Péna a Apotereri 8
8
1Sôl zibɔʼɔ hûl a Etíyɛ́n.
Sôl ɓá gun láɓulawri tɔ́ʼɔsêe
Dáy sêeké nɔ́, tɔ́ʼɔsêe tí ziŋ njuku láɓulawri ka e a Zerúzalɛ̂m ɓá ŋgɛ̧́náké. Njuku láɓulawri too ɓɛrɛ mbêw mbêw lá gélri too a ɓil kaw a Judé rá̧ Samarí, a pɔŋ ɓá apotereri a Zerúzalɛ̂m. 2Njukuri ka e ka wɔ́w a Gáŋvbôn gí mbí hûl a Etíyɛ́n, a sé gɔ́rɔ́, dáy a kú vú hûl a mɛ̌. 3Sôl a mɛ̌, ké ɛ́ ŋgboro gbɛʼɛrɛ Egilize, a sé ka nzáʼa vûnri̧ mbêw mbêw too, a ten njuku láɓulawri, wûnynjukuri rá̧ wɔ̧rɔ̧́njukuri, a ŋgbá kuriri sé kɔ̧ vûn sɛl.
Filíp tɔ́ʼɔ Bélaɓay a Kiris a ɓil kaw a Samarí
4Njukuri ka ŋgúy sé ma pûri too, a tɔ́ʼɔ Bélaɓay a Kiris hí̧ njukuri. 5Filíp, uru a sé ɓil pû a Samarí, a tɔ́ʼɔɓay a Kiris hí̧ njukuri. 6Njuku pûri too kaw ták, a kaw láɓay ka Filíp tɔ́ʼɔy, a kó hɛ̧sáʼamari̧ ɓórí ɓórí a ké niŋ. 7Ɓayhí̧lé têm ɓékéri ɓá ŋgɛ̧́náké tɛ̧́ ka mûn a njukuri a vbá̧nzáʼa. Njuku kpɛrɛri rá̧ njuku bɔʼɔ belyári kɔ́, ɓá ŋgɛ̧́náké ziŋ ŋgɛ́rɛ. 8Nǎŋnɔ́, ná ɓá gáŋ mûnrína a ɓil pûké.
9Njuku a há̧na tí e a ɓil pûké nɔ́, rɛŋɛ́ ɓá Simɔŋ, ka mbí mûn nɛ́ ɓá njuku a sukí, a kaw niŋ hɛ̧sáʼamari̧ ɗiɓaŋ dá, a ɓá njuku a Samaríri kaw yér. 10Nǎŋnɔ́, njukuri too, tí ka tûl a gun a léléri sé ka̧ tûl a gáŋnjukuri too géké súkú a kuriri, a kaw lá nɛ́, a sa ɓá: «Njuku nɛ́ kaw ɓá kpɔ́ŋa a Gáŋvbôn, a kú ɗí ɓá “Gáŋ kpɔ́ŋa.”» 11Kú lá nɛ́ a law mbêw, ɓayhí̧lé ɗiɓaŋ dá, a ké ɓá njukuri kaw yér ka tûl niŋ hɛ̧sáʼama a mɛ̌ri̧y. 12Dáy, ŋgɛŋnɛ́ a kú láɓulaw sé tûl Bélaɓay ka Filíp tɔ́ʼɔ sé tûl ɓay ka kó Pû a Gáŋvbôn, rá̧ ɓay ka kó Zezú Kiris, wɔ̧rɔ̧́njukuri kuu wûnynjukuri ziŋ nyá batêm. 13Simɔŋ ka mûn nɛ́ kɔ́ láɓulaw a nyá batêm, ké zi pɔŋ Filíp mbaa a kaw yér sé tûl gáŋ hɛ̧sáʼamari̧ ɓá ŋgɛ̧́náké ka Filíp kaw niŋáké.
14Dáy, apotereri ka e a Zerúzalɛ̂m, lá ɓá njuku Samaríri nyá ɓay a Gáŋvbôn, dáy a pé Píyɛ́r rá̧ Zâŋ sé. 15Gelka, Píyɛ́r rá̧ Zâŋ gé ka̧ Samarí, kú gé gɔ́ŋ Gáŋvbôn ɓay a njuku láɓulawri, rá̧ kú ma ziŋ Têm Pukí. 16Ɓayhí̧lé, Têm Pukí zi ɗere kɔ́ tûl a njuku mbêw a bazeŋ a kuriri yá ɓáy, ɔ ɓá nyá batêm, a kú nyá ka rɛŋ a Gáŋmbây Zezú. 17Dáy, Píyɛ́r rá̧ Zâŋ ɓá ndɔ̂ʼɔ kɔ̧ tûl a kuriri, nǎŋnɔ́, pé kú ziŋ Têm Pukí.
18Gelka Simɔŋ kó njuku láɓulawri ziŋ Têm Pukí, ka ŋgboro a ɓá ndɔ̂ʼɔ a apotereri kɔ̧ tûl a kuriri, ké zi ɓay a ké hí̧ lari hí̧ Píyɛ́r rá̧ Zâŋ, 19a sa ɓá: «I hí̧ mí kpɔ́ŋáké nɔ́ kɔ́, ɓay a mǐ kɔ́, mi ɓá ndɔ̂ʼɔ kɔ̧ tûl a njuku lé, ké ziŋ Têm Pukí kɔ́.» 20Dáy, Píyɛ́r resa hí̧ nɛ́: «Gáŋvbôn, ké tɛwrɛ mɔ́ ka lari a mɔ̌ too, ɓay ka mɔ kɛrɛ ɓá hɛ̧hí̧na a Gáŋvbôn, kú ma zé ka lari! 21Mɔ zi tí ka hɛ̧ há̧na malé ŋgboro a há̧na a ɓil pénáké yá, ɓayhí̧lé, lawɔ́ zi ná ɓá táŋáké a mbɛl a Gáŋvbôn nyá. 22Mɔ́ fere lawɔ́, a mɔ́ gɔ́ŋ Gáŋvbôn, ka ŋgboro mí erú lé, ké vbá̧buma ɓéké kɛrɛ a mɔ̌. 23Ɓayhí̧lé, mi kó ɓá, mɔ mbá ka ɓéké kɛrɛ ka lawɔ́, a kaw ɓá koy a ɓéké!» 24Nǎŋnɔ́ Simɔŋ, zi nzáʼa a Píyɛ́r kuu Zâŋ a sa: «Í gɔ́ŋ Gáŋvbôn ka mûn a wǎyri hí̧ mí, ɓay a hɛ̧ nɔ́rí̧ ka i sáy, ké ná ziŋ mí.» 25Fal saɓay a hɛ̧ a kú kó, ka a láy sé tûl a Zezúy, kú tɔ́ʼɔɓay a Gáŋmbây. Nǎŋnɔ́ Píyɛ́r kuu Zâŋ rekála sé Zerúzalɛ̂m. A kú kaw rénay, kú tɔ́ʼɔ Bélaɓay lá ɓil pûri a ɓil kaw a Samaríri ɓá ŋgɛ̧́náké.
Filíp ziŋ njukupéna a Etíyopí a há̧na
26Aŋnze a Gáŋmbây sa hí̧ Filíp: «Mɔ́ uru sé ŋgboro a Zabaw, ka tûl ŋgboro ka uru a Zerúzalɛ̂m sé Gazá. (Ŋgboroké nɔ́, njukuri pɔŋ serú dá.») 27Filíp uru a núnmbɛ̧́nɛ́ nɔ́, a sé, a gé ziŋ njuku a há̧na, ɓá gáŋnjuku péna a tísiri a Etíyopí#8:27 Gáŋnjuku péna Etíyopí nɔ́, kú sa kɔ́ ɓá ké kaw ɓá njuku ka ma mbuŋ gun nyáy, ɓayhí̧lé inik a kú ɗíy, zi ɓay a sa ɓá, njuku a kú ten vbaray., mɛ̌, pé ɓá njuku koro lari a Kaŋdás, mbây wûnynjuku ka tísiri a Etíyopí. Ké gí Zerúzalɛ̂m gí hɔ̧́ Gáŋvbôn, 28a kaw rekála sé gé lé. Ké he kaw ɓil hotó dôn, a kaw kɛ̧́ mbété a porofɛ́t Ezayí. 29Têm Pukí sa hí̧ Filíp: «Mɔ́ ta̧m sé gbɛ́ŋɛ́, a ɓil hotó a mɛ̌!» 30Filíp sé ka ŋgúna, ka lá njuku Etíyopí ráy kaw kɛ̧́ mbété a porofɛ́t Ezayí, dáy a vbí nɛ́: «Mɔ lá ɓil ɓay nɔ́ a mɔ kaw kɛ̧́náké lé?»
31Njuku ráy sa hí̧ nɛ́: «A ŋgboro a sí̧, rá̧ mi e lá ɓilké ka njuku mí zi ten táŋáké hí̧ mí nyáy lé?» Dáy a vbí Filíp, ɓá ké he ɓil hotó dôn gí kaw gbɛ́ŋɛ́. 32Ké kaw kɛ̧́ ɓil mbété a Ezayí ka sa ɓá:
«Ké ɛ́ŋ mbólé a kú kɔʼɔ ɓay a sé vbénáké,
ɛ́ŋ ɓá gun mbólé, ka kaw ták a kú kaw kúŋ tâny mûn nɛ́.
Ké zi saɓay mbêw yá.
33Kú yáw nɛ́, njuku walɓay ɓá ndáráké hí̧ nɛ́ zi tí yá.
Njuku saɓay a gun ɓiléri zi tí yá.
Ɓayhí̧lé kú lú ndísɛ̌ʼɛ a mɛ̌ ka tísiri dá.»
34Nǎŋnɔ́, njuku Etíyopí ráy vbí Filíp: «Mɔ́ sa hí̧ mí, ɓay a gé rá̧ porofɛ́t Ezayí kaw sanáké lé? Ɓá ɓay a mɛ̌ malé ɓay a njuku a féké lé?» 35Dáy, Filíp mbí ɓay, a tí a ɓil mbété a Ezayí nɔ́, pé a tí sa Bélaɓay ka kó Zezú hí̧ nɛ́. 36A kú kaw séséna, a gé ka̧ gel a há̧na, kú gé ziŋ mbii. Dáy njuku Etíyopí ráy sa hí̧ Filíp: «Mbii ka ná nyáy, a̧hí̧ de mɔ, ɓá mɔ́ ɓá mí nyá batêm lé?» [37Filíp, sa hí̧ nɛ́: «Mɔ̌ mí láɓulaw a lawɔ́ tooy, ŋgboro erú, ɓay a ɓá mɔ́ nyá batêm.» Njuku Etíyopí ráy sa hí̧ Filíp: «Mi láɓulaw ɓá Zezú Kiris ɓá Gun a Gáŋvbôn.»] 38Falké, kú ew, a ɗere a ɓil hotó dôn a kuriri sé ɓil mbii. Dáy Filíp gé ɓá nɛ́ nyá batêm. 39Gelka kú tɛ̧́ a ɓil mbii, Têm a Gáŋmbây mbí Filíp. Njuku Etíyopí zi kó nɛ́ mbaa, dáy, a mbí ŋgboro a mɛ̌, ka lawrína. 40Filíp rekó mûn nɛ́ ɓá a Azót. Falké, ké sé pû ka pû mbêw mbêw too, a tɔ́ʼɔ Bélaɓay a Zezú ka̧ nâm a ké ka̧ Sezaré.
தற்சமயம் தேர்ந்தெடுக்கப்பட்டது:
Péna a Apotereri 8: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
