá̧buma hí̧ njukuri, a Gáŋvbôn ké vbá̧buma hí̧ wǎyri kɔ́. 38Í hí̧ndɔ̂ʼɔ hí̧ njukuri, a Gáŋvbôn ké hí̧ndɔ̂ʼɔ hí̧ wǎyri kɔ́. Kú e fere hɛ̧hí̧na a wǎyri kɔ̧ ɓil ŋguu a wǎyri, ŋguuké e mbána, kú e mbaʼaké, ka sɔ̧ŋɔ̧, ké e rembá a kɔ̧ kpâa! Ɓayhí̧lé, Gáŋvbôn e lé hɛ̧ hí̧ wǎyri ka hɛ̧ lé hɛ̧ a mbêwké nɔ́, ka i lé ɓála njukuri rúy!»
39Zezú, resa galaɓay hí̧ kuriri ɓá: «Râ̧w ma kɔʼɔ kaw a mbɛ́ŋnɛ́ râ̧w lé? Kú tí lé sére too kɔ̧ ɓil lɔ̂ʼɔ a mbêwké yá lé? 40Ké sa ɓáy ɓá: Gun mbɛl péna, zi ndé bákáwa a mɛ̌ ka tu péna nyá, dáy gun mbɛl péna too, a mbɛl péna ɓá béláké, e niŋ péna ɓá báŋa bákáwa a mɛ̌. 41Ɓayhí̧rá̧, mɔ́ kó ɓá râw kpâa a nûn a nyîn nɔ́, dáy a zi kó ŋgburu dii a nûn nɔ́ nyáy lé? 42Ná a̧ní rá̧ mɔ́ e sa hí̧ nyîn nɔ́ ɓá: Nyîn ní, mɔ́ pɔŋ mi ten râw a nûn nɔ́? A zi kó ŋgburu dii a nûn nɔ́ nyáy lé? Njuku foo, mɔ́ tí ten ŋgburu dii a nûn nɔ́ rá̧, a mɔ́ kó gel ɓá táŋáké ɓay a ten râw kpâa a nûn a nyîn nɔ́!»
Dii rá̧ lénáké
(Mat 7:16-20; 12:33-35)
43Zezú resa ɓáy ɓá: «Dii a béláké, zi ma hí̧ léna a belyáké yá, malé, dii ka ɓá ɓéké dii, ma hí̧ léna a béláké yá. 44Kú tu dii a bélákéri ka léna kuriri. Kú zi ma ɗɔ́rɔ́ léna njɔ̧̂ny ka tûl dii ŋgátúru yá, ɓá báŋké nɔ́, kú tí ɗɔ́rɔ́ léna duní ka tûl dii mbaʼaw yá. 45I tu ɓá njuku a béláké ten béla hɛ̧ a mɛ̌ ka mbá a ɓil lawɛ́. Ka ɓéké njuku ten ɓéké hɛ̧ a mɛ̌ ka mbá a ɓil ɓéké lawɛ́. Ɓayhí̧lé ɓá hɛ̧ri̧ ka mbá law a njuku, pé tɛ̧́ a nzɛ́ʼɛ.»
Vûnri̧ sére
(Mat 7:24-27)
46Zezú saɓay ɓá: «Ɓayhí̧ i kaw ɗí mi Gáŋmbây, Gáŋmbây, a zi niŋ hɛ̧ ka mi sa hí̧ wǎyri yáy lé? 47Mi e tɔ́ʼɔ hí̧ wǎyri njuku ka gí gel ní, ka a láɓay a mǐ, ka a ŋgbá ɓayké, ka a niŋ pénákéy: 48Ké ɛ́ŋ njuku ka zi ɓay a zá vûn a mɛ̌, ka a tí ɗáŋ lɔ̂ʼɔ ndálvûnké ɓá ɗínáké, ka̧ tûl lárá, dáy a laɓa ndálvûn a mɛ̌. Gáŋ mbɔ̂m tɔ́, mbii kporo mbá a gí zaʼa vûnké, dáy zi laŋ nyá, ɓayhí̧lé kú mbó vûnké ɓá béláké. 49A njuku ka láɓay a mǐ, ka a zi niŋ pénáké yáy, ɛ́ŋ njuku a há̧na, ka zá vûn a mɛ̌, táŋ ɗáŋ lɔ̂ʼɔ ndálvûnké. Gelka mbɔ̂m tɔ́, mbii kporo mbá a gí zaʼa vûnkéy, vûnké lé a gbuʼuru too kɔ̧ siri!»
தற்சமயம் தேர்ந்தெடுக்கப்பட்டது:
Luk 6: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
