Chituwa 5
5
Kupempha kwaku Mosese ndi Aroni kupaska mrandu ŵaYisraele
1Pavuli Mosese ndi Aroni ŵanguruta kwaku Farao, ndi ŵanguti, “Atiti viyo Ambuya, Chiuta waku Yisraele, ‘Zomerezga ŵanthu ŵangu kuti ŵarute alinga ŵandichitiye dghera mu bozwa.’ ” 2Kweni Farao wanguti, “Njani yo Ambuya, wakuti ndiphwere mazu ghake, ndikuzomerezga kuti Yisraele warutenge? Nditiŵaziŵa cha wo Ambuya, ndipo so kuti ndizomerezgenge kuti Yisraele warutenge cha.” 3Sono iwo ŵanguti, “Chiuta wa ŵaHebere wakumana nafwe. Timupemphani tirekeni tirutenge lwendo la mazuŵa ghatatu kuja mu bozwa, ndi kwachisopa Ambuya Chiuta widu, kopa kuti wangaza paku ifwe ndi chideru pamwenga ndi lipanga.” 4Kweni karonga wa Egipiti wanguti kwaku wo, “Mosese ndi Aroni, chifukwa chine mutiŵatuzgako ŵanthu ku nchitu yawo? Kaninga ku nchitu yinu.” 5Ndipo Farao wanguti, “Awonani, ŵanthu ŵamu charu ichi sono mbanandi ndipo imwe mutiŵapumuzga ku nchitu zawo!” 6Mu zuŵa lenilo Farao wangulanguliya ŵakutufuliya ŵanthu ndi ŵakapitawi, 7“Kuti muŵapaskenge so cha uteka yaŵa ŵanthu wakuchitiya ncherwa uli ndimo mwachitiyanga kufika ku sono. Ŵarekeni ŵakajiwunjikiyenge uteka ŵeneko. 8Kweni unandi wa ncherwa zo ŵanguwumba kufika kuno kusono mukanyekezganga paku wo, mungesa kusiskako cha; pakuti mbakata; ndicho chifukwa ŵaliriya kuti, ‘Tizomerezgeni kwachipereka sembe kwaku Chiuta widu.’ 9Yinyekezgeke pa ŵanthu wo nchitu yizitu yakuruska yasono alinga ŵatakatake paku yo ndipo mungategherezganga ku mazu ghatesi.”
10Viyo nduna za nchitu, ndi ŵakapitawo ŵa ŵanthu ŵanguruta ndi ŵanguti ku ŵanthu wo, “Farao watiti, ‘Kuti tikupaskeninge uteka cha. 11Rutani mwaŵeni, kajitoliyeni uteka kweniko mungawusaniya, kweni nchitu yinu kuti yikayuyuskikanga cha nanga nkhamanavi.’” 12Viyo ŵanthu ŵanguparghang'ikana uku ndi uku mu charu cha Egipiti kwachiwunjika viputu mu malo gha uteka. 13Nduna zo zaŵachiskanga kuti, “Marizgani nchitu zinu, chipimu cha zuŵa ndi zuŵa, uli ndipo penga uteka.” 14Ndipo ŵakapitawi ŵa ŵaYisraele wo ŵangumikika ndi nduna zaku Farao ŵangupumika, ndipo ŵangufumbika, “Chifukwa chine mulivi kufiska nchitu yinu yose yakuwumba ncherwa msana wale, uli ndimo mwachitiyanga kale?”
15Sono ŵakapitawi ŵa ŵaYisraele ŵanguza kwachiliya kwaku Farao, “Chifukwa chine muchita viyo ndi ŵaŵanda ŵinu? 16Uteka kuti upaskika cha ku ŵaŵanda ŵinu, kweni ŵatiti kwaku ifwe ‘Wumbaninga ncherwa!’ Ndipo ehe, ŵaŵanda ŵinu ŵapumika; kweni kunanga kwe mu ŵanthu ŵinu.” 17Kweni iyo wanguti, “Mwe ŵakata, mwe ŵakata; ndicho chifukwa mutiti, ‘Tizomerezgeni tirute kupereka sembe ku Ambuya.’ 18Rutaninge sono, katateninga, pakuti mukapaskikanga uteka cha, kweni mukawumbanga ncherwa zakuyana unandi wake.” 19Ŵakapitawi ŵa ŵaYisraele ŵanguwona kuti ŵenga mu kukomwa ukongwa, po ŵangunena kuti, “Kuti mukasiskanga unandi wa ncherwa za mazuŵa ghose cha.” 20Ŵangukumana ndi Mosese ndi Aroni, ŵeniwo ŵaŵalindizganga ŵanguti ŵatuwa kwaku Farao; 21ndipo ŵanguti kwaku wo, “Ambuya alereskepo paku imwe ndi ŵeruzgi, chifukwa mwatiguŵiska mu maso ghaku Farao ndi ŵateŵeti ŵake; ndipo mwaŵika lipanga mu janja lawo kutibaya.”
22Sono Mosese wangung'anamukiya ku Ambuya, ndi wanguti, “Ambuya, chifukwa chine mwaŵachitiya chiheni yaŵa ŵanthu? Na mungunditumiyanji ine? 23Chifukwa kutuliya po ndinguziya kwaku Farao kwachikamba mu zina linu, waŵachitiya uheni ukuru yaŵa ŵanthu. Ndipo imwe mulivi kuŵawombo ŵanthu ŵinu nanga nkhamanavi.”
தற்சமயம் தேர்ந்தெடுக்கப்பட்டது:
Chituwa 5: TongaMw
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi