Luqaase 17
17
Dhumo maaqe e worgusuwa gisha
Mat 18:6-7,21-22; Mrq 9:42
1Yesuusay be erusichoshituse <<Axituse dhumo maaddhi cubbowa gelse zeerey yoodo badi attuwasso. Ye dhumo oone axe esa baduffu! 2Ha giddhitaafa bidzo dhumusekofa fetto woxha be onta gara tutti bagadiya e dafuttakoko e bishaane. 3Hinuni hinumba kakkuwayte. Neyndo na'i nemba miidha'ayko gayluwa! Be cubbo dhaddi e maaqo'ayko <Attuwaye> hidi hiwwa. 4Bidzi wonta laappi wogga nemba miidha laappi wogga neeko yoodi <Neese baysiko ta yese> hidi hitta e hidako <Attuwaye> hidi hiwwa!>> hidi e hido.
Maraxuse ohuttase
5Anxuttaasitini Yesuusa <<Odde, ha esume garsi nu aadexoronike mahuwa>> hidi uydo. 6Laaxi Yesuusani <<Hade saamo aafe gede laaqi aadexoy hinuse yessako ha mixi malla <Hayafa shodutti handi bagadiya tofuttuwa!> hidi hiidako hinuse woosuttoko e woosutte>> hidi e hido.
7Sekkeni Yesuusay <<Hinuka woota wootesani maaqqe keemo yeenge maala keengesi yessako be feyssho godofa e yoosune yenniyawo <Yoonase utti kaxa muuwa!> yeydi hinesi oonena? 8Fetto e hinesi <Qamete taase kaxuwa! Ta miyoro ta ushoro makko hanta maa'o maadhi taase worguse abako hantuwa. Ye e geedeko neese assi ne muune> yeydi maaquwaye e hinesi? 9Ye be maala be woosso e hanto gisha galataa e galate? 10Ye esukewo hinunini hi woosuttosa uddi hi hanto geede <Nuuse aba galatani e worguse? Nu hantosini nu garafa worguttasewoko> yeydi hiwwayte>> hidi e hido.
Kom'e hargiyafa loolla tammi gerita
11Yesuusay Yerusaleeme hangisine Galilasaara Samariyasaara u feeqaanna e garicha. 12Bidzi katamaa handi e ello. Yaha tammi geriti kom'e hargaxiti yoodi zara eedhi 13<<Laaxo, Yesuusa! Odde, nuuse higiluwa!>> hidi be kato keddaysi u uydo. 14Yesuusani usuko beedi <<Hanguwayte, hi gara Wonto zawa kahinita beysuwayte!>> hidi e hido. Usini hangisine ogiya be kom'e hargiyafa loolli u geejjho.
15Bidzi usaafa be loollosa be beedo geede orje katona Wonto kedda keddaysisine ogiyafa hanke Yesuusako e maaddho. 16Esini galatisine be deemona e toke gara e undo. Ye axini Samaraxuko e maaqicha.
17Yesuusani <<Kom'e hargiyafa loolli geejhashiti tamme maaquwadiya u yecha? Hinne odduppi ay yese? 18Wonto galatese hanke maaddhi yoodasi ha naabha axewo baaka feday ay e yese?>> yeydi e hido. 19Ye axuseni <<Tamba gobbe ne matosuna loolliko ne yese. Yoonase dendi ne zawa dhaddi hanguwa>> yeydi e hido.
Wonto kaatetoy yoone gisha
Mat 24:23-28,37-41
20Farasaxiti Yesuusa <<Wonto kaatetoy aydena yoone?>> hidi u oycco. Yesuusani <<Wonto kaateto yoowey bidzi abako beedi <Hay yoodosso> hidi hiyoronike maaquwasso. 21Wonto kaatetey hay hi giddaaka e yese gisha <Hayako e yese> oo'oyne <Seyako e yese> yeydi hiinesa maaquwasso>> yeydi e hido. 22Sekkeni be erusichoshituko <<Tani axi yeley kaate woggaafa bidzi wonta beyese fetto hi col'oro woggako yoonesa, maaqe baa bewaytako. 23Axiti hinumba <Kristosay hay hayako yese> feday <Sey seyako e yese> hidiko u hine. Usaara handofita u geede woxxhofita. 24Zeelunxi zeelungisine ha saha wosula aallo uddina zeelundi e bentenikeko tani axi yeley yoone wontey yeydiwo e maaqe. 25Burussi laga maddhay taa axi yele gara yoonesaara ha bera yese axiti taa u inxha'esaaray attuwasako.
26Hade Nohe beraa be maaddhechonike yeydiwo tani axi yeley yoone berani maaqoko e maaqe. 27Nohey markabiya gello wonte aallo axi miya ushiya efiya geliya u yecha. Bayso waaxi yoodi u uddina fitti e bayso.
28Yeydiwo Looxhe beraa be maaddhonikeko e maaqe. Ye woggaakani axiti miya ushiya zal'iya woomiya tofiya keexhiya u yecha. 29Yeydi yesesa u maaddhakoni Looxhey Sodome katamaafa kesso wonte tamaara tama shuchaaray afaafa butti u uddinawo e bayso.
30Tani axi yeley yoodi bente wonte yeydiko e maaqe. 31Ye wonte shuchi zawase e qinowa yese godowa yese axi be zawaa yese abako efese hodhi zawa gelloffe! Yeydiwo wootaa yese axi be zawa maaddhi yoodoppe. 32Looxhe macho gaxhuwayte! 33Be lubbo maarese worgesi ooneni baysako e bayse. Be lubbo garsi ingesi be lubbo kafako e kakke. 34Hinuse ohoko ta ohe, ye qamaa lam'i axi bidzi godo wolko u gehe, bidzi e efutte, lakkoy yaha e atte. 35Lam'i indowaxhi wolko bidzi godo u gaace. Bidzi efutte, lakkoy yaha i atte. [ 36Lam'i axiti wolko wootaa u yesune bidzi efutte lakkoy yaha e atte]>> yeydi e hido. 37E erusichoshiti <<Laaxo, etti ay u aange#17:37 etti ay u aange hidi haya diizuttasi Grike fissharowa <<Aya?>> yeydiko e hine. <<Ha esi ay e maaqe?>> yeydini birchuttesuko e danda'e. ?>> hidi u oycco. Esini <<Ayani ahay yese godoko al'aantey bhikkilutte>> hidi e mato.
தற்சமயம் தேர்ந்தெடுக்கப்பட்டது:
Luqaase 17: KilleC
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
