Luk 10

Nzáʼapéna a gunbɔʼɔ a Zezúri bonzíndɔ̂ʼɔsáy a sére

1Falké, Zezú ten gunbɛʼɛ a fékéri bonzíndɔ̂ʼɔsáy a sére, a pé kuriri sére sére ɗambɛlɛ, ɓá kú sé gel too rá̧ ɓil pûri too, a ké e serúy. 2Zezú sa hí̧ kuriri ɓá: Hɛ̧pay erú mambá, dáy njukupénakéri zi daw yá. I vú hí̧ njuku wâʼa, ɓay a ké pé njukupéna a fékéri ɓáy, ɓá ŋgɛ̧́náké, ɓay a mára̧ hɛ̧pay. 3Í sé, mi pé wǎyri ɓá báŋa gun mbóléri sé bazeŋ a mamûuri̧. 4Í mí kaw séna lé, í mbí ŋguu lari yá, a mbí ŋguu rá̧ sabɔʼɔ a féké yá. Í ew a ŋgboro a nam njukuri yá. 5Gelka í ka̧ ɓil vûn a sí̧ too, ka a rí rúy, í tí sa ɓá: «A vónáké ké kɔ̧ ɓil vûn nɛ́!» 6Njuku law a vónáké mí e a ɓil vûnké nɔ́y, a vónáké a wǎyriké e ɗere kɔ̧ tûlé. Dáy, mi zi tí nyáy, a vónáké a wǎyriké e regí gel a wǎyri. 7Gelka kú mí nyá wǎyri ná vûn a há̧na lé, í kaw ɔ rú, lâʼa too rá̧ hɛ̧ nzóna a kú e hí̧ wǎyri, í nyá, ɓayhí̧lé njukupéna erú ka ŋgboro ziŋ kpáʼandɔ̂ʼɔ péna a mɛ̌. Í tá ka vûnké sé vûn a féké yá. 8Gelka i gé ka̧ ɓil pû a há̧na, rá̧ njuku mí nyá wǎyri ná vûn lé, í sɔ̧́lâʼa too a kú e hí̧ wǎyri. 9Í ŋgɛ́rɛ njuku záŋmári̧ too, ka e a goló, a i sa hí̧ kuriri ɓá: «Káwa mbây a Gáŋvbôn gí ɗɛ́ŋ kuu wǎyri dá.» 10Dáy, wǎyri mí ka̧ ɓil pû a há̧na rá̧ njuku pûkéri mí zi nyá wǎyri yá lé, í sé laɓára, a í sa hí̧ njukuri too ɓá: 11«Rú haŋ sôm a siri a pû wǎyri ka kɔ̧ bɔʼɔ a ɓurú, kɔ̧ tûl a wǎyri. Dáy í tu ɓá, nâm káwa Mbây a Gáŋvbôn gí ɗɛ́ŋ kuu wǎyri dá. 12Katína, mi sa gbátɓay hí̧ wǎyri, sêe ka Gáŋvbôn e walɓay kɔ̧ tûl a njukuri, tɔ́ʼɔsêe a kuriri e ŋgɛ́rɛ ndé ɓala Sɔdɔ̂m.»

Pûri ka zi láɓulaw yáy

(Mat 11:20-24)

13«Zezú resa ɓáy hí̧ kuriri ɓá: Lelêe hí̧ wǎyri, njuku a tísiri a korazɛ̧ŋri̧ rá̧ njuku a tísiri a Bɛtsayidari. Ɓayhí̧lé hɛ̧sáʼamari̧, ka Gáŋvbôn niŋ ka pû a wǎyri, ɓá nǎŋnɔ́ pé ké niŋ ka tísiri a Tîr rá̧ Sidɔ̂ŋ lé, í̧ŋásá̧ pé kú e niŋ ɓá báŋa gel hûl, a gɔ́rɔ́ gári a kuriri, a fá̧ kpɛrɛ ŋguu a ri, a fá̧ súgú nɔ́ mûn a kuriri, a ɓá mûn a kuriri tɔ́ʼɔsêe, a fere káwa a kuriri. 14I tu ɓá táŋáké ɓá: Sêe ka Gáŋvbôn e walɓay kɔ̧ tûl a njukuri, tɔ́ʼɔsêe a wǎyri, e ndé ɓala a njuku a Tîr rá̧ njuku a Sídɔŋri̧! 15A wǎyri njuku a Kapɛrnahûmri̧, i kɛrɛ ɓá Gáŋvbôn e ɓá wǎyri he sé nûnalê lé? Bɔʼɔ mbêw yá, ké e ɗere wǎyri sé pû hûlri.» 16Zezú resa hí̧ gunbɛʼɛri ɓá: «Njuku ka lá wǎyri, e lá mí. A njuku ka sáŋ wǎyri, sáŋ mí kɔ́. Nǎŋnɔ́, njuku ka sáŋ mí, sáŋ njuku ka pé mí gíy kɔ́.»

Rená a gunbɔʼɔ a Zezúri bonzíndɔ̂ʼɔsáy a sére

17Gunbɛʼɛri bonzíndɔ̂ʼɔsáy a sére ka Zezú pé kuriri, regí a mbá ka mûnrína, a gí sa hí̧ Zezú: «Gáŋmbây, péna tá ɓá béláké, rú sé a saɓay ka rɛŋɔ́ hí̧ têm ɓékéri kɔ́, kú lá rú!» 18Zezú resa hí̧ kuriri: «Katína, mi kó Sata̧n tɛ̧́, ɓá báŋa mbɔ̂m ka vbú hâ a nûnalê, ka to gí vbú tísiri. 19Í lá, mi hí̧ wǎyri kpɔ́ŋa sé tûl a sôyri rá̧ ndɔ̂yri, a hí̧ wǎyri kpɔ́ŋa ndé ŋgɛ́rɛ a njuku ŋgá̧nari̧. Hɛ̧ há̧na mbêw, ka e niŋ ɓéké ziŋ wǎyri zi tí yá. 20Dáy, a ɓilké nɔ́ too, í zi ná ri mûn a wǎyri ɓay ka têm ɓékéri lá wǎyri, í ri mûn a wǎyri, ɓay ka Gáŋvbôn ɗé rɛŋ a wǎyri ka̧n ɓil Mbété a mɛ̌ a nûnalêy.»

Mûnrína a Zezú

(Mat 11:25-27; 13:16-17)

21A sêeké nɔ́, law a Zezú mbá ka sáʼa ka ŋgboro a Têm Pukí, dáy ké sa: «Bâa, Gáŋmbây a nûnalê rá̧ a tísiri, mi zi awá hí̧ mɔ́, ɓay ka mɔ mú hɛ̧ nɛ́rí̧ hí̧ njuku a rɔ̧́nakéri rá̧ njuku hɛ̧túnari̧, ka a ten tɔ́ʼɔ gun a léléri. Katína Bâa, mi ɗél mɔ́, ɓayhí̧lé nǎŋ pé mɔ zi ɓá hɛ̧ké ké niŋ. 22Bâa a mǐ ɓá hɛ̧ri̧ too kɔ̧ ɓil ndɔ̂ʼɔ ní. Njuku a há̧na ka tu ɓá gé ɓá Gun zi tí yá, ɓá Bâa a mɛ̌ mbêw yáŋ, malé njuku a há̧na ka tu ɓá gé ɓá Bâa, zi tí yá, ɓá Gun mbêw yáŋ, rá̧ njukuri ka Gun zi ɓay a tɔ́ʼɔ Bâa a mɛ̌ hí̧ kuriri.» 23Falké, Zezú fere a ɛ̧rɛ̧ gunbɛʼɛri, a sa hí̧ kuriri ɓá: Béla hí̧ wǎyri, ka nûn a wǎyri kó hɛ̧ri̧, ka i kaw kónáké nɛ́y! 24Ɓayhí̧lé mi sa hí̧ wǎyri, porofɛ́tri ɓá ŋgɛ̧́náké rá̧ mbâyri ɓá ŋgɛ̧́náké, zi ɓay a kó hɛ̧ ka i kaw kónáké a ŋgɛŋnɛ́ dáy, a zi ziŋ kónáké yá! Kú zi ɓay láɓay ka i kaw lánáké a ŋgɛŋnɛ́ dáy, a zi ziŋ lánáké yá.

Galaɓay a béla njuku samarí

25Njuku tɔ́ʼɔ sáŋna a há̧na mbêw, láɓay a Zezú a uru gí lélawɛ́, a vbí nɛ́ ɓá: «Gáŋnjuku, a̧hí̧ mi e niŋáké, ɓay a mí ziŋ kaw a ndísɛ̌ʼɛ dát lé?» 26Zezú lá nǎŋnɔ́ a sa hí̧ nɛ́: «A ɓil mbété a sáŋna, a̧hí̧ kú ɗé ka̧n ɓil mbétéké lé? Mɔ lá ɓilké a̧ní lé?» 27Ké refére a sa ɓá: «Mɔ́ zi Gáŋmbây, Gáŋvbôn a mɔ̌, ka law mbêw, ka têm mûn nɔ́ too, ka hɛ̧túna a mɔ̌ too, ka ŋgɛ́rɛ a mɔ̌ too, a mɔ́ zi mbɔ́ŋnɔ́ ɓá báŋa mûn nɔ́.» 28Zezú sa hí̧ nɛ́: «Mɔ rerú ɓayké bel mambá, mɔ́ niŋ ɓá báŋké nɔ́, mɔ e ziŋ ndísɛ̌ʼɛ dát.» 29Dáy, njuku ráy zi ɓay tɔ́ʼɔ ɓá ké kaw ɓá njuku a ndáráké dáy, a revbí Zezú ɓá: «A gé ɓá mbáŋ ní lé?» 30Zezú rerú ka galaɓay hí̧ nɛ́ ɓá: «Njuku a há̧na uru ka Zerúzalɛ̂m, a kaw ɗere sé Jeriko, lé ɓéké njukuri gé ŋgbá nɛ́ ka ŋgboro, ka naʼa hɛ̧ mɛ̌ri̧ too, ka vbá̧ nɛ́ zi nzáʼa hûl, a pɔŋ nɛ́, a kú kála. 31Njuku nzáʼaká̧na a há̧na mbí ŋgboroké nɔ́, a gí kó njuku ráy, ka ná tísiri, ka gí ɛrɛ tá ŋgboro mbêw a kála. 32Falké, njuku sɛl î̧n a Leví a há̧na, gí a gí kó njuku ráy ka náy, a gí ɛrɛ tá ŋgboro mbêw a kála, ɓá báŋa njuku a mbɛlké 33Dáy, Njuku samarí a há̧na, uru kaw sé gɔ́rɔ́, a gí ka̧ gel ráy ka njuku ráy nárú̧, gelka ké gí kó njuku ráy, ké kó sehaŋ hí̧ nɛ́. 34Ké ta̧m gí gbɛ́ŋɛ́, a mbí mára̧ rá̧ vôn#10:34 Mára̧ vo nûn nɔʼɔ malé vôn í kay a nûn nɔʼɔ. ka fere kɔ̧ nɔʼɔ, a turu nûn nɔʼɔ ráy, a gí ku nɔʼɔké, a mbí nɛ́ ka̧n tûl máhóla a ké gírúy, a ɓá nɛ́ sé ka̧n vûn nâm a gɔ́rɔ́ri, a gé ná kuu mɛ̌ táŋ pélé. 35Ka gel gí táŋ dáy, ké fá̧ mínya sére, a gí hí̧ njuku vûn nâm a gɔ́rɔ́ri, a sa hí̧ nɛ́ ɓá: Mɔ́ nyá a mɔ́ ɛ̧rɛ̧ njuku nɛ́rú̧, hɛ̧ too ka mɔ e ɓew sé tûléy, mi e regí pú mɔ́ too.» 36A fal saɓay nɔ́, Zezú revbí nɛ́ ɓá: «A gé a kɛrɛ a mɔ̌, a ɓil a njuku a nɔ́rí̧ sáy, ɓá mbáŋa a njuku nɔ́ lé?» 37Njuku tɔ́ʼɔ sáŋna rá̧y sa: «Ɓá njuku nɔ́, ka kó nɛ́ sehaŋ.» Dáy, Zezú sa hí̧ nɛ́: «Mɔ́ sé, a mɔ́ niŋ ɓá báŋké nɔ́.»

Zezú sé gel a Márta rá̧ Marí

38Zezú kuu gunbɛʼɛri uru kaw kála, a gé ka̧ pû a há̧na dáy, wûny a há̧na, a kú ɗí nɛ́ ɓá Márta, gé nyá kuriri sé gé lé. 39Márta erú ka nyîn nɛ́, ka rɛŋɛ́ ɓá Marí, ké gí kaw gbaŋa Zezú, a kaw lá tɔ́ʼɔɓay a mɛ̌. 40Márta kaw dɔʼɔlɔ mûn nɛ́, ɓay kara hɛ̧lâʼa hí̧ Zezú, a uru gí sa hí̧ Zezú: «Gáŋmbây, zi dɔʼɔlɔ mɔ́ nyá, ɓay a mɔ́ kó Marí, ké pɔŋ mí hɛʼɛ ní niŋ péna nɛ́ nyá lé? Mɔ́ sa hí̧ nɛ́, ké gí niŋ péna ziŋ mí.» 41Gáŋmbây fere a sa hí̧ nɛ́: «Márta, Márta, lawɔ́ ɛ́ ɓay, mɔ́ ɓá mûn nɔ́ tɔ́ʼɔsêe mambá. 42Dáy hɛ̧ mbêw pé ɓá gáŋ hɛ̧, Marí mbí béla hɛ̧ ka erú ka nɛ́rɛ̧, ka njuku a há̧na, zi ma naʼaké yáy.»

தற்சமயம் தேர்ந்தெடுக்கப்பட்டது:

Luk 10: pnz

சிறப்புக்கூறு

பகிர்

நகல்