Chituwa 11
11
Chakuziziswa cha chumi: nyifwa ya ŵana ŵaumwali
1Ambuya anguti kwaku Mosese, “Kwaja childeru chimoza cho ndikatoliyanga paku Farao ndi pa Egipiti; pavuli paku cho wakakuzomerezganinga kutuwamo muno; wachikuzomerezgani kuruta wakakudikiyaninga limu. 2Sono kamba ku ŵanthu, kuti ŵapemphane munthurumi we yose ndi mzengezgani wake, munthukazi we yose ndi mzengezgani wake, vijewere vya siliva ndi vya golide”. 3Ndipo Ambuya anguchita wezi ku ŵanthu pa maso gha ŵaEgipiti. Ndipo so, Mosese wenga wakuzirwa ukongwa mu charu cha Egipiti, pa maso gha ŵaŵanda ŵaku Farao ndi pa maso gha ŵanthu.
4Ndipo Mosese wanguti, “Viyo atiti Ambuya, ‘Ndi usiku pakati ndikarutanga mukati mu Egipiti; 5ndipo ŵana ŵaumwali wose mu charu cha Egipiti ŵakafwanga, kwamba ku ŵaumwali ŵaku Farao mweniyo pa chitengo chake cha ufumo mpaka kwachifika ku ŵaumwali ŵa muŵanda munthukazi, mweniyo we kuvuli kwa mphe, ndi chaumwali chose cha ng'ombe. 6Ndipo kukaŵanga maliro ghakuru mu charu chose cha Egipiti ghenigho ghalivi kuŵapo kale, chingana nkhuti ghakaŵangapo so cha. 7Kweni pa munthu nanga njumoza wa ŵaYisraele manyi ndi munthu pamwenga ng'ombe, palivi garu yo wakalurumanga; mwakuti muziŵe kuti Ambuya achita mphambano pakati pa ŵaEgipiti ndi ŵaYisraele.’ 8Ndipo ŵaŵanda ŵinu wose yaŵa ŵakasikiyanga kwangu, ndi kuŵeramiya ine, ndi kuti, ‘Tuwanimo, ndi ŵanthu wose wo ŵatikurondo’. Ndipo pavuli pake ine ndikatuwanga.” Ndipo wangutuwako kwaku Farao ndi mtima wakufya.
9Sono Ambuya anguti kwaku Mosese, “Farao kuti wakakutegherezganga cha; mwakuti vyakuziziswa vyangu vyandaniskike mu charu cha Egipiti.”
10Mosese ndi Aroni ŵanguchita vyakuziziswa ivi vyose paurongo paku Farao, kweni Ambuya angunonopeska mtima waku Farao ndipo kuti wanguŵazomerezga cha ŵaYisraele kutuwamo mu charu.
தற்சமயம் தேர்ந்தெடுக்கப்பட்டது:
Chituwa 11: TongaMw
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi